ꓟꓬꓱꓺ ꓓꓳꓽ ꓙꓳˍ ꓟ Leonardo da Vinci ꓟꓸ ꓟꓲꓽ

Leonardo Da Vinci (1452 – 1519)

ꓬꓲ ꓠꓬ Painter (ꓐꓬꓱꓽ ꓐꓳ ꓢꓴ) ꓾ Sculptor (ꓫꓵꓺ ꓐꓰ ꓧꓳꓺ ꓓꓶꓽ ꓒ) ꓾ Architect꓾ Engineer ꓐꓰ Scientist ꓔꓯ ꓟꓳꓸ ꓢꓷꓸ ꓠꓲꓹ ꓙꓳ ꓒ ꓕꓲ ꓣꓳ ꓥ ꓡꓳ= ꓬꓲ ꓔꓯ 4 ꓦ ꓟ 15 ꓠꓬꓲ꓾ 1452 ꓘꓳꓼ ꓕꓯ ꓲ-ꓔ-ꓡꓲ ꓗꓴꓷꓼ Vinci ꓡꓳ ꓒꓱ ꓗꓪ ꓦꓵꓻ ꓔ ꓡꓳ=

ꓬꓲꓸ ꓐꓹ ꓐ ꓟꓬꓱꓺ ꓠꓬ Piero Da Vinci ꓥ ꓢꓲ꓾ ꓬꓲꓸ ꓟꓹ ꓟ ꓠꓬ Caterina ꓥ ꓡꓳ=ꓬꓲꓸ ꓐꓹ ꓐ ꓠꓬ ꓞꓳ ꓐꓳ ꓕꓲ ꓣꓳ ꓥ ꓢꓲ ꓤ ꓟꓶ ꓮ ꓟꓬꓹ ꓙꓳˍ ꓟ ꓗꓪ ꓐꓰ ꓗꓳꓸ ꓗꓷ ꓠꓬ꓾Leonardo ꓬꓲꓸ ꓤ ꓠꓱ ꓤ ꓤꓶꓻ ꓔꓯ ꓮ ꓟꓬꓹ ꓢꓷꓸ ꓪˍ ꓟ ꓟꓽ ꓙꓳ=

ꓬꓲꓸ ꓞꓲꓼ 14 ꓘꓳꓼ ꓕꓯ ꓬꓲꓸ ꓠꓬ ꓾ Verrocchio ꓐꓰ ꓟꓬꓱꓺ ꓔ ꓟ ꓐꓬꓱꓽ ꓐꓳꓻ ꓢꓴ ꓕꓲ ꓣꓳ ꓔꓬ ꓗꓪ ꓟꓬꓱꓽ ꓬꓰ ꓢꓳ ꓗꓷꓳ= Leonardo Da Vinci ꓠꓬ ꓬꓲꓸ ꓠꓯꓸꓼ ꓗꓪ ꓐꓬꓱꓽ ꓐꓳꓻ ꓠꓹ ꓟ ꓐꓰ sculpt ꓬꓰ ꓗꓴꓸ ꓠꓹ ꓟ ꓢꓳ ꓣꓴ ꓗꓷ ꓢꓲ꓾ ꓧꓳꓺ ꓐꓰ ꓙꓲꓽ ꓓꓶꓽˍ ꓟ (metallurgy) ꓾ drafting꓾ chemistry꓾ ꓡ ꓞꓳ ꓖꓳ ꓓꓱꓽ ꓚꓱꓹ (botany) ꓾ ꓡꓳ ꓒꓱ ꓐꓰ ꓗꓴꓷꓼ ꓐꓬꓱꓽ ꓐꓳˍ ꓟ (cartography) ꓐꓰ ꓡꓯꓼ ꓟꓬꓱꓽ ꓬꓰˍ ꓟ (carpentry) ꓟꓬꓱꓽ ꓐꓴ ꓔꓯ ꓟꓲ ꓢꓳ ꓣꓴ ꓗꓷꓳ=

ꓬꓲ ꓠꓬ ꓬꓲꓸ ꓟꓸ ꓒꓽ Verrocchio ꓐꓰ ꓕꓲ ꓪꓽ ‘The Baptism of Christ’ ꓬꓰ-ꓢꓴ ꓙꓲ-ꓢꓴ ꓖꓳ ꓓꓱ ꓔꓲꓹ ꓔꓬꓹ ꓟ ꓐꓬꓱꓽ ꓔꓯ ꓐꓳꓻ ꓗꓷꓳ=

1472 ꓘꓳꓼ ꓕꓯ Leonardo ꓠꓬ ꓬꓲꓸ ꓫꓵꓽ ꓬꓲꓸ ꓙꓰꓽ ꓐꓬꓱꓽ ꓐꓳˍ ꓟ ꓗꓪ ꓪꓽ ꓠꓬꓲ ꓢꓴ ꓾ ꓟꓬꓱꓺ ꓓꓳꓽ ꓙꓳ ꓢꓴ ꓕꓲ ꓣꓳ ꓒꓬꓱꓼ ꓡ ꓗꓷꓳ=

ꓬꓲꓸ ꓓꓽ ꓪꓴꓸ ꓐꓳ ꓔ ꓟ ꓐꓬꓱꓽ ꓠꓬ 1473 ꓘꓳꓼ 8 ꓦ 5 ꓠꓬꓲ ꓕꓯ Verrocchio ꓡꓰ ꓬꓰ ꓙ ꓢꓲ ꓐꓳꓻ ꓔ ꓟ ‘Arno Valley’ ꓐꓬꓱꓽ ꓥ ꓡꓳ=

1478 ꓕꓯ ꓬꓲ ꓠꓬ ꓾ ꓟꓽ ꓓ ꓬꓳꓸ ꓚꓵˍ ꓟ ꓐꓬꓱꓽ ꓐꓳˍ ꓟ ꓟꓬꓱꓽ 2 ꓙꓰꓽ ꓥ ꓟ ꓾ ‘St. Jerome in the Wilderness’  ꓐꓰ ‘Adoration of the Magi’ ꓔꓯ ꓐꓳ ꓠꓹ ꓟ ꓕꓵꓼ ꓪ ꓟꓶ ꓗꓷꓳ= ꓖꓳ ꓡꓱ ꓥ ꓟꓲ ꓖꓳ ꓟ ꓔꓯ ꓬꓲꓸ ꓬꓰ ꓟꓽ ꓡꓳꓹ ꓗꓷ=

1478 ꓗꓪ ꓐꓰ 1480 ꓗꓪ ꓛꓲ ꓬꓲ ꓠꓬ ꓤ ꓟꓶ ꓡꓯꓸ ꓚꓵ ꓟ-ꓡꓲ ꓡꓰ ꓤ ꓠꓱ ꓤ ꓬꓰ-ꓢꓴ ꓔꓯ ꓔꓯꓹ ꓔ ꓢꓲ ꓡꓯꓼ ꓶꓸ ꓗꓪ ꓠꓬ Carnation ꓢꓲꓹ ꓪꓰꓺ ꓔꓯꓹ ꓔ ꓟ ꓐꓬꓱꓽ ‘Madonna of the Carnation’ ꓟꓬꓱꓺ ꓔ ꓟ ꓐꓬꓱꓽ ꓐꓳꓻ ꓗꓷꓳ=

ꓝꓮꓲ ‘The Virgin of the Rocks’ ꓐꓰ ‘Madonna of the Rocks’ ꓐꓬꓱꓽ ꓐꓴ ꓔꓯ ꓐꓳ ꓗꓷꓳ=

ꓬꓲꓸ ꓠꓬ ꓬꓲꓸ ꓬꓰ ꓔꓬ ꓟ ꓟꓬꓱꓽ ꓔꓯ ꓬꓰ ꓙ ꓔꓳꓹ ꓙ ꓖꓶ ꓔꓬ ꓢꓴ ꓕꓲ ꓣꓳ ꓐꓱ ꓶ +ꓮꓸ ꓟꓴꓽ ꓐꓬꓱꓽ ꓘꓴꓸ ꓓꓽ ꓟ ꓫꓬꓹ ꓖꓶ ꓠꓹ ꓟ ꓕꓵꓼ ꓪ ꓖꓶˍ ꓟ ꓟꓶ ꓗꓷꓳ=

‘The Last Supper’ ꓡꓳꓹ ꓬꓰˍ ꓟ ꓟꓶꓽ ꓘꓶꓽ ꓜ ꓜꓽ ꓑꓮꓲꓽ ꓐꓬꓱꓽ ꓔꓯ ꓐꓳꓻ ꓠꓹ ꓟ ꓐꓱ ꓶ Duke Lodovico Sforza ꓡꓰ ꓬꓲꓸ ꓔꓯ ꓟꓬꓱꓽ ꓖꓶ ꓗꓷ ꓟ ꓪꓴꓸ ꓠꓬꓲ꓾ Leonardo ꓠꓬ  1495 ꓗꓪ ꓐꓰ 1498 ꓘꓴꓽ ꓗꓪ ꓐꓬꓱꓽ ꓖꓳ ꓟ ꓔꓯ ꓐꓳ ꓗꓷꓳ=ꓖꓳ ꓟ ꓠꓬ Leonardo ꓬꓰ ꓔ ꓟ ꓟꓬꓱꓽ ꓘꓴꓽ ꓗꓪ ꓟꓽ ꓓ ꓟꓬꓱꓺ ꓓꓳꓽ ꓙꓳˍ ꓟ ꓟꓬꓱꓽ ꓕꓲ ꓟ ꓒꓬꓱꓼ ꓡ ꓗꓷꓳ=

1500 ꓘꓳꓼ ꓕꓯ Leonardo ꓠꓬ ꓟꓯꓼ ꓚꓱꓹ ꓔꓯ ꓟꓳꓸ architect ꓐꓰ engineer ꓐꓯ ꓢꓲ꓾ ꓢꓷꓸ ꓙ ꓟꓳ ꓙˍ ꓟ ꓟꓶ ꓗꓷꓳ=

1502 ꓘꓳꓼ ꓕꓯ ꓬꓲ ꓠꓬ ꓔꓲꓺ ꓒ ꓪ ꓔꓲ Alexander VI ꓬꓲꓸ ꓤ ꓥ ꓟ Cesare Borgia ꓣꓱꓽ ꓙˍ ꓟ ꓟꓬꓱꓽ ꓗꓪ ꓓꓵꓽ ꓙꓰ ꓢꓲ꓾ Cesare ꓡꓳ ꓒꓱ ꓐꓬꓱꓽ ꓐꓳ ꓖꓶ ꓗꓷꓳ=

1503 ꓘꓳꓼ ꓕꓯ Leonardo ꓠꓬ Florence ꓡꓳ ꓒꓱ ꓗꓪ ꓙꓰ ꓗꓷ ꓢꓲ ‘The Battle of Anghiari’ ꓐꓰ ꓟꓬꓱꓺ ꓔ ꓟ ꓐꓬꓱꓽ ꓔꓯ ꓠꓬꓲꓽ ꓘꓳꓼ ꓛꓲꓺ  ꓐꓳ ꓗꓷꓳ=

ꓬꓲꓸ ꓐꓳ ꓔ ꓟ ‘Mona Lisa’ ꓐꓬꓱꓽ ꓔꓯˍ ꓟꓲ 1506 ꓘꓳꓼ ꓕꓯ ꓐꓳ ꓡꓳꓹ ꓬꓰ ꓗꓷꓳ= ‘Mona Lisa’ ꓐꓬꓱꓽ ꓔꓯ ‘La Gioconda’ ꓐꓰˍ ꓟꓲ ꓘꓴˍ ꓡꓳ=

1506 ꓘꓳꓼ ꓕꓯ ꓬꓲꓸ ꓠꓬ Milan ꓗꓪ ꓬꓲꓼ ꓛꓲꓺ ꓡ ꓢꓲ꓾ ꓬꓲꓸ ꓔꓬ ꓗꓪ ꓐꓰ ꓢꓳ ꓣꓴ ꓔꓬꓹ ꓢꓴ ꓐꓴ ꓠꓬ ꓬꓲꓸ ꓐꓰ ꓕꓲ ꓪꓽ ꓟꓬꓱꓽ ꓬꓰ ꓪꓴꓸ ꓔꓴˍ ꓡꓳ= ꓬꓲꓸ ꓠꓬ ꓙꓱꓻ ꓦꓲꓻ ( ꓮ ꓔꓳꓸ ꓦꓲꓻ ꓐꓬꓱꓺ) ꓐꓰ ꓙꓰˍ ꓟ ꓔꓯ ꓠꓲꓹ ꓟ ꓙꓳˍ ꓟ ꓪꓴꓸ ꓠꓬꓲ 1502 ꓕꓯ helicopter ꓔꓯ ꓫꓱˍ ꓟ ꓕꓲꓽ ꓫꓵꓽ ꓔꓯ ꓫꓬꓹ ꓠꓹ ꓟ ꓬꓰ ꓗꓷꓳ=

ꓬꓲꓸ ꓠꓬ 1555 ꓘꓳꓼ ꓕꓯ ꓐꓳ ꓔ ꓟ ‘Codex on the Flight of Birds’ ꓐꓰ ꓠꓱꓸ ꓐꓯꓼ ꓕꓳꓽ ꓶꓽ ꓮ ꓟꓬꓹ ꓔꓯˍ ꓟꓲ ꓐꓳ ꓗꓷꓳ=

‘Vitruvian Man’ ꓠꓬ 1490 ꓘꓳꓼ ꓕꓯ Leonardo Da Vinci ꓡꓰ ꓐꓳꓻ ꓔ ꓟ ꓐꓬꓱꓽ ꓥ ꓢꓲ꓾ ꓖꓳ ꓟ ꓠꓬ ꓤ ꓑꓸ ꓤ ꓖꓳ ꓓꓱꓽ ꓐꓬꓱꓽ ꓥ ꓡꓳ=

ꓬꓲꓸ ꓠꓬ ꓤ ꓟꓶ ꓤ ꓐꓴ ꓔꓯ ꓠꓲꓹ ꓟ ꓟꓽ ꓙꓳ ꓐꓯ ꓥˍ ꓟꓲ꓾ ꓬꓲꓸ ꓟꓬꓱꓽ ꓔꓯ ꓬꓰ ꓙ ꓔꓳꓹ ꓙ ꓔꓬ ꓢꓴ ꓥ ꓟ Cecilia Gallerani ꓐꓰ ꓮ ꓚꓲꓺ ꓠꓬꓲ ꓟ ꓥ ꓟ Isabella ꓐꓰ Beatrice ꓾ ꓬꓲꓸ ꓪ ꓐꓴ ꓐꓰ ꓕꓽ ꓡꓯ ꓘꓳꓹ ꓡꓳ=

ꓬꓲꓸ ꓠꓬ 1519 ꓘꓳꓼ 5 ꓦ 2 ꓠꓬꓲ ꓕꓯ France ꓗꓴꓷꓼ Amboise ꓗꓪ ꓫꓵꓻ ꓗꓷꓳ=ꓬꓲꓸ ꓞꓲꓼ ꓠꓬ 67 ꓘꓳꓼ ꓥ ꓡꓳ=

 “ꓧꓶꓸ ꓕꓯ ꓟꓽ ꓢꓷꓸ ꓡꓰ ꓠꓬ ꓮ ꓡꓲ ꓕꓲꓽ ꓫꓵꓽ ꓔꓯˍ ꓟꓲ ꓠꓲꓹ ꓠꓵˍ ꓟ ꓐꓰ ꓠꓲꓹ ꓙꓳˍ ꓟ ꓬꓰ ꓟꓽ ꓐ ꓡ”