ꓟꓬꓱꓺ ꓓꓳꓽ ꓙꓳˍ ꓟ Rowan Atkinson ꓟꓸ ꓟꓲꓽ

Rowan Atkinson ꓔꓯ ꓠꓬ Mr. Bean ꓐꓯ ꓢꓲ ꓢꓷꓸ ꓔ ꓟ ꓥ ꓡꓳ=

ꓬꓲ ꓠꓬ ꓟꓬꓱꓺ ꓓꓳꓽ ꓪꓴꓽˍ ꓟ ꓢꓯꓸ ꓐꓬꓱꓽ ꓐ ꓢꓴ ꓐꓰ ꓕꓳꓽ ꓶ ꓐꓳ ꓒ ꓕꓲ ꓣꓳ꓾

ꓝꓮꓲ ꓠꓬ ꓾ ꓫꓸ ꓕꓱ ꓘꓶꓽ ꓕꓲ ꓘꓶꓽˍ ꓟꓲ ꓟꓽ ꓕꓱ ꓕꓱ ꓐꓰ ꓟꓲ ꓠꓯ ꓕꓲꓽ ꓟ ꓡꓱꓹꓼ ꓔꓯ ꓪꓽ ꓢꓱ ꓡꓲꓹ (ꓧꓶꓼ ꓡꓲꓹ) ꓝꓲ ꓢꓴ ꓕꓲ ꓣꓳ꓾

ꓖꓳ ꓡꓱ ꓥˍ ꓟꓲ ꓕꓱ ꓟ ꓠꓬ ꓾ ꓕꓲꓽ ꓦꓬꓽ ꓕꓲ ꓟꓶꓽ ꓘꓶꓽ ꓡꓰꓽ ꓬꓰ ꓢꓲ ꓒꓬꓱꓼ ꓡˍ ꓟ ꓟꓽ ꓥ=

Rowan Atkinson ꓔꓯ ꓮ ꓘꓶꓸ ꓟꓽ ꓐꓳ ꓟꓽ ꓫꓸ ꓟ ꓦꓲꓻ ꓗꓪ ꓐꓰ ꓦꓵꓻ ꓔ ꓡꓳ= ꓬꓲꓸ ꓫꓸ ꓕꓱꓻ ꓕꓯ ꓮ ꓘꓶꓸ ꓐꓯ ꓣꓱꓽˍ ꓟ ꓪꓴꓸ ꓠꓬꓲ ꓬꓲꓸ ꓤ ꓠꓱ ꓤ ꓤꓶꓻ ꓕꓯ ꓮ ꓘꓶꓸ ꓫꓸ ꓙꓵ ꓗꓷꓳ=

ꓬꓲ ꓠꓬ ꓬꓲꓸ ꓒꓬꓱꓽ ꓪꓴꓸ ꓠꓬꓲ ꓢꓷꓸ ꓠꓲꓹ ꓢꓳ ꓦꓲ ꓗꓪˍ ꓟꓲ ꓫꓸ ꓟꓴ ꓫꓸ ꓚꓬ ꓬꓰˍ ꓟ ꓟꓶ ꓗꓷꓳ= ꓢꓳ ꓦꓲ ꓗꓪ ꓛꓲꓺ ꓬꓰ ꓗꓸ ꓠꓯꓸ ꓟꓽ ꓟꓶ ꓫꓵˍ ꓕꓯꓽ ꓡꓰ ꓬꓲ ꓔꓯ ꓠꓱꓸ ꓐꓯꓼ ꓤ ꓠꓱ ꓤ ꓐꓰ ꓟꓽ ꓫꓱꓸ ꓟ ꓟꓽ ꓪꓽ ꓟ ꓤ ꓠꓱ ꓐꓯ ꓢꓲ ꓢꓷꓸ ꓙ ꓟꓳ ꓙˍ ꓟ ꓟꓶ ꓗꓷꓳ= ꓖꓳ ꓡꓱ ꓢꓲ ꓬꓲ ꓠꓬ ꓮ ꓘꓶꓸ ꓫꓸ ꓔꓳ ꓗꓴˍ ꓟ ꓤ ꓠꓱ ꓒꓬꓱꓼ ꓡ ꓢꓲ꓾ ꓬꓲꓸ ꓔꓯ ꓛꓳꓽ ꓒꓯˍ ꓟꓲ ꓮ ꓟꓬꓹ ꓟꓽ ꓙꓳ ꓗꓷ ꓡꓰꓳ= ꓖꓳ ꓟ ꓪꓴꓸ ꓠꓬꓲ ꓬꓲꓸ ꓠꓬ science ꓚꓱꓹ ꓔꓯꓸ ꓟꓳ ꓢꓳ ꓙꓰˍ ꓡꓳ=

ꓬꓲꓸ ꓟꓸ ꓒ ꓕꓲ ꓣꓳ ꓡꓰ ꓐꓯˍ ꓟ ꓠꓬ “ꓬꓲꓸ ꓐꓰ ꓗꓴꓸ ꓙꓲ ꓙꓳ ꓢꓲ ꓾ ꓮꓸ ꓫꓵꓽˍ ꓟꓲ ꓟꓽ ꓙꓳ= ꓬꓲꓸ Science ꓚꓱꓹ ꓔꓯꓸ ꓟꓳ ꓢꓷꓸ ꓠꓲꓹ ꓙꓳ ꓢꓴ ꓕꓲ ꓣꓳ ꓒꓬꓱꓼ ꓡˍ ꓥꓳ꓾ ꓐꓰˍ ꓟꓲ ꓟꓽ ꓥꓳ ꓡꓳꓸ ꓔ” ꓐꓰ ꓐꓯˍ ꓡꓳ=ꓖꓳ ꓡꓱ ꓥˍ ꓟꓲ ꓬꓲ ꓠꓬ ꓾ ꓬꓲꓸ ꓔꓯ ꓞꓳ ꓤ ꓐꓴ ꓡꓳꓸ ꓟꓳˍ ꓟ ꓠꓬ ꓟꓽ ꓜꓳꓽ ꓟ ꓔꓯ ꓟꓳꓸ ꓖꓶ ꓗꓷ ꓢꓲ꓾ ꓬꓲꓸ ꓠꓬ ꓟꓴꓺ ꓕꓲꓸ ꓢꓳ ꓦꓲ Oxford University ꓗꓪ ꓓꓵꓽ ꓪ ꓡꓰꓳ= Oxford ꓗꓪ ꓢꓳ ꓔꓬꓹ ꓕꓯ ꓬꓲ ꓠꓬ ꓾ ꓢꓯꓸ ꓐꓬꓱꓽ ꓗꓪ ꓐ ꓠꓲꓹ ꓟ ꓙꓳˍ ꓡꓳ= ꓖꓳ ꓡꓱ ꓥˍ ꓟꓲ ꓬꓲꓸ ꓠꓬ ꓫꓸ ꓕꓱˍ ꓟ ꓗꓪ ꓮ ꓘꓶꓸ ꓐꓯ ꓣꓱꓽˍ ꓟ ꓪꓴꓸ ꓠꓬꓲ꓾ ꓢꓯꓸ ꓐꓬꓱꓽ ꓬꓰˍ ꓟ ꓗꓪ ꓬꓲꓸ ꓬꓰ ꓟꓽ ꓐ ꓡ ꓗꓷ=

ꓖꓳ ꓟ ꓪꓴꓸ ꓠꓬꓲ ꓬꓲ ꓠꓬ ꓮ ꓡꓰ ꓔꓦ show ꓗꓪˍ ꓟꓲ ꓟꓽ ꓓꓳ ꓡ ꓢꓰꓽ ꓕꓯ꓾ ꓬꓲꓸ ꓠꓬ electric ꓔꓯ ꓟꓳꓸ engineer ꓙꓵꓽ ꓪꓴꓸ ꓛꓴꓽ ꓟꓶ ꓗꓷꓳ= ꓙꓵꓽ ꓪꓴꓸ ꓛꓴꓽ ꓟꓶ ꓗꓷ ꓗꓸ ꓠꓯꓸ ꓬꓲꓸ ꓠꓬ ꓬꓲ ꓠꓲꓽ ꓡꓶꓽ ꓙꓳˍ ꓟ ꓔꓯ ꓬꓰ ꓠꓹ ꓟ ꓓꓵꓽ ꓙ ꓞꓷꓹ ꓗꓷꓳ=

ꓖꓳ ꓟ ꓪꓴꓸ ꓠꓬꓲ ꓬꓲ ꓠꓬ ꓜꓴ ꓗꓪ ꓓꓵꓽ ꓗꓷꓳ= ꓖꓳ ꓡꓱ ꓥˍ ꓟꓲ ꓾ ꓝꓮꓲ ꓕꓲ ꓧꓪꓹ ꓝ ꓢꓲ ꓬꓲꓸ ꓐꓱ ꓶ ꓫꓸ ꓓꓴ ꓓꓳ ꓡˍ ꓡꓳ= TV show ꓮ ꓟꓬꓹ ꓠꓬ ꓬꓲꓸ ꓔꓯ ꓟꓽ ꓘꓳꓸ ꓣꓴ ꓟ ꓪꓴꓸ ꓠꓬꓲ ꓬꓲꓸ ꓮ ꓘꓶꓸ ꓠꓲꓹ ꓟ ꓙꓬꓻ ꓡꓰˍ ꓡꓳ= ꓬꓲꓸ ꓠꓬ ꓬꓲꓸ ꓔꓯ ꓟꓽ ꓘꓳꓹ ꓣꓴ ꓟ ꓡꓳꓺ ꓗꓷˍ ꓟ ꓮ ꓟꓬꓹ ꓔꓳꓹ ꓜꓳꓽ ꓪˍ ꓟꓲ꓾ ꓬꓲꓸ ꓚꓲꓸ ꓛꓬ ꓬꓲ ꓙꓵꓻˍ ꓟ ꓟꓽ ꓠꓽ ꓗꓷ=

ꓬꓲꓸ ꓠꓬ ꓞꓳ ꓤ ꓐꓴ ꓔꓯ  ꓪꓽ ꓢꓱ ꓡꓲꓹ ꓓꓴ (ꓧꓶꓼ ꓡꓲꓹ) ꓓꓴ ꓬꓰ ꓖꓶꓽ ꓠꓹ ꓟ ꓮ ꓘꓶꓸ ꓠꓲꓹ ꓟ ꓙꓳˍ ꓡꓳ꓾ ꓖꓳ ꓡꓱ ꓬꓰˍ ꓟ ꓗꓪ ꓬꓲꓸ ꓮ ꓘꓶꓸ ꓓˍ ꓟ ꓔꓯˍ ꓟꓲ ꓬꓲꓸ ꓢꓷˍ ꓡꓳ=

ꓖꓳ ꓟ ꓪꓴꓸ ꓠꓬꓲ ꓬꓲꓸ ꓠꓬ ꓬꓲꓸ ꓪꓽ ꓢꓱ ꓡꓲꓹ ꓓꓴ (ꓧꓶꓼ ꓡꓲꓹ) ꓓꓴ ꓬꓰˍ ꓟ ꓔꓯꓸ ꓟꓳꓸ ꓬꓲ ꓙꓲꓻ ꓢꓯꓼ ꓕꓵˍ ꓡꓳ= ꓝꓮꓲ ꓬꓲ ꓠꓬ ꓪꓽ ꓢꓱ ꓡꓲꓹ ꓓꓴ (ꓧꓶꓼ ꓡꓲꓹ) ꓓꓴ ꓬꓰˍ ꓟ ꓕꓲ ꓖ ꓕꓲ ꓔꓳꓸ ꓗꓪ ꓫꓸ ꓕꓱ ꓡꓳꓹ ꓬꓰ ꓐ ꓡˍ ꓟ ꓔꓯ ꓬꓲꓸ ꓙꓽ ꓜꓲꓼ ꓡˍ ꓡꓳ=

Master ꓙꓵꓽ ꓪꓴꓸ ꓛꓴꓽ ꓟꓶ ꓠꓹ ꓟ ꓢꓯꓼ ꓕꓵꓼ ꓔꓬ ꓕꓯ꓾ Rowan Atkinson ꓠꓬ ꓾ “strange, surreal and non-speaking character” ꓐꓯˍ ꓟ ꓬꓲꓸ ꓢꓯꓼ ꓟꓽ ꓓꓳꓺ ꓓꓳꓺ ꓢꓯꓸ ꓐꓬꓱꓽ ꓬꓰˍ ꓟ ꓗꓪ ꓐꓰ ꓬꓲꓸ ꓔꓯ Mr.Bean ꓟꓬꓱꓺ ꓗꓪ ꓐꓰ ꓢꓷꓸ ꓡˍ ꓟ ꓥ ꓡꓳ=

ꓬꓲꓸ ꓠꓬ ꓠꓱꓸ ꓐꓯꓼ show ꓗꓪ ꓐꓰˍ ꓟꓲ ꓟꓬꓱꓺ ꓓꓳꓽ ꓙꓳ ꓡˍ ꓥˍ ꓟꓲ꓾ “Mr.Bean” ꓠꓬ ꓬꓲꓸ ꓔꓯ ꓟꓵꓽ ꓗꓳꓹ ꓓꓵꓺ ꓓꓵꓺ ꓗꓪ ꓟꓬꓱꓺ ꓓꓳꓽ ꓙꓳ ꓡ ꓝꓲˍ ꓡꓳ=

ꓬꓲꓸ ꓠꓬ ꓬꓲꓸ ꓒꓬꓱꓽ ꓟꓬ ꓐꓰ ꓫꓸ ꓕꓱ ꓟ ꓗꓪ ꓡꓳꓹ ꓬꓰ ꓟꓽ ꓐ ꓡ ꓟ ꓪꓴꓸ ꓠꓬꓲ ꓫꓸ ꓓꓴ ꓮ ꓟꓬꓹ ꓔꓳꓹ ꓜꓳꓽ ꓗꓷꓳ= ꓝꓮꓲ ꓬꓲ ꓠꓬ “ꓮ ꓡꓲ ꓕꓲ ꓣꓳˍ ꓟꓲ ꓖꓳ ꓓꓱ ꓐꓰ ꓒꓬꓱꓽ ꓟꓽ ꓐꓲˍ ꓟꓲ ꓑ ꓫꓬꓼ ꓐꓴ ꓠꓲꓹ ꓠꓵˍ ꓟ ꓪꓽ ꓢꓱ ꓡꓲꓹ ꓓꓴ (ꓧꓶꓼ ꓡꓲꓹ) ꓓꓴ ꓬꓰ ꓢꓴ ꓒꓬꓱꓼ ꓡ ꓓˍ ꓟ” ꓬꓲ ꓢꓷꓸ ꓡꓰ ꓓꓴ ꓕꓲ ꓟ ꓒꓬꓱꓼ ꓡ ꓗꓷꓳ=

ꓠꓬꓲꓸ ꓠꓬꓲ ꓟ ꓦꓬꓼ ꓠꓬꓲ ꓗꓪ ꓬꓲꓸ ꓠꓬ $ 130 million ꓟꓽ ꓞꓲ ꓙꓳ ꓢꓲ꓾ ꓞꓳ ꓤ ꓮ ꓟꓬꓹ ꓠꓲꓹ ꓠꓵˍ ꓟ ꓟꓶ ꓢꓴ ꓕꓲ ꓣꓳ  ꓥ ꓡꓳ=

 

Add new comment

4 + 8 =