ꓙꓲꓻ ꓫꓬ ꓢꓴ St. Dominic ꓚꓺ ꓟꓲꓽ (St. Dominic)

ꓙꓲꓻ ꓫꓬ ꓢꓴ St. Dominic ꓚꓺ ꓟꓲꓽ (St. Dominic)

ꓙꓲꓻ ꓫꓬ ꓢꓴ Dominic ꓠꓬ ꓟꓽ ꓔꓱ ꓟꓽ ꓜꓳ ꓟꓽ ꓙꓵꓻ ꓠꓲ, ꓚꓱ, ꓔꓯ ꓗꓽ ꓕꓽ ꓖꓶ ꓢꓴ ꓙꓲꓻ ꓫꓬ ꓢꓴ ꓔꓲꓺ ꓒ ꓕꓲ ꓣꓳ ꓥ ꓡꓳ꓿ ꓬꓲ ꓔꓯ ꓮꓓ (1170) ꓘꓳꓼ ꓕꓯ ꓢꓑꓮꓠ ꓗꓴꓷꓼ ꓚꓮꓡꓮꓣꓳꓖꓮ ꓡꓳ ꓒꓱ ꓗꓪ ꓬꓲ ꓔꓯ ꓦꓵꓻ ꓗꓷꓳ꓿ ꓕꓲ ꓠꓬꓲ ꓙꓳˍ ꓟ ꓙꓵ, ꓕꓯ ꓙꓲꓻ ꓫꓬ ꓢꓴ ꓓꓳꓟꓲꓠꓲꓚ ꓠꓬ ꓔꓲꓺ ꓒ ꓕꓲ ꓣꓳ ꓡꓰ ꓟ. ꓟꓲꓽ ꓚꓺ ꓟ ꓔꓯ ꓬꓲ ꓠ ꓠ,  ꓪ ꓡꓰ ꓟ ꓥ ꓡꓳ꓿

ꓕꓱ ꓔꓲꓺ ꓒ ꓟ. ꓟꓲ ꓚꓺ ꓟ ꓙꓵ, ꓕꓯ ꓬꓲ ꓠꓬ ꓮ ꓘꓶ. ꓛꓲ ꓓꓽ ꓢꓴ ꓥ ꓟ ꓐꓰ ꓬꓲ ꓠꓬ ꓮ ꓘꓶ. ꓛꓲ ꓢꓲꓽ ꓫꓬ ꓢꓴ ꓕꓲ ꓣꓳ ꓥ ꓟ ꓔꓯ ꓚꓺ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓕꓱ ꓟ. ꓟꓲ ꓔꓯ ꓠ ꓠ, ꓢꓴ ꓐꓴ ꓠꓬ ꓥꓳꓽ ꓡꓰ ꓟ ꓛꓬ ꓡꓰ ꓟ ꓟ. ꓟꓲ ꓔꓯ ꓘꓳ, ꓣꓴ ꓔꓬ ꓟ ꓥ ꓡꓳ꓿ ꓢꓲꓽ ꓫꓬ ꓢꓴ ꓓꓳꓟꓲꓠꓲꓚ ꓠꓬ ꓕꓱ ꓟ. ꓟꓲꓽ ꓔꓯ ꓟꓽ ꓠꓲ, ꓫꓵˍ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓟ. ꓟꓲꓽ ꓚꓺ ꓟ ꓙꓵ, ꓕꓯ ꓚꓬꓴ ꓢꓲꓺ ꓒ ꓬꓰ‐ꓢꓴ ꓔꓯ ꓮ ꓡꓰ ꓐꓰ ꓝꓴꓲ ꓙꓳˍ ꓢꓴ ꓟꓲ ꓠꓯ ꓡ ꓞꓳ ꓔꓯ ꓠꓲ, ꓠꓵ ꓟ ꓚꓱ, ꓔꓯ ꓚꓺ ꓠ , ꓟ ꓐꓯ ꓗꓷꓳ꓿

ꓖꓳ ꓕꓲ ꓙꓵ, ꓗꓪ ꓐꓰ ꓙꓲꓻ ꓫꓬ ꓢꓴ ꓓꓳꓟꓲꓠꓲꓚ ꓠꓬ ꓔꓱ ꓚꓵ ꓟ ꓟ. ꓟꓲꓽ ꓚꓺ ꓒꓽ ꓕꓲ ꓣꓳ ꓒꓬꓱꓼ ꓡ ꓠ, ꓟ ꓮ ꓘꓶ. ꓛꓲ ꓢꓯꓼ ꓕꓵꓼ ꓗꓷꓳ꓿ ꓕꓱ ꓡꓰ ꓐꓰ ꓪꓴ‐ꓢ ꓐꓯ ꓘꓶꓽ ꓔꓯ ꓚꓺ ꓠꓲ, ꓫꓵˍ ꓢꓴ ꓔꓲꓺ ꓒ ꓐꓴ ꓥ ꓟꓲ ꓬꓲ ꓐꓰ ꓕꓲ ꓪ ꓔ ꓡ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓟꓯ ꓗꓷꓳ꓿ ꓙꓲꓻ ꓫꓬ ꓢꓴ ꓓꓳꓟꓲꓠꓲꓚ ꓠꓬ ꓪꓴ‐ꓢ ꓟꓬꓱꓼ ꓟꓯ ꓔꓬ ꓟ ꓔꓲꓺ ꓒ ꓐꓴ ꓔꓯ ꓛꓳꓽ ꓠ, ꓟ ꓙꓵꓽ ꓗꓽ ꓔꓯ ꓢꓔ. ꓠꓳꓣꓐꓰꓣꓔ ꓐꓰ ꓢꓔ. ꓮꓴꓖꓴꓢꓔꓲꓠꓰ ꓐꓴ ꓡꓰ ꓐꓳ ꓔ ꓟ ꓠꓬ ꓔ ꓢꓲ ꓠꓬꓲ ꓛ ꓗꓷ ꓟ ꓥ ꓡꓳ꓿ ꓬꓲ ꓪ ꓜꓴꓻ ꓔꓲꓺ ꓒ ꓐꓴ ꓮ ꓙꓵꓽ ꓠꓬ ꓫ. ꓫ ꓡꓰ ꓞꓳ ꓙꓳˍ ꓢꓯ. ꓔꓬ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓟꓯ ꓢꓴ ꓐꓴ ꓥ ꓡꓳ꓿

ꓬꓲ ꓪ ꓜꓴꓻ ꓠꓬ ꓔꓲꓺ ꓒ ꓮ ꓟꓬ, ꓟꓽ ꓔꓬ ꓥ ꓟꓲ ꓕꓲ ꓟꓵꓽ ꓡꓰ ꓕꓲ ꓟꓵꓽ ꓗꓪ ꓙꓰ ꓢꓲ ꓠꓬꓲ ꓪꓴ‐ꓢ ꓐꓯ ꓘꓶꓽ ꓚꓺ ꓟ. ꓖꓶ ꓟ ꓥ ꓡꓳ꓿ ꓬꓲ ꓪ ꓜꓴꓻ ꓔꓲꓺ ꓒ ꓜꓴꓻ ꓐꓴ ꓔꓶ ꓐꓬꓱ ꓠꓬ ꓪꓴ‐ꓢ ꓐꓯ ꓘꓶꓽ ꓔꓯ ꓕꓲ ꓟꓵꓽ ꓡꓰ ꓕꓲ ꓟꓵꓽ ꓗꓪ ꓙꓰ ꓢꓲ ꓠꓬꓲ ꓚꓺ ꓠ, ꓟ ꓥ ꓡꓳ꓿ ꓙꓲꓻ ꓫꓬ ꓢꓴ ꓓꓳꓟꓲꓠꓲꓚ ꓡꓰ ꓧꓳꓽ ꓪꓴ. ꓟꓴ ꓢꓲ ꓠꓬꓲ ꓒꓴ ꓔ ꓟ ꓔꓲꓺ ꓒ ꓜꓴꓻ ꓔꓯ ꓮ ꓓ (1216) ꓘꓳꓼ ꓔꓯ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓢꓴ ꓔꓲꓺ ꓒ ꓪ ꓔꓲ ꓧꓳꓠꓳꓣꓲꓴꓢ ꓡꓰ ꓙꓵꓽ ꓪ ꓖꓶ ꓗꓷꓳ꓿

ꓙꓲꓻ ꓫꓬ ꓢꓴ ꓓꓳꓟꓲꓠꓲꓚ ꓐꓴ ꓔꓲꓺ ꓒ ꓜꓴꓻ ꓐꓴ ꓖꓪ ꓫꓵꓽ ꓠꓬ ꓐꓯ ꓞꓲ ꓒꓴ ꓐꓰ ꓠꓯꓻ ꓟ ꓐꓴ ꓞꓲ ꓐꓴ ꓥ ꓡꓳ꓿ ꓙꓲꓻ ꓫꓬ ꓢꓴ ꓓꓳꓟꓲꓠꓲꓚ ꓠꓬ ꓪꓴ‐ꓢ ꓐꓯ ꓘꓶꓽ ꓔꓯ ꓮ ꓘꓶ. ꓛꓲ ꓧꓪ, ꓡꓰ ꓗꓪ ꓛꓲ ꓚꓺ ꓠ, ꓟ ꓟꓽ ꓢꓽ ꓟ ꓔꓯ ꓢꓷ. ꓡꓰ ꓟ ꓥ ꓡꓳ꓿ ꓖꓳ ꓕꓲ ꓙꓵ, ꓗꓪ ꓡ ꓞꓳ ꓐꓴ ꓡꓰ ꓠ, ꓠꓬꓲˍ ꓟ ꓔꓯ ꓒꓳ, ꓖꓶ ꓐ ꓡ ꓟ ꓐꓰ ꓪꓴ‐ꓢ ꓚꓱ, ꓔꓰꓳꓡꓳꓖꓬ ꓢꓷ. ꓠꓲ, ꓔꓯ ꓢꓷ. ꓠ, ꓟ ꓣꓳ. ꓚꓵ ꓟ ꓔꓯ ꓬꓲ ꓢꓷ. ꓡꓰ ꓟ ꓥ ꓡꓳ꓿

ꓖꓳ ꓡꓱ ꓥ ꓟ ꓪꓴ. ꓠꓬꓲ ꓙꓲꓻ ꓫꓬ ꓢꓴ ꓓꓳꓟꓲꓠꓲꓚ ꓠꓬ ꓔꓲꓺ ꓒ ꓐꓴ ꓮ ꓟꓬ, ꓔꓯ ꓪꓴ‐ꓢ ꓐꓯ ꓘꓶꓽ ꓢꓳꓻ ꓣꓴ ꓠ, ꓟ ꓑꓮꓣꓲꓢ ꓡꓳ ꓒꓱ ꓗꓪ ꓮ ꓟꓬ, ꓝꓲ ꓩꓴ ꓗꓷꓳ꓿ ꓕꓱ ꓡꓰ ꓐꓰ ꓔꓲꓺ ꓒ ꓐꓴ ꓮ ꓟꓬ, ꓠꓬ ꓪꓴ‐ꓢ ꓐꓯ ꓘꓶꓽ ꓐꓰ ꓟꓲ ꓠꓯ ꓢꓷ. ꓠꓲ, ꓔꓯ ꓢꓷ. ꓡꓰ ꓢꓴ ꓓꓽ ꓢꓴ ꓮ ꓟꓬ, ꓙꓳˍ ꓡ ꓟ ꓙꓵ, ꓕꓯ ꓕꓲ ꓟꓵꓽ ꓡꓰ ꓕꓲ ꓟꓵꓽ ꓗꓪ ꓝꓲ ꓩꓴ ꓗꓷ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓬꓰ ꓠ, ꓟ ꓝꓲ ꓩꓴ ꓗꓷ ꓟ ꓥ ꓡꓳ꓿

ꓙꓲꓻ ꓫꓬ ꓢꓴ ꓓꓳꓟꓲꓠꓲꓚ ꓔꓲꓺ ꓒ ꓜꓴꓻ ꓗꓪ ꓟ ꓔꓲꓺ ꓒ ꓐꓴ ꓠꓬ ꓟꓲ ꓠꓯ ꓢꓷ. ꓠꓲ, ꓝꓮꓲ ꓪꓴ‐ꓢ ꓐꓯ ꓘꓶꓽ ꓮ ꓟꓬ, ꓛꓲ ꓢꓷ. ꓢꓴ ꓓꓽ ꓢꓴ ꓔꓲꓺ ꓒ ꓐꓴ ꓥ ꓟ ꓪꓴ. ꓠꓬꓲ ꓖꓳ ꓕꓲ ꓙꓵ, ꓗꓪ ꓟꓽ ꓔꓱ ꓟꓽ ꓜꓳ, ꓟ ꓥꓳꓽ ꓡꓰ ꓙꓵꓻ ꓠꓲ, ꓚꓱ, ꓮ ꓟꓬ, ꓔꓯ ꓗꓽ ꓕꓽ ꓖꓶ ꓢꓴ ꓒꓬꓱꓼ ꓡ ꓗꓷ ꓟ ꓥ ꓡꓳ꓿ ꓖꓳ ꓟ ꓡꓰ ꓟꓽ ꓞꓲ ꓑꓮꓣꓲꓢ ꓡꓳ ꓒꓱ ꓗꓪ ꓐꓰ ꓟꓴ ꓔꓲ ꓢꓳꓻ ꓦꓲꓻ ꓗꓪ ꓥ ꓟꓲ ꓮ ꓘꓶ. ꓛꓲ ꓓꓽ ꓟ ꓟꓲ ꓠꓯ ꓕꓳ ꓶ ꓟ. ꓖꓶ ꓢꓴ ꓔꓲꓺ ꓒ ꓐꓴ ꓮ ꓟꓬ, ꓙꓳˍ ꓡ ꓟ ꓟꓲ ꓥ ꓡꓳ꓿

ꓙꓲꓻ ꓫꓬ ꓢꓴ ꓓꓳꓟꓲꓠꓲꓚ ꓠꓬ ꓪꓴ‐ꓢ ꓟꓯ ꓠꓲ, ꓫꓵˍ ꓢꓴ ꓤ ꓠꓱ ꓤ ꓐꓴ ꓐꓱ ꓶ ꓥ ꓟꓲ  ꓔꓲꓺ ꓟ ꓜꓴꓻ ꓔꓯ ꓒꓴ ꓖꓶ ꓗꓷ ꓟ ꓥ ꓡꓳ꓿ ꓖꓳ ꓗ. ꓠꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓪꓴꓽ ꓟꓴ ꓡ ꓢꓲ ꓠꓬꓲ ꓔꓧꓰ ꓢꓲꓢꓔꓰꓣꓢ ꓳꓝ ꓢꓔ. ꓓꓳꓟꓲꓠꓲꓚ ꓟꓬꓱꓽ ꓙꓳˍ ꓡꓰ ꓟ ꓥ ꓡꓳ꓿