ꓟꓬꓱꓽ ꓓꓳꓽ ꓙꓳ ꓢꓴ Malala Yousafzai ꓚꓺ ꓟꓲꓽ (Malala Yousafzai)

ꓟꓬꓱꓽ ꓓꓳꓽ ꓙꓳ ꓢꓴ Malala Yousafzai ꓚꓺ ꓟꓲꓽ (Malala Yousafzai)

ꓬꓲ ꓠꓬ ꓠꓳꓐꓰꓡ ꓡꓯꓽ ꓫꓴ ꓪ ꓢꓴ ꓐꓴ ꓗꓳ ꓡꓳ ꓗꓪ ꓐꓰ ꓬꓲ ꓠꓬ ꓞꓲꓼ ꓣꓴ ꓓꓰꓽ ꓡꓰ ꓢꓴ ꓥ ꓡꓳ꓿ ꓬꓲ ꓔꓯ 1997 ꓘꓳ 7 ꓦ ꓟ 12 ꓠꓬꓲ ꓕꓯ Pakistan ꓗꓴꓷꓼ Mingora ꓗꓪ ꓦꓵꓻ ꓗꓷꓳ꓿ ꓬꓲ ꓐ, ꓐ ꓟꓬꓱꓽ ꓠꓬ Ziauddin Yousafzai ꓥ ꓢꓲ ꓠꓬꓲ ꓬꓲ ꓟ, ꓟ ꓟꓬꓱꓽ ꓠꓬ Tor Pekai Yousafzai ꓥ ꓡꓳ꓿ ꓬꓲ ꓠꓬ ꓘꓪ ꓠꓬꓲ ꓤ ꓠꓬꓲꓽ ꓣꓳ ꓔꓬ ꓟ ꓥ ꓡꓳ꓿

ꓬꓲ ꓕꓲ ꓦꓲꓻ ꓠꓬ ꓟꓲ ꓠꓯ ꓢꓷ. ꓠꓲ, ꓢꓳꓻ ꓦꓲꓻ ꓕꓲ ꓦꓲꓻ ꓒꓴ ꓔ ꓟ ꓥ ꓡꓳ꓿ ꓬꓲ ꓐ, ꓐ  ꓠꓬ ꓤ ꓠꓱ ꓤ ꓐꓴ ꓟꓲ ꓠꓯ ꓢꓷ. ꓠꓲ, ꓕꓳ ꓶ ꓢꓳꓻ ꓣꓴ ꓟꓶ ꓠ, ꓟ ꓟꓬꓱꓽ ꓬꓰ ꓢꓴ ꓕꓲ ꓣꓳ ꓥ ꓡꓳ꓿ ꓖꓳ ꓟ ꓡꓰ ꓟꓽ ꓞꓲ ꓬꓲ ꓐ, ꓐ ꓠꓬ English ꓐꓰ ꓴꓣꓓꓴ ꓥꓳꓽ ꓔꓯ ꓟ. ꓖꓶ ꓗꓷꓳ꓿

ꓬꓲ ꓐ, ꓐ ꓠꓲ, ꓟ ꓘꓴꓽ ꓗꓪ ꓟ‐ꓟ‐ꓡ ꓞꓲꓽ ꓣꓳ ꓙꓵ, ꓗꓪ ꓕꓯ ꓟꓲ ꓠꓯ ꓢꓷ. ꓠꓲ, ꓕꓳ ꓶ ꓗꓪ ꓐꓰ ꓮ ꓘꓶ. ꓛꓲ ꓓꓽ ꓡ ꓓꓴ ꓙꓳˍ ꓟ ꓔꓯ ꓢꓷ. ꓡꓰ ꓟ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓠꓬ ꓐꓯ ꓠꓬ ꓟ‐ꓟ‐ꓡ ꓠꓬ ꓬꓲ ꓮ ꓡꓰ ꓐꓰ ꓓꓵ ꓙ ꓟ ꓐꓰ ꓮ ꓡꓰ ꓐꓰ ꓫꓪ ꓠꓬꓲ ꓟ ꓔꓯ ꓐꓯ ꓟ. ꓖꓶ ꓢꓴ ꓤ ꓠꓱ ꓤ ꓥ ꓟ ꓪꓴ. ꓠꓬꓲ ꓥ ꓡꓳ꓿ ꓬꓲ ꓠꓬ 2008 ꓘꓳꓼ ꓕꓯ ꓟꓲ ꓠꓯ ꓢꓷ. ꓠꓲ, ꓔꓯ ꓟꓳ. ꓓꓽ ꓪꓴ. ꓜꓲꓼ ꓓꓴ ꓗꓪ ꓫ. ꓕꓱ ꓗꓷꓳ꓿

ꓖꓳ ꓕꓯ ꓬꓲ ꓠꓬ 11 ꓘꓳꓼ ꓡꓰ ꓙꓳˍ ꓟ ꓥ ꓡꓳ꓿ ꓬꓲ ꓠꓬ ꓬꓲ ꓔꓬ ꓟ ꓞꓳ ꓘ, ꓗꓪ ꓟꓲ ꓠꓯ ꓢꓷ. ꓠꓲ, ꓔꓯ ꓟꓳ. ꓮ ꓡꓰ ꓬꓰ ꓠ, ꓟ ꓮ ꓟꓬ, ꓫ. ꓕꓱ ꓗꓷꓳ꓿ ꓬꓲ ꓔꓬ ꓟ ꓞꓳ ꓘ, ꓗꓪ ꓠꓬ ꓤ ꓠꓱ ꓤ ꓐꓴ ꓔꓯ ꓙꓵꓽ ꓪ ꓙꓳˍ ꓢꓴ ꓐꓴ ꓡꓰ ꓟꓲ ꓠꓯ ꓢꓷ. ꓠꓲ, ꓟꓽ ꓢꓳꓻ ꓝꓲ ꓟ ꓪꓴ. ꓠꓬꓲ ꓥ ꓡꓳ꓿

ꓬꓲ ꓠꓬ ꓟꓲ ꓠꓯ ꓢꓷ. ꓠꓲ, ꓔꓯ ꓤ ꓠꓱ ꓤ ꓐꓴ ꓢꓳꓻ ꓣꓴ ꓠ, ꓟ ꓮ ꓡꓰ ꓐꓰ ꓬꓰ ꓠ, ꓟ ꓕꓳ ꓶ ꓮ ꓟꓬ, ꓔꓯ ꓐꓐꓚ ꓗꓪ ꓐꓳ ꓖꓶ ꓗꓷꓳ꓿ ꓬꓲ ꓕꓱ ꓡꓰ ꓟꓲ ꓠꓯ ꓢꓷ. ꓠꓲ, ꓔꓯ ꓟꓳ. ꓤ ꓠꓱ ꓤ ꓐꓴ ꓢꓳꓻ ꓪ ꓠ, ꓟ ꓙꓵꓽ ꓪ ꓠ, ꓟ ꓔꓯ ꓕꓳ ꓶ ꓮ ꓟꓬ, ꓐꓳ ꓟ ꓔꓯ ꓟꓽ ꓙꓲ ꓢꓴ ꓜꓴꓻ ꓥ ꓟꓲ Taliban ꓜꓴꓻ ꓗꓪ ꓥ ꓟꓲ ꓮ ꓟꓬ, ꓢꓷ. ꓡꓰ ꓪ꓿ ꓬꓲ ꓡꓰ ꓐꓰ ꓐꓐꓚ ꓴꓣꓓꓴ ꓗꓪ ꓕꓳ ꓶ ꓐꓳ ꓟ ꓠꓬ ꓬꓲ ꓐꓱ ꓶ ꓮ ꓟꓬ, ꓛꓲ ꓙꓳꓺ ꓓꓴ ꓙꓳ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ 11 ꓘꓳꓼ ꓙꓳ ꓟ ꓟ‐ꓡ‐ꓡ ꓠꓬ ꓮ ꓘꓶ. ꓙꓳꓺ ꓓꓴ ꓙꓳ ꓟ ꓟꓬꓱꓽ ꓔꓯ ꓬꓰ ꓗꓷ ꓟ ꓥ ꓡꓳ꓿

ꓬꓲ ꓓꓽ ꓓꓴ ꓕꓳ ꓶ ꓐꓳ ꓔ ꓟ ꓔꓯ 2009 1 ꓦ ꓟ 3 ꓠꓬꓲ ꓕꓯ ꓡ ꓞꓳ ꓮ ꓟꓬ, ꓟꓳ. ꓪ ꓠ, ꓟ ꓟ. ꓖꓶ ꓗꓷꓳ꓿ ꓬꓲ ꓡꓰ ꓐꓳ ꓔ ꓟ ꓠꓬ ꓟꓽ ꓙꓲ ꓢꓴ ꓜꓴꓻ ꓥ ꓟꓲ ꓔꓮꓡꓲꓐꓮꓠ ꓜꓴꓻ ꓑꓶ. ꓓꓴ ꓬꓲ ꓔꓬ ꓟ ꓗꓴꓷꓼ ꓗꓪ ꓟꓲ ꓠꓯ ꓢꓷ. ꓠꓲ,  ꓢꓳꓻ ꓦꓲꓻ ꓗꓪ ꓤ ꓠꓱ ꓤ ꓐꓴ ꓮ ꓟꓬ, ꓟꓽ ꓢꓳꓻ ꓟ ꓚꓱ, ꓔꓯ ꓐꓳ ꓔ ꓟ ꓥ ꓡꓳ꓿  ꓝꓮꓲ ꓮ ꓡꓰ ꓐꓰ ꓔꓮꓡꓲꓐꓮꓠ ꓜꓴꓻ ꓡꓰ ꓟꓲ ꓠꓯ ꓢꓷ. ꓠꓲ, ꓢꓳꓻ ꓔꓬ ꓟ ꓤ ꓟꓶ ꓤ ꓐꓴ ꓔꓯ ꓡ ꓚꓴ. ꓗꓪ ꓐꓰ ꓮ ꓡꓰ ꓐꓰ ꓑꓳ ꓢꓰꓼ ꓗꓷ ꓟ ꓚꓱ, ꓔꓯ ꓐꓳ ꓔ ꓟ ꓥ ꓡꓳ꓿ ꓬꓲ ꓠꓬ ꓟ ꓠꓽ ꓠꓽ ꓕꓳ ꓶ ꓮ ꓟꓬ, ꓐꓳ ꓗꓷ ꓢꓲ ꓠꓬꓲ ꓢꓳꓻ ꓦꓲꓻ ꓝꓮꓲ ꓒꓴ ꓡ ꓗꓪ ꓛꓲ ꓕꓳ ꓶ ꓐꓳ ꓗꓷꓳ꓿ ꓕꓱ ꓡꓰ ꓐꓰ ꓬꓲ ꓛꓳꓽ ꓒꓯꓽ ꓐꓴ ꓐꓰ ꓕꓲ ꓪ ꓗꓳ. ꓗꓷ ꓟ ꓙꓵ, ꓕꓯ ꓢꓳꓻ ꓦꓲꓻ ꓢꓳꓻ ꓡꓰ ꓐꓰ ꓢꓳꓻ ꓣꓴ ꓪ ꓡꓰ ꓟ ꓥ ꓡꓳ꓿ ꓖꓳ ꓗ. ꓠꓯ ꓬꓲ ꓠꓬ ꓰꓫꓮꓟ ꓔꓯ ꓘꓳꓽ ꓗꓷ ꓗ. ꓠꓯ ꓬꓲ ꓕꓳ ꓶ ꓐꓳ ꓟ ꓔꓯ 2009 3 ꓦ ꓕꓯ ꓐꓳ ꓠꓽ  ꓗꓷ ꓟ ꓥ ꓡꓳ꓿

ꓕꓱ ꓡꓰ ꓐꓰ ꓬꓲ ꓞꓲꓼ ꓣꓳ ꓟ ꓤ ꓟꓶ ꓡꓯ ꓤ ꓕꓲ ꓣꓳ ꓠꓬ ꓮ ꓘꓶ. ꓛꓲ ꓟꓬꓱꓽ ꓓꓳꓽ ꓙꓳ ꓡ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓟꓲ ꓠꓯ ꓢꓷ. ꓠꓲ, ꓔꓯ ꓟꓳ ꓞꓳ ꓡꓯ. ꓐꓴ ꓗꓳ ꓡꓳ ꓗꓪ ꓫ. ꓕꓱ ꓠ, ꓟ ꓬꓲ ꓔꓯ ꓘꓴꓽ ꓗꓷ ꓟ ꓥ ꓡꓳ꓿ ꓕꓱ ꓡꓰ ꓐꓰ ꓬꓲ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟꓬꓱꓽ ꓓꓳꓽ ꓙꓳ ꓡ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓬꓲ ꓔꓬ ꓟ ꓗꓴꓷꓼ ꓔꓯ ꓙꓵꓽ ꓢꓴ ꓙꓵꓽ ꓪ ꓙꓳ ꓢꓴ ꓡꓰ ꓖꓶ ꓟ ꓡꓯꓽ ꓫꓴ ꓔꓯ ꓘꓳ, ꓣꓴ ꓪ ꓡꓰꓳ꓿

ꓟꓽ ꓙꓲ ꓢꓴ ꓜꓴꓻ ꓥ ꓟꓲ ꓔꓮꓡꓲꓐꓮꓠ ꓜꓴꓻ ꓠꓬ ꓞꓲꓼ ꓣꓳ ꓟ ꓤ ꓟꓶ ꓤ ꓐꓴ ꓔꓯ ꓟꓲ ꓠꓯ ꓢꓷ. ꓠꓲ, ꓟꓽ ꓢꓳꓻ ꓪ ꓠ, ꓟ ꓮ ꓘꓶ. ꓛꓲ ꓬꓰ ꓢꓲ ꓠꓬꓲ ꓢꓰꓼ ꓟ ꓟꓲ ꓥ ꓡꓳ꓿ ꓕꓱ ꓡꓰ ꓐꓰ ꓬꓲ ꓥ ꓟꓲ ꓫꓵꓻ ꓗꓪ ꓛꓲ ꓡ ꓚꓴ. ꓑꓳ ꓗꓪ ꓐꓰ ꓐꓶ ꓟ ꓔꓯ ꓔꓳ, ꓜꓳ ꓡꓰꓳ꓿ ꓕꓱ ꓡꓰ ꓒꓬꓱꓼ ꓡꓰ ꓟ ꓠꓬ ꓬꓲ ꓠꓬ ꓢꓳꓻ ꓦꓲ ꓙꓳ ꓦꓲꓻ ꓗꓪ ꓐꓰ ꓦꓲꓻ ꓗꓪ ꓡ ꓡꓽ ꓟ ꓙꓵ, ꓕꓯ 2012 ꓘꓳꓼ 10 ꓦ ꓟ 9  ꓠꓬꓲ ꓕꓯ ꓟꓽ ꓙꓲ ꓢꓴ ꓜꓴꓻ ꓔꓮꓡꓲꓐꓮꓠ ꓜꓴꓻꓡꓰ ꓡ ꓚꓴ. ꓑꓳ ꓗꓪ ꓐꓰ ꓐꓶ ꓗꓷ ꓟ ꓪꓴ. ꓠꓬꓲ ꓬꓲ ꓪꓴꓽ ꓓꓵ, ꓗꓪ ꓜꓯ ꓡꓰꓳ꓿

ꓡ ꓚꓴ. ꓑꓳ ꓠꓬ ꓬꓲ ꓪꓴꓽ ꓓꓵꓽ ꓗꓪ ꓙ ꓡꓰ ꓟ ꓥ ꓡꓳ꓿ꓖꓳ ꓟ ꓡꓰ ꓟꓽ ꓞꓲ ꓬꓲ ꓡꓯ ꓢꓲ ꓗꓪ ꓥ ꓟꓲ ꓡ ꓚꓴ. ꓑꓶ ꓜꓯ ꓡꓰ ꓟ ꓥ ꓡꓳ꓿ ꓬꓲ ꓛꓳꓽ ꓒꓯꓼ ꓠꓬꓲꓽ ꓣꓳ ꓥ ꓟꓲ ꓟꓽ ꓙꓲ ꓢꓴ ꓐꓴ ꓡꓰ ꓐꓶ ꓡ ꓟ ꓗꓪ ꓮ ꓘꓶ. ꓛꓲ ꓠꓻ ꓓꓴ ꓡꓰ ꓟ ꓥ ꓡꓳ꓿ ꓬꓲ ꓠꓬ ꓟꓽ ꓙꓲ ꓢꓴ ꓐꓴ ꓡꓰ ꓡ ꓚꓴ. ꓟꓶ ꓗꓷ ꓟ ꓔꓯ ꓞꓼ ꓞꓼ ꓠꓯꓼ ꓞꓲꓼ ꓦꓲꓻ ꓗꓪ ꓠꓻ ꓫꓬ ꓟꓶ ꓡꓰ ꓟ ꓥ ꓡꓳ꓿ ꓗ. ꓠꓯ ꓰꓠꓖꓡꓮꓠꓓ ꓗꓴꓷꓼ ꓗꓪ ꓙꓳˍ ꓟ Birmingham ꓠꓯꓻ ꓞꓲꓼ ꓦꓲꓻ ꓗꓪ ꓠꓻ ꓫꓬ, ꓪ ꓡꓰꓳ꓿

ꓬꓲ ꓠꓻ ꓓꓴ ꓟ ꓗꓪ ꓐꓰ ꓓꓽ ꓡꓰ ꓗ. ꓠꓯ ꓬꓲ ꓠꓬ ꓟꓲ ꓠꓯ ꓢꓷ. ꓠꓲ, ꓔꓯ England ꓗꓴꓷꓼ ꓗꓪ ꓢꓳꓻ ꓣꓴ ꓪ ꓡꓰꓳ꓿ꓟꓽ ꓙꓲ ꓢꓴ ꓐꓴ ꓡꓰ ꓐꓶ ꓡ ꓥ ꓟꓲ ꓟꓲ ꓠꓯ ꓢꓷ. ꓠꓲ, ꓔꓯ ꓑꓶ. ꓑꓶ. ꓡꓰ ꓢꓳꓻ ꓣꓴ ꓗꓷ ꓟ ꓮ ꓘꓶ. ꓛꓲ ꓓꓽ ꓟ ꓪꓴ. ꓠꓬꓲ ꓕꓲ ꓟꓲ ꓠꓯ ꓡꓱ ꓗꓪ ꓐꓰ ꓢꓯꓼ ꓖꓶ ꓟ ꓟꓬꓱꓽ ꓓꓳꓽ ꓖꓶ ꓟ ꓔꓯ ꓘꓳ, ꓣꓴ ꓪ ꓡꓰꓳ꓿

ꓬꓲ ꓠꓬ ꓴꓢꓮ ꓗꓴꓷꓼ ꓗꓪ ꓙꓵꓽ ꓪ ꓙꓳˍ ꓢꓴ ꓐꓴ ꓜꓲꓼ ꓟ ꓗꓪ 2013 ꓘꓳꓼ ꓬꓲ ꓞꓲꓼ (16) ꓘꓳꓼ ꓕꓯ ꓫ. ꓕꓱ ꓪ ꓡꓰꓳ꓿ ꓖꓳ ꓡꓱ ꓥ ꓟꓲ ꓪꓴ. ꓠꓬꓲ ꓕꓱ ꓕꓲ ꓠꓬꓲ ꓠꓬ ꓴꓢꓮ ꓙꓵꓽ ꓪ ꓙꓳ ꓢꓴ ꓡꓰ ꓟ‐ꓡ‐ꓡ ꓦꓬꓼ ꓠꓬꓲ ꓐꓰ ꓟꓬꓱꓽ ꓖꓶ ꓗꓷꓳ꓿ ꓕꓱ ꓕꓲ ꓘꓳꓼ ꓗꓪ ꓬꓲ ꓚꓺ ꓟꓲ. ꓚꓱ, ꓔꓯ ꓐꓳ ꓔ ꓟ (I am Malala) ꓥꓪ ꓠꓬ ꓟ‐ꓡ‐ꓡ ꓥ ꓡꓳ ꓟꓲ ꓠꓯ ꓢꓷ. ꓠꓲ, ꓑꓶ. ꓓꓴ ꓔꓮꓡꓲꓐꓮꓠ ꓜꓴꓻ ꓡꓰ ꓡ ꓚꓴ. ꓑꓶ. ꓪ ꓡꓰ ꓢꓴ ꓐꓰ ꓟꓬꓱꓽ ꓕ ꓳ ꓶ ꓔꓯ ꓐꓳ ꓗꓷꓳ꓿ꓬꓲ ꓠꓬ ꓝ. ꓢꓲ ꓠꓬꓲ ꓥ ꓟꓲ Harvard University ꓗꓪ ꓥ ꓟꓲ ꓝꓮꓲ Oxford Union ꓗꓪ ꓥ ꓟꓲ 2013 ꓘꓳꓼ ꓕꓯ ꓟ. ꓕꓱ ꓪ ꓡꓰꓳ꓿

2013 ꓘꓳꓼ 7 ꓦ ꓟ ꓕꓯ ꓡꓮꓠꓓꓳꓠ ꓗꓴꓷꓼ ꓗꓪ ꓤ ꓠꓱ ꓤ ꓐꓴ ꓪꓽ ꓙꓵꓽ ꓪ ꓔꓯ ꓟꓳ. ꓫ. ꓕꓱ ꓖꓶ ꓗꓷꓳ꓿ ꓬꓲ ꓔꓯ Pakistan ꓗꓴꓷꓼ ꓗꓪ ꓠ‐ꓐ ꓢꓽ ꓪꓴ. ꓡꓳ ꓬꓰ ꓟ ꓡꓯꓽ ꓫꓴ ꓔꓯ 2012 ꓘꓳꓼ 10 ꓦ ꓬꓲ ꓘꓳ, ꓣꓴ ꓪ ꓡꓰꓳ꓿ ꓕꓱ ꓡꓯꓽ ꓫꓴ ꓠꓬ ꓑ ꓫꓬ ꓐꓴ ꓠꓯ. ꓗꓪ ꓐꓰ ꓙꓲ ꓟ ꓟꓬꓱꓽ ꓗꓪ ꓮ ꓘꓶ. ꓛꓲ ꓑꓶ. ꓢꓴ ꓔꓯ ꓖꓶ ꓟ ꓥ ꓡꓳ꓿ ꓝꓮꓲ Clinton Foundation ꓜꓴꓻ ꓗꓪ ꓐꓰ ꓥ ꓟꓲ 2013 ꓘꓳꓼ ꓕꓯ ꓡꓯꓽ ꓫꓴ ꓖꓶ ꓗꓷꓳ꓿ European Parliament ꓗꓪ ꓥ ꓟꓲ ꓐꓰ ꓬꓲ ꓔꓯ ꓡꓯꓽ ꓫꓴ ꓓꓽ ꓔꓯ ꓖꓶ ꓗꓷꓳ꓿

2014 ꓘꓳꓼ ꓕꓯ ꓬꓲ ꓠꓬ Nobel Peace Prize ꓔꓯ Indian ꓞꓳ ꓫꓵꓽ ꓥ ꓟꓲ  Kailash Satyarthi ꓐꓰ ꓘꓳ, ꓣꓴ ꓪ ꓡꓰꓳ꓿ ꓕꓱ ꓟ ꓠꓬ ꓞꓲꓼ ꓣꓳ ꓟ ꓤ ꓠꓱ ꓤ ꓐꓴ ꓟꓲ ꓠꓯ ꓢꓷ. ꓠꓲ, ꓢꓳꓻ ꓠ, ꓟ ꓛꓴ ꓙꓳˍ ꓢꓴ ꓔꓯ ꓟꓽ ꓙꓳꓺ ꓙꓳꓺ ꓐꓯ ꓟ. ꓖꓶ ꓟ ꓪꓴ. ꓠꓬꓲ ꓪ ꓟ ꓡꓯ ꓫꓴꓻ ꓥ ꓡꓳ꓿  ꓤ ꓠꓱ ꓤ ꓐꓴ ꓮ ꓙꓵꓽ ꓟꓲ ꓠꓯ ꓢꓳꓻ ꓣꓴ ꓪ ꓠ, ꓟ ꓟꓬꓱꓽ ꓬꓰ ꓠ, ꓟ ꓟꓲ ꓥ ꓡꓳ꓿

2017 ꓘꓳꓼ ꓕꓯ Canada ꓗꓴꓷꓼ ꓗꓪ ꓔꓬ ꓟ ꓠ, ꓙꓵꓽ ꓪꓽ ꓪ ꓡꓰꓳ꓿ ꓬꓲ ꓠꓬ Philosophy ꓢꓷ. ꓠꓲ, ꓔꓯ ꓢꓳꓻ ꓣꓴ ꓔꓬ ꓟ ꓟꓲ ꓥ ꓡꓳ꓿ ꓖꓳ ꓟ ꓡꓰ ꓟꓽ ꓞꓲ ꓠꓱ. ꓐꓯ ꓮ ꓟꓬ, ꓫꓵꓽ ꓢꓷ. ꓠꓲ, ꓔꓯ ꓥ ꓟꓲ Oxford ꓢꓳꓻ ꓦꓲꓻ ꓗꓪ ꓢꓳꓻ ꓣꓴ ꓔꓬ ꓟ ꓟꓲ ꓥ ꓡꓳ꓿

ꓬꓲ ꓡꓰ ꓫ. ꓕꓱ ꓔ ꓟ ꓠꓬ ꓕꓲ ꓟꓲ ꓠꓯ ꓡꓱ ꓠꓬ ꓢꓲ ꓡꓲ ꓐꓰ ꓔ ꓟ ꓙꓵ, ꓕꓯ ꓕꓲ ꓢꓯꓼ ꓡꓰ ꓫ. ꓕꓱ ꓟ ꓠꓬ ꓮ ꓘꓶ. ꓛꓲ ꓪꓽ ꓠꓬꓲˍ ꓐꓰ ꓟꓬꓱꓽ ꓓꓳꓽ ꓙꓳˍ ꓡꓳ ꓐꓰ ꓟ‐ꓡ‐ꓡ ꓡꓰ ꓫ. ꓕꓱ ꓔ ꓟ ꓥ ꓡꓳ꓿