ꓛꓲ ꓒꓯ, ꓡꓯꓽ ꓒꓯ, ꓟꓽ ꓙꓳˍ ꓥ ꓟꓲ ꓟꓬꓱꓽ ꓠꓯ, ꓗꓪ ꓮ ꓘꓶ. ꓛꓲ ꓟꓬꓱꓽ ꓓꓳꓽ ꓙꓳ ꓢꓴ Nick Vujicic ꓚꓺ ꓟꓲꓽ (Nick Vujicic)

ꓛꓲ ꓒꓯ, ꓡꓯꓽ ꓒꓯ, ꓟꓽ ꓙꓳˍ ꓥ ꓟꓲ ꓟꓬꓱꓽ ꓠꓯ, ꓗꓪ ꓮ ꓘꓶ. ꓛꓲ ꓟꓬꓱꓽ ꓓꓳꓽ ꓙꓳ ꓢꓴ Nick Vujicic ꓚꓺ ꓟꓲꓽ (Nick Vujicic)

Nick Vujicic ꓠꓬ ꓐꓯ ꓘꓶꓽ ꓐꓯ ꓘꓶ. ꓚꓺ ꓢꓴ ꓕꓲ ꓣꓳ ꓥ ꓢꓲ ꓠꓬꓲ ꓬꓲ ꓠꓬ ꓢꓯꓼ ꓪ ꓪꓽ ꓠ, ꓟ ꓟ. ꓟꓲꓽ ꓚꓺ ꓒꓽ ꓕꓲ ꓣꓳ ꓥ ꓡꓳ꓿ ꓬꓲ ꓔꓯ 1982 ꓘꓳꓼ 12 ꓦ ꓟ 4 ꓠꓬꓲ ꓕꓯ Australia ꓗꓴꓷꓼ Melbourne ꓡꓳ ꓒꓱ ꓗꓪ ꓬꓲ ꓔꓯ ꓦꓵꓻ ꓗꓷꓳ꓿  ꓬꓲ ꓐ, ꓐ ꓟꓬ ꓠꓬ ꓐꓳꓣꓲꓢ ꓦꓴꓙꓲꓚꓲꓚ ꓥ ꓢꓲ ꓠꓬꓲ ꓬꓲ ꓟ, ꓟ ꓟꓬꓱꓽ ꓠꓬ ꓓꓴꓢꓧꓗꓮ ꓦꓴꓙꓲꓚꓲꓚ ꓐꓴ ꓥ ꓡꓳ꓿  ꓕꓱ ꓤ ꓠꓱ ꓤ ꓟ, ꓟ ꓧꓪꓽ ꓖꓳ ꓓꓱ ꓗꓪ ꓔꓬ ꓕꓯ ꓠꓬ ꓧꓪ. ꓧꓪ ꓔ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓟ, ꓟ ꓡꓰ ꓒꓬꓱ ꓟꓳ ꓗꓷ ꓕꓯ ꓕꓯ ꓤ ꓠꓱ ꓤ ꓠꓬ ꓡꓯꓽ ꓒꓯ, ꓐꓰ ꓛꓲ ꓒꓯ, ꓟꓽ ꓙꓳ ꓢꓴ ꓥ ꓡꓳ꓿ ꓕꓱ ꓡꓰ ꓐꓰ ꓬꓲ ꓠꓯ, ꓗꓪ ꓬꓲ ꓠꓬꓲ ꓠꓬꓲꓽ ꓡꓰ ꓒ ꓟ ꓥ ꓡꓳ꓿

ꓕꓱ ꓡꓰ ꓐꓰ ꓤ ꓠꓱ ꓤ ꓐꓱ ꓶ ꓮ ꓟꓲ ꓮ ꓘꓶ. ꓛꓲ ꓔꓬ ꓫ. ꓢꓲ ꓠꓬꓲ ꓬꓲ ꓪ ꓕꓲ ꓦꓲꓻ ꓝꓮꓲ ꓬꓲ ꓛꓳꓽ ꓒꓯꓽ ꓐꓴ ꓐꓱ ꓶ ꓥ ꓟꓲ ꓔ ꓠ, ꓟ ꓫ. ꓡꓰ ꓡꓳ ꓒꓬꓱꓼ ꓡꓰ ꓟ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓐꓯ ꓠꓬ ꓬꓲ ꓠꓯ, ꓗꓪ ꓛꓲ ꓒꓯꓽ ꓡꓯꓽ ꓒꓯ, ꓟꓽ ꓙꓳ ꓟ ꓪꓴ. ꓠꓬꓲ ꓥ ꓡꓳ꓿  ꓬꓲ ꓔꓯ ꓟꓲ ꓠꓯ ꓢꓷ. ꓠꓲ, ꓕꓳ ꓶ ꓢꓳꓻ ꓠ, ꓟ ꓐꓱ ꓶ ꓢꓳꓻ ꓦꓲꓻ ꓗꓪ ꓐꓰ ꓟꓽ ꓘꓳ, ꓣꓴ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓪꓴ. ꓠꓷ  ꓠꓬ ꓙꓲ ꓟ ꓥ ꓡꓳ꓿

ꓬꓲ ꓠꓬ ꓟꓲ ꓠꓯ ꓢꓷ. ꓠꓲ, ꓕꓳ ꓶ ꓢꓳꓻ ꓟ ꓙꓵ, ꓕꓯ ꓬꓲ ꓛꓲꓽ ꓠꓬꓲ ꓠꓬꓲꓽ ꓠꓬꓲ ꓡꓰ ꓣꓱ ꓢꓲ ꓠꓬꓲ ꓕꓳ ꓶ ꓐꓳ ꓢꓳꓻ ꓗꓽ ꓗ ꓟ ꓐꓰ ꓬꓰ ꓗꓷ ꓟ ꓥ ꓡꓳ꓿ ꓬꓲ ꓟꓲ ꓠꓯ ꓢꓷ. ꓠꓲ, ꓕꓳ ꓶ ꓔꓯ Runcorn ꓡꓳ ꓒꓱ ꓗꓪ ꓙꓳˍ ꓟ Queensland Australia ꓗꓴꓷꓼ ꓗꓪ  ꓢꓳꓻ ꓦꓲꓻ ꓗꓪ ꓐꓰ ꓢꓳꓻ ꓣꓴ ꓗꓷꓳ꓿ ꓕꓱ ꓢꓳꓻ ꓦꓲꓻ ꓗꓪ ꓬꓲ ꓠꓬ ꓢꓳꓻ ꓒꓽ ꓐꓴ ꓔꓯ ꓧꓳꓽ ꓪꓴ. ꓟꓴ ꓢꓴ ꓕꓲ ꓣꓳ ꓟꓲ ꓥ ꓡꓳ꓿ ꓬꓲ ꓠꓬ ꓢꓳꓻ ꓤ ꓙꓳ ꓟ ꓐꓴ ꓐꓱ ꓶ ꓥ ꓟꓲ ꓟꓬꓱꓽ ꓬꓰ ꓖꓶ ꓢꓴ ꓕꓲ ꓣꓳ ꓥ ꓡꓳ꓿

ꓬꓲ ꓞꓲꓼ (17) ꓘꓳꓼ ꓙꓳˍ ꓡꓰ ꓟ ꓙꓵ, ꓕꓯ ꓬꓲ ꓠꓬ ꓬꓲ ꓪ ꓘꓴ ꓜꓲꓼ ꓞꓳ ꓗꓪ ꓐꓰ ꓜꓴꓻ ꓐꓴ ꓐꓰ ꓕꓲ ꓪ ꓟ. ꓟꓲꓽ ꓮ ꓟꓬ, ꓚꓺ ꓗꓷꓳ꓿ ꓬꓲ ꓠꓬ Bachelor Degree ꓔꓯ ꓚꓳꓟꓟꓰꓣꓚꓰ, ꓗꓪ ꓣꓴ ꓗꓷ ꓢꓲ ꓠꓬꓲ ꓬꓲ ꓠꓬ Financial Planning ꓢꓷ. ꓠꓲ, ꓔꓯ ꓠꓬ ꓖꓣꓲꓝꓝꓲꓔꓧ ꓴꓠꓲꓦꓰꓣꓢꓲꓔꓬ Qꓴꓰꓰꓠꓢꓡꓮꓠꓓ ꓗꓪ ꓢꓳꓻ ꓣꓴ ꓗꓷꓳ꓿ ꓬꓲ ꓠꓬ ꓢꓳꓻ ꓒ ꓙꓳ ꓟ ꓐꓴ ꓔꓯ ꓢꓯꓼ ꓪꓽ ꓪ ꓠ, ꓟ ꓟ. ꓟꓲꓽ ꓮ ꓟꓬ, ꓔꓯ ꓚꓺ ꓟ. ꓖꓶ ꓗꓷꓳ꓿ ꓕꓱ ꓗꓪ ꓞꓲꓼ ꓣꓳ ꓟ ꓙꓳ ꓟ ꓐꓴ ꓝꓮꓲ ꓞꓳ ꓡꓯ. ꓐꓴ ꓝꓮꓲ ꓟꓬꓱꓽ ꓬꓰ ꓔꓬ ꓢꓴ ꓐꓴ ꓐꓱ ꓶ ꓢꓯꓼ ꓪ ꓪꓽ ꓠ, ꓟ ꓢꓯꓼ ꓖꓶ ꓘꓶꓽ ꓟ. ꓟꓲꓽ ꓮ ꓟꓬ, ꓕꓱ ꓗꓷꓳ꓿

ꓖꓳ ꓟ ꓡꓰ ꓟꓽ ꓞꓲ ꓬꓲ ꓠꓬ ꓟꓵ ꓗꓳ ꓓꓵ ꓓꓵ ꓪꓽ ꓘꓴ ꓦꓲꓻ ꓮ ꓟꓬ, ꓗꓪ ꓥ ꓟꓲ ꓟ. ꓟꓲꓽ ꓚꓺ ꓟ. ꓖꓶ ꓗꓷꓳ꓿ ꓮ ꓫꓵꓽ ꓑꓶ. ꓓꓴ ꓥ ꓐꓯ ꓠꓬ ꓬꓲ ꓠꓬ ꓢꓲꓺ ꓒ ꓬꓰ‐ꓢꓴ ꓬꓲ ꓔꓯ ꓠꓵꓻ ꓠꓲ, ꓟ. ꓟꓲꓽ ꓐꓰ ꓬꓲ ꓤ ꓠꓱ ꓐꓴ ꓔꓯ ꓠꓲ, ꓠꓵ ꓟ ꓔꓯ ꓚꓺ ꓟ. ꓖꓶ ꓗꓷꓳ꓿ ꓠꓲꓚꓗ ꓠꓬ ꓕꓲ ꓟꓲ ꓠꓯ ꓡꓱ ꓗꓪ ꓙꓳ ꓟ ꓗꓴꓷꓼ (60) ꓘꓳꓼ ꓗꓪ ꓛꓲ ꓙꓰ ꓢꓲ ꓠꓬꓲ ꓟ. ꓖꓶ ꓚꓺ ꓖꓶ ꓗꓷꓳ꓿ ꓕꓱ ꓡꓱ ꓐꓰ ꓡ ꓞꓳ ꓮ ꓟꓬ, ꓥ ꓟꓲ ꓬꓲ ꓡꓰ ꓚꓺ ꓟ ꓟ. ꓟꓲꓽ ꓔꓯ ꓠꓲ, ꓠꓵ ꓟ ꓢꓲ ꓠꓬꓲ ꓘꓳ, ꓣꓴ ꓟ ꓥ ꓡꓳ꓿

2006 ꓘꓳꓼ ꓕꓯ ꓛꓲꓽ ꓒꓯ, ꓡꓯꓽ ꓒꓯ, ꓟꓽ ꓙꓳ ꓢꓴ ꓐꓴ ꓔꓯ ꓬꓰ ꓙ ꓔꓳ, ꓙ ꓠ,ꓟ (ꓠꓖꓳ) ꓜꓴꓻ ꓔꓯ California ꓗꓪ ꓒꓴ ꓖꓶ ꓗꓷꓳ꓿ ꓖꓳ ꓕꓲ ꓘꓳꓼ ꓗꓪ ꓬꓲ ꓠꓬ ꓓꓦꓓ ꓗꓪ ꓬꓲ ꓚꓺ ꓟꓲꓽ ꓢꓯ. ꓐꓬꓱ ꓔꓯ ꓟ. ꓖꓶ ꓗꓷꓳ꓿ ꓕꓱ ꓢꓯ. ꓐꓬꓱ ꓟꓬꓱꓽ ꓠꓬ ꓣꓳ ꓤꓶꓻ ꓗꓪ ꓮ ꓘꓶ. ꓛꓲ ꓪꓴꓽ ꓟ ꓔꓶ ꓐꓬꓱ ꓐꓯ ꓟ. ꓢꓯ. ꓐꓬꓱꓽ ꓥ ꓡꓳ꓿ ꓕꓱ ꓢꓯ. ꓐꓬꓱ ꓗꓪ ꓬꓲ ꓞꓲꓼ ꓣꓳ ꓟ ꓙꓵ, ꓕꓯ ꓮ ꓡꓰ ꓐꓰ ꓟ. ꓟꓲꓽ ꓚꓺ ꓢꓴ ꓒꓬꓱꓼ ꓡ ꓟ ꓚꓱ,꓾ ꓮ ꓡꓰ ꓐꓰ ꓬꓲ ꓠꓬ ꓛꓲ ꓒꓯ, ꓡꓯ ꓒꓯ, ꓟꓽ ꓙꓳ ꓥ ꓟꓲ ꓕꓳ ꓶ ꓐꓳ ꓐꓰ ꓠꓲ ꓠꓯ ꓢꓷ. ꓠꓲ, ꓢꓳꓻ ꓣꓴ ꓟ ꓝꓮꓲ ꓡꓯꓽ ꓒꓯ, ꓝ. ꓟꓶ ꓡꓰ ꓟ ꓚꓱ, ꓔꓯ ꓫ. ꓕꓱ ꓔ ꓟ ꓥ ꓡꓳ꓿

2006 ꓘꓳꓼ 3 ꓦ ꓟ ꓕꓯ ꓠꓲꓚꓗ ꓠꓬ 20/20 ꓔ ꓦ ꓢꓯ. ꓐꓬꓱ ꓔꓯ ꓥ ꓟꓲ ꓴꓢꓮ ꓗꓴꓷꓼ ꓗꓪ ꓓꓱ ꓗꓷꓳ꓿ 2009 ꓘꓳꓼ ꓕꓯ ꓠꓲꓚꓗ ꓠꓬ ꓢꓯ. ꓐꓬꓱ ꓕꓲ ꓟ ꓓꓱ ꓗꓷꓳ꓿ “The Butterfly Circus’ ꓟꓬꓱꓽ ꓔ ꓟ ꓐꓳ ꓡꓳ ꓕꓲ ꓟ ꓮ ꓡꓰ ꓐꓰ ꓒꓬꓱꓼ ꓡ ꓟ ꓔꓯ ꓚꓵ. ꓟꓶ ꓓꓴ ꓢꓯ. ꓐꓬꓱ ꓔꓯ ꓓꓱ ꓗꓷꓳ꓿ ꓕꓱ ꓗꓪ ꓠꓱ. ꓐꓯꓼ ꓢꓯ. ꓐꓬꓱꓽ ꓢꓴ ꓐꓴ ꓐꓰ ꓕꓲ ꓪ ꓑ ꓗꓷꓳ꓿  ꓕꓱ ꓢꓯ. ꓐꓬꓱ ꓠꓬ ꓟꓬꓱꓽ ꓓꓳꓽ ꓙꓳ ꓢꓲ ꓠꓬꓲ ꓡꓯꓽ ꓫꓴꓻ ꓘꓳ, ꓣꓴ ꓪ ꓡꓰꓳ꓿

2010 ꓘꓳꓼ ꓔꓯ ꓠꓲꓚꓗ ꓠꓬ Life without Limits ꓐꓯ ꓟ ꓕꓳ ꓶ ꓔꓯ ꓐꓳ ꓗꓷꓳ꓿ ꓬꓲ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓮ ꓡꓰ ꓢꓯ. ꓔꓬ ꓗꓷ ꓟ ꓪꓴ‐ꓢ ꓣꓱ ꓛꓰ ꓔꓯ ꓮ ꓡꓰ ꓘꓳ, ꓣꓴ ꓟꓶ ꓟ ꓚꓱ,ꓔꓯ ꓐꓳ ꓗꓷ ꓟ ꓥ ꓡꓳ꓿ ꓖꓳ ꓟ ꓡꓰ ꓟꓽ ꓞꓲ ꓬꓲ ꓠꓬ ꓓꓦꓓ ꓗꓪ ꓐꓰ ꓢꓯ. ꓐꓬꓱ ꓔꓯ ꓟꓮꓠ ꓳꓝ ꓝꓮꓲꓔꓧ ꓙꓵꓻ ꓠꓲ, ꓙꓳ ꓢꓴ ꓕꓲ ꓣꓳ ꓐꓰ ꓟꓬꓱꓽ ꓔ ꓟ ꓔꓯ ꓥ ꓟꓲ ꓓꓱ ꓗꓷꓳ꓿

ꓬꓲ ꓠꓬ Switzerland ꓗꓴꓷꓼ ꓗꓪ ꓥ ꓟꓲ ꓟ. ꓟꓲꓽ ꓮ ꓟꓬ, ꓛꓲ ꓚꓺ ꓟꓲ. ꓖꓶ ꓗꓷꓳ꓿ ꓬꓲ ꓠꓬꓲ ꓟꓵ ꓗꓳ ꓓꓵ ꓓꓵ ꓗꓪ ꓙꓵꓽ ꓪ ꓙꓳ ꓢꓴ ꓐꓴ ꓖꓪꓽ ꓙꓱ ꓜꓲꓼ ꓓꓴ ꓬꓰ ꓟ ꓙꓵ, ꓗꓪ ꓥ ꓟꓲ ꓟ. ꓟꓲꓽ ꓚꓺ ꓟ. ꓖꓶ ꓗꓷꓳ꓿

2008 ꓘꓳꓼ ꓕꓯ ꓬꓲ ꓠꓬ Texas ꓗꓪ ꓗꓮꓠꓮꓰ ꓟꓲꓬꓮꓧꓮꓣꓮ ꓟꓬꓱꓽ ꓔ ꓢꓴ ꓐꓰ ꓟꓳꓸ ꓡꓯ ꓘꓳꓹ ꓗꓷꓳ꓿ ꓬꓲ ꓪ ꓠꓬꓲꓽ ꓣꓳ ꓠꓬ 2012 ꓘꓳꓼ 2 ꓦ ꓟ 12  ꓠꓬꓲ ꓕꓯ ꓡꓯ ꓒꓯꓹ ꓝꓸ ꓗꓷ ꓢꓲ ꓠꓬꓲ ꓤ  ꓠꓱ ꓤ (4) ꓣꓳ ꓘꓳꓹ ꓣꓴ ꓪ ꓡꓰ ꓟ ꓥ ꓡꓳ꓿ ꓬꓲ ꓠꓬ ꓕꓲ ꓦꓲꓻ ꓢꓴ ꓮ ꓙꓵꓽ ꓠꓬ ꓴꓢꓮ ꓗꓴꓷꓼ ꓚꓮꓡꓲꓝꓳꓣꓠꓲꓮ ꓗꓴꓷꓼ ꓗꓪ ꓔꓬ ꓟ ꓥ ꓡꓳ꓿

ꓬꓲ ꓡꓰ ꓐꓯ ꓔ ꓟ ꓫꓸ ꓕꓱ ꓘꓶꓽ ꓠꓬ ꓣꓳ ꓢꓯꓸ ꓔꓬ ꓟ ꓤꓶꓻ ꓗꓪ ꓣꓳ ꓠꓬ ꓑꓶꓸ ꓑꓶꓸ ꓡꓰ ꓢꓯꓼ ꓕꓵꓼ ꓥꓳꓽ ꓐꓯ ꓣꓳ ꓐꓱ ꓶ ꓙꓲˍ ꓟ ꓮ ꓟꓬꓹ ꓫꓵꓽ ꓔꓯ ꓘꓳꓹ ꓣꓴ ꓪ ꓓꓴ ꓥ ꓡꓳ ꓐꓰ ꓐꓯ ꓔ ꓟ ꓥ ꓡꓳ꓿ ꓫꓸ ꓟꓳ ꓪ꓿ꓠ