ꓟꓬꓱꓺ ꓓꓳ ꓙꓳ ꓢꓴ Jeff Bezos ꓚꓱꓹ

Jeff Bezos

ꓠꓬꓲꓸ ꓠꓬꓲ ꓟꓵꓽ ꓗꓳ ꓓꓵ ꓓꓵ ꓗꓪ ꓟꓬꓱꓺ ꓓꓳꓽ ꓙꓳ_ ꓟ America ꓶꓻ ꓡꓯꓼ ꓟꓬꓱꓽ ꓬꓰ ꓢꓴ꓾ Amazon Company ꓔꓯ ꓫꓬꓹ ꓔꓶ ꓢꓴ꓾ Computer Engineer꓾ Blue Origin ꓐꓰ ꓟꓬꓱꓺ_ꓟ ꓣ-ꓗ-ꓔ ꓚꓳꓟꓑꓮꓠꓬ ꓫꓬꓹ ꓔꓶ ꓢꓴ ꓕꓲ ꓣꓳ ꓥ ꓟ꓾ ꓟꓲ ꓠꓯ ꓗꓪ ꓮ ꓘꓶꓸ ꓐꓳ ꓢꓴ ꓗꓪ ꓐꓰ ꓕꓲ ꓣꓳ ꓥ ꓢꓲ꓾ Time ꓡꓰ ꓐꓰ ꓟꓵꓽ ꓗꓳ ꓓꓵ ꓓꓵ ꓟꓮꓓꓮꓜꓲꓠꓰ ꓗꓪ ꓮ ꓟꓬꓹ ꓧꓪꓹ ꓟꓬꓱꓺ ꓓꓳꓽ ꓖꓶ ꓢꓴ ꓟꓲ ꓥ ꓡꓳ= ꓬꓲ ꓠꓬ ꓮ ꓘꓶꓸ ꓓ ꓢꓴ ꓥ ꓢꓲ꓾ ꓟꓵꓽ ꓗꓳꓸ ꓓꓵ ꓓꓵ ꓗꓪ ꓙꓵꓽ ꓪ ꓙꓳ ꓢꓴ ꓟꓬꓱꓺ ꓙꓳ ꓢꓴ 100 ꓣꓳ ꓘꓴꓽ ꓗꓪ ꓐꓰ ꓕꓲ ꓣꓳ ꓥ ꓟ Jeff Bezos ꓚꓱꓹ ꓔꓯ ꓠ ꓠꓹ ꓓꓴ ꓬꓰ ꓡꓯ= Jeff Bezos ꓬꓲꓸ ꓶꓻ ꓡꓯꓼ ꓟꓬꓱꓽ ꓔ ꓟ Company ꓥ ꓟꓲ ꓮ ꓟꓬꓹ ꓙꓳ_ ꓟ ꓥꓳ= Amazon꓾ Blue Origin꓾ Washington post ꓕꓱ ꓢꓽ ꓟ ꓟ ꓠꓬ ꓞꓳ ꓤ ꓮ ꓟꓬꓹ ꓢꓷꓸ ꓔ ꓟ Company ꓥ ꓡꓳ=

Jeff Bezos Billionaire ꓗꓷ ꓗꓪ ꓛꓲ ꓮ ꓡꓰ ꓐꓰ ꓢꓯꓼ ꓕꓵꓼ ꓢꓲ ꓧꓪꓸ ꓡꓰ ꓟ ꓔꓯ ꓠ ꓠꓹ ꓓꓴ ꓬꓰ ꓡꓯ= Jeff Bezos ꓔꓯ ꓠꓬ Albuquerque, New Mexico ꓗꓪ 1964 ꓘꓳꓼ 1 ꓦ 12 ꓠꓬꓲ ꓕꓯ ꓦꓵ ꓔ ꓟ ꓥꓳ= ꓬꓲ ꓟꓹ ꓟ ꓠꓬ Jacklyn Gise ꓥ ꓢꓲ꓾ꓬꓲꓸ ꓐꓹ ꓐ ꓠꓬ Ted Jorgensen ꓥ ꓡꓳ= ꓬꓲ ꓦ ꓒꓴ 8 ꓦ ꓛꓲ ꓡꓰ ꓡꓳꓼ ꓢꓰ ꓕꓯ ꓬꓲꓸ ꓐꓹ ꓐ ꓢꓲ ꓬꓲ ꓟꓹ ꓟ ꓧꓹ ꓡꓯꓼ ꓘꓳ ꓗꓸ ꓠꓯꓸ ꓬꓲꓸ ꓟꓹ ꓟ ꓠꓬ Cuba ꓗꓴꓷꓼ ꓗꓪ ꓐꓰ America ꓗꓪ ꓛꓵꓸ ꓡ ꓢꓴ Miguel Bezos ꓐꓰ 1968 ꓘꓳꓼ ꓕꓯ ꓡꓯꓽ ꓒꓯꓹ ꓝꓸ ꓡꓰ ꓟ ꓥꓳ= ꓕꓱ ꓡꓱ ꓝꓸ ꓓꓳ ꓗꓸ ꓠꓯꓸ Miguel ꓠꓬ 4 ꓘꓳꓼ ꓡꓳꓼ ꓡꓰ ꓟ  Jeff ꓔꓯ ꓬꓲꓸ ꓤ ꓕꓲ ꓣꓳ ꓡꓰ ꓐꓰ ꓟꓯꓸ ꓞ ꓗꓷ ꓟ ꓥꓳ= ꓖꓳ ꓗꓸ ꓠꓯꓸ Jeff Family ꓟꓬꓱꓺ ꓔꓯ Jorgensen ꓗꓪ ꓐꓰ Bezos ꓐꓰ ꓒꓳꓹ ꓗꓷ ꓟ ꓥꓳ= 1993 ꓘꓳꓼ ꓕꓯ Mackenzie Scott ꓐꓰ ꓟꓬꓱꓺ_ ꓟ ꓤ ꓟꓶ ꓤ ꓕꓲ ꓣꓳ ꓐꓰ ꓡꓯꓽ ꓒꓯꓹ ꓝꓸ ꓗꓷ ꓢꓲ꓾ 2019 ꓘꓳꓼ ꓕꓯ ꓬꓲ ꓪ ꓠꓬꓲ ꓣꓳ ꓧꓹ ꓡꓯ ꓘꓳ ꓟ ꓥꓳ= ꓤ ꓠꓱ ꓤ 4 ꓣꓳ ꓔꓬ ꓢꓲ꓾ ꓬꓲꓸ ꓤ 3 ꓣꓳ ꓐꓰ ꓤ ꓠꓱ ꓟꓯꓸ ꓤ ꓟꓶ ꓤ 1 ꓣꓳ ꓐ ꓟ ꓥꓳ= ꓤ ꓟꓶ ꓤ ꓬꓲꓸ ꓟꓹ ꓟ ꓠꓬ ꓧꓶꓽ ꓟꓵꓽ ꓗꓪ ꓐꓰ ꓥ ꓢꓲ꓾ Lauren Sanchez ꓐꓰ ꓟꓬꓱꓺ ꓢꓴ ꓥ ꓡꓳ= ꓮ ꓟꓶ ꓗꓪ ꓛꓲ ꓬꓲ ꓐꓰ ꓕꓲ ꓪ ꓔꓬ ꓟ ꓥꓳ= 

1986 ꓘꓳꓼ ꓕꓯ Princeton University ꓗꓪ ꓐꓰ computer science, electrical engineering  ꓠꓬꓲ ꓟ ꓔꓯ ꓙꓵꓽ ꓪꓴꓸ ꓛꓴ ꓪ ꓡꓰ ꓟ ꓥꓳ= Princeton ꓢꓷꓸ ꓠꓲꓹ ꓢꓳ ꓜꓲꓼ ꓓꓴ ꓗꓪ ꓐꓰ ꓢꓳ ꓓꓳ ꓗꓸ ꓠꓯꓸ company ꓮ ꓟꓬꓹ ꓗꓪ ꓬꓲ ꓟꓬꓱꓽ ꓬꓰ ꓗꓷ ꓟ ꓥꓳ= Fitel ꓐꓰ ꓟꓬꓱꓺ ꓟ Internet service provider company ꓕꓲ ꓟ ꓗꓪ networking ꓐꓰ ꓝꓸ ꓢꓲ ꓟꓬꓱꓽ ꓬꓰ ꓗꓷ ꓟ ꓥꓳ= ꓖꓳ ꓗꓸ ꓠꓯꓸ Bankers trust ꓐꓰ DE Shaw ꓐꓰ ꓶꓻ ꓡꓯꓼ ꓔ_ ꓟ company ꓗꓪ ꓟꓬꓱꓽ ꓬꓰ ꓗꓷ ꓟ ꓥꓳ= 1990 ꓘꓳꓼ ꓕꓯ  DE Shaw company ꓗꓪ ꓬꓲꓸ ꓞꓲꓼ ꓟ ꓓ ꓣꓳꓺ ꓢꓴ Vice President ꓐꓰ ꓟꓬꓱꓽ ꓬꓰ ꓡꓳꓹ ꓬꓰ ꓟ ꓥꓳ= ꓬꓲ ꓠꓯꓼ ꓗꓪ ꓒꓴ ꓮ ꓟꓬꓹ ꓓꓵ ꓥ ꓟꓲ꓾ ꓰ-ꓚꓳꓟꓟꓰꓣꓚꓰ ꓚꓳꓟꓑꓮꓠꓬ ꓕꓲ ꓟ ꓔꓯ ꓫꓬꓹ ꓔꓶ ꓐꓰ ꓓꓵꓽ ꓙ ꓢꓲ ꓟꓬꓱꓽ ꓓꓳ ꓡꓰ ꓟ ꓥꓳ= 1994 ꓘꓳꓼ ꓕꓯ ꓟꓬꓱꓽ ꓓꓳ ꓡꓰ ꓢꓲ꓾ Seattle ꓡꓳ ꓒꓱ Washington ꓗꓪ ꓚꓵꓸ ꓡꓰ ꓟ ꓥꓳ= ꓬꓲ ꓔꓶꓻ ꓙꓱꓼ ꓠꓬ ꓳꓠꓡꓲꓠꓰ ꓗꓪ ꓐꓰ ꓕꓳ ꓑꓶ ꓪꓴꓽ_ ꓟ ꓚꓳꓟꓑꓮꓠꓬ ꓕꓲ ꓟ ꓫꓬꓹ ꓔꓶ ꓓꓴ ꓥ ꓡꓳ= 1995 ꓘꓳꓼ 7 ꓦ 16 ꓠꓬꓲ ꓕꓯ Amazon.com ꓔꓯ ꓬꓲ ꓪꓴꓸ ꓔꓴ_ ꓟ ꓥꓳ= ꓮꓟꓮꓜꓳꓠ ꓬꓲ ꓪꓴꓸ ꓔꓴ_ ꓕꓯ ꓫꓸ ꓓꓴ ꓮ ꓘꓶꓸ ꓔꓳꓹ ꓜꓳ ꓡꓰ ꓟ ꓥꓳ= ꓬꓲꓸ ꓪꓴꓸ ꓠꓬ ꓳꓠꓡꓲꓠꓰ ꓗꓪ ꓐꓰ ꓪꓴ_ ꓟ ꓕꓳ ꓑꓶ ꓙꓵ ꓕꓲ ꓟ ꓐꓰ ꓪꓴꓸ ꓔꓴ_ ꓟ ꓥꓳ= ꓬꓲꓸ ꓠꓯꓼ ꓗꓪ ꓪꓴꓺ ꓡ ꓢꓴ ꓠꓲꓹ ꓫꓵ_ ꓟ ꓕꓳ ꓑꓶ ꓟꓽ ꓙꓳ ꓠꓬ ꓳꓠꓡꓲꓠꓰ ꓗꓪ ꓐꓰ ꓧꓪ ꓢꓲ ꓟꓽ ꓥ ꓠꓬ ꓕꓳ ꓑꓶ ꓙꓵ ꓗꓪ ꓐꓰ ꓧꓪ ꓢꓲ ꓪꓴꓺ ꓡ ꓢꓴ ꓐꓴ ꓠꓯꓼ ꓗꓪ ꓛꓲ ꓠ ꓬꓰ ꓖꓶ_ ꓟ ꓥꓳ= ꓬꓲꓸ ꓟꓬꓱꓽ ꓠꓬ ꓬꓲꓸ ꓓꓵꓽ ꓙ_ ꓟ ꓓꓲ ꓢ ꓧꓪꓸ ꓡꓰ ꓟ ꓥ ꓢꓲ꓾ 30 ꓠꓬꓲ ꓘꓴꓽ ꓗꓪ ꓗꓴꓷꓼ 45 ꓗꓴꓷꓼ ꓗꓪ ꓬꓲ ꓕꓳ ꓑꓶ ꓪꓴ ꓘꓴ ꓡꓰ ꓟ ꓥꓳ=

1 ꓦ ꓕꓯ Dollar 2 ꓫꓬꓹ ꓒꓴꓽ ꓛꓲ ꓪꓴ ꓪ ꓡꓰ ꓟ ꓥꓳ= 1997 ꓘꓳꓼ ꓕꓯ Amazon ꓠꓬ Private company ꓗꓪ ꓐꓰ Public company ꓐꓰ ꓗꓷ ꓡꓰ ꓟ ꓥꓳ= ꓳꓠꓡꓲꓠꓰ ꓗꓪ ꓐꓰ ꓕꓳ ꓑꓶ ꓪꓴ ꓟ ꓟꓬꓱꓽ ꓔꓯ ꓞꓳ ꓤ ꓐꓴ ꓠꓬꓲ ꓟꓽ ꓟꓵ ꓢꓲ ꓟꓽ ꓬꓰ ꓥ ꓟꓲ ꓬꓲ ꓠꓬ 6 ꓘꓳꓼ ꓡꓱꓼ ꓳꓠꓡꓲꓠꓰ ꓗꓪ ꓐꓰ ꓕꓳ ꓑꓶ ꓪꓴ_ ꓟ ꓔꓯ ꓬꓰ ꓗꓷ ꓟ ꓥꓳ= ꓳꓠꓡꓲꓠꓰ ꓕꓳ ꓑꓶ ꓪꓴ_ ꓟ ꓟꓬꓱꓽ ꓮ ꓘꓶꓸ ꓪꓴ ꓟꓴ ꓡ ꓕꓯ customer ꓙꓵ ꓪꓴ ꓢꓴ ꓐꓴ ꓔꓯ ꓳꓠꓡꓲꓠꓰ ꓗꓪ ꓐꓰ ꓮ ꓫꓵ ꓪꓴ ꓠꓲꓹ ꓫꓵ_ ꓡ ꓐꓰ ꓠ ꓠꓬꓲ ꓗꓷ ꓟ ꓥꓳ= ꓬꓲ ꓪ ꓡꓰ ꓐꓯ ꓔ ꓟ ꓔꓯ ꓛꓳꓽ ꓕꓯ ꓠꓱꓸ ꓐꓯꓼ ꓗꓪ ꓪ_ ꓟ ꓮ ꓙꓵ ꓳꓠꓡꓲꓠꓰ ꓗꓪ ꓐꓰ ꓪꓴ ꓠꓲꓹ ꓫꓵ_ ꓡꓳ ꓐꓰ ꓐꓯ ꓔ ꓟ ꓔꓯ Jeff Bezos ꓡꓰ ꓢꓷꓸ ꓡꓰ ꓢꓲ꓾ ꓪꓴ ꓢꓴ ꓠꓲꓹ ꓫꓵ_ ꓟ ꓡꓰ ꓐꓰ ꓬꓲꓸ ꓟꓬꓱꓽ ꓔꓯ ꓟꓬ ꓠꓬꓲ ꓐꓲ ꓜꓲꓼ ꓠꓹ ꓟ ꓬꓰ ꓗꓷ ꓟ ꓥꓳ= 1998 ꓘꓳꓼ ꓕꓯ ꓚꓓ꓾ ꓓꓦꓓ꓾ ꓦꓲꓓꓰꓳ ꓕꓱ ꓡꓱ ꓫꓵ ꓔꓯ ꓳꓠꓡꓲꓠꓰ ꓗꓪ ꓐꓰ ꓪꓴ ꓓ ꓡꓰ ꓠꓹ ꓟ ꓬꓰ ꓗꓷꓳ= ꓗꓳ ꓗꓸ ꓠꓯꓸ ꓐꓵ ꓞꓲꓽ꓾ Electronic ꓶꓻ ꓤ꓾ ꓮ ꓙꓵ ꓔꓯ ꓳꓠꓡꓲꓠꓰ ꓗꓪ ꓐꓰ ꓪꓴ ꓓ ꓡꓰ ꓠꓹ ꓟ ꓬꓰ ꓗꓷ ꓟ ꓥꓳ= ꓕꓱ ꓡꓱ ꓬꓰ ꓓꓳ ꓗꓸ ꓠꓯꓸ Amazon ꓶꓻ ꓡꓯꓼ ꓟꓬꓱꓽ ꓪꓴꓽ ꓪ_ ꓟ ꓔꓯ ꓛꓳ ꓠꓬ 1995 ꓘꓳꓼ ꓕꓯ  American dollar 5 ꓫꓬꓹ ꓛꓲ ꓥ ꓢꓲ꓾ 2011 ꓘꓳꓼ ꓕꓯ American dollar 17 billion ꓗꓪ ꓛꓲ ꓥ ꓡꓳ= 2018 ꓘꓳꓼ 9 ꓦ ꓕꓯ ꓠꓬ Amazon ꓚꓳꓟꓑꓮꓠꓬ ꓬꓲꓸ ꓒꓵꓽ ꓠꓬ 1 trillion ꓙꓳ_ ꓡꓳ ꓐꓰ ꓬꓲ ꓒꓵꓽ ꓞꓷꓹ ꓗꓷ ꓟ ꓥꓳ= ꓖꓳ ꓕꓲ ꓙꓵꓹ ꓕꓱ ꓟꓬ ꓬꓲꓸ ꓒꓵꓽ ꓙꓳ_ ꓟ ꓚꓳꓟꓑꓮꓠꓬ ꓠꓬ Apple ꓐꓰ Amazon ꓠꓬꓲ ꓟ ꓡꓰ ꓙꓳ_ ꓟ ꓥꓳ=

ꓕꓱ ꓡꓱ ꓧꓪꓸ ꓡꓰ ꓓꓴ ꓪꓴ ꓟꓴ ꓡ ꓓꓴ ꓔꓯ ꓮ ꓡꓰ ꓐꓰ ꓪ ꓡꓰ_ ꓡ? ꓐꓰ ꓣꓳ ꓛꓳꓽ ꓠꓬꓲ ꓓꓴ ꓬꓰ ꓡꓯ= ꓬꓲ ꓠꓬ ꓙꓵ ꓪꓴ ꓢꓴ ꓣꓱꓽ ꓬꓯꓼ_ ꓟ ꓔꓯ ꓮ ꓘꓶꓸ ꓠꓬꓲꓸ ꓠꓸ ꓔ ꓟ ꓑꓶ ꓓꓴ ꓥ ꓡꓳ= ꓮ ꓟꓶ ꓠꓬ Amazon ꓗꓪ ꓮ ꓗꓪ ꓐꓰ ꓜ ꓗꓪ ꓛꓲ ꓣꓱꓽ ꓬꓯꓼ_ ꓟ ꓮ ꓙꓵ ꓪ_ ꓟ ꓥꓳ= ꓝꓮꓲ ꓟꓽ ꓞꓲ Amazon Logo ꓔꓯ ꓥ ꓟꓲ ꓮ ꓐꓰ ꓜ ꓔꓯ ꓟꓸ ꓖꓶ ꓔ ꓟ ꓔꓯ ꓟꓳ ꓪ ꓟ ꓥꓳ= 2021 ꓘꓳꓼ 2 ꓦ ꓕꓯ ꓚꓰꓳ ꓗꓪ ꓐꓰ ꓠꓽ ꓓꓴ ꓥꓳ ꓐꓰ ꓐꓯ ꓑꓶ ꓗꓷ ꓥ ꓟꓲ ꓮꓟꓮꓜꓳꓠ ꓗꓪ ꓝꓮꓲ ꓢ ꓡ ꓙꓵ ꓐꓰ ꓟꓬꓱꓽ ꓬꓰ ꓓꓴ ꓙ ꓖꓶ ꓔ ꓟ ꓥꓳ=

2000 ꓘꓳꓼ ꓗꓸ ꓠꓯꓸ Blue origin ꓐꓰ ꓐꓯ_ ꓟ Rocket ꓫꓬꓹ ꓔ ꓟ ꓚꓳꓟꓑꓮꓠꓬ ꓕꓲ ꓟ ꓔꓯ ꓬꓲꓸ ꓪꓴꓸ ꓔꓴ ꓗꓷ ꓟ ꓥꓳ= 2024 ꓘꓳꓼ ꓕꓯ ꓦ ꓐ ꓗꓪ ꓛꓲ ꓙꓰ ꓠꓹ ꓟ ꓓꓵꓽ ꓙ ꓔꓬ ꓟ ꓥꓳ= 2021 ꓘꓳꓼ 7 ꓦ ꓕꓯ Blue Origin ꓠꓬ new Shepard ꓐꓰ ꓐꓯ_ ꓟ ꓣꓳꓚꓗꓰꓔ ꓔꓯ space (ꓣ-ꓗ-ꓔ) ꓗꓪ ꓬꓲꓸ ꓪꓴꓸ ꓕꓲ ꓧꓪꓹ ꓟ ꓙꓰ ꓐ ꓡꓰ ꓟ ꓥꓳ= Karman Line ꓔꓯ ꓙ ꓢꓲ꓾ ꓖꓳ ꓗꓪ ꓙꓰ ꓢꓴ 4 ꓣꓳ ꓗꓪ ꓐꓰ Jeff Bezos ꓥ ꓟꓲ ꓐ_ ꓟ ꓥꓳ=

ꓬꓲ ꓕꓱ ꓡꓱ ꓧꓪꓸ ꓡꓰ ꓟ ꓠꓬ customer ꓙꓵ ꓪꓴ ꓡ ꓢꓴ ꓐꓴ ꓣꓱꓽ ꓬꓯꓼ_ ꓟ ꓣꓱꓽ ꓞ ꓟ ꓔꓯ ꓠꓬꓲꓸ ꓠ ꓔꓬ ꓟ ꓑꓶ ꓓꓴ ꓥ ꓡꓳ= ꓬꓲ ꓪ ꓣꓱꓽ ꓬꓯꓼ ꓟ ꓔꓯ ꓬꓰ ꓖꓶ ꓢꓲ꓾ ꓬꓲꓸ ꓟꓬꓱꓽ ꓔꓯ ꓟꓬ ꓡ ꓝꓲ ꓢꓲ ꓟꓵꓽ ꓗꓳꓸ ꓓꓵ ꓓꓵ ꓗꓪ ꓐꓰ ꓟꓬꓱꓽ ꓕꓲ ꓟ ꓫꓬꓹ ꓔꓶ ꓗꓷ ꓟ ꓥ ꓡꓳ= ꓬꓲ ꓮ ꓕꓯ ꓟꓲ ꓐꓯ ꓔ ꓟ ꓙꓳ_ ꓡꓳ꓾ customer of section ꓐꓰ ꓐꓯ ꓟ ꓥꓳ꓾ ꓕꓱ ꓟ ꓠꓬ customer ꓐꓴ ꓮ ꓫꓵꓽ ꓣꓱꓽ ꓬꓯꓼ ꓣꓱꓽ ꓞ ꓟ ꓔꓯ ꓮ ꓕꓯ ꓟꓲ ꓛꓳ_ ꓟ ꓔꓯ ꓐꓯ_ ꓟ ꓥꓳ= ꓖꓳ ꓟ ꓑꓶ ꓓꓴ ꓣꓳ ꓚꓲ ꓛꓬ ꓟꓬꓱꓽ ꓬꓲꓸ ꓪꓴꓸ ꓔꓴ ꓠꓬ ꓕꓱ ꓟꓬꓱꓽ ꓗꓪ ꓐꓰ ꓣꓳ ꓐꓳ ꓢ ꓠꓹ ꓟ ꓡꓳ ꓑ ꓗꓷ ꓠꓹ ꓟ ꓐꓰ ꓓꓵꓽ ꓙ_ ꓟ ꓓꓲ ꓢ ꓕꓱ ꓟꓬꓱꓽ ꓗꓪ ꓐꓰ customer ꓢꓯꓼ ꓖꓶ ꓡ ꓢꓴ ꓐꓴ ꓔꓯ ꓮ ꓡꓰ ꓐꓰ service ꓖꓶ ꓐ ꓡ ꓡ ꓐꓰ ꓣꓳ ꓓꓵꓽ ꓙ ꓠꓬ ꓣꓳ ꓟꓬꓱꓽ ꓟꓬ ꓠꓬꓲ ꓪꓴ ꓟꓴ ꓡ ꓓꓴ ꓥꓳ=