ꓙꓲꓻ ꓫꓬ ꓢꓴ Wolfgang ꓑꓮꓲꓽ (St.Wolfgang of Ratisbon)

ꓙꓲꓻ ꓫꓬ ꓢꓴ Wolfgang ꓑꓮꓲꓽ

ꓙꓲꓻ ꓫꓬ ꓢꓴ Wolfgang ꓔꓯ ꓮ.ꓓ (925) ꓘꓳꓼ ꓕꓯ ꓙ‐ꓟ‐ꓠꓲ ꓗꓴꓷꓼ Suabia ꓟꓵꓽ ꓗꓪ ꓬꓲ ꓔꓯ ꓦꓵꓻ ꓗꓷ ꓟ ꓥ ꓡꓳ꓿ ꓬꓲ ꓠꓬ Luke Constance ꓗꓪ ꓔꓲꓺ ꓒ ꓐꓴ ꓡꓰ ꓒꓴ ꓔ ꓟ ꓙꓳ ꓦꓲꓻ ꓗꓪ ꓐꓰ ꓟꓲ ꓠꓯ ꓢꓷ. ꓠꓲ, ꓢꓳꓻ ꓣꓴ ꓪ ꓡꓰꓳ꓿ ꓖꓳ ꓗ. ꓠꓯ ꓟꓲ ꓠꓯ ꓢꓷ. ꓠꓲ, ꓢꓳꓻ ꓣꓴ ꓪ ꓡꓰ ꓓꓳꓻ ꓡꓰ ꓟ ꓙꓵ, ꓔꓯ Wurburg ꓡꓳ ꓒꓱ ꓗꓪ ꓙꓳ ꓦꓲꓻ (ꓢꓳꓻ ꓦꓲꓻ) ꓗꓪ ꓟ. ꓒ ꓟ. ꓗꓷꓳ꓿

ꓝꓮꓲ ꓙ‐ꓟ‐ꓠꓲ ꓗꓴꓷꓼ ꓗꓪ ꓐꓰ ꓔꓲꓺ ꓒ ꓓꓽ Henry ꓡꓰ ꓘꓴ ꓜꓲꓼ ꓞꓳ ꓪꓴꓽ ꓟꓴ ꓡ ꓚꓱ, ꓗꓪ ꓮ ꓡꓰ ꓐꓰ ꓧꓳꓽ ꓟꓴ. ꓟꓴ ꓠ, ꓟ ꓐꓱ ꓶ ꓔꓲꓺ ꓒ (Ramhold) ꓐꓰ ꓕꓲ ꓪ ꓟꓬꓱꓽ ꓬꓰ ꓙ ꓗꓷꓳ꓿ ꓝꓮꓲ ꓔꓲꓺ ꓒ ꓓꓽ Henry ꓟꓲ ꓠꓯ ꓗꓪ ꓐꓰ ꓧꓪꓽ ꓖꓳ ꓓꓱ ꓡꓺ ꓳ ꓬꓰ ꓗ. ꓠꓯ ꓬꓲ ꓠꓬ Switzerland ꓗꓴꓷꓼ ꓗꓪ Einsiedelm ꓡꓳ ꓒꓱ ꓗꓪ ꓔꓲꓺ ꓒ ꓢꓳꓻ ꓦꓲꓻ ꓗꓪ ꓓꓵꓽ ꓗꓷꓳ꓿

ꓕꓱ ꓢꓳꓻ ꓦꓲꓻ ꓗꓪ ꓟꓲ ꓠꓯ ꓢꓷ. ꓠꓲ, ꓐꓰ ꓪꓴ‐ꓢ ꓐꓯ ꓘꓶꓽ ꓔꓯ ꓢꓳꓻ ꓣꓴ ꓪ ꓡꓰꓳ꓿ ꓖꓳ ꓗ. ꓠꓯ ꓬꓲ ꓠꓬ ꓔꓲꓺ ꓒ ꓕꓲ ꓪ ꓒꓬꓱꓼ ꓡ ꓪ꓿ ꓙꓲꓻ ꓫꓬ ꓢꓴ Wolfgang ꓠꓬ ꓔꓲꓺ ꓒ ꓒꓬꓱꓼ ꓡ ꓗ. ꓠꓯ ꓣꓳ‐ꓟ ꓗꓴꓷꓼ ꓙꓵꓽ ꓢꓲꓽ ꓒ ꓐꓴ ꓙꓵꓽ ꓟ ꓗꓴꓷꓼ ꓥ ꓟ (Hunggary) ꓗꓴꓷꓼ ꓗꓪ ꓔꓬ ꓗꓷꓳ꓿

ꓔꓲꓺ ꓒ ꓠꓬ Magyar ꓞꓳ ꓫꓵꓽ ꓔꓯ ꓪꓴ‐ꓢ ꓐꓯ ꓘꓶꓽ ꓚꓺ ꓟ. ꓖꓶ ꓢꓲ ꓠꓬꓬꓲ ꓙꓲ‐ꓢꓴ ꓢꓲꓺ ꓤ ꓒꓬꓱꓼ ꓡ ꓠ, ꓟ ꓢꓯꓼ ꓕꓵꓼ ꓗꓷꓳ꓿ ꓖꓳ ꓗꓪ ꓔꓲꓺ ꓒ ꓔꓬ ꓗꓷ ꓟ ꓟꓽ ꓟꓶ ꓫꓵˍ ꓟ ꓙꓵ, ꓕꓯ Ratisbon ꓡꓳ ꓒꓱ ꓗꓪ ꓔꓲꓺ ꓒ ꓓꓽ ꓙꓵꓽ ꓪ ꓘꓳ, ꓣꓴ ꓟꓶ ꓡꓰꓳ꓿

ꓔꓲꓺ ꓒ ꓓꓽ Woflgang ꓠꓬ ꓢꓲ ꓡꓲ ꓐꓰ ꓔꓬ ꓢꓲ ꓠꓬꓲ ꓦꓻ ꓕꓲ ꓒꓳ, ꓗꓪ ꓮ ꓘꓶ. ꓛꓲ ꓢꓯꓼ ꓕꓵꓼ ꓗꓷꓳ꓿ ꓔꓲꓺ ꓒ ꓓꓽ ꓒꓬꓱꓼ ꓡ ꓗ. ꓠꓯ ꓟꓽ ꓪ ꓡꓯꓽ ꓘꓳ, ꓟ ꓜꓴꓻ ꓮ ꓟꓬ, ꓐꓰ ꓙꓻ ꓡꓯꓽ ꓘꓳ, ꓠ, ꓟ ꓙꓳ ꓡ ꓟ ꓥ ꓡꓳ꓿ ꓔꓲꓺ ꓒ ꓓꓽ ꓠꓬ ꓢꓲꓺ ꓒ ꓬꓰ‐ꓢꓴ ꓡꓰ ꓕꓱ ꓡꓱ ꓐꓰ ꓜꓴꓻ ꓮ ꓟꓬ, ꓐꓰ ꓙꓻ ꓡꓯꓽ ꓘꓳ ꓠ, ꓟ ꓬꓰ ꓝꓲ ꓟ ꓠꓬ ꓪꓴ‐ꓢ ꓟꓬꓱꓽ ꓥ ꓡꓳ ꓐꓰ ꓓꓵꓽ ꓙ ꓢꓲ ꓠꓬꓲ ꓮ ꓘꓶ. ꓛꓲ ꓢꓯꓼ ꓕꓵꓼ ꓗꓷꓳ꓿ ꓔꓲꓺ ꓒ ꓓꓽ ꓙꓵꓽ ꓔꓲ ꓗꓪ ꓪꓴ‐ꓢ ꓟꓬꓱꓽ ꓟꓯꓽ ꓔꓲ ꓗꓪ ꓪꓴꓽ ꓟꓴ ꓡ ꓓꓴ ꓮ ꓘꓶ. ꓛꓲ ꓟꓽ ꓙꓳ ꓟ ꓔꓲ ꓥ ꓟꓲ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓪꓴꓽ ꓟꓴ ꓡ ꓓꓴ ꓙꓳ ꓡ ꓟ ꓥ ꓡꓳ꓿

ꓙꓲꓻ ꓫꓬ ꓢꓴ Wolfgang ꓠꓬ ꓮ.ꓓ (994) ꓘꓳꓼ ꓕꓯ ꓢꓲꓺ ꓒ ꓠꓯ, ꓗꓪ ꓬꓯꓼ ꓟꓶ ꓡꓰꓳ꓿ ꓙꓲꓻ ꓫꓬ ꓢꓴ Wolfgang ꓠꓬ ꓙꓻ ꓣꓳ ꓠꓲ, ꓟ ꓐꓰ ꓪꓴ‐ꓢ ꓔꓯ ꓙꓵꓻ ꓢꓴ ꓕꓲ ꓣꓳ ꓥ ꓡꓳ꓿ ꓫ. ꓢꓴ ꓟꓷꓼ ꓢꓴ ꓔꓯ ꓥ ꓟꓲ ꓬꓰ ꓙ ꓢꓴ ꓥ ꓡꓳ꓿ ꓮ.ꓓ 1022 ꓘꓳꓼ ꓕꓯ ꓙꓲꓻ ꓫꓬ ꓢꓴ Wolfgang ꓠꓬ ꓙꓲꓻ ꓫꓬ ꓕꓲ ꓣꓳ ꓐꓰ ꓟꓬꓱꓺ ꓓꓳꓽ ꓖꓶ ꓗꓷ ꓟ ꓥ ꓡꓳ꓿