ꓟꓬꓱꓺ ꓓꓳꓽ ꓙꓳˍ ꓟ Abraham Lincoln ꓚꓺ ꓟꓲꓽ ( Abraham Lincoln) Popular person

ꓟꓬꓱꓺ ꓓꓳꓽ ꓙꓳˍ ꓟ Abraham Lincoln ꓚꓺ ꓟꓲꓽ (St. Abraham Lincoln)

Abraham Lincoln ꓠꓬ ꓴꓢꓮ ꓗꓴꓷꓼ ꓔꓯ ꓙꓵꓽ ꓗꓷ ꓢꓴ (16) ꓣꓳ ꓟ ꓢꓲꓽ ꓒ ꓥ ꓢꓲ ꓠꓬꓲ ꓬꓲ ꓠꓬ ꓡ ꓞꓳ ꓔꓯ ꓚꓳ ꓑ ꓬꓰ ꓝꓲ ꓟ ꓔꓯ ꓠꓽ ꓗꓷ ꓠ, ꓟ ꓖꓪꓽ ꓙꓱ ꓗꓷ ꓢꓴ ꓮ ꓘꓶ. ꓛꓲ ꓟꓬꓱꓽ ꓓꓳꓽ ꓙꓳˍ ꓢꓴ ꓕꓲ ꓣꓳ ꓥ ꓡꓳ꓿ ꓬꓲ ꓔꓯ 1809 ꓘꓳꓼ ꓕꓯ ꓬꓲ ꓔꓯ ꓴꓢꓮ ꓗꓴꓷꓼ ꓗꓪ ꓦꓵꓻ ꓗꓷ ꓪ꓿ ꓬꓲ ꓐ, ꓐ ꓟꓬꓱꓽ ꓠꓬ Thomas Lincoln ꓥ ꓢꓲ ꓠꓬꓲ ꓬꓲ ꓟ, ꓟ ꓟꓬꓱꓽ ꓠꓬ Nancy Hank Lincoln ꓥ ꓡꓳ꓿ ꓬꓲ ꓐ, ꓐ ꓠꓬ ꓟꓬꓱꓽ ꓬꓰ ꓜ ꓢꓴ ꓕꓲ ꓣꓳ ꓥ ꓢꓲ ꓠꓬꓲ ꓬꓲ ꓪ ꓕꓲ ꓦꓲꓻ ꓠꓬ ꓮ ꓘꓶ. ꓫ. ꓟ ꓦꓲ ꓘꓴꓽ ꓥ ꓡꓳ꓿ ꓬꓲ ꓪ ꓕꓲ ꓦꓲꓻ ꓠꓬ ꓦꓲꓻ ꓤ ꓤ ꓕꓲ ꓦꓲꓻ ꓗꓪ ꓔꓬ ꓗꓷꓳ꓿

Abraham Lincoln ꓠꓬ ꓞꓲꓼ ꓣꓳ ꓟ ꓙꓵ, ꓕꓯ ꓬꓲ ꓪ ꓕꓲ ꓦꓲꓻ ꓠꓬ USA ꓗꓴꓷꓼ Indiana ꓟꓵꓽ ꓗꓪ ꓚꓲ. ꓡꓰ ꓢꓲ ꓠꓬꓲ ꓝꓮꓲ ꓕꓲ ꓧꓪ, Illinois ꓗꓪ ꓔꓬ ꓗꓷꓳ꓿ Abraham Lincoln ꓠꓬ ꓟꓲ ꓠꓯ ꓢꓷ. ꓠꓲ, ꓢꓳꓻ ꓦꓲꓻ ꓗꓪ ꓕꓲ ꓘꓳꓼ ꓡꓰ ꓢꓳꓻ ꓪ ꓢꓴ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓠꓬ ꓕꓳ ꓶ ꓵꓻ ꓟ ꓔꓯ ꓮ ꓘꓶ. ꓠꓲ, ꓠꓵ ꓢꓴ ꓕꓲ ꓣꓳ ꓥ ꓡꓳ꓿ ꓕꓱ ꓡꓱ ꓐꓰ ꓬꓲ ꓠꓬ ꓬꓲ ꓒ ꓡ ꓟ ꓕꓲ ꓒꓳ, ꓗꓪ ꓐꓰ ꓕꓳ ꓵꓻ ꓟ ꓢꓳꓻ ꓟ ꓔꓯ ꓬꓰ ꓔꓯ ꓢꓯꓼ ꓕꓵꓼ ꓗꓷꓳ꓿ ꓬꓲ ꓞꓲꓼ (22) ꓘꓳꓼ ꓙꓳˍ ꓟ ꓙꓵ, ꓕꓯ ꓬꓲ ꓠꓬ ꓬꓲ ꓪ ꓦꓲꓻ ꓗꓪ ꓐꓰ ꓓꓳ ꓝꓲ ꓢꓲ ꓠꓬꓲ ꓟꓬꓱꓽ ꓬꓰ ꓠ, ꓟ ꓙꓰ ꓗꓷꓳ꓿

ꓬꓲ ꓟꓬꓱꓽ ꓬꓰ ꓟ ꓗꓪ ꓬꓲ ꓠꓬ ꓮ ꓘꓶ. ꓛꓲ ꓔꓱ ꓚꓵ. ꓟ ꓮ‐ꓓꓯ ꓟꓬꓱꓽ ꓔꓯ ꓪ ꓡꓰ ꓟ ꓥ ꓡꓳ꓿ ꓕꓲ ꓧꓪ, ꓙꓳ ꓕꓯ ꓬꓲ ꓟꓬꓱꓽ ꓬꓰ ꓔꓬ ꓟ ꓙꓲ ꓗꓪ ꓡ ꓞꓳ ꓕꓲ ꓣꓳ ꓡꓰ ꓶꓻ ꓤ ꓪꓴ ꓡ ꓟ ꓙꓵ, ꓕꓯ ꓒꓴ ꓖꓴ ꓟꓬ, ꓡꓰ ꓟ ꓪꓴ. ꓠꓬꓲ ꓡꓲꓠꓚꓳꓡꓠ ꓠꓬ ꓖꓳ ꓟꓶꓼ ꓘꓶꓼ ꓗꓪ ꓟꓲ 4 ꓔꓷ ꓶꓻ ꓟ ꓔꓶ ꓗꓪ ꓙ ꓖꓴ ꓫꓱ, ꓢꓲ ꓠꓬꓲ ꓒꓴ ꓔꓯ ꓖꓶ ꓡꓰ ꓟ ꓥ ꓡꓳ꓿

1832 ꓘꓳꓼ ꓕꓯ ꓬꓲ ꓔꓬ ꓟ ꓗꓴꓷꓼ ꓫꓴꓻ ꓗꓪ ꓢꓲꓽ ꓒ ꓟꓬꓱꓽ ꓬꓰ ꓠ, ꓟ ꓟꓯꓻ ꓔꓯꓺ ꓡꓯꓽ ꓘꓳꓼ ꓗꓷ ꓟ ꓙꓵ, ꓕꓯ ꓬꓲ ꓞꓳꓺ ꓡꓰ ꓟ ꓥ ꓡꓳ꓿ ꓖꓳ ꓗ. ꓠꓯ ꓬꓲ ꓠꓬ ꓴꓢꓮ ꓟꓯꓼ ꓜꓴꓻ ꓗꓪ ꓓꓵ ꓡꓰ ꓢꓲ ꓠꓬꓲ ꓟꓯꓼ ꓒꓽ ꓓꓽ ꓕꓲ ꓪ ꓒꓬꓱꓼ ꓡ ꓪ꓿ 1834 ꓘꓳꓼ ꓕꓯ Abraham Lincoln ꓠꓬ ꓢꓲꓽ ꓒ ꓟꓬꓱꓽ ꓬꓰ ꓠ, ꓟ Illinois ꓟꓵꓽ ꓗꓪ ꓐꓰ ꓢꓲꓽ ꓒ ꓟꓬꓱꓽ ꓬꓰ ꓜꓴꓻ ꓗꓪ ꓑ ꓪ ꓡꓰꓳ꓿

ꓖꓳ ꓗ. ꓠꓯ ꓬꓲ ꓠꓬ ꓫꓵꓽ ꓘꓶꓽ ꓢꓴ ꓟꓬꓱꓽ ꓔꓯ ꓬꓰ ꓗꓷꓳ꓿ 1837 ꓘꓳꓼ ꓕꓯ ꓬꓲ ꓠꓬ ꓢꓑꓣꓲꓠꓖꓝꓲꓰꓡꓓ ꓗꓪ ꓔꓬ ꓗꓷꓳ꓿ ꓕꓱ ꓗꓪ ꓬꓲ ꓠꓬ ꓫꓵꓽ ꓘꓶꓽ ꓔꓯ ꓮ ꓘꓶ. ꓛꓲ ꓢꓳꓻ ꓣꓴ ꓪ ꓡꓰꓳ꓿ 1842 11 ꓦ ꓟ 4 ꓠꓬꓲ ꓬꓲ ꓞꓲꓼ (33) ꓘꓳꓼ ꓕꓯ ꓟꓮꓣꓬ ꓔꓳꓓꓓ ꓐꓰ ꓡꓯꓽ ꓒꓯꓼ ꓝ. ꓗꓷꓳ꓿ ꓬꓲ ꓪ ꓠꓬꓲꓽ ꓫꓵˍ ꓠꓬ ꓤ ꓠꓱ ꓤ (4) ꓣꓳ ꓘꓳ, ꓣꓴ ꓪ ꓡꓰꓳ꓿ ꓬꓲ ꓪ ꓟꓬꓱꓽ ꓐꓴ ꓠꓬ Rober Lincoln Edward Lincoln, Willie Lincoin, Tad Lincoln ꓐꓴ ꓥ ꓡꓳ꓿ 1846, ꓕꓯ Abraham Lincoln ꓔꓯ ꓴꓢꓮ ꓗꓴꓷꓼ ꓢꓲꓽ ꓒ ꓐꓴ ꓠꓯ, ꓗꓪ ꓐꓰ ꓝꓲ ꓓꓴ ꓕꓲ ꓪ ꓒꓬꓱꓼ ꓡ ꓪ꓿ 1860 ꓘꓳꓼ ꓬꓲ ꓞꓲꓼ (51) ꓘꓳꓼ ꓕꓯ ꓬꓲ ꓠꓬ ꓴꓢꓮ ꓗꓴꓷꓼ ꓔꓯ ꓙꓵꓽ ꓢꓴ ꓢꓲꓽ ꓒ ꓓꓽ ꓒꓬꓱꓼ ꓡ ꓟ ꓥ ꓡꓳ꓿ Abraham Lincoln ꓴꓢꓮ ꓗꓴꓷꓼ ꓔꓯ ꓙꓵꓽ ꓟ ꓙꓵ, ꓕꓯ ꓮ ꓘꓶ. ꓫꓵꓽ ꓪꓴꓽ ꓔꓳ, ꓜꓳ ꓔꓬ ꓟꓲ ꓥ ꓡꓳ꓿ ꓖꓳ ꓟ ꓠꓬ ꓴꓢꓮ ꓗꓴꓷꓼ ꓫꓴꓻ ꓖꓴ ꓪꓴ. ꓐꓰ ꓖꓴ ꓟꓶ. ꓗꓪ ꓔꓬ ꓟ ꓑ ꓫꓬ ꓐꓴ ꓫꓵꓽ ꓪꓴꓽ ꓮ ꓟꓬ, ꓙꓳ ꓟ ꓟꓲ ꓙꓵ, ꓟꓲ ꓥ ꓡꓳ꓿ 

ꓟꓽ ꓪ ꓡꓯꓽ ꓘꓳꓽ ꓟ ꓗꓪ ꓐꓰ ꓮ ꓘꓶ. ꓛꓲ ꓪꓴꓽ ꓟ ꓕꓲ ꓫꓵꓽ ꓠꓬ ꓡ ꓞꓳ ꓔꓯ ꓚꓳ ꓑ ꓬꓰ ꓝꓲ ꓟꓬꓱꓽ ꓔꓯ ꓠꓽ ꓗꓷ ꓠ, ꓟ ꓥ ꓡꓳ꓿ ꓴꓢꓮ ꓗꓴꓷꓼ ꓫꓴꓻ ꓖꓴ. ꓟꓶ. ꓕꓲ ꓒꓳ, ꓗꓪ ꓔꓬ ꓟ ꓑ ꓫꓬ ꓐꓴ ꓠꓬ ꓡ ꓞꓳ ꓔꓯ ꓛꓳ ꓑ. ꓬꓰ ꓝꓲ ꓟ ꓟꓬꓱꓽ ꓔꓯ ꓟꓽ ꓠꓲ, ꓫꓵˍ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓖꓴ ꓪꓴ. ꓕꓲ ꓒꓳ, ꓗꓪ ꓔꓬ ꓟ ꓑ ꓫꓬ ꓐꓴ ꓠꓬ ꓛꓳ ꓑ. ꓬꓰ ꓝꓲ ꓟ ꓔꓯ ꓠꓲ, ꓫꓵˍ ꓢꓴ ꓐꓴ ꓥ ꓡꓳ꓿ Abraham Lincoln ꓥ ꓟꓲ ꓛꓳ ꓑ ꓬꓰ ꓝꓲ ꓟ ꓔꓯ ꓟꓽ ꓠꓲ, ꓫꓵˍ ꓟ ꓥ ꓡꓳ꓿ 1960 ꓘꓳꓼ ꓔꓯ ꓬꓲ ꓠꓬ Republican party ꓔꓯ ꓧꓳꓽ ꓪꓴ. ꓟꓴ ꓢꓴ ꓒꓬꓱꓼ ꓡ ꓪ꓿ ꓮ ꓫꓵꓽ ꓑꓶ. ꓓꓴ ꓥ ꓐꓯ ꓠꓬ ꓬꓲ ꓠꓬ ꓖꓴ ꓪꓴ. ꓕꓲ ꓒꓳ, ꓔꓯ ꓬꓰ ꓙ ꓟ ꓑꓶ. ꓓꓴ ꓥ ꓡꓳ꓿

Abraham Lincoln ꓠꓬ ꓖꓴ ꓟꓶ. ꓕꓲ ꓒꓳ, ꓗꓪ ꓔꓬ ꓟ ꓑ ꓫꓬ ꓐꓴ ꓔꓯ ꓟꓽ ꓬꓰ ꓙ ꓗꓷ ꓟ ꓥ ꓡꓳ꓿ ꓬꓲ ꓗꓴꓷꓼ ꓙꓵꓽ ꓢꓴ ꓒꓬꓱꓼ ꓡ ꓟ ꓙꓵ, ꓕꓯ ꓗꓴꓷꓼ ꓫ   ꓴꓻ ꓮ ꓟꓬ ꓠꓬ ꓴꓢꓮ ꓗꓴꓷꓼ ꓗꓪ ꓑ ꓠꓲ, ꓟꓽ ꓫꓵˍ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓢꓲꓽ ꓒ Abraham Lincoln ꓠꓬ ꓴꓢꓮ ꓗꓴꓷꓼ ꓔꓯ ꓕꓲ ꓪ ꓒꓬꓱꓼ ꓡ ꓠ, ꓟ ꓢꓯꓼ ꓕꓵꓼ ꓢꓴ ꓥ ꓡꓳ꓿ 1861 ꓘꓳꓼ ꓕꓯ ꓴꓢꓮ ꓗꓴꓷꓼ ꓘꓴꓽ ꓗꓪ ꓢꓰꓼ ꓡꓯꓽ ꓘꓳ ꓓꓴ ꓙꓳ ꓡꓰ ꓟ ꓥ ꓡꓳ꓿ ꓕꓱ ꓟ ꓠꓬ ꓘꓴꓽ ꓗꓪ ꓔꓬ ꓟ ꓑ ꓫꓬ ꓐꓴ ꓜꓴꓻ ꓕꓲ ꓜꓴꓻ ꓡꓰ ꓕꓲ ꓜꓴꓻ ꓡꓰ ꓢꓰꓼ ꓡꓯꓽ ꓘꓳ ꓟ ꓥ ꓢꓲ (4) ꓘꓳꓼ ꓟꓶ ꓫꓵˍ ꓡꓰ ꓟ ꓥ ꓡꓳ꓿

1863 ꓘꓳꓼ 1 ꓦ ꓟ 1 ꓠꓬꓲ ꓕꓯ ꓢꓲꓽ ꓒ Abraham Lincoln ꓠꓬ ꓚꓳ ꓑ ꓬꓰ ꓝꓲ ꓟ ꓟꓬꓱꓽ ꓔꓯ ꓠꓽ ꓗꓷ ꓠ, ꓟ ꓐꓯ ꓑꓶ ꓗꓷ ꓟ ꓥ ꓡꓳ꓿ ꓕꓱ ꓟ ꓠꓬ ꓴꓢꓮ ꓗꓴꓷꓼ ꓫꓴꓻ ꓕꓲ ꓐꓱ ꓗꓪ ꓔꓬ ꓟ ꓚꓳ. ꓑ ꓐꓴ ꓡꓲ. ꓙꓰ ꓟ ꓟꓶ ꓡꓰꓳ꓿ ꓖꓳ ꓗ. ꓠꓯ ꓟꓽ ꓟꓶ ꓫꓵˍ ꓟ ꓙꓵ, ꓔꓯ ꓡꓲꓠꓚꓳꓡꓠ ꓠꓬ ꓴꓢꓮ ꓗꓴꓷꓼ ꓘꓴꓽ ꓗꓪ ꓚꓳ. ꓑ ꓟꓽ ꓬꓰ ꓝꓲ ꓠ, ꓟ ꓗꓴꓷꓼ ꓙꓵꓽ ꓔꓶ. ꓗꓪ ꓐꓰ ꓕꓳ ꓶ ꓐꓳ ꓔꓶ ꓗꓷꓳ꓿ ꓗꓴꓷꓼ ꓘꓴꓽ ꓗꓪ ꓒꓬꓱꓼ ꓔꓬ ꓟ ꓫꓵꓽ ꓪꓴꓽ ꓠꓬ 1865 ꓘꓳꓼ 4 ꓦ ꓟ 9 ꓠꓬꓲ ꓕꓯ ꓠꓽ ꓗꓷꓳ꓿ ꓢꓲꓽ ꓒ Abraham Lincoln ꓠꓬ ꓴꓢꓮ ꓗꓴꓷꓼ ꓔꓯ ꓕꓲ ꓪ ꓢꓯ. ꓔꓬ ꓠ, ꓟ ꓔ ꓡꓯꓽ ꓘꓳ, ꓠ, ꓟ ꓟ ꓢꓯꓼ ꓕꓵꓼ ꓗꓷꓳ꓿

Abraham Lincoln ꓠꓬ ꓮ ꓘꓶ. ꓛꓲ ꓓꓻ ꓢꓴ ꓗꓴꓷꓼ ꓙꓵꓽ ꓢꓴ ꓕꓲ ꓣꓳ ꓡꓰ ꓟꓽ ꓞꓲ ꓴꓢꓮ ꓗꓴꓷꓼ ꓙꓵꓽ ꓢꓴ ꓢꓲꓽ ꓒ ꓐꓴ ꓠꓯ, ꓗꓪ ꓮ ꓘꓶ. ꓛꓲ ꓟꓬꓱꓽ ꓓꓳꓽ ꓙꓳ ꓢꓴ ꓕꓲ ꓣꓳ ꓐꓰ ꓚꓺ ꓟꓲꓽ ꓗꓪ ꓐꓳ ꓔ ꓟ ꓥ ꓡꓳ꓿ ꓬꓲ ꓡꓰ ꓗꓴꓷꓼ ꓔꓯ ꓙꓵꓽ ꓢꓲ ꓠꓬꓲ ꓧꓳꓽ ꓪꓴ. ꓟꓴ ꓟ ꓙꓵ, ꓔꓯ ꓑ ꓫꓬ ꓐꓴ ꓢꓯꓼ ꓟꓬ, ꓔꓯ ꓮ ꓟꓬ, ꓛꓲ ꓚꓬꓴ ꓙ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓬꓲ ꓠꓬ ꓴꓢꓮ ꓗꓴꓷꓼ ꓗꓪ ꓐꓰ ꓮ ꓘꓶ. ꓛꓲ ꓓꓻ ꓒꓽ ꓕꓲ ꓣꓳ ꓥ ꓡꓳ꓿

ꓬꓲ ꓐꓬꓱ ꓔꓯ ꓴꓢꓮ ꓒꓴ (5) ꓒꓯ ꓗꓪ ꓔꓳ ꓔ ꓟ ꓥ ꓡꓳ꓿ ꓖꓳ ꓟ ꓡꓰ ꓟꓽ ꓛꓲ ꓟꓬꓱꓽ ꓓꓳ ꓙꓳ ꓢꓴ ꓐꓴ ꓔꓯ ꓚꓵ. ꓟꓶ ꓓꓴ ꓪꓽ ꓚꓲ ꓗꓪ ꓥ ꓟꓲ Abraham Lincoln ꓐꓬꓱ ꓔ ꓐꓳ ꓔ ꓟ ꓥ ꓡꓳ꓿ ꓗꓴꓷꓼ ꓘꓴꓽ ꓗꓪ ꓒꓬꓱꓼ ꓔꓬ ꓟ ꓫꓵꓽ ꓪꓴꓽ ꓠꓽ ꓗꓷ ꓗ. ꓠꓯ ꓕꓲ ꓫꓵꓽ ꓠꓽ ꓕꓯ ꓬꓲ ꓠꓬ ꓬꓲ ꓦꓲꓻ ꓢꓲꓽ ꓟ ꓐꓰ ꓢꓯ. ꓐꓬꓱ ꓔꓯ ꓡꓳ. ꓠꓬꓲ ꓗꓷ ꓟ ꓙꓵ, ꓔꓯ ꓕꓱ ꓗꓪ ꓬꓲ ꓔꓯ ꓟꓽ ꓙꓲ ꓢꓴ ꓕꓲ ꓣꓳ ꓡꓰ ꓡ ꓚꓴ. ꓑꓳ ꓗꓪ ꓐꓰ ꓑꓶ ꓢꓰꓼ ꓗꓷꓳ ꓕꓱ ꓬꓲ ꓔꓶ. ꓠꓬ ꓪꓮꓢꓧꓲꓠꓖꓔꓳꓠ ꓓ. ꓚ ꓗꓪ ꓥ ꓡꓳ꓿

ꓢꓲꓽ ꓒ Abraham Lincoln ꓠꓬ ꓗ. ꓠꓯ ꓠꓯꓼ ꓙꓵ, ꓕꓯ ꓧꓪꓽ ꓖꓳ ꓓꓱ ꓡꓳꓻ ꓬꓰ  ꓟ ꓥ ꓡꓳ꓿ 1865 ꓩ꓾ꓡ 4 ꓟ 15 ꓠꓬꓲ ꓕꓯ ꓬꓲ ꓞꓲꓼ (56) ꓘꓳꓼ ꓕꓯ ꓧꓪꓽ ꓖꓳ ꓓꓱ ꓡꓳ ꓬꓰ ꓟ ꓥ ꓡꓳ꓿ ꓬꓲ ꓠꓬ ꓴꓢꓮ ꓚꓺ ꓟꓲꓽ ꓗꓪ ꓓꓽ ꓪꓴ. ꓕꓲ ꓣꓳ ꓟ ꓟꓽ ꓙꓲ ꓢꓴ ꓡꓰ ꓢꓰꓼ ꓟꓶ ꓡꓰ ꓢꓴ ꓥ ꓡꓳ꓿ ꓬꓲ ꓡꓰ ꓐꓯ ꓔ ꓟ ꓫ. ꓕꓱ ꓘꓶꓽ ꓠꓬ ꓠꓬꓲ. ꓠꓬꓲ ꓠꓴ    ꓬꓰ ꓗꓷ ꓟ  ꓟꓬꓱꓽ ꓗꓪ ꓐꓰ ꓛꓲ ꓡ ꓟ ꓙꓵ, ꓗꓪ ꓬꓰ ꓠ, ꓔ ꓟ ꓟꓬꓱꓽ ꓔꓯ ꓠꓴ ꓧꓪ, ꓡꓰ ꓓꓻ ꓡꓳ ꓐꓰ ꓐꓯ ꓔ ꓟ ꓥ ꓡꓳ꓿