ꓙꓲꓻ ꓫꓬ ꓢꓴ Deogratius ꓑꓮꓲ꓿ (St. Deogratius )

#creditphoto #St.Deogratius #Saint

ꓙꓲꓻ ꓫꓬ ꓢꓴ Deogratius   ꓑꓮꓲ꓿

ꓙꓲꓻ ꓫꓬ ꓢꓴ Deogratius  ꓠꓬ African ꓟꓵꓽ Carthage ꓡꓳ ꓒꓱ  ꓗꓪ ꓐꓰ ꓔꓲꓺ ꓒ ꓕꓲ ꓪ ꓥ ꓡꓳ꓿ ꓕꓱ African ꓟꓵꓽ Carthage ꓡꓳ ꓒꓱ ꓔꓯ ꓗꓳ ꓕꓲ ꓙꓵ, ꓗꓪ Spain ꓗꓴꓷꓼ ꓐꓰ ꓣꓳ‐ꓟ ꓗꓴꓷꓼ ꓐꓴ ꓐꓰ ꓕꓲ ꓪ German ꓞꓳ ꓫꓵꓽ ꓐꓴ ꓐꓰ Vandal ꓟꓬꓱꓺ ꓖꓶ ꓢꓲ ꓠꓬꓲ ꓦꓴꓻ ꓔꓯ, ꓙꓰ ꓟ ꓟꓵꓽ ꓥ ꓡꓳ꓿ ꓕꓱ ꓡꓱ ꓐꓰ Carthage ꓟꓵꓽ ꓔꓯ ꓛꓴꓽ ꓙꓳ ꓢꓴ ꓐꓴ ꓡꓰ ꓣꓴ ꓔꓯ, ꓙꓰ ꓟ ꓪꓴ. ꓠꓬꓲ ꓖꓳ ꓕꓲ ꓙꓵ, ꓗꓪ ꓪꓴ‐ꓢ ꓟꓬꓱꓽ ꓟꓯ ꓔꓬ ꓟ ꓔꓲꓺ ꓒ ꓓꓽ ꓠꓬ ꓠꓱ. ꓐꓯꓼ ꓟꓵꓽ ꓗꓪ ꓘꓰ ꓙꓰꓳ꓿

Carthage ꓟꓵꓽ ꓗꓪ ꓔꓲꓺ ꓒ ꓓꓽ ꓟꓽ ꓔꓬ ꓟ ꓠꓬ (14) ꓘꓳꓼ ꓙꓳ ꓡꓰ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓪ ꓔꓲ ꓠꓬ ꓔꓲꓺ ꓒ ꓓꓽ ꓕꓲ ꓪ ꓢꓲꓻ ꓠ, ꓟ ꓙꓵꓽ ꓪ ꓖꓶ ꓗꓷꓳ꓿ ꓙꓲꓻ ꓫꓬ ꓢꓴ Octavian ꓠꓬ ꓪꓴ‐ꓢ ꓔꓯ, ꓟꓽ ꓙꓵꓽ ꓢꓴ ꓐꓴ ꓐꓰ ꓑ ꓫꓬ ꓐꓴ ꓮ ꓟꓬ, ꓮ ꓟꓬ, ꓠꓵ, ꓠꓵ ꓢꓴ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓔꓲꓺ ꓒ ꓙꓵꓽ ꓪ ꓔꓯ ꓖꓶ ꓠ, ꓟ ꓬꓰ ꓗꓷꓳ꓿

ꓙꓲꓻ ꓫꓬ ꓢꓴ Deogratius  ꓠꓬ ꓔꓲꓺ ꓒ ꓓꓽ ꓙꓵꓽ ꓪ ꓘꓳ, ꓣꓴ ꓟꓶ ꓡꓰ ꓗ. ꓠꓯ African ꓞꓳ ꓫꓵꓽ ꓐꓴ ꓔꓯ ꓚꓳ ꓑ ꓬꓰ ꓝꓲ ꓟ ꓔꓯ ꓠꓽ ꓡꓰ ꓝꓲ ꓠ, ꓟ ꓚꓱ, ꓔꓯ ꓢꓯꓼ ꓕꓵꓼ ꓗꓷꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓪꓴ‐ꓢ ꓔꓯ ꓟꓽ ꓙꓵꓽ ꓢꓴ ꓐꓴ ꓡꓰ ꓙꓲꓻ ꓫꓬ ꓢꓴ Octavian ꓔꓯ ꓢꓰꓼ ꓠ, ꓟ ꓬꓰ ꓗꓷꓳ꓿

ꓔꓲꓺ ꓒ ꓓꓽ ꓠꓬ ꓡ ꓞꓳ ꓪꓴꓽ ꓢꓲ ꓠꓬꓲ ꓚꓳ ꓑ ꓬꓰ ꓝꓲ ꓟ ꓔꓯ ꓠꓽ ꓡꓰ ꓠ, ꓟ ꓬꓲ. ꓠꓯ ꓗꓪ ꓙꓳˍ ꓟ ꓮ ꓙꓵꓽ ꓔꓯ ꓪꓴꓽ ꓗꓷ  ꓢꓲ ꓠꓬꓲ ꓒꓴ ꓔꓯ ꓚꓳ ꓑ ꓬꓰ ꓝꓲ ꓟ ꓡ ꓞꓳ ꓐꓴ ꓔꓯ ꓠꓽ ꓡꓰ ꓠ, ꓟ ꓒꓴ ꓖꓶ ꓢꓲ ꓠꓬꓲ ꓪꓽ ꓘꓴ ꓦꓲꓻ ꓗꓪ ꓔꓬ ꓝꓲꓳ꓿ ꓕꓱ ꓡꓱ ꓬꓰ ꓟ ꓪꓴ. ꓠꓬꓲ ꓪꓴ‐ꓢ ꓔꓯ ꓟꓽ ꓦꓻ ꓡꓱ ꓢꓴ ꓠꓬ ꓮ ꓟꓬ, ꓠꓲ, ꓟ ꓟꓽ ꓢꓽ ꓗꓷ ꓡꓰꓳ꓿

ꓙꓲꓻ ꓫꓬ ꓢꓴ Deogratius ꓠꓬ ꓪꓴ‐ꓢ ꓟꓬꓱꓽ ꓗꓪ ꓮ ꓘꓶ. ꓢꓯꓼ ꓕꓵꓼ ꓗꓷ ꓟ ꓪꓴ. ꓠꓬꓲ A.D 457 ꓘꓳꓼ ꓕꓯ ꓢꓲꓺ ꓒ ꓠꓯ, ꓗꓪ ꓬꓲꓼ ꓟꓶ ꓡꓰꓳ꓿

Add new comment

3 + 0 =