ꓙꓲꓻ ꓫꓬ ꓢꓴ Antony ꓑꓮꓲꓽ (St.Antony)

ꓙꓲꓻ ꓫꓬ ꓢꓴ Antony ꓑꓮꓲꓽ (St.Antony)

ꓙꓲꓻ ꓫꓬ ꓢꓴ Antony ꓔꓯ ꓮꓓ (251) ꓘꓳꓼ ꓗꓪ Egypt ꓗꓴꓷꓼ ꓬꓲ ꓔꓯ ꓦꓵꓻ ꓗꓷꓳ꓿ ꓬꓲ ꓠꓬ ꓡ ꓞꓳ ꓮ ꓟꓬ, ꓟꓽ ꓔꓬ ꓟ ꓟ ꓟꓵꓽ ꓗꓪ ꓙꓰ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓟꓯ ꓟ ꓔꓲꓺ ꓒ ꓜꓴꓻ ꓔꓯ ꓒꓴ ꓗꓷꓳ꓿ ꓬꓲ ꓠꓬ ꓒꓴ ꓫꓵ. ꓮ ꓟꓬ, ꓙꓳ ꓢꓴ ꓥ ꓡꓳ꓿ ꓬꓲ ꓐ, ꓐ ꓐꓰ ꓟ, ꓟ   ꓟꓲ ꓠꓯ ꓗꓪ ꓐꓰ ꓧꓪꓽ ꓖꓳ ꓓꓱ ꓡꓺꓳ ꓬꓰ ꓗ. ꓠꓯ ꓬꓲ ꓠꓬꓲ‐ꓟ ꓐꓰ ꓕꓲ ꓪ ꓟꓲ ꓠꓯ ꓢꓷ. ꓠꓲ, ꓢꓳ ꓣꓴ ꓗꓷꓳ꓿ ꓬꓲ ꓠꓬ ꓬꓲ ꓠꓬꓲ‐ꓟ ꓔꓯ ꓮ ꓘꓶ. ꓠꓲ, ꓠꓵ ꓢꓲ ꓬꓲ ꓔꓯ ꓮ ꓘꓶ. ꓬꓰ ꓙ ꓔꓳ, ꓙ ꓗꓷꓳ꓿

ꓙꓲꓻ ꓫꓬ ꓢꓴ Antony ꓠꓬ ꓕꓲ ꓠꓬꓲ ꓙꓳˍ ꓕꓯ ꓟꓲ‐ꓢ ꓪꓽ ꓘꓴ ꓙꓵ, ꓗꓪ ꓪꓽ ꓘꓴ ꓔꓬ ꓟ ꓙꓵ, ꓕꓯ ꓢꓲꓽ ꓫꓬ ꓕꓳ ꓶ (ꓟꓔ  19ꓽ21 ) ꓠꓴ ꓜꓳꓽ ꓓꓰ ꓡꓰ ꓠꓲ, ꓫꓵˍ ꓠꓬ ꓠꓴ ꓙꓳˍ ꓟ ꓮ ꓙꓵꓽ ꓪꓴꓽ ꓗꓷ  ꓢꓲ ꓞꓳ ꓫ. ꓔꓯ ꓖꓶ꓿ ꓖꓳ ꓡꓱ ꓠꓬ ꓟꓴ ꓗꓪ ꓕꓯꓽ ꓢꓲ ꓗꓪ ꓠꓴ ꓠꓽ ꓒꓵꓽ ꓶ ꓙꓳˍ ꓥꓳ꓿

ꓖꓳ ꓡꓱ ꓢꓲ ꓥꓪ ꓔꓯ ꓛꓳ ꓡꓯ꓾ ꓐꓯ ꓟ ꓢꓲꓽ ꓫꓬ ꓕꓳ ꓶ ꓝꓲ. ꓔꓯ ꓠ ꓠ, ꓪ ꓡꓰ ꓗ. ꓠꓯ ꓪꓴ‐ꓢ ꓟꓬꓱꓽ ꓬꓰ ꓠ, ꓓꓵꓽ ꓙ ꓗꓷꓳ꓿ ꓠꓴ ꓮ ꓫꓵꓽ ꓜ ꓠ, ꓟ ꓐꓰ ꓮ ꓫꓵꓽ ꓓꓳꓻ ꓠ, ꓟ ꓓꓽ ꓙ ꓫ. ꓐꓯ ꓔ ꓟ ꓢꓲꓽ ꓫꓬ ꓔꓯ ꓡꓳ. ꓟꓳ ꓗꓷ ꓗ. ꓠꓯ ꓬꓲ ꓠꓬꓲ ꓟ ꓔꓯ ꓔꓲꓺ ꓟ ꓐꓴ ꓔꓬ ꓟ ꓪꓽ ꓘꓴ ꓦꓲꓻ ꓗꓪ ꓔꓬ ꓝꓲ ꓢꓲ ꓠꓬꓲ ꓬꓲ ꓠꓬ ꓪꓴ‐ꓢ ꓟꓬꓱꓽ ꓬꓰ ꓠ, ꓟ ꓔꓲꓺ ꓒ ꓢꓳꓻ ꓦꓲꓻ ꓗꓪ ꓙꓰ  ꓡꓰꓳ꓿

ꓡ ꓞꓳ ꓮ ꓟꓬ, ꓟꓽ ꓔꓬ ꓟ ꓔꓲ. ꓗꓪ ꓙꓲꓻ ꓫꓬ ꓢꓴ Antony ꓠꓬ ꓪꓴ‐ꓢ ꓐꓯ ꓘꓶꓽ ꓢꓳ ꓣꓴ ꓔꓬ ꓟ ꓙꓵ, ꓕꓯ ꓢ‐ꓓꓯ ꓠꓬ ꓮ ꓘꓶ. ꓐꓲ ꓟ ꓤ ꓟꓶ ꓡꓯ ꓡꓰ ꓐꓰ ꓡ ꓢꓲ ꓠꓬꓲ ꓬꓲ ꓔꓯ ꓤꓼ ꓠꓬꓲ ꓡ ꓟ ꓥ ꓡꓳ꓿ ꓝꓮꓲ ꓢ‐ꓓꓯ ꓠꓬ ꓮ ꓘꓶ. ꓚꓴ ꓟ ꓢꓯꓼ ꓗꓪ ꓐꓰ ꓥ ꓟꓲ ꓤꓼ ꓠꓬꓲ ꓫꓵꓽ ꓠꓬꓲ ꓡ ꓟ ꓥ ꓡꓳ꓿

ꓕꓱ ꓟ ꓠꓬ ꓒꓴ ꓫꓵ ꓠꓬ ꓟꓲ ꓠꓯ ꓗ, ꓛꓲ ꓓꓴ ꓮ ꓟꓬ, ꓙꓳ ꓟ ꓔꓯ ꓟ. ꓖꓶ ꓡ ꓥ ꓟꓲ ꓙꓲꓻ ꓫꓬ ꓢꓴ Antony ꓠꓬ ꓤꓼ ꓠꓬꓲ ꓟ ꓗꓪ ꓐꓰ ꓧꓪ. ꓡꓰ ꓟ ꓥ ꓡꓳ꓿

ꓬꓲ ꓗ. ꓠꓯ ꓛꓳ ꓢꓴ ꓐꓴ ꓔꓯ ꓢꓲꓺ ꓒ ꓐꓯ ꓘꓶꓽ ꓔꓯ ꓙꓵꓻ ꓢꓲ ꓠꓬ ꓞꓳ ꓙꓳ ꓚꓱ, ꓗꓪ ꓙꓲ ꓟ ꓕꓲ  ꓒꓳ, ꓗꓪ ꓞꓳ ꓫꓱ, ꓠ, ꓟ ꓮ ꓕꓯ ꓥ ꓟꓲ ꓟ. ꓖꓶ ꓢꓴ ꓥ ꓡꓳ꓿  ꓠꓬꓲ. ꓠꓬꓲ ꓣꓳ ꓬꓰ ꓔꓬ ꓟ ꓟꓬꓱꓽ ꓠꓬ ꓬꓲ ꓤꓶꓻ ꓗꓪ ꓬꓲ ꓟꓶ ꓟ ꓙꓵ, ꓐꓰ ꓓꓵꓽ ꓙ ꓢꓲ ꓠꓬꓲ ꓟꓬꓱꓽ ꓬꓰ ꓠ, ꓟ ꓟ. ꓖꓶ ꓟ ꓥ ꓡꓳ꓿ ꓙꓲꓻ ꓫꓬ ꓢꓴ Antony ꓠꓬ ꓬꓲ ꓙꓵ, ꓮ ꓟꓬ, ꓗꓪ ꓪꓽ ꓘꓴ ꓟ ꓗꓪ ꓬꓲ ꓙꓵ, ꓖꓴ ꓢꓴ ꓥ ꓡꓳ꓿

ꓤ ꓝꓱ ꓝꓱ ꓟ ꓐꓰ ꓮ ꓘꓶ. ꓛꓲ ꓙꓻ ꓣꓳ ꓟ ꓠꓲ, ꓟ ꓙꓳ ꓢꓴ ꓥ ꓡꓳ꓿ ꓮꓓ 356 ꓘꓳꓼ ꓬꓲ ꓞꓲꓼꓲ (105) ꓘꓳꓼ ꓕꓯ ꓢꓲꓺ ꓒ ꓠꓯ, ꓗꓪ ꓬꓯꓼ ꓟꓶ ꓡꓰꓳ꓿