ꓝꓲ ꓓꓴ ꓐꓴ ꓙꓵ ꓠꓲꓹ ꓐꓰ ꓠꓲ-ꓚꓰꓠꓰ ꓙꓵ ꓠꓲꓹ (Q & A)

ꓘꓴ ꓜꓲꓼ ꓞꓳ ꓘꓴꓽ ꓗꓪ ꓟꓽ ꓙꓵ ꓟꓽ ꓓꓹ ꓟ ꓙꓵ ꓠꓲꓹ ꓐꓯꓹ ꓟ ꓙꓳˍ ꓡꓳ= ꓖꓳ ꓟ ꓔꓯ ꓝꓲ ꓓꓴ ꓐꓴ ꓙꓵ ꓠꓲꓹ ꓐꓰ ꓐꓯꓹ ꓟ ꓥ ꓪ= ꓖꓳ ꓡꓰ ꓥˍ ꓟꓲ ꓝꓲ ꓓꓴ ꓐꓴ ꓙꓵ ꓠꓲꓹ ꓕꓯ ꓠꓲꓚꓰꓠꓰ ꓚꓣꓰꓰꓓ ꓠꓲ-ꓚꓰꓠꓰ ꓙꓵ ꓠꓲꓹ ꓐꓰ ꓐꓯ ꓢꓲ ꓠꓲ-ꓚꓰꓠꓰ ꓙꓵ ꓠꓲꓹ (ꓚꓣꓰꓰꓓꓳ) ꓔꓯ ꓓꓸ ꓓꓴꓸ ꓤꓼ ꓗꓶ ꓡꓰ ꓠ ꓟꓲ-ꓡꓮꓠ ꓡꓳ ꓒꓱ ꓗꓪ ꓐꓳ ꓦ ꓟ ꓔꓯ ꓠꓬ ꓝꓲ ꓓꓴ ꓐꓴ ꓙꓵ ꓠꓲꓹ ꓐꓰ ꓕꓱ ꓡꓰ ꓐꓳ ꓔ ꓟ ꓔꓯ ꓡꓳꓸ ꓟꓳ ꓪ ꓓˍ ꓡꓳ= ꓮ ꓡꓰ ꓪꓴꓸ ꓠꓬꓲ ꓝꓲ ꓓꓴ ꓐꓴ ꓙꓵ ꓠꓲꓹ ꓐꓯꓹ ꓡ? ꓐꓯ ꓠꓬ ꓝꓲ ꓓꓴ ꓐꓴ ꓗꓪ ꓐꓰ ꓕꓲꓽ ꓤꓶ ꓡꓰ ꓕꓲꓽ ꓤꓶ ꓫꓶꓸ ꓡꓹ ꓟ ꓘꓴ ꓜꓲꓼ ꓞꓳ ꓪꓴꓸ ꓓꓵ ꓣꓱꓽ ꓢꓴ ꓐꓴ ꓡꓰ ꓖꓪꓽ ꓙꓱ ꓢꓲ ꓐꓳ ꓔ ꓟ ꓥꓹ ꓟ ꓪꓴꓸ ꓠꓬꓲ ꓝꓲ ꓓꓴ ꓐꓴ ꓙꓵ ꓠꓲꓹ ꓐꓰ ꓐꓯꓹ ꓟ ꓥˍ ꓡꓳ= ꓧꓶꓸ ꓕꓯꓽ ꓙꓲ-ꓢꓴ ꓢꓲ ꓤꓼ ꓐꓴ ꓠꓬ ꓪꓴ-ꓢ ꓕꓲꓽ ꓟ ꓐꓹ ꓐꓽ ꓪꓴ-ꓢ꓾ ꓢꓲ ꓒꓽ ꓕꓲꓽ ꓟ ꓬꓰ-ꓢꓴ ꓙꓲ-ꓢꓴ꓾ ꓠꓲ ꓗꓴꓹ ꓟꓬ ꓗꓴꓹ ꓖꓶ ꓢꓴ ꓕꓲꓽ ꓣꓳ ꓢꓲ-ꓫꓬ-ꓟ-ꓦ ꓐꓰ ꓕꓱ ꓡꓰ ꓙꓵ ꓡꓳꓹ ꓬꓰ ꓟ ꓥˍ ꓡꓳ= ꓖꓳ ꓟ ꓡꓰ ꓟꓽ ꓞꓲ ꓘꓴ ꓜꓲꓼ ꓞꓳ ꓕꓲꓽ ꓟ ꓖꓳ ꓟ ꓘꓴ ꓜꓲꓼ ꓞꓳ ꓠꓬ ꓕꓲꓽ ꓟ ꓡꓰ ꓥ ꓢꓲ꓾ ꓢꓲꓽ ꓫꓬꓹ ꓟ꓾ ꓟꓵꓽ ꓗꓴꓸ ꓓꓵ ꓓꓵ ꓗꓪ ꓔꓬꓹ ꓟ ꓞꓳ ꓫꓵꓽ ꓞꓳ ꓙꓵꓽ ꓮꓽ ꓙꓵꓽ ꓐꓹ ꓟ ꓘꓴ ꓜꓲꓼ ꓞꓳ꓾ ꓝꓲ ꓓꓴ ꓠꓯꓸꓼ ꓗꓪ ꓐꓰ ꓫꓶꓸ ꓡꓹ ꓟ ꓘꓴ ꓜꓲꓼ ꓞꓳ ꓐꓰ ꓕꓱ ꓡꓰ ꓐꓯˍ ꓐꓶ= ꓖꓳ ꓟ ꓕꓯ ꓳꓠꓰꓹ ꓧꓳꓡꓬꓹ ꓚꓮꓔꓧꓳꓡꓲꓚ ꓮꓠꓓ ꓮꓑꓳꓢꓔꓳꓡꓲꓚ ꓐꓰ ꓕꓱ ꓡꓰ ꓐꓯˍ ꓐꓶ= 

ꓝꓲ ꓓꓴ ꓐꓴ ꓙꓵ ꓠꓲꓹ ꓠꓬ ꓮ ꓡꓰ ꓕꓲꓽ ꓘꓴꓸ ꓗꓪ ꓐꓰ ꓥꓹ ꓡ ꓐꓯ ꓠꓬ 1ꓘꓴ-ꓡꓴ-ꓕꓵ 12ꓽ 3-7ꓹ 12-13 ꓗꓪ ꓟ ꓥ ꓐꓶ= ꓖꓳ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓮ ꓡꓰ ꓐꓯꓹ ꓡ ꓐꓯꓹ ꓠꓬ ꓬꓰ ꓓꓳ ꓡꓹ ꓟ ꓟꓽ ꓫꓱꓹ ꓡꓯꓽ ꓘꓳꓹ ꓟ ꓙꓳꓹ ꓟꓲ ꓪꓴ-ꓢ ꓠꓽ ꓕꓲꓽ ꓣꓳ ꓡꓰꓽ ꓥˍ ꓡꓳ= ꓕꓱ ꓕꓲꓽ ꓘꓴꓸ ꓗꓪ ꓪꓴ-ꓢ ꓠꓽ ꓕꓲꓽ ꓣꓳꓹ ꓡꓰ ꓥˍ ꓡꓳ꓾ ꓳꓠꓰ ꓖꓳꓓ ꓐꓯꓹ ꓟ ꓥ ꓪ= ꓖꓳ ꓟ ꓪꓴ-ꓢ ꓔꓯ ꓮ ꓡꓰ ꓐꓯ ꓔ ꓡꓽ ꓐꓯ ꓠꓬ ꓬꓲ ꓠꓬ ꓙꓳꓹ ꓟ ꓥ ꓕ ꓑꓳꓸ ꓗꓪ ꓮꓽ ꓙꓵꓽ ꓡꓱꓸꓼ ꓒꓬꓱꓼ ꓡ ꓝꓲ ꓢꓴ ꓥˍ ꓡꓳ= ꓬꓲ ꓠꓬ ꓚꓰꓼ ꓢꓴ ꓢꓲ ꓒꓽ ꓥˍ ꓡꓳ ꓐꓰ ꓕꓱ ꓡꓰ ꓐꓯ ꓔ ꓡꓳ= ꓝꓲ ꓓꓴ ꓐꓴ ꓙꓵ ꓠꓲꓹ ꓠꓯꓸꓼ ꓗꓪ ꓥˍ ꓟꓲ ꓮꓸ ꓫꓵꓹ ꓟꓲ ꓬꓰ ꓐ ꓡ ꓢꓴ ꓪꓴ-ꓢ ꓕꓲꓽ ꓟ ꓡꓰꓽ ꓙꓳ ꓡꓳ ꓐꓰ ꓐꓯ ꓔ ꓡꓳ= ꓣꓱꓽ ꓙꓹ ꓟ ꓟꓬꓱꓽ ꓠꓬ ꓟꓽ ꓫꓱꓹ ꓡꓯꓽ ꓘꓳꓹ ꓥˍ ꓟꓲ ꓢꓲ ꓒꓽ ꓠꓽ ꓕꓲꓽ ꓣꓳꓹ ꓡꓰ ꓥ ꓡꓳ ꓐꓰ ꓐꓯ ꓔ ꓡꓳ= ꓳꓠꓰ ꓡꓳꓣꓓ ꓙꓰꓢꓴꓢ ꓚꓧꓣꓲꓢꓔ ꓐꓯꓹ ꓟ ꓢꓲ ꓒꓽ ꓠꓽ ꓕꓲꓽ ꓣꓳꓹ ꓡꓰ ꓥˍ ꓡꓳ ꓐꓰ ꓐꓯ ꓔ ꓡꓳ= ꓡꓯꓽ ꓫꓵ ꓠꓬ ꓟꓽ ꓫꓱꓹ ꓡꓯꓽ ꓘꓳ ꓟ ꓙꓳꓹ ꓟꓲ ꓢꓲ-ꓫꓬ-ꓟ-ꓦ ꓕꓲꓽ ꓣꓳ ꓡꓰ ꓥˍ ꓡꓳ ꓐꓰ ꓐꓯ ꓔ ꓡꓳ=

 ꓖꓳ ꓟ ꓡꓰ ꓟꓽ ꓞꓲ ꓳꓠꓰ꓾ ꓧꓳꓡꓬ꓾ ꓚꓮꓔꓧꓳꓡꓲꓚ ꓮꓠꓓ ꓮꓑꓢꓔꓳꓡꓲꓚ ꓐꓯꓹ ꓟ ꓘꓴ ꓜꓲꓼ ꓞꓳ ꓠꓬ ꓕꓲꓽ ꓟ ꓡꓰ ꓐꓯꓹ ꓟ ꓬꓲ ꓟꓸ ꓟꓲꓽ ꓙꓳ ꓠꓬꓲ ꓔ ꓡꓳ= ꓢꓲꓽ ꓫꓬꓹ ꓟ ꓥ꓾ ꓞꓳ ꓫꓵꓽ ꓞꓳ ꓙꓵꓽ ꓮ ꓙꓵꓽ ꓐꓹ ꓟ ꓐꓯꓹ ꓟ ꓚꓮꓔꓧꓳꓡꓲꓚ ꓐꓯꓹ ꓟ ꓬꓲ ꓟꓸ ꓟꓲꓽ ꓙꓳ ꓠꓬꓲ ꓔ ꓥ= ꓝꓲ ꓓꓴ ꓐꓴ ꓠꓯꓸꓼ ꓗꓪ ꓐꓰ ꓫꓶꓸ ꓡꓹ ꓟ ꓥ ꓐꓰ ꓐꓯꓹ ꓟ ꓕꓯ ꓮ ꓡꓰ ꓐꓰ ꓐꓯ ꓔ ꓡꓽ ꓐꓯ ꓠꓬ ꓖꓳ ꓓꓱꓽ ꓠꓹ ꓕꓲꓽ ꓟꓹ ꓥ ꓢꓲ ꓬꓲ ꓡꓯꓼ ꓗꓸ ꓮ ꓟꓬꓹ ꓙꓳ ꓟ ꓡꓰ ꓐꓰ ꓝꓮꓲ ꓬꓲ ꓡꓯꓼ ꓗꓸ ꓮꓽ ꓟꓬꓹ ꓙꓳꓹ ꓥˍ ꓟꓲ ꓕꓲꓽ ꓗꓳ ꓓꓱ ꓡꓰ ꓥꓹ ꓟ ꓡꓰ ꓐꓰ ꓙꓲ-ꓢꓴꓹ ꓟꓲ ꓬꓲ ꓗꓳ ꓓꓱ ꓥˍ ꓡꓳ ꓐꓰ ꓐꓯ ꓔ ꓡꓳ= ꓝꓲ ꓓꓴ ꓐꓴ ꓙꓵ ꓠꓲꓹ ꓗꓪ ꓥˍ ꓟꓲ ꓕꓱ ꓟ ꓡꓰ ꓐꓰ ꓪꓽ ꓡꓯꓽ ꓘꓳꓹ ꓟ ꓐꓳ ꓔ ꓡꓳ=