ꓙꓲꓻ ꓫꓬ ꓢꓴ Ambrose ꓚꓺ ꓟꓲꓽ (St.Ambrose)

#St.Ambrose #creditphoto #Church history

Monday, December 04, 2023

ꓙꓲꓻ ꓫꓬ ꓢꓴ Ambrose ꓚꓺ ꓟꓲꓽ (St.Ambrose)

ꓙꓲꓻ ꓫꓬ ꓢꓴ Ambroseꓠꓬ ꓲꓔꓮꓡꓬ ꓗꓴꓷꓼ ꓟꓲꓡꓮꓠ ꓡꓳ ꓒꓱ ꓗꓪ ꓐꓰ ꓔꓲꓺ ꓒ ꓓꓽ ꓕꓲ ꓣꓳ ꓥ ꓡꓳ꓿ ꓬꓲꓻ ꓠꓬ ꓙꓵꓻ ꓠꓲ, ꓚꓱ, ꓑꓶ ꓓꓴ ꓟꓽ ꓙꓲ ꓢꓴ ꓐꓴ ꓡꓰ ꓢꓰꓼ ꓡꓰ ꓢꓴ ꓔꓲꓺ ꓒ ꓓꓽ ꓕꓲ ꓣꓳ ꓥ ꓡꓳ꓿ ꓔꓲꓺ ꓒ ꓓꓽ ꓠꓬ ꓙ ꓣꓳ ꓟ ꓠꓲ, ꓟ ꓙꓳ ꓢꓴ ꓥ ꓢꓲ ꓠꓬꓲ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓮ ꓘꓶ. ꓛꓲ ꓠꓲ, ꓠꓵ ꓢꓴ ꓕꓲ ꓣꓳ ꓥ ꓡꓳ꓿ ꓬꓲ ꓐ, ꓐ ꓠꓬ ꓒꓴ ꓫꓵꓽ ꓮ ꓟꓬ, ꓙꓳ ꓢꓴ ꓕꓲ ꓣꓳ ꓥ ꓢꓲ ꓠꓬꓲ ꓬꓲ ꓠꓬ ꓬꓲ ꓦꓲꓻ ꓗꓪ ꓐꓰ ꓞꓲꓼ ꓣꓳ ꓓꓲ ꓢꓴ ꓤ ꓓꓲ ꓥ ꓡꓳ꓿ ꓬꓲ ꓔꓯ (340) ꓘꓳꓼ ꓕꓯ ꓔꓣꓰꓦꓰꓢ ꓡꓳ ꓒꓱ ꓗꓪ ꓦꓵꓻ ꓗꓷꓳ꓿ ꓬꓲ ꓞꓲꓼ ꓣꓳ ꓟ ꓙꓵ, ꓕꓯ ꓫꓵꓽ ꓫꓬ, ꓟꓲ ꓠꓯ ꓢꓷ. ꓠꓲ, ꓕꓳ ꓶ ꓔꓯ ꓢꓳ ꓣꓴ ꓗꓷ ꓢꓴ ꓥ ꓡꓳ꓿

ꓝꓮꓲ ꓬꓲ ꓟꓲ ꓠꓯ ꓢꓷ. ꓠꓲ, ꓕꓳ ꓶ ꓢꓳꓻ ꓓꓳꓻ ꓡꓰ ꓗ. ꓠꓯ ꓟꓲꓡꓮꓠ ꓡꓳ ꓒꓱ ꓗꓪ ꓡꓽ ꓡ ꓪ꓿ ꓬꓲ ꓢꓳꓻ ꓣꓴ ꓗꓷ ꓟ ꓢꓷ. ꓠꓲ, ꓐꓰ ꓟꓲꓡꓮꓠ ꓗꓪ ꓟꓬꓱꓽ ꓬꓰ ꓗꓷꓳ꓿ ꓬꓲ ꓔꓯ ꓲꓔꓮꓡꓬ ꓗꓴꓷꓼ ꓐꓶ ꓓꓳ ꓕꓲ ꓒꓳ, ꓗꓪ ꓙꓵꓽ ꓠ, ꓟ ꓙꓵꓽ ꓪ ꓘꓳ, ꓣꓴ ꓪ ꓡꓰꓳ꓿ ꓖꓳ ꓡꓱ ꓥ ꓟꓲ ꓬꓲ ꓟꓬꓱꓽ ꓬꓰ ꓗꓷ ꓟ ꓠꓬ ꓟꓲꓡꓮꓠ ꓡꓳ ꓒꓱ ꓗꓪ ꓐꓰ ꓥ ꓡꓳ꓿

ꓲꓔꓮꓡꓬ ꓗꓴꓷꓼ ꓗꓪ ꓟꓲꓡꓮꓠ ꓡꓳ ꓒꓱ ꓗꓪ ꓐꓰ ꓔꓲꓺ ꓒ ꓓꓽ ꓠꓬ ꓮꓣꓲꓮꓠ ꓜꓴꓻ ꓔꓯ ꓗꓪ ꓐ ꓢꓴ ꓥ ꓡꓳ꓿ ꓬꓲ ꓟꓲ ꓠꓯ ꓗꓪ ꓐꓰ ꓧꓪꓽ ꓖꓳ ꓓꓱ ꓡꓳ ꓬꓰ ꓗ. ꓠꓯ ꓗ‐ꓔꓳ‐ꓡꓲꓗ ꓙꓲ‐ꓢꓴ ꓢꓲꓺ ꓤ ꓐꓴ ꓐꓰ ꓫꓵꓽ ꓪꓴꓽ ꓮ ꓟꓬ, ꓛꓲ ꓙꓳ ꓗꓷ ꓟ ꓥ ꓡꓳ꓿ ꓮ ꓟꓶ ꓑꓶ. ꓓꓴ ꓥ ꓐꓯ ꓠꓬ ꓔꓲꓺ ꓒ ꓓꓼ ꓙꓵꓽ ꓪ ꓘꓳ, ꓣꓴ ꓢꓴ ꓑꓶ. ꓓꓴ ꓥ ꓡꓳ꓿

ꓙꓲꓻ ꓫꓬ ꓢꓴ ꓮꓟꓐꓣꓳꓢꓰ ꓢꓴ ꓢꓲ ꓡꓲ ꓟ ꓔꓯ ꓠꓲ, ꓠꓵ ꓢꓴ ꓕꓲ ꓣꓳ ꓥ ꓟ ꓪꓴ ꓠꓬꓲ ꓫꓵꓽ ꓪꓴꓽ ꓒꓬꓱꓼ ꓔꓬ ꓙꓲ‐ꓢꓴ ꓢꓲꓺ ꓤ ꓐꓴ ꓐꓰ ꓫ. ꓕꓱ ꓗꓷ ꓟ ꓥ ꓡꓳ꓿ ꓔꓲꓺ ꓒ ꓓꓼ ꓐꓰ ꓙꓲ‐ꓢꓴ ꓢꓲꓺ ꓤ ꓐꓴ ꓫ. ꓕꓱ ꓓꓳꓻ ꓡꓰ ꓗ. ꓠꓯ ꓑ ꓫꓬ ꓮ ꓙꓵꓽ ꓠꓬ ꓥꓪ ꓠꓴ ꓔꓲꓺ ꓒ ꓓꓽ ꓠꓬ ꓐꓰ ꓘꓴ ꓢꓲ ꓠꓬꓲ ꓟꓬꓱꓺ ꓓꓳꓽ ꓖꓶ ꓗꓷ ꓟ ꓥ ꓡꓳ꓿

ꓖꓳ ꓕꓲ ꓙꓵ, ꓗꓪ ꓙꓲꓻ ꓫꓬ ꓢꓴ ꓮꓟꓐꓣꓳꓢꓰ ꓠꓬ ꓝꓴꓲ ꓔꓲ ꓠ, ꓟ ꓬꓰ ꓔꓬ ꓟ ꓙꓵ, ꓟꓲ ꓥ ꓡꓳ꓿ ꓬꓲ ꓔꓯ ꓙꓵꓽ ꓪ ꓮ ꓟꓬ, ꓖꓶ ꓥ ꓟꓲ ꓬꓲ ꓠꓬ ꓟꓽ ꓠꓲ, ꓫꓵꓽ ꓢꓴ ꓥ ꓟ ꓪꓴ. ꓠꓬꓲ ꓟꓽ ꓘꓳ, ꓣꓴ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ ꓠꓬꓲ ꓙꓲꓻ ꓫꓬ ꓢꓴ ꓮꓟꓐꓣꓳꓢꓰ ꓠꓬ ꓝꓴꓲ ꓔꓲ ꓟꓶ ꓡꓰ ꓗ. ꓠꓯ (8) ꓠꓬꓲ ꓟꓶ ꓫꓵˍ ꓕꓯ ꓔꓲꓺ ꓒ ꓙꓵꓽ ꓪ ꓔꓯ ꓘꓳ, ꓣꓴ ꓗꓷꓳ꓿ ꓖꓳ ꓗ. ꓠꓯ ꓔꓲꓺ ꓒ ꓓꓽ ꓙꓵꓽ ꓪ ꓔꓯ ꓘꓳ ꓣꓴ ꓗꓷ ꓟ ꓥ ꓡꓳ꓿ ꓖꓳ ꓕꓲ ꓙꓵ, ꓗꓪ ꓬꓲ ꓠꓬ ꓢꓲꓽ ꓫꓬ ꓕꓳ ꓶ ꓔꓯ ꓮ ꓘꓶ. ꓛꓲ ꓣꓳ ꓣꓴ ꓗꓷꓳ꓿ ꓙꓲ‐ꓢꓴ ꓢꓲꓺ ꓤ ꓐꓴ ꓐꓱ ꓶ ꓥ ꓟꓲ ꓮ ꓡꓰ ꓐꓰ ꓞꓳ ꓙꓳ ꓢꓯ. ꓔꓬ ꓠ, ꓟ ꓕꓳ ꓶ ꓮ ꓟꓬ, ꓐꓳ ꓗꓷꓳ꓿

ꓬꓲ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓳ ꓙꓳ ꓚꓱ, ꓗꓪ ꓐꓰ ꓙꓲ ꓟ ꓕꓲ ꓒꓳ, ꓗꓪ ꓒꓳ, ꓡꓶꓽ ꓡ ꓢꓲ ꓠꓬꓲ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓟꓬ, ꓥ ꓟꓲ ꓙꓵꓻ ꓠꓲ, ꓙꓳ ꓢꓴ ꓐꓴ ꓒꓬꓱꓼ ꓡ ꓟ ꓥ ꓡꓳ꓿ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓚꓱ, ꓗꓪ ꓮ ꓘꓶ. ꓛꓲ ꓠꓲ, ꓟ ꓐ ꓢꓲ ꓠꓬ ꓠ ꓡꓳ ꓡ ꓟ ꓟꓲ ꓥ ꓡꓳ꓿ ꓬꓲ ꓔꓯ ꓠꓬꓲ. ꓠꓬꓲ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓗꓪ ꓐꓰ ꓢꓯ. ꓔꓬ ꓟ ꓪꓴ‐ꓢ ꓟꓬꓱꓽ ꓟꓯ ꓢꓴ ꓐꓰ ꓟꓬꓱꓺ ꓓꓳꓽ ꓖꓶ ꓔꓬ ꓟ ꓥ ꓡꓳ꓿

ꓬꓲ ꓠꓬ ꓮ ꓘꓶ. ꓛꓲ ꓫꓱ. ꓤ ꓗꓴ ꓢꓴ ꓥ ꓡꓳ꓿ ꓔꓲꓺ ꓒ ꓓꓽ ꓠꓬ ꓬꓲ ꓐ, ꓐ ꓗꓪ ꓐꓰ ꓖꓶ ꓡ ꓟ ꓒꓴ ꓫꓵꓽ ꓮ ꓟꓬ, ꓔꓯ ꓫ. ꓢꓴ ꓟꓶ ꓢꓴ ꓐꓴ ꓐꓱ ꓶ ꓣꓱ ꓗꓷ ꓟ ꓥ ꓡꓳ꓿ ꓘꓴ ꓜꓲꓼ ꓞꓳ ꓠꓯ, ꓗꓪ ꓣꓱ ꓞ ꓔꓬ ꓟ ꓔꓲ. ꓗꓪ ꓬꓲ ꓒꓴ ꓫꓵꓽ ꓔꓯ ꓣꓱ ꓗꓷ ꓟ ꓥ ꓡꓳ꓿ ꓬꓲ ꓠꓬ ꓫ. ꓢꓴ ꓟꓶ ꓢꓴ ꓐꓴ ꓔꓯ ꓮ ꓘꓶ. ꓛꓲ ꓠꓲ, ꓠꓵ ꓟ ꓐꓰ ꓜ ꓓꓴ ꓓꓳꓻ ꓓꓴ ꓖꓶ ꓢꓲ ꓟꓲ ꓥ ꓡꓳ꓿

ꓬꓲ ꓡꓰ ꓔꓲꓺ ꓒ ꓐꓴ ꓔꓯ ꓟꓲ ꓠꓯ ꓗꓪ ꓖꓴ ꓙꓴꓽ ꓔꓯ ꓟꓽ ꓠꓲ, ꓥꓳ ꓠ, ꓟ ꓟ. ꓖꓶ ꓟ ꓥ ꓡꓳ꓿ ꓝꓮꓲ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓬꓰ ꓙ ꓔꓳ, ꓙ ꓠ, ꓟ ꓟ. ꓖꓶ ꓟ ꓥ ꓡꓳ꓿ ꓬꓲ ꓡꓰ ꓣꓳ ꓠꓬ ꓫ. ꓔꓬ ꓥ ꓟꓲ ꓢ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓠꓯ ꓗꓪ ꓕꓲ ꓠꓲ, ꓕꓲ ꓪ ꓥ ꓡꓳ ꓐꓰ ꓐꓯ ꓖꓶ ꓟ ꓥ ꓡꓳ꓿

ꓔꓲꓺ ꓒ ꓓꓽ ꓙꓲꓻ ꓫꓬ ꓢꓴ ꓮꓟꓐꓣꓳꓢꓰ ꓠꓬ ꓲꓔꓮꓡꓬ ꓗꓴꓷꓼ ꓟꓲꓡꓮꓠ ꓗꓪ ꓙꓳ ꓟ ꓘꓴ ꓜꓲꓼ ꓞꓳ ꓔꓯ ꓮ ꓘꓶ. ꓛꓲ ꓙꓲ ꓟ ꓙꓲ ꓗ ꓔꓯ ꓛ ꓗꓷ ꓟ ꓥ ꓡꓳ꓿ ꓬꓲ ꓗ. ꓠꓯ ꓮꓣꓲꓮꓠ ꓜꓴꓻꓔꓯ ꓘꓳ, ꓣꓴ ꓢꓴ ( ꓢꓲꓺ ꓒ ꓬꓰ‐ꓢꓴ ꓠꓬ ꓪꓴ‐ꓢ ꓟꓽ ꓥ ꓙꓵ) ꓢꓴ ꓐꓴ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓠ, ꓟ ꓫ. ꓡꓰ ꓝꓲ ꓠ, ꓟ ꓙꓵꓽ ꓗ ꓛ ꓖꓶ ꓗꓷ ꓟ ꓥ ꓡꓳ꓿ ꓪ ꓔꓲ Theodosius ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓰꓼ ꓠ, ꓟ ꓐꓯ ꓑꓶ ꓗꓷ ꓟ ꓡꓳ꓿

ꓖꓳ ꓕꓲ ꓙꓵ, ꓗꓪ ꓙꓲ‐ꓢꓴ ꓢꓴ ꓮꓟꓐꓣꓳꓢꓰ ꓠꓬ ꓪ ꓔꓲ ꓕꓱ ꓡꓱ ꓬꓰ ꓟ ꓝꓴꓲ ꓓꓽ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ ꓠꓬꓲ ꓪ ꓔꓲ ꓔꓯ ꓢꓲꓽ ꓫꓬ ꓟ ꓪꓽ ꓘꓴ ꓗꓪ ꓬꓲ ꓛꓳꓽ ꓒꓯꓽ ꓔꓯ ꓓꓴꓽ ꓟꓽ ꓓꓽ ꓐꓰ ꓙꓲꓻ ꓫꓬ ꓢꓴ ꓐꓯ ꓗꓷꓳ ꓟ ꓥ ꓡꓳ꓿ ꓙꓲꓻ ꓫꓬ ꓢꓴ Ambrose ꓡꓰ ꓐꓳ ꓔ ꓟ ꓪꓴ‐ꓢ ꓟꓴ ꓖꓪꓽ ꓐꓰ ꓕꓳ ꓶ ꓮ ꓟꓬ, ꓛꓲ ꓙꓳ ꓟ ꓥ ꓡꓳ꓿ ꓘꓴ ꓜꓲꓼ ꓞꓳ ꓠꓯ ꓗꓪ ꓥ ꓟꓲ ꓮ ꓡꓰ ꓐꓰ ꓙꓲꓲ‐ꓢꓴ ꓢꓲꓺ ꓤ ꓐꓴ ꓢꓯ. ꓔꓬ ꓠ, ꓟ ꓚꓱ, ꓕꓳ ꓶ ꓮ ꓟꓬ, ꓛꓲ ꓐꓳ ꓢꓴ ꓥ ꓡꓳ꓿ `