ꓙꓲꓻ ꓫꓬꓻ ꓢꓴ ꓔꓲꓺ ꓒ ꓪ ꓔꓲ Leo the great ꓑꓮꓲ꓿

ꓙꓲꓻ ꓫꓬꓻ ꓢꓴ ꓔꓲꓺ ꓒ ꓪ ꓔꓲ Leo the great ꓑꓮꓲ꓿

ꓙꓲꓻ ꓫꓬꓻ ꓢꓴ Leo the great ꓠꓬ ꓮ ꓟꓬ, ꓛꓲ ꓟꓬꓱꓺ ꓓꓳꓽ ꓙꓳ ꓟ ꓔꓲꓺ ꓒ ꓪ ꓔꓲ ꓕꓲ ꓣꓳ ꓥ ꓡꓳ꓿ ꓬꓲ. ꓔꓯ AD 400 ꓘꓳꓼ ꓔꓯ ꓣꓳ‐ꓟ ꓡꓳ ꓒꓱ ꓗꓪ ꓦꓵꓻ ꓗꓷꓳ꓿ ꓬꓲ. ꓠꓬꓲ ꓟꓲ ꓠꓯ ꓢꓷ. ꓠꓲ, ꓕꓳꓽ ꓶ ꓐꓰ ꓪꓴ‐ꓢ ꓐꓯ ꓘꓶꓽ ꓗꓪ ꓮ ꓟꓬ, ꓢꓷ. ꓟ ꓪꓴ. ꓠꓬꓲ ꓔꓲꓺ ꓒ ꓪ ꓔꓲ ꓔꓯ  ꓬꓰ ꓙ ꓠ, ꓟ ꓙꓵꓽ ꓪ ꓖꓶ ꓗꓷꓳ꓿ AD 440 ꓘꓳꓼ ꓕꓯ ꓔꓲꓺ ꓒ ꓕꓲ ꓪ ꓒꓬꓱꓼ ꓡ ꓪ꓿ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓢꓴ ꓔꓲꓺ ꓒ ꓪ ꓔꓲ ꓟꓲ ꓠꓯ ꓗꓪ ꓐꓰ ꓧꓳꓽ ꓖꓳ ꓓꓱꓽ ꓡꓳˍ ꓬꓰ ꓗ, ꓠꓯ. ꓔꓲꓺ ꓒ ꓓꓽ ꓐꓴ ꓡꓰ ꓙꓲꓻ ꓫꓬꓻ ꓢꓴ Leo the great ꓔꓯ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓠ, ꓟ ꓙꓵꓽ ꓪ ꓖꓶˍ ꓗꓷꓳ꓿

ꓙꓬꓻ ꓫꓬꓻ ꓢꓴ ꓔꓲꓺ ꓒ ꓪ ꓔꓲ Leo the great ꓠꓬ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓟꓴ. ꓔꓬ ꓟ ꓙꓵ, ꓗꓪ ꓘꓴ ꓜꓲꓼ ꓞꓳ ꓠꓬ ꓪꓴꓽ ꓟꓴ ꓡ ꓓꓴ ꓮ ꓟꓬ, ꓙꓳ ꓡꓰꓳ꓿ ꓬꓲ. ꓡꓰ ꓬꓰ ꓗꓷ ꓟ ꓗꓪ ꓐꓰ ꓙꓵꓻ ꓠꓲ, ꓚꓱ, ꓗꓪ ꓐꓰ ꓮ ꓘꓶ. ꓛꓲ ꓧꓪ. ꓡꓰ ꓟ  ꓠꓬ AD 451 ꓘꓳꓼ ꓕꓯ Chalcedon ꓖꓪꓽ ꓙꓱ ꓜꓲꓼ ꓓꓴ ꓥ ꓡꓳ꓿ ꓕꓱ ꓖꓪꓽ ꓙꓱ ꓜꓲꓼ ꓓꓽ ꓗꓪ ꓠꓬ Eutyches ꓟꓬꓱꓺ ꓔ ꓢꓴ ꓡꓰ ꓢꓲꓺ ꓒ ꓬꓰ‐ꓢꓴ ꓠꓬ ꓟꓲ ꓠꓯ ꓗꓪ ꓬꓲꓼ ꓡ ꓟ ꓙꓵ, ꓕꓯ ꓪꓴ‐ꓢ ꓙꓵꓽ ꓪ ꓕꓲ ꓟ ꓙꓳ ꓡꓳ꓿ ꓟꓲ ꓠꓯ ꓞꓳ ꓤ ꓕꓲ ꓣꓳ ꓡꓰ ꓐꓰ ꓟꓽ ꓦꓵꓻ ꓡ ꓐꓰ ꓟꓽ ꓔꓱ ꓟꓽ ꓜꓳˍ ꓟ ꓙꓵꓻ ꓠꓲ, ꓚꓱ, ꓔꓯ ꓙꓬꓻ ꓫꓬꓻ ꓢꓴ ꓔꓲꓺ ꓒ ꓪ ꓔꓲ Leo the great ꓠꓬ ꓢꓲꓺ ꓒ ꓬꓰ‐ꓢꓴ ꓠꓬ ꓟꓲ ꓠꓯ ꓞꓳ ꓤ ꓐꓰ ꓪꓴ‐ꓢ ꓥ ꓟ ꓚꓱ, ꓔꓯ ꓟ. ꓖꓶ ꓗꓷꓳ꓿

AD 452 ꓘꓳꓼ ꓕꓯ ꓟꓯꓼ ꓜꓲꓼ ꓒꓽ ꓓꓽ Attila ꓟꓬꓱꓺ ꓔ ꓢꓴ ꓠꓬ ꓣꓳ‐ꓟ ꓡꓳ ꓒꓱ ꓔꓯ ꓐꓬ ꓡꓰ ꓠ, ꓟ ꓟꓯꓼ ꓢꓰꓼ ꓡ ꓡꓳ꓿ ꓖꓳ ꓕꓲ ꓙꓵ, ꓗꓪ ꓙꓬꓻ ꓫꓬꓻ ꓢꓴ ꓔꓲꓺ ꓒ ꓪ ꓔꓲ Leo the great ꓠꓬ ꓡꓯ ꓐꓳ. ꓔꓶ. ꓓꓴ ꓓꓯˍ ꓢꓲ ꓠꓬꓲ ꓟꓯꓼ ꓜꓲꓼ ꓒꓽ Attila ꓔꓯ ꓬꓲ. ꓔꓬ ꓟꓵꓽ ꓗꓪ ꓡ ꓙꓰ ꓠ, ꓟ ꓐꓯ ꓗꓷꓳ꓿ ꓟꓯꓼ ꓜꓲꓼ ꓒꓽ Attila ꓥ ꓟꓲ ꓬꓲ. ꓔꓬ ꓟꓵꓽ ꓗꓪ ꓡ ꓙꓰ ꓢꓲ ꓠꓬꓲ ꓣꓳ‐ꓟ ꓑ ꓫꓬ ꓐꓴ ꓮ ꓙꓵꓽ ꓗ, ꓛꓲ ꓛꓲ ꓔꓬ ꓪ ꓡꓰꓳ꓿ꓙꓬꓻ ꓫꓬꓻ ꓢꓴ ꓔꓲꓺ ꓒ ꓪ ꓔꓲ Leo the great ꓠꓬ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓪꓴ‐ꓢ ꓐꓯ ꓘꓶꓽ ꓮ ꓟꓬ, ꓢꓷ. ꓢꓴ ꓔꓯ ꓡꓰ ꓔꓲꓺ ꓒ ꓙꓵꓽ ꓪ ꓖꓶˍ ꓟ ꓥ ꓡꓳ꓿ ꓙꓬꓻ ꓫꓬꓻ ꓢꓴ ꓔꓲꓺ ꓒ ꓪ ꓔꓲ Leo the great ꓠꓬ AD 461 ꓘꓳꓼ ꓕꓯ ꓢꓲꓺ ꓒ ꓠꓯ. ꓗꓪ ꓬꓲꓼ ꓟꓶꓽ ꓡꓰꓳ꓿ ꓬꓲ. ꓔꓯ Vatican ꓗꓴꓷꓼ ꓝꓲ ꓓꓴ ꓒꓲ‐ꓕꓱ ꓪꓽ ꓘꓴ ꓦꓲꓻ ꓗꓪ ꓓꓵ ꓔ ꓡꓳ꓿