ꓙꓲꓻ ꓫꓬ ꓢꓴ Gregory the Great (St.Gregory the Great) (1) ꓕꓱ (St. Gregory the great)

ꓙꓲꓻ ꓫꓬ ꓢꓴ Gregory the Great (St.Gregory the Great) (1) ꓕꓱ  (St. Gregory the great)

ꓙꓲꓻ ꓫꓬ ꓢꓴ Gregory the Great ꓔꓯ ꓮꓓ (540) ꓘꓳꓼ ꓕꓯ ꓣꓳ‐ꓟ ꓗꓴꓷꓼ ꓗꓪ ꓬꓲ ꓔꓯ ꓦꓵꓻ ꓗꓷꓳ꓿ ꓬꓲ ꓐ, ꓐ ꓐꓰ ꓟ, ꓐ ꓐꓴ ꓐꓰ ꓫꓵꓽ ꓤ ꓪꓳꓽ ꓤ ꓐꓴ ꓠꓬ ꓣꓳ‐ꓟ ꓟꓯꓼ ꓬꓰ ꓢꓴ ꓐꓴ ꓥ ꓡꓳ꓿ ꓬꓲ ꓐ, ꓐ ꓥ ꓟꓲ ꓣꓳ‐ꓟ ꓙꓵꓽ ꓪ ꓙꓳ ꓢꓴ ꓕꓲ ꓣꓳ ꓥ ꓡꓳ꓿ꓬꓲ ꓟ, ꓟ ꓠꓬ Sylvia ꓥ ꓢꓲ ꓠꓬꓲ ꓬꓲ ꓠꓬ ꓙꓲꓻ ꓫꓬ ꓟ ꓚꓱ, ꓗꓪ ꓞꓳ ꓙꓳ ꓢꓴ ꓕꓲ ꓣꓳ ꓥ ꓡꓳ꓿ꓬꓲ ꓟ, ꓟ ꓠꓬ ꓘꓴ ꓜꓲꓼ ꓞꓳ ꓠꓯ, ꓗꓪ ꓙꓲꓻ ꓫꓬ ꓢꓴ ꓟꓬꓱꓽ ꓪ ꓢꓴ ꓕꓲ ꓣꓳ ꓥ ꓡꓳ꓿

ꓬꓲ ꓠꓬ ꓟꓲ ꓠꓯ ꓗꓪ ꓢꓯ. ꓔꓬ ꓕꓯ  ꓟꓬꓱꓽ ꓬꓰ ꓠ, ꓟ ꓐꓱ ꓶ ꓫꓵꓽ ꓘꓶꓽ ꓟ ꓢꓷ. ꓠꓲ, ꓔꓯ ꓢꓳꓻ ꓣꓴ ꓢꓴ ꓕꓲ ꓣꓳ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓞꓲꓼ ꓣꓳ ꓟ ꓙꓵ, ꓕꓯ ꓘꓴ ꓜꓲꓼ ꓞꓳ ꓠꓯ, ꓗꓪ ꓐꓰ ꓢꓷ. ꓠꓲ, ꓙꓲ ꓢꓴ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓢꓴ ꓐꓴ ꓥ ꓟ (St. Ambrose, St. Jerome, St. Augustine ꓐꓴ ꓡꓰ ꓐꓳ ꓔ ꓟ ꓕꓳ ꓶ ꓔꓯ ꓵꓻ ꓢꓴ ꓐꓰ ꓞꓳ ꓙꓳ ꓚꓱ, ꓔꓯ ꓠꓲ, ꓠꓵ ꓢꓴ ꓥ ꓡꓳ꓿

ꓬꓲ ꓠꓬ ꓕꓱ ꓙꓲꓻ ꓫꓬ ꓢꓴ ꓐꓴ ꓡꓰ ꓐꓳ ꓔ ꓟ ꓕꓳ ꓶ ꓔꓯ ꓵꓻ ꓖꓴ ꓡꓰ ꓗ. ꓠꓯ ꓫꓵꓽ ꓘꓶꓽ ꓟ ꓟꓬꓱꓽ ꓬꓰ ꓟ ꓗꓪ ꓮ ꓘꓶ. ꓛꓲ ꓟꓬꓱꓺ ꓓꓳꓽ ꓙꓳ ꓡꓰꓳ꓿ ꓖꓳ ꓡꓰ ꓢꓲ ꓬꓲ ꓠꓬ ꓣꓳ‐ꓟ ꓫꓵꓽ ꓘꓶꓽ ꓔꓶ ꓗꓪ ꓙꓵꓽ ꓪ ꓙꓳ ꓢꓴ ꓕꓲ ꓣꓳ ꓒꓬꓱꓼ ꓡ ꓟ ꓥ ꓡꓳ꓿ ꓬꓲ ꓠꓬ ꓫꓵꓽ ꓘꓶꓽ ꓟ ꓟꓬꓱꓽ ꓔꓯ  ꓬꓰ ꓟ ꓙꓵ, ꓗꓪ ꓥ ꓟꓲ ꓑ ꓫꓬ ꓐꓴ ꓔꓯ ꓠꓵꓻ ꓠꓲ, ꓡꓰ ꓫꓵꓽ ꓘꓶꓽ ꓢꓲ ꓠꓬꓲ ꓑ ꓫꓬ ꓮ ꓟꓬ, ꓬꓲ ꓔꓯ ꓠꓲ, ꓫꓵ ꓟ ꓥ  ꓡꓳ꓿

St. Gregory ꓠꓬ ꓬꓲ ꓮ ꓘꓶ. ꓛꓲ ꓟꓬꓱꓽ ꓬꓰ ꓠꓲ, ꓫꓵˍ ꓟ  ꓟꓬꓱꓽ ꓕꓲ ꓫꓵꓽ ꓠꓬ ꓕꓲ ꓣꓳ ꓔꓵ ꓪꓴ‐ꓢ ꓐꓯ ꓘꓶꓽ ꓛꓳꓽ ꓢꓲ ꓠꓬ ꓟꓵꓽ ꓗꓪ ꓕꓲ ꓣꓳ ꓔꓵꓼ ꓔꓬ ꓠ, ꓟ ꓥ ꓡꓳ꓿ ꓬꓲ ꓐ, ꓐ ꓟꓲ ꓠꓯ ꓗꓪ ꓐꓰ ꓧꓪ ꓖꓳꓽ ꓓꓱ ꓡꓳ ꓬꓰ ꓗ. ꓠꓯ ꓬꓲ ꓠꓯ, ꓗꓪ ꓙꓳ ꓟ ꓟꓵꓽ ꓮ ꓙꓵꓽ ꓔꓯ ꓪꓴꓽ ꓗꓷ ꓢꓲ ꓠꓬꓲ ꓪꓽ ꓘꓴ ꓦꓲꓻ ꓗꓪ ꓮ ꓡꓴ ꓗꓶ ꓗꓷꓳ꓿

ꓝꓮꓲ ꓬꓲ ꓠꓬ ꓣꓳ‐ꓟ ꓣꓳ‐ꓟ ꓗꓴꓷꓼ ꓪꓽ ꓘꓴ ꓦꓲꓻ ꓔꓯ ꓥ ꓟꓲ ꓫꓬ, ꓖꓶ ꓗꓷꓳ꓿ ꓬꓲ ꓔꓬ ꓟ ꓦꓲꓻ ꓔꓯ ꓥ ꓟꓲ ꓪꓽ ꓘꓴ ꓔꓯ ꓖꓶ ꓗꓷ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓬꓰ ꓢꓴ ꓔꓬ ꓟ ꓦꓲꓻ ꓒꓬꓱꓼ ꓡ ꓝꓲꓳ꓿ ꓕꓱ ꓡꓱ ꓐꓰ ꓬꓲ ꓡꓰ ꓫꓬ, ꓔ ꓟ ꓪꓽ ꓘꓴ ꓦꓲꓻ ꓗꓪ St. Benedictine ꓔꓲꓺ ꓒ ꓕꓲ ꓣꓳ ꓔꓬ ꓗꓷ ꓟ ꓥ ꓡꓳ꓿

AD (578) ꓘꓳꓼ ꓔꓯ ꓔꓲꓺ ꓒ ꓪ ꓔꓲ ꓡꓰ ꓬꓲ ꓔꓯ ꓘꓴ ꓢꓲ ꓠꓬꓲ ꓔꓲꓺ ꓒ ꓪ ꓔꓲ ꓝꓲ ꓓꓴ ꓟꓬꓱꓽ ꓬꓰ ꓠ, ꓟ ꓐꓯ ꓗꓷꓳ꓿ ꓕꓱ ꓡꓱ ꓐꓰ ꓬꓲ ꓠꓬ ꓔꓲꓺ ꓒ ꓪ ꓔꓲ ꓝꓲ ꓓꓴ ꓕꓲ ꓪ ꓒꓬꓱꓼ ꓡ ꓢꓲ ꓠꓬꓲ Constantinople ꓪ ꓔꓲ ꓐꓰ ꓜꓲꓼ ꓡꓯꓽ ꓘꓳ ꓗꓷꓳ꓿ ꓕꓱ ꓡꓱ ꓬꓲ ꓔꓯ ꓝꓲ ꓩꓴ ꓗꓷ ꓟ ꓠꓬ Lombard ꓟꓯꓼ ꓐꓴ ꓡꓰ ꓣꓳ‐ꓟ ꓐꓰ ꓲꓔꓮꓡꓬ ꓗꓴꓷꓼ ꓗꓪ ꓟꓯꓼ ꓢꓰꓼ ꓡ ꓟꓯꓼ ꓓꓶꓽ ꓡ ꓟ ꓗꓪ ꓐꓰ ꓗꓽ ꓕꓽ ꓠ, ꓟ ꓥ ꓡꓳ꓿ ꓬꓲ ꓠꓬ Constantinople  ꓡꓳ ꓒꓱ ꓗꓪ (6) ꓘꓳꓼ ꓔꓬ ꓗꓷꓳ꓿ ꓬꓲ ꓠꓬ ꓟꓬꓱꓽ ꓬꓰ ꓓꓳ ꓡꓰ ꓗ. ꓠꓯ ꓬꓰ ꓔꓬ ꓟ ꓪꓽ ꓘꓴ ꓦꓲꓻ ꓗꓪ ꓡ ꓡ ꓪ꓿

ꓝꓮꓲ ꓮꓓ (590) ꓘꓳꓼ ꓕꓯ ꓝꓮꓲ ꓕꓲ ꓧꓪ ꓔꓲꓺ ꓒ ꓪ ꓔꓲ ꓡꓰ ꓬꓲ ꓔꓯ ꓟꓬꓱꓽ ꓬꓰ ꓠ, ꓟ ꓐꓱ ꓶ ꓘꓴ ꓗꓷ ꓟ ꓟꓶ ꓡꓰꓳ꓿ ꓖꓳ ꓡꓰ ꓥ ꓟꓲ ꓕꓱ ꓕꓲ ꓧꓪ, ꓟ ꓠꓬ ꓔꓲꓺ ꓒ ꓪ ꓔꓲ ꓒꓬꓱꓼ ꓠ, ꓟ ꓥ ꓢꓲ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓠ, ꓟ ꓥ ꓡꓳ꓿ St. Gregory ꓠꓬ ꓘꓴ ꓜꓲꓼ ꓞꓳ ꓔꓯ ꓘꓴ ꓜꓲꓼ ꓞꓳ ꓔꓯ (13) ꓘꓳꓼ ꓧꓳꓽ ꓪꓴ. ꓟꓴ ꓗꓷ ꓟ ꓥ ꓡꓳ꓿ ꓬꓲ ꓔꓲꓺ ꓒ ꓪ ꓔꓲ ꓙꓵꓽ ꓪ ꓐꓰ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓗꓷ ꓟ ꓙꓵ, ꓕꓯ ꓘꓴ ꓜꓲꓼ ꓞꓳ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓪꓽ ꓡꓯꓽ ꓘꓳ ꓟ ꓙꓳ ꓡ ꓟ ꓐꓰ ꓬꓲ ꓒꓳ, ꓒꓳ, ꓗꓪ ꓥ ꓟꓲ ꓪꓴꓽ ꓟꓴ ꓡ ꓓꓴ ꓮ ꓟꓬ, ꓛꓲ ꓙꓳ ꓡ ꓟ ꓔꓯ ꓡꓳ.ꓟꓳ ꓪ ꓟ ꓥ ꓡꓳ꓿

ꓕꓱ ꓡꓱ ꓐꓰ ꓘꓴ ꓜꓲꓼ ꓞꓳ ꓠꓬ ꓖꓳ ꓕꓲ ꓙꓵ, ꓗꓪ ꓣꓳ‐ꓟ ꓗꓴꓷꓼ ꓗꓪ ꓟꓽ ꓚꓬꓴ ꓟ ꓟꓽ ꓬꓲ ꓙ ꓗꓷ ꓠꓬ ꓣꓳ‐ꓟ ꓗꓴꓷꓼ ꓐꓰ ꓲꓔꓮꓡꓬ ꓗꓴꓷꓼ ꓗꓪ ꓐꓮꓣꓮꓣꓲꓮꓠ ꓟꓯꓼ ꓜꓴꓻ ꓡꓰ ꓙꓵꓽ ꓡ ꓟ ꓥ ꓡꓳ꓿ ꓕꓱ ꓡꓰ ꓐꓰ ꓘꓴ ꓜꓲꓼ ꓞꓳ ꓠꓬ ꓗꓴꓷꓼ ꓘꓴ ꓗꓪ ꓔꓬ ꓟ ꓑ ꓫꓬ ꓐꓴ ꓢꓯꓼ ꓟꓬ ꓔꓯ ꓚꓬꓴ ꓙ ꓗꓷ ꓟ ꓐꓰ ꓦꓻ ꓕꓲ ꓒꓳ, ꓗꓪ ꓥ ꓟꓲ ꓪꓴ‐ꓢ ꓐꓯ ꓘꓶꓽ ꓔꓯ ꓮ ꓟꓬ, ꓛꓲ ꓚꓺ ꓟ ꓖꓶ ꓗꓷꓳ꓿