ꓞꓳ ꓫꓵꓼ ꓤ ꓬꓰ‐ꓢꓴ ꓮ ꓟꓲꓽ ꓕꓯ‐ꓣꓰ‐ꓢꓯ

ꓞꓳ ꓫꓵꓼ ꓤ ꓬꓰ‐ꓢꓴ ꓮ ꓟꓲꓽ ꓕꓯ‐ꓣꓰ‐ꓢꓯ

ꓙꓲꓻ ꓫꓬ ꓢꓴ ꓕꓮ‐ꓣꓰ‐ꓢꓮ ꓠꓬ ꓑꓬꓲꓠ‐ꓔꓲ ꓗꓴꓓꓼ꓾ ꓡꓲ‐ꓜꓴ ꓡꓳ ꓒꓱ ꓗꓪ ꓔꓬ, ꓟ ꓮ ꓐꓽ ꓡꓴ‐ꓪꓲꓢ ꓟꓮ‐ꓔꓲꓠ ꓮ, ꓟ ꓜꓰ‐ꓡꓲ ꓗꓪ ꓐꓰ ꓟꓶ ꓔ ꓢꓲ꓾ ꓠꓬꓲꓽ ꓢ ꓫꓵ. ꓘꓴ ꓗꓪ ꓮ ꓘꓶ. ꓣꓳꓺ ꓟ ( ꓡꓳꓼ ꓟꓲ. ) ꓮ ꓟꓲ ꓤ ꓥ ꓡꓳ꓿ ꓕꓮ‐ꓣꓰ‐ꓢꓮ ꓠꓬ ꓞꓲꓼ ꓣꓳˍ ꓕꓯ ꓡꓰ ꓴ‐ꓢ ꓠꓲ, ꓡꓶ ꓔꓯ ꓞꓳ ꓗꓴˍ ꓟ꓾ ꓙꓵꓻ ꓠꓲ, ꓕꓶ ꓢꓴ꓾ ꓮ ꓐꓽ ꓮ ꓟ ꓐꓯ ꓘꓶꓽ ꓔꓯ ꓞꓳ ꓒꓵꓽ ꓗꓴ. ꓢꓴ ꓮ ꓟꓲ ꓤ ꓥ ꓡꓳ꓿ ꓮ ꓐꓽ ꓮ ꓟ ꓠꓵꓻ ꓠꓲ, ꓒ ꓐꓲꓺ ꓟꓶ ꓢꓴ ꓥ ꓡꓳ꓿

ꓬꓲ. ꓮ ꓐꓽ ꓡꓴ‐ꓪꓲꓢ ꓠꓬ ꓬꓲ ꓙꓵꓻ ꓡꓳ. ꓚꓬꓼ (ꓫꓵꓽ ꓫꓵꓺ ) ꓫꓬ, ꓢꓴ ꓥ ꓢꓲ꓾ ꓬꓲ. ꓥ ꓟꓲ ꓣꓳˍ ꓕꓯ ꓔꓲꓺ ꓒ ꓕꓲ ꓣꓳ ꓒꓬꓱꓼ ꓠꓲ, ꓫꓵꓺ ꓢꓴ ꓥ  ꓟꓲ ꓕꓳꓽ ꓶ )ꓡꓮ‐ꓔꓲꓠ) ꓔꓯ ꓢꓳꓺ ꓟꓶ ꓟꓽ ꓓ ꓠꓬꓲ ꓠꓽ ꓗꓷ ꓟ ꓥ ꓡꓳ꓿ ꓕꓱ ꓟ ꓡꓱ ꓬꓲ. ꓟ, ꓟ ꓜꓰ‐ꓡꓲ ꓟꓲ ꓔꓲꓺ ꓟ ꓣꓱꓽ ꓚꓳꓽ ꓗꓪ ꓔꓬ ꓕꓯ ꓢꓯꓼ ꓪ ꓟ ꓙꓳ ꓠꓬꓲ ꓠꓽ ꓗꓷ ꓟ ꓥ ꓡꓳ꓿ ꓮ ꓐꓽ ꓮ ꓟ ꓠꓬ꓾ ꓔꓲꓺ ꓒ ꓔꓲꓺ ꓟ ꓣꓱꓽ ꓠꓲ, ꓫꓵꓻ ꓟꓲ ꓟ ꓐ ꓡ ꓟ ꓥ ꓡꓳ꓿

ꓕꓯ‐ꓣꓰ‐ꓢꓯ 4 ꓘꓳꓼ ꓕꓯ ꓡꓰ ꓮꓽ ꓟ  ꓜꓰ‐ꓡꓲ ꓫꓵꓻ ꓢꓲ ꓮ ꓐꓽ ꓡꓴ‐ꓪꓲꓢ ꓡꓰꓽ ꓬꓲ. ꓔꓯ ꓠꓬꓲ ꓡꓳ. ꓪꓴꓽ ꓡˍ ꓡꓳ꓿ ꓕꓯ‐ꓣꓰ‐ꓢꓯ ꓐꓯˍ ꓟ ꓟꓬꓱ. ꓬꓲ. ꓬꓲ ꓢꓶ ꓠꓬ (ꓪ ꓔꓲ. ꓮ ꓟꓲꓽ ꓤ꓾ ꓥ ꓠꓬ꓾ ꓪ ꓔꓲ. ꓡꓳꓼ ꓟꓰ. ꓤ) ꓐꓰ ꓥ ꓡꓳ꓿

ꓕꓮ‐ꓣꓰ‐ꓢꓮ ꓠꓬ ꓣꓳ.ˍ ꓕꓯ ꓡꓰ ꓔꓲꓺ ꓟ ꓮ ꓘꓶ. ꓣꓱꓽ ꓠꓲ, ꓫꓵꓻ ꓢꓴ ꓥ ꓡꓳ꓿ ꓗꓮ‐ꓟꓯ‐ꓡꓮꓲ ꓔꓲꓺ ꓟ ꓣꓱꓽ ꓚꓳꓽ ꓗꓪ ꓔꓲꓺ ꓟ ꓮ ꓘꓶ. ꓬꓰ ꓠꓲ, ꓫꓵꓻ ꓟꓲ ꓬꓲ ꓞꓲꓼ ꓮ ꓘꓶ. ꓣꓳꓺ ꓠꓬꓲ ꓓꓵꓽ ꓡꓰ ꓟ ꓟ ꓓ꓿ ꓖꓳ ꓡꓱ ꓠꓬꓲ ꓔꓲꓺ ꓒ ꓪ ꓔꓲ. ꓔꓬ, ꓗꓪ ꓔꓽ ꓚꓲꓺ ꓙꓳ, ꓙꓳ ꓡꓰ ꓬꓲꓚꓲ ꓛꓬꓼ ꓓꓰ ꓬꓰˍ ꓡꓳ꓿ ꓕꓱ‐ꓣꓰ‐ꓢꓮ ꓠꓬꓲ 15 ꓘꓳꓼ ꓡꓰ ꓙꓳ, ꓢꓰꓼ ꓥ, ꓟꓲ ꓤ ꓠꓬꓲ ꓓꓴ ꓮ ꓙꓵꓽ ꓔꓯ ꓜꓲꓽ ꓧꓪ. ꓠ, ꓟ ꓢꓯꓼ ꓕꓵꓽˍ ꓡꓳ꓿ ꓫ. ꓙꓵꓻ ꓓꓴ ꓮ ꓙꓵꓽ ꓔꓯ ꓜꓲꓽ ꓢꓲ꓾ ꓶꓻ ꓡꓲ ꓓ ꓟ ꓟꓯ ꓢꓲ꓾ ꓬꓲ. ꓫ. ꓙꓵ ꓓꓴ ꓮ ꓙꓵꓽ ꓔꓯ. ꓮ ꓔꓳ. ꓡꓳꓽ ꓕꓽ ꓤ ꓤ ꓗꓪ ꓝꓴꓲ. ꓒꓵꓽ ꓚꓱ, ꓔꓬ, ꓢꓴ ꓐꓱ ꓶ ꓔꓲꓺ ꓖꓶ ꓡꓳ꓿

ꓙꓲꓻ ꓫꓬ ꓢꓴ ꓕꓯ‐ꓣꓰ‐ꓢꓮ ꓬꓰ ꓠꓲ, ꓫꓵˍ ꓟ ꓠꓬ ꓶ ꓤꓺ ꓟꓵꓽ ꓗꓪ ꓙꓰ ꓢꓲ ꓪꓴ‐ꓢ ꓟꓬꓱꓽ ꓟꓯ ꓠꓲ, ꓫꓵˍ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ. ꓖꓳ ꓓꓱꓽ ꓠꓯ.ꓼ ꓗꓪ ꓠꓺ (ꓐꓵꓼ ꓟꓵꓺ ꓠ) ꓙꓳ ꓟ ꓑꓶ. ꓓꓴ ꓚꓳꓽ ꓦꓲ ꓗꓪ ꓡꓰ ꓔꓬ, ꓢꓲ ꓪꓴ‐ꓢ ꓟꓬꓱꓽ ꓟꓯˍ ꓡꓳ꓿ ꓬꓲ ꓠꓬ ꓜꓲꓽ ꓢꓲ ꓐꓽ ꓧꓶꓽ ꓧꓶꓼ ꓐꓰ ꓗ, ꓛꓲ ꓛꓲ ꓡꓰ ꓬꓰˍ ꓡꓳ꓿ ꓕꓱ ꓟ ꓡꓰ ꓟ ꓛꓲ ꓟꓵꓽ ꓗꓳꓺ ꓓꓵ ꓓꓵ ꓗꓪ ꓔꓬ, ꓟ ꓪꓴ‐ꓢ ꓟꓬꓱꓽ ꓬꓰ ꓢꓴ ꓔꓲꓺ ꓒ ꓔꓲꓺ ꓟ꓾ ꓟ. ꓒ ꓟ. ꓟ ꓮ ꓡꓰ ꓕꓲ ꓣꓳ ꓟꓲ ꓠꓲ, ꓟ ꓢꓲ ꓢꓲ ꓫꓬ ꓫꓬ, ꓡꓰ ꓐꓰ ꓐ ꓡ꓾ ꓔꓲꓺ ꓖꓶ ꓐ ꓡ ꓠ, ꓟ ꓟꓲ ꓪꓽ ꓘꓴ ꓔꓲꓺ ꓖꓶˍ ꓡꓳ꓿

ꓬꓲ ꓡꓰ ꓕꓱ ꓡꓱ ꓔꓲꓺ ꓖꓶ ꓢꓲ ꓪ ꓘꓴ ꓟ ꓠꓬ ꓥꓪ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓬꓰˍ ꓟꓲ ꓪ ꓙꓲ ꓪ ꓘꓴ ꓙ ꓢꓲ ꓤꓱꓽ ꓛꓰ ꓔꓯ ꓟꓯ, ꓪꓰ ꓟꓴꓽ ꓦ, ꓡꓰ ꓦꓺ ꓖꓶ ꓩꓴ ꓡ ꓝꓲ ꓠ, ꓟ ꓟꓲ ꓪꓴ‐ꓢ ꓔꓬ, ꓗꓪ ꓓꓰ ꓙ ꓥꓳ ꓐꓰ ꓕꓵꓼ ꓪ ꓖꓶ ꓔꓲ. ꓢꓰꓼ ꓡꓳ꓿ ꓠꓵ ꓠꓲ, ꓠꓬ ꓬꓲ ꓤꓶ ꓗꓪ ꓮ ꓓꓲ ꓪꓴꓽ ꓟ꓾ ꓬꓳꓻ ꓚꓲˍ ꓟ ꓬꓲ. ꓔꓶ ꓙꓱꓼ ꓥ ꓡꓳ꓿ ꓬꓲ ꓞꓲꓼ 24 ꓘꓳꓼ ꓗꓪ ꓐꓵꓼ ꓟꓵꓻ ꓠ ꓠ, ꓠꓬꓲ ꓫꓵꓻ ꓗꓷꓳ꓿ ꓠꓬꓲ ꓣꓳ ꓕꓲ ꓣꓳ ꓟ ꓔꓲꓺ ꓒ ꓪ ꓔꓲ ꓬꓳ‐ꓦ ꓒꓳ‐ꓡꓳ ꓗꓪ ꓐꓰ ꓬꓲ. ꓔꓯ ꓘꓴ ꓜꓲꓼ ꓞꓳ ꓗꓪ ꓢꓷ. ꓠꓲ, ꓙꓳ ꓙꓢꓴ (DOCTORY) ꓙꓵꓽ ꓪ ꓙꓳ ꓢꓴ ꓐꓰ ꓟꓬꓱ ꓓꓳꓽ ꓖꓶ ꓚꓰ. ꓔ ꓖꓶ ꓡꓳ꓿ ꓠꓬꓲ. ꓠꓬꓲ ꓗꓪ ꓠꓬ ꓙꓲ ꓫꓬ ꓢꓴ ꓕꓯ‐ꓣꓰ‐ꓢꓮ ꓠꓬꓺ ꓡꓳ. ꓬꓰ ꓙˍ ꓟ ꓗꓪ ꓐꓰ ꓕꓯ‐ꓣꓰ‐ꓢꓮ ꓟꓬꓱ. ꓠꓯ.ꓼ ꓗꓪ ꓔꓲꓺ ꓟ ꓜꓴꓺ ꓮ ꓟꓬ, ꓜꓴ ꓙꓳ ꓡˍꓳ꓿ ꓡꓳ‐ꓟ ꓟꓵꓽ ꓗꓪ ꓟꓲ ꓕꓮ‐ꓣꓰ‐ꓢꓮ ꓟꓬꓱ. ꓣꓴ ꓔ ꓢꓲ. ꓔꓲꓺ ꓟ ꓜꓴ (2) ꓜꓴ ꓙꓳˍ ꓡꓳ꓿ ꓔꓮꓳꓥ‐ꓙꓲ (ꓔꓮꓴꓠꓖꓬꓲ) ꓢ‐ꓢ‐ꓠꓮ ꓗꓪ ꓢꓰ‐ꓔꓮ‐ꓟꓰꓐ ꓐꓰ ꓘꓴˍ ꓟ ꓔꓲꓺ ꓟ ꓜꓴ ꓟꓲ ꓙꓲ ꓫꓬ ꓢꓴ ꓕꓮ‐ꓣꓰ‐ꓢꓮ ꓟꓬꓱ. ꓗꓪ ꓟ ꓔꓲꓺ ꓟ ꓜꓴ ꓥ ꓡꓳ꓿

ꓢꓰ‐ꓔꓲ‐ꓟꓰꓠ ꓔꓲꓺ ꓟ ꓐꓴ ꓠꓬ ꓟꓲ ꓠꓯ ꓗꓪ ꓢꓲ ꓒ ꓬꓰ ꓢꓴ ꓔꓯ. ꓟꓬ ꓠꓬ ꓠꓬꓲ ꓢꓷ. ꓡ ꓝꓲ ꓢꓲ ꓠꓵ, ꓠꓲ, ꓟꓬ ꓠꓬꓲ ꓢꓷ. ꓐ ꓡ ꓠ, ꓟ ꓐꓯ ꓢꓲ ꓪꓴ‐ꓢ ꓟꓬꓱꓽ ꓬꓰ ꓔꓬ, ꓖꓴˍ ꓡꓳ꓿ ꓕꓱ ꓟ ꓡꓰ ꓟ ꓛꓲ꓾ ꓞꓳ ꓠꓺ ꓔꓯ ꓬꓰ ꓙˍ ꓟ꓾ ꓫꓬ, ꓖꓶˍ ꓟ꓾ (ꓧꓲꓦ) ꓞꓳꓻ ꓠ ꓔꓯ ꓟꓲ ꓠꓬꓲ ꓡꓳ. ꓗꓪꓼ ꓫꓵꓼ ꓖꓶ ꓔꓬ, ꓡꓳ꓿ ꓦ ꓡꓱ ꓙꓰ ꓟꓽ ꓢꓲꓺ ꓢꓲꓺ  ꓬꓰ ꓙ ꓠꓬꓲꓺ ꓙ ꓔꓳ, ꓙ ꓖꓶ ꓔꓬ, ꓟ ꓟꓲ ꓥ ꓡꓳ꓿ ꓖꓳ ꓡꓱ ꓠꓬꓲ ꓡꓲ‐ꓢꓴ ꓗꓪ ꓐꓰ ꓢꓰ‐ꓔꓮ‐ꓟꓰꓠ ꓔꓲꓺ ꓟ ꓜꓴ ꓗꓪ ꓔꓲꓺ ꓟ ꓣꓱꓽ ꓠꓲ, ꓫꓵꓻ ꓐꓭˍ ꓠꓬ ꓥꓪ ꓠꓴ ꓔꓯ. ꓐꓯ ꓖꓶ ꓡ ꓓˍ ꓡꓳ꓿ ꓐꓳ ꓔꓲꓺ ꓟ ꓥꓪ‐ꓐꓳ‐ꓟꓲ