ꓟꓬꓱꓺ ꓓꓳꓽ ꓙꓳˍ ꓟ Charles Darwin ꓟꓸ ꓟꓲꓽ

ꓬꓲꓸ ꓠꓬ Natural  ꓐꓰ Geology ꓔꓯꓸ ꓟꓳꓸ ꓢꓷꓸ ꓠꓲꓹ ꓙꓳ ꓒꓽ ꓕꓲ ꓣꓳ ꓥ ꓡꓳ= ꓬꓲ ꓔꓯ 1809 ꓘꓳꓼ 2 ꓦ ꓕꓯ꓾ England  ꓗꓴꓷꓼ Shropshire  ꓗꓪ ꓟ Shrewsbury ꓪꓽ ꓚꓲꓺ ꓗꓪ ꓦꓵꓻ ꓔ ꓡꓳ=

ꓬꓲꓸ ꓐꓹ ꓐ ꓟꓬꓱ ꓠꓬ Robert Darwin ꓥ ꓢꓲ꓾ ꓬꓲꓸ ꓟꓹ ꓟ ꓔꓯ ꓠꓬ Susannah Darwin ꓐꓰ ꓟꓬꓱ ꓔ ꓟ ꓥ ꓡꓳ= ꓬꓲꓸ ꓐꓹ ꓐ ꓠꓬ ꓠꓻ ꓫꓬꓹ ꓒ ꓐꓰ ꓒꓴꓻ ꓔꓳꓹ ꓙ ꓢꓴ ꓥ ꓢꓲ꓾ ꓬꓲꓸ ꓟꓹ ꓟˍ ꓟꓲ ꓠꓻ ꓫꓬꓹ ꓢꓴ ꓕꓲ ꓣꓳ ꓥ ꓡꓳ= ꓬꓲꓸ ꓪ 6 ꓫꓵꓸ ꓘꓴꓽ ꓗꓪ ꓬꓲꓸ ꓠꓬ ꓥꓪꓽ ꓣꓳ ꓕꓲ ꓣꓳ ꓟ ꓤ ꓥ ꓡꓳ=

ꓬꓲ ꓠꓬ Edinburgh  ꓠꓯꓺ ꓞꓲꓼ ꓢꓳꓺ ꓦꓲꓻ ꓓꓽ ꓟ ꓗꓪ ꓟꓽ ꓓꓯꓺ ꓢꓰꓽ ꓕꓯ꓾ 1818 ꓘꓳꓼ 11 ꓦ ꓗꓪ ꓐꓰ ꓪꓴꓸ ꓔꓴ ꓢꓲ  Anglican Shrewsbury  ꓢꓳꓺ ꓦꓲꓻ ꓗꓪ ꓐꓰ ꓢꓷꓸ ꓠꓲꓹ ꓕꓳ ꓶ ꓢꓳ ꓣꓴ ꓗꓷꓳ=

ꓬꓲꓸ ꓠꓬ ꓓꓽ ꓪꓴꓸ ꓧꓪ ꓟꓶ ꓔ ꓟ ꓔꓯ 1827 ꓘꓳꓼ 3 ꓦ ꓟ 27 ꓕꓯ Plinian ꓗꓪ ꓟꓸ ꓖꓶ ꓗꓷꓳ=ꓬꓲꓻ ꓙꓬ ꓗꓪ ꓔꓬ ꓟ ꓢꓯꓸ ꓫꓵꓽ ꓥ ꓟ oyster  ꓗꓴꓹ ꓙꓲꓻ ꓕꓯꓽ ꓢꓲ ꓗꓪ ꓟꓳ ꓪˍ ꓟ ꓬꓲꓸ ꓠꓯꓺ ꓠꓯꓺ ꓠꓬ skate leech  ꓐꓯˍ ꓟ ꓦꓰꓼ ꓩꓴ ꓥ ꓡꓳ=

ꓬꓲꓸ ꓠꓬ ꓠꓯꓺ ꓞꓲꓼ ꓚꓱꓹ ꓔꓯꓸ ꓟꓳꓸ ꓠꓲꓹ ꓟ ꓟꓽ ꓙꓳ ꓟ ꓪꓴꓸ ꓠꓬꓲ BA ꓙꓵꓽ ꓪꓴꓸ ꓛꓴꓽ ꓟꓶ ꓠꓹ ꓟ ꓐꓱ ꓶ Christ ꓟꓴꓺ ꓕꓲꓸ ꓢꓳꓺ ꓦꓲꓻ ꓗꓪ ꓬꓲꓸ ꓟꓬꓱ ꓧꓳꓽ ꓖꓶ ꓠꓹ ꓟ ꓬꓲꓸ ꓐꓹ ꓐ ꓔꓯ ꓐꓯ ꓖꓶ ꓗꓷꓳ= ꓬꓲꓸ ꓠꓬ ꓬꓲꓸ ꓢꓳꓺ ꓔꓬꓹ ꓟ ꓚꓱꓹ ꓢꓲꓸ ꓟꓽ ꓞꓲꓺ botany ꓔꓯ ꓪ ꓙꓲꓻ ꓢꓳꓺ ꓠꓲꓹ ꓟ ꓙꓳˍ ꓡꓳ= ꓬꓲꓸ ꓠꓬ 1831 ꓕꓯ ꓟꓴꓺ ꓕꓲꓸ ꓢꓳꓺ ꓦꓲꓻ ꓗꓪ ꓐꓰ ꓙꓵꓽ ꓪꓴꓸ ꓛꓴꓽ ꓟꓶ ꓡꓰꓳ=

1831 ꓕꓯ Darwin ꓠꓬ ꓬꓲꓻ ꓙꓬꓻ ꓟꓯꓼ ꓡꓲꓺ HMS Beagle ꓐꓰ ꓙꓰ ꓗꓷꓳ= Darwin ꓠꓬ ꓬꓲꓸ ꓛꓲꓺ ꓬꓰ ꓖꓴ ꓟꓵꓽ ꓮ ꓙꓵꓽ ꓗꓪ ꓟ ꓢꓲꓹ ꓜꓲ ꓢꓲꓹ ꓟꓲꓺ ꓐꓰ ꓙꓱꓽ ꓤ ꓐꓴ ꓔꓯ ꓧꓪ ꓙꓰˍ ꓟ ꓥ ꓡꓳ= ꓡꓲꓺ ꓐꓰ ꓙꓰ ꓗꓷ ꓟ ꓠꓬ 5 ꓘꓳꓼ ꓛꓲꓺ ꓗꓷ ꓡꓰꓳ=

Charles Darwin ꓐꓱ ꓶ ꓮ ꓘꓶꓸ ꓬꓳꓸ ꓚꓵˍ ꓟ ꓬꓲꓸ ꓙꓵꓹ ꓠꓬ Galapagos Islands ꓗꓪ ꓛꓲꓺ ꓬꓰ ꓕꓯ ꓥꓳ= ꓖꓳ ꓬꓲꓻ ꓡꓴꓽ ꓐꓱ ꓘꓶꓽ ꓟꓵꓽ ꓐꓴ ꓠꓬ (island) ꓾ ꓟꓲ ꓠꓯ ꓕꓯꓽ ꓢꓲ ꓗꓪ ꓟ ꓠꓱꓸ ꓐꓯꓼ ꓗꓴꓷꓼ ꓠꓱꓸ ꓐꓯꓼ ꓟꓵꓽ ꓗꓪ ꓟꓽ ꓙꓳ ꓟ ꓢꓲꓹ ꓜꓲ ꓐꓰ ꓙꓱꓽ ꓤ ꓐꓴ ꓦꓲꓻ ꓥ ꓡꓳ=ꓬꓲꓻ ꓙꓬꓽ ꓘꓶꓽ ꓟꓵꓽ ꓕꓲꓽ ꓖꓺ ꓡꓰ ꓕꓲꓽ ꓖꓺ ꓗꓪ ꓟꓽ ꓫꓱꓸ ꓡꓯꓽ ꓘꓳ ꓟ ꓪꓴꓸ-ꓑ-ꓡꓽ-ꓗꓪꓻ ꓐꓰ ꓐꓯˍ ꓟ ꓪꓴ-ꓗꓴꓰ ꓮ ꓟꓬꓹ ꓙꓳˍ ꓟ ꓔꓯ Darwin ꓚꓬꓹ ꓪ ꓗꓷ ꓟ ꓥꓳ=

Darwin ꓠꓬ ꓬꓲꓸ ꓞꓲꓼ 29 ꓘꓳꓼ ꓛꓲꓺ ꓡˍ ꓟ 1839 ꓘꓳꓼ ꓕꓯ꓾ ꓬꓲꓸ ꓫꓵꓽ ꓬꓲꓸ ꓧꓪ ꓕꓲ ꓣꓳ ꓥ ꓟ Emma Wedgewood ꓐꓰ ꓡꓯꓽ ꓒꓯꓹ ꓝ ꓗꓷꓳ=

Beagle ꓐꓰ ꓟꓬꓱ ꓔ ꓟ ꓡꓲꓺ England ꓗꓪ ꓬꓲꓼ ꓛꓲꓺ ꓡ ꓗꓸ ꓠꓯꓸ ꓾ Darwin ꓠꓬ ꓬꓲꓸ ꓧꓪ ꓔ ꓟ ꓟꓳ ꓔ ꓟ ꓔꓯ ꓬꓲ ꓙꓲꓻ ꓧꓪ ꓢꓲ ꓢꓳ ꓣꓴˍ ꓕꓯ ꓾ ꓧꓶꓸ ꓕꓯ ꓟꓽ ꓕꓯꓽ ꓢꓲꓺ ꓟꓬꓽ ꓠꓬꓲ ꓜꓲ ꓜꓲ ꓟꓵ ꓟꓵ ꓢꓷꓸ ꓡꓰ ꓪ=

ꓬꓲꓻ ꓙꓬ ꓘꓶꓽ ꓟꓵꓽ ꓮ ꓙꓵꓽ ꓗꓪ ꓟ ꓠꓬꓹ ꓫꓵꓽ ꓐꓴ ꓫꓱꓸ ꓡꓯꓽ ꓘꓳ ꓪꓽ ꓡꓯꓽ ꓘꓳꓹ ꓟꓲ ꓾ ꓕꓲꓽ ꓟꓵꓽ ꓗꓪ ꓟ ꓠꓬꓹ ꓐꓴ ꓔꓯ ꓠꓬ ꓟꓽ ꓫꓱꓸ ꓟ ꓟꓷꓽ ꓠꓷꓹ ꓙꓳˍ ꓡꓳ= Darwin ꓠꓬ ꓠꓱꓸ ꓐꓯꓼ ꓙꓱꓽ ꓤ ꓐꓰ ꓬꓲꓸ ꓜꓲ ꓐꓴ ꓔꓯ ꓧꓪ ꓢꓳ ꓣꓴ ꓪꓴꓸ ꓔꓴ ꓢꓲ ꓬꓲ ꓠꓬ natural selection ꓐꓯˍ ꓟ theory ꓔꓯ ꓫꓬꓹ ꓗꓷ ꓟ ꓥꓳ= Theory ꓖꓳ ꓟ ꓠꓬ ꓞꓳ ꓤ ꓮ ꓡꓰ ꓐꓰ ꓟꓬꓽ ꓡ ꓟ ꓔꓯ ꓐꓯ ꓟꓳꓸ ꓖꓶ ꓔ ꓡꓳ= Darwin ꓠꓬ ꓬꓲꓸ ꓧꓪꓺ ꓟꓳ ꓔ ꓟ theory ꓠꓬ ꓞꓳ ꓤ ꓐꓴ ꓔꓯ ꓠꓲꓹ ꓟ ꓦꓶꓻ ꓡꓰ ꓝꓲˍ ꓟ ꓔꓯ ꓢꓷˍ ꓟ ꓪꓴꓸ ꓠꓬꓲ꓾ ꓬꓲꓸ ꓐꓳ ꓔ ꓟ ꓔꓯ ꓬꓲꓸ ꓑ ꓫꓬ ꓐꓴ ꓟꓲꓽ ꓙꓬ ꓗꓪ ꓟꓽ ꓟꓸ ꓖꓶꓽ ꓗꓷ=

On the Origin of Species ꓐꓯˍ ꓟ ꓕꓳꓽ ꓶꓽ ꓑꓷꓠꓽ ꓠꓬ ꓡꓳꓹ ꓬꓰ ꓟ 1859 ꓘꓳꓼ ꓕꓯ ꓓꓳ ꓡ ꓗꓷꓳ=

ꓠꓬꓲꓸ ꓠꓬꓲ ꓗꓪ ꓠꓬ ꓾ Darwin ꓬꓲꓸ natural selection theory ꓔꓯ science ꓚꓱꓹ ꓕꓲꓽ ꓫꓵꓽ ꓡꓰ ꓘꓳꓹ ꓣꓴ ꓔ ꓢꓲ꓾ ꓮ ꓠꓱ ꓕꓯ ꓟ ꓔꓯ ꓧꓪꓺ ꓟꓰꓹ ꓠꓬꓲˍ ꓟ ꓠꓬ ꓕꓲ ꓝꓸ ꓑꓶꓸ ꓕꓲ ꓝꓸ ꓣꓳ ꓢꓷꓸ ꓠꓲꓹ ꓟꓬꓽ ꓡ ꓔꓬ ꓟ ꓥ ꓡꓳ=

Darwin ꓒꓬꓱꓽ ꓠꓬ UK £12 ꓒꓴꓻ ꓒꓬꓽ ꓗꓪ ꓗꓷ ꓔ ꓟ ꓥ ꓢꓲ꓾ ꓬꓲꓸ ꓘꓴ ꓐꓬꓱꓽ ꓔꓯ ꓠꓬ London’s Natural History Museum ꓗꓪ ꓗꓷ ꓔ ꓡꓳ=

1858 ꓘꓳꓼ ꓕꓯ ꓠꓬ꓾ ꓬꓲꓸ ꓘꓳꓼ 20 ꓘꓳꓼ ꓛꓲꓺ ꓧꓪꓺ ꓟꓰꓹ ꓠꓬꓲ ꓔ ꓟ ꓬꓲꓸ theory ꓔꓯ ꓑ ꓫꓬ ꓐꓴ ꓔꓯ ꓟꓸ ꓖꓶ ꓗꓷꓳ= ꓬꓲꓸ ꓜꓲ ꓐꓰ ꓙꓱꓽ ꓤ 120 ꓙꓰꓽ ꓟꓽ ꓛꓲꓺ ꓔꓯ Darwin ꓡꓰ ꓬꓲꓸ ꓟꓬꓱꓺ ꓟꓬꓱꓺ ꓖꓶꓽ ꓗꓷˍ ꓡꓳ= ꓬꓲꓸ ꓠꓬ 1882 ꓘꓳꓼ 4 ꓦ 19 ꓠꓬꓲ꓾ ꓬꓲꓸ ꓞꓲꓼ 73 ꓘꓳꓼ ꓕꓯ꓾ England ꓗꓴꓷꓼ Kent ꓡꓳ ꓒꓱ Downe ꓗꓪ ꓾ ꓠꓲꓹ ꓟ ꓠꓻ ꓪꓴꓸ ꓠꓬꓲ ꓫꓵꓻ ꓗꓷꓳ=

ꓬꓲꓸ ꓐꓯ ꓘꓶꓽ ꓠꓬ  “ꓬꓲꓸ ꓙꓵꓹ ꓕꓲꓽ ꓙꓵꓹ ꓔꓯ ꓮ ꓔꓳ ꓔꓳ ꓒꓬꓹ ꓑꓶꓸ ꓢꓴ ꓠꓬ ꓬꓲꓸ ꓒꓵꓽ ꓙꓳˍ ꓟ ꓞꓳ ꓤ ꓤꓶꓻ ꓔꓯ ꓧꓪ ꓟꓶ ꓟꓽ ꓓ=”

Add new comment

5 + 4 =