ꓙꓲꓻ ꓫꓬ ꓢꓴ Leo (9) ꓑꓮꓲꓽ (St.Leo)

ꓙꓲꓻ ꓫꓬ ꓢꓴ Leo (9) ꓑꓮꓲꓽ (St.Leo)

ꓙꓲꓻ ꓫꓬ ꓢꓴ Leo ꓠꓬ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓫꓬ, ꓔꓱ, ꓠ, ꓟ ꓚꓱ, ꓐꓰ ꓫꓵꓽ ꓪꓴꓽ ꓮ ꓟꓬ, ꓙꓳˍ ꓟ ꓙꓵ, ꓗꓪ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓢꓲ ꓠꓬꓲ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓧꓳꓽ ꓣꓱ ꓢꓴ ꓔꓲꓺ ꓒ ꓪ ꓔꓲ ꓥ ꓡꓳ꓿

ꓙꓲꓻ ꓫꓬ ꓢꓴ Leo ꓔꓯ AD 1002 ꓘꓳꓼ 6 ꓦ ꓟ  21 ꓠꓬꓲ ꓕꓯ Italy ꓗꓴꓷꓼ Alase ꓘ, ꓗꓪ ꓬꓲ. ꓔꓯ  ꓦꓵꓻ ꓗꓷꓳ꓿ ꓙꓲꓻ ꓫꓬ ꓢꓴ Leo ꓢꓲꓽ ꓫꓬ ꓟꓬꓱꓽ ꓠꓬ Bruno ꓥ ꓡꓳ꓿ ꓙꓲꓻ ꓫꓬ ꓢꓴ Leo ꓠꓬ ꓪꓴ‐ꓢ ꓟꓬꓱꓽ ꓟꓯ ꓠ, ꓟ Deacon ꓙꓵꓽ ꓪ ꓘꓳ, ꓣꓴ ꓟꓶ ꓡꓰ ꓟ ꓙꓵ, AD 1026 ꓘꓳꓼ ꓕꓯ Italy ꓗꓴꓷꓼ ꓗꓪ ꓢꓰꓼ ꓡꓯ ꓘꓳ, ꓓꓴ ꓙꓳˍ ꓡꓰꓳ꓿ ꓖꓳ ꓕꓯ ꓙꓲꓻ ꓫꓬ ꓢꓴ Leo ꓠꓬ ꓪ ꓔꓲ Conrad (2) ꓟꓯꓼ ꓜꓴꓻ ꓔꓯ ꓧꓳꓽ ꓪꓴ. ꓟꓴ ꓗꓷꓳ꓿ Italy ꓗꓴꓷꓼ ꓗꓪ ꓢꓲ ꓡꓲ ꓟꓶ ꓡꓰ ꓟ ꓙꓵ, ꓕꓯ ꓙꓲꓻ ꓫꓬ ꓢꓴ Leo ꓠꓬ ꓔꓲꓺ ꓒ ꓓꓽ ꓙꓵꓽ ꓪ ꓘꓳ, ꓣꓴ ꓟꓶ ꓡꓰꓳ꓿

ꓙꓲꓻ ꓫꓬ ꓢꓴ Leo ꓠꓬ ꓔꓲꓺ ꓒ ꓓꓽ ꓙꓵꓽ ꓪ ꓐꓰ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓗꓷ ꓟ ꓙꓵ, ꓕꓯ ꓔꓲꓺ ꓒ ꓐꓴ ꓮ ꓡꓰ ꓐꓰ ꓞꓳ ꓫꓱ, ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓗꓪ ꓢꓯꓼ ꓕꓵꓼ ꓠ, ꓟ ꓞꓳ ꓚꓱ, ꓮ ꓟꓬ, ꓫꓵꓽ ꓔꓯ ꓕꓳ ꓶ ꓗꓪ ꓐꓳ ꓗꓷꓳ꓿ AD 1049 ꓘꓳꓼ ꓕꓯ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓢꓴ ꓔꓲꓺ ꓒ ꓪ ꓔꓲ Damasus (2) ꓧꓪꓽ ꓖꓳ ꓓꓱ ꓡꓳ. ꓬꓰꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓙꓲꓻ ꓫꓬ ꓢꓴ Leo (9) ꓬꓲ. ꓞꓲꓼ (47) ꓘꓳꓼ ꓕꓯ  ꓔꓲꓺ ꓒ  ꓪ ꓔꓲ ꓒꓬꓱꓼ ꓡꓺꓳ꓿ ꓙꓲꓻ ꓫꓬ ꓢꓴ Leo ꓠꓬ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓫꓬ, ꓔꓱ, ꓠ, ꓟ ꓮ ꓟꓬ, ꓫꓵꓽ ꓔꓯ ꓫꓬ, ꓔꓱ ꓢꓲ ꓠꓬꓲ ꓙꓲ‐ꓢꓴ ꓢꓲꓺ ꓤ ꓐꓴ ꓔꓬ ꓟ ꓕꓲ  ꓟꓵꓽ ꓡꓰ ꓕꓲ ꓟꓵꓽ ꓗꓪ ꓙꓰ ꓢꓲ ꓠꓬꓲ ꓪꓴ‐ꓢ ꓐꓯ ꓘꓶꓽ ꓚꓺ ꓟ. ꓖꓶ ꓗꓷꓳ꓿

ꓙꓲꓻ ꓫꓬ ꓢꓴ Leo (9) ꓡꓰ ꓘꓴ ꓜꓲꓼ ꓞꓳ ꓘꓴꓼ ꓗꓪ ꓫꓬ, ꓔꓱ, ꓗꓷ ꓟ ꓟꓬꓱꓽ ꓕꓲ ꓟ ꓠꓬ ꓔꓲꓺ ꓒ ꓪ ꓔꓲ ꓒꓬꓱꓼ ꓡ ꓢꓴ ꓔꓯ Cardinal ꓐꓴ ꓡꓰ ꓢꓲꓻ ꓠ, ꓟ ꓔꓯ ꓐꓯ ꓑꓶ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓢꓴ ꓐꓴ ꓔꓯ ꓮ ꓡꓰ ꓐꓰ ꓢꓲꓻ ꓠ, ꓟ ꓚꓱ, ꓔꓯ ꓙꓲꓻ ꓫꓬ ꓢꓴ Leo ꓧꓪꓽ ꓖꓳ ꓓꓱ ꓡꓳꓻ ꓬꓰ ꓗ. ꓠꓯ. (5) ꓘꓳꓼ ꓕꓯ ꓣꓱ ꓗꓷꓳ꓿ꓙꓲꓻ ꓫꓬ ꓢꓴ Leo (9) ꓠꓬ AD 1054 ꓘꓳꓼ ꓬꓲ. ꓞꓲꓼ (52) ꓘꓳꓼ ꓕꓯ ꓟꓲ ꓠꓯ ꓗꓪ ꓐꓰ ꓧꓪꓽ ꓖꓳ ꓓꓱ ꓡꓳꓻ ꓬꓰꓳ꓿ ꓬꓲ. ꓔꓯ 1082 ꓕꓯ ꓘꓴ ꓜꓲꓼ ꓞꓳ ꓧꓳꓽ ꓪꓴ. ꓟꓴ ꓢꓴ ꓔꓲꓺ ꓒ ꓪ ꓔꓲ Victor(3) ꓠꓬ ꓙꓲꓻ ꓫꓬ ꓢꓴ ꓞꓳ ꓤ ꓐꓴ ꓐꓯ ꓑꓶ ꓗꓷꓳ꓿