ꓙꓲꓻ ꓫꓬꓻ ꓢꓴ Engelbert ꓑꓮꓲ꓿(St. Engelbert of Cologne)

ꓙꓲꓻ ꓫꓬꓻ ꓢꓴ Engelbert ꓑꓮꓲ꓿

ꓙꓲꓻ ꓫꓬꓻ ꓢꓴ Engelbert ꓔꓯ AD 1185 ꓘꓳꓼ ꓕꓯ England ꓗꓴꓷꓼ ꓗꓪ ꓮ ꓟꓬ, ꓛꓲ ꓒꓴ ꓫꓵꓽ ꓙꓳ ꓟ ꓕꓲ ꓦꓲꓻ ꓘꓴꓽ ꓗꓪ ꓬꓲ. ꓔꓯ ꓦꓵꓻ ꓗꓷꓳ꓿ ꓙꓲꓻ ꓫꓬꓻ ꓢꓴ Engelbert  ꓬꓲ. ꓐ, ꓐ ꓐꓰ ꓟ, ꓟ ꓠꓬ ꓮ ꓟꓬ, ꓒꓴ ꓫꓵꓽ ꓐꓰ ꓟꓬꓱꓺ ꓓꓳꓽ ꓙꓳ ꓢꓴ ꓥ ꓟ ꓪꓴ. ꓠꓬꓲ ꓬꓲ. ꓠꓬ ꓟꓬꓱꓺ ꓓꓳꓽ ꓐꓰ ꓒꓴ ꓫꓵꓽ ꓙꓳ ꓢꓴ ꓕꓲ ꓣꓳ ꓒꓬꓱꓼ ꓡꓺꓳ꓿ ꓖꓳ ꓡꓱ ꓥ ꓟꓲ ꓬꓲ. ꓠꓬ ꓪꓴ‐ꓢ ꓟꓬꓱꓽ ꓟꓯ ꓠ, ꓟ ꓐꓰ ꓬꓲ. ꓔꓬ ꓟ ꓗꓴꓷꓼ ꓗꓪ ꓑ ꓫꓬ ꓐꓴ ꓔꓯ ꓬꓰ ꓙ ꓠ, ꓟ ꓓꓴ ꓙ ꓗꓷ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓗꓪ ꓢꓯꓼ ꓕꓵꓼ ꓗꓷꓳ꓿ꓬꓲ. ꓠꓬꓲ ꓔꓲꓺ ꓒ ꓢꓳꓻ ꓦꓲꓻ ꓗꓪ ꓙꓰ ꓗꓷ ꓢꓲ ꓠꓬꓲ ꓪꓴ‐ꓢ ꓐꓯ ꓘꓶꓽ ꓢꓳꓻ ꓣꓴ ꓟꓶ ꓗ, ꓠꓯ AD 1215 ꓘꓳꓼ ꓕꓯ Cologne ꓡꓳ ꓒꓱ ꓗꓪ ꓐꓰ ꓔꓲꓺ ꓒ ꓓꓽ ꓕꓲ ꓪ ꓒꓬꓱꓼ ꓡ ꓪ ꓿

ꓙꓲꓻ ꓫꓬꓻ ꓢꓴ Engelbert ꓠꓬ ꓪꓴ‐ꓢ ꓟꓬꓱꓽ ꓗꓪ ꓢꓯꓼ ꓕꓵꓼ ꓢꓲ ꓠꓬꓲ ꓔꓲꓺ ꓒ ꓐꓴ ꓔꓯ ꓪꓴ‐ꓢ ꓟꓬꓱꓽ ꓟꓯꓻ ꓟ ꓗꓪ ꓮ ꓘꓶ. ꓛꓲ ꓢꓯꓼ ꓪ ꓖꓶˍ ꓗꓷꓳ꓿ꓙꓲꓻ ꓫꓬꓻ ꓢꓴ Engelbert ꓠꓬ ꓪꓴ‐ꓢ ꓐꓯ ꓘꓶꓽ ꓐꓰ ꓟꓲ ꓠꓯ ꓢꓷ. ꓠꓲ, ꓕꓳꓽ ꓶ ꓮ ꓟꓬ, ꓢꓷ. ꓢꓴ ꓥ ꓟ ꓪꓴ. ꓠꓬꓲ ꓙꓲ‐ꓢꓴ ꓢꓲꓺ ꓤ ꓮ ꓟꓬ, ꓔꓯ ꓪꓴ‐ꓢ ꓐꓯ ꓘꓶꓽ ꓐꓰ ꓪ ꓔꓲ ꓤ ꓠꓱ ꓐꓴ ꓔꓯ ꓕꓳꓽ ꓶ ꓟ. ꓖꓶ ꓗꓷꓳ꓿ ꓙꓲꓻ ꓫꓬꓻ ꓢꓴ Engelbert ꓡꓰ ꓟ. ꓖꓶ ꓟ ꓢꓷ. ꓠꓲ ꓚꓱ, ꓠꓬ “Justice’ ꓐꓯ ꓟ ꓕꓲ ꓡꓰ꓾ ꓟꓶ ꓙꓵꓽ ꓙꓳˍ ꓟ ꓚꓱ, ꓟꓲ ꓠꓯ ꓡ ꓞꓳ ꓐꓴ ꓪ꓾ ꓟꓶ ꓙꓵꓽ ꓪ ꓚꓱ, ꓔꓯ ꓮ ꓟꓬ, ꓟ. ꓖꓶ ꓗꓷꓳ꓿ ꓙꓲꓻ ꓫꓬꓻ ꓢꓴ Engelbert ꓬꓲ. ꓮ‐ꓬꓲ Frederick ꓠꓬ ꓪꓴ‐ꓢ ꓟꓬꓱꓽ ꓟꓯ ꓔꓬ ꓟ ꓔꓲꓺ ꓒ ꓐꓴ ꓣꓱ ꓫꓵꓽ ꓣꓱ ꓙꓵꓽ ꓔꓯ ꓡꓳ. ꓢꓴ ꓥ ꓡꓳ꓿ Frederick ꓠꓬ ꓔꓲꓺ ꓟ ꓐꓴ ꓣꓱ ꓫꓵꓽ ꓣꓱ ꓙꓵꓽ ꓔꓯ ꓘꓴꓽ ꓟ ꓪꓴ. ꓠꓬꓲ ꓙꓲꓻ ꓫꓬꓻ ꓢꓴ Engelbert ꓠꓬ ꓬꓲ. ꓔꓯ ꓠꓽ ꓡꓰ ꓝꓲꓳ꓿  ꓖꓳ ꓡꓱ ꓥ ꓟ ꓪꓴ. ꓠꓬꓲ Frederick ꓠꓬ ꓙꓲꓻ ꓫꓬꓻ ꓢꓴ Engelbert ꓔꓯ ꓢꓰꓼ ꓠ, ꓟ ꓬꓰ ꓗꓷꓳ꓿AD 1225 ꓘꓳꓼ 11 ꓦ ꓟ 7 ꓠꓬꓲ ꓕꓯ ꓙꓲꓻ ꓫꓬꓻ ꓢꓴ Engelbert ꓔꓯ Frederick ꓡꓰ ꓢꓰꓼ ꓗꓷꓳ꓿ ꓙꓲꓻ ꓫꓬꓻ ꓢꓴ Engelbert ꓠꓬ ꓙꓵꓻ ꓠꓲ, ꓚꓱ, ꓑꓶ. ꓓꓴ ꓢꓰꓼ ꓗꓷ ꓢꓴ ꓥ ꓡꓳ꓿