ꓟꓬ ꓢꓷꓽ ꓠꓬꓲ ꓟꓽ ꓟꓳ ꓥ ꓟꓲ ꓜ ꓚ. ꓔꓯꓺ ꓡꓯꓽ ꓘꓳ, ꓕꓯ ꓠꓳ‐ꓐ (1) ꓧꓪ ꓢꓴ Christine Ha ꓚꓺ ꓟꓲꓽ (Christine Ha)

ꓟꓬ ꓢꓷꓽ ꓠꓬꓲ ꓟꓽ ꓟꓳ ꓥ ꓟꓲ ꓜ ꓚ. ꓔꓯꓺ ꓡꓯꓽ ꓘꓳ, ꓕꓯ ꓠꓳ‐ꓐ (1) ꓧꓪ ꓢꓴ Christine Ha ꓚꓺ ꓟꓲꓽ (Christine Ha)

ꓟꓬ ꓢꓷꓽ ꓠꓬꓲˍ ꓟꓽ ꓟꓳ ꓥ ꓟꓲ 2012 ꓘꓳꓼ ꓴꓢꓮ ꓗꓴꓷꓼ ꓜ ꓚ. ꓔꓯꓺ ꓡꓯꓽ ꓘꓳ, ꓓꓴ ꓑꓮꓲꓽ ꓓꓽ ꓗꓪ ꓐꓰ (1) ꓡꓯ ꓫꓴ ꓪ ꓢꓴ ꓚꓧꓣꓲꓢꓔꓲꓠꓰ ꓧꓮ ꓚꓺ ꓟꓲ ꓥ ꓡꓳ꓿ ꓬꓲ ꓠꓬ ꓟꓬ ꓢꓷꓽ ꓟꓽ ꓟꓳ ꓢꓴ ꓕꓲ ꓣꓳ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓠꓬ ꓜ ꓚ. ꓧꓪꓽ ꓚ. ꓗꓪ ꓮ ꓘꓶ. ꓓꓽ ꓢꓴ ꓤ ꓟꓶ ꓤ ꓕꓲ ꓣꓳ ꓥ ꓡꓳ꓿ ꓬꓲ ꓠꓬ ꓟꓬ ꓢꓷꓽ ꓢꓴ ꓐꓴ ꓐꓰ ꓜ ꓚ. ꓔꓯꓺ ꓡꓯꓽ ꓘꓳ ꓑꓮꓲ ꓗꓪ ꓮ ꓟꓬ, ꓛꓲ ꓚ. ꓔꓯꓺ ꓡꓯꓽ ꓘꓳ, ꓢꓲ ꓠꓬꓲ ꓠꓲ, ꓟ ꓟꓽ ꓐꓬ ꓡꓰ ꓮ ꓘꓶ. ꓢꓯꓼ ꓕꓵꓼ ꓢꓲ ꓠꓬꓲ (1) ꓟꓮꓢꓔꓰꓣ ꓚꓧꓰꓝ ꓡꓯ ꓫꓴꓻ ꓔꓯ ꓪ ꓡꓰ ꓢꓴ ꓥ ꓡꓳ꓿

ꓴꓢꓮ ꓗꓴꓷꓼ ꓗꓪ ꓔꓰꓫꓮꓢ ꓡꓳ ꓒꓱ ꓓꓽ ꓗꓪ ꓚꓧꓣꓲꓢꓔꓲꓠꓰ ꓔꓬ ꓟ ꓥ ꓡꓳ꓿ꓬꓲ ꓠꓬ 2012 ꓘꓳꓼ ꓕꓯ ꓟꓮꓢꓔꓰꓣ ꓚꓧꓰꓝ ꓜ ꓚ. ꓔꓯꓺ ꓡꓯ ꓘꓳ, ꓑꓮꓲ ꓗꓪ ꓐꓰ ꓡꓯ ꓫꓴꓻ ꓪ ꓢꓴ ꓥ ꓡꓳ꓿ ꓬꓲ ꓠꓬ ꓞꓲꓼ ꓣꓳ ꓟ ꓙꓵ, ꓕꓯ ꓜꓽ ꓚ. ꓟ ꓔꓯ ꓮ ꓘꓶ. ꓛꓲ ꓠꓲ, ꓟ ꓐ ꓢꓴ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓞꓲꓼ (20) ꓘꓳꓼ ꓙꓳˍ ꓡꓰ ꓟ  ꓙꓵ, ꓕꓯ ꓬꓲ ꓟꓬ ꓢꓷꓽ ꓠꓬ ꓮ ꓤ ꓤ ꓠꓬꓲ ꓟꓽ ꓟꓳ ꓗꓷ ꓡꓰ ꓟ ꓥ ꓡꓳ꓿ ꓬꓲ ꓠꓯ, ꓗꓪ ꓮ ꓙꓵꓽ ꓠꓬ ꓒꓳ, ꓡꓰ ꓟ ꓥ ꓡꓳ꓿

ꓝꓮꓲ ꓬꓲ ꓓꓵ ꓙ ꓔꓯ ꓟ ꓔꓶ ꓙꓱ ꓥ ꓟꓲ ꓒꓳ, ꓡꓰ ꓟ ꓥ ꓡꓳ꓿  ꓬꓲ ꓡꓰ ꓫ. ꓕꓱ ꓔ ꓟ ꓠꓬ ꓬꓲ ꓠꓬ ꓟꓬ ꓢꓷꓽ ꓟꓽ ꓟꓳ ꓗꓷ ꓡꓰ ꓟ ꓙꓵ, ꓕꓯ ꓬꓲ ꓠꓯ, ꓗꓪ ꓛ ꓗꓷ ꓟ ꓔꓶ ꓙꓱ ꓮ ꓙꓵꓽ ꓠꓬ ꓐꓬ ꓡꓰ ꓟ ꓥ ꓡꓳ ꓐꓰ ꓫ. ꓕꓱ ꓔ ꓡꓳ꓿ ꓬꓲ ꓠꓬ ꓮ ꓘꓶ. ꓛꓲ ꓠꓲ, ꓟ ꓫ. ꓗꓷꓳ꓿ ꓝꓮꓲ ꓬꓲ ꓚꓲ. ꓛꓬ ꓠꓲ, ꓟ ꓫ. ꓔꓬ ꓥ ꓟꓲ ꓬꓲ ꓠꓬ ꓚꓲ. ꓛꓬ ꓔꓯ ꓢꓯꓼ ꓖꓶ ꓢꓲ ꓠꓬꓲ ꓢꓯ. ꓔꓬ ꓟ ꓬꓲ ꓤꓶꓻ ꓗꓪ ꓮ ꓡꓰ ꓐꓰ ꓢꓯꓼ ꓕꓵꓼ ꓠ, ꓟ ꓢꓯꓼ ꓪ ꓣꓴ ꓗꓷꓳ꓿ ꓖꓳ ꓡꓰ ꓥ ꓟ ꓪꓴ. ꓠꓬꓲ ꓟꓲ ꓠꓯ ꓗꓪ ꓟꓬꓱꓽ ꓓꓳꓽ ꓙꓳ ꓢꓴ ꓕꓲ ꓣꓳ ꓒꓬꓱꓼ ꓡ ꓠ,ꓟ ꓢꓯꓼ ꓕꓵꓼ ꓠ, ꓟ ꓓꓵ ꓙ ꓗꓷꓳ꓿

ꓖꓳ ꓡꓱ ꓥ ꓟ ꓪꓴ. ꓠꓬꓲ ꓬꓲ ꓠꓬ ꓟꓲ ꓠꓯ ꓗꓪ ꓙꓳˍ ꓟ ꓮ ꓙꓵꓽ ꓕꓯ ꓤ ꓠꓱ ꓤ ꓕꓲ ꓣꓳ ꓡꓰ ꓐꓰ ꓬꓲ ꓪꓴ. ꓗꓪ ꓐꓰ ꓢꓳꓻ ꓣꓴ ꓗꓷꓳ꓿ ꓮ ꓡꓰ ꓐꓰ ꓕꓳ ꓶ ꓵꓻ ꓠ, ꓟ ꓮ ꓡꓰ ꓐꓰ ꓙ ꓫꓱ, ꓠ, ꓟ ꓮ ꓡꓰ ꓐꓰ ꓜ ꓚ. ꓠ, ꓟ ꓔꓯ ꓢꓳꓻ ꓣꓴ ꓗꓷꓳ꓿ ꓟꓬ ꓢꓷꓽ ꓠꓬꓲ ꓟꓽ ꓟꓳ ꓥ ꓟꓲ ꓬꓲ ꓠꓬ ꓜ ꓚ. ꓢꓴ ꓒꓬꓱꓼ ꓡ ꓟ ꓥ ꓡꓳ꓿ ꓮ ꓡꓰ ꓐꓰ ꓜ ꓚ. ꓢꓴ ꓒꓬꓱꓼ ꓡ ꓥ ꓐꓯ ꓠꓬ ꓬꓲ ꓠꓬ ꓡ ꓛꓶꓻ ꓔꓯ ꓣꓱ ꓢꓲ ꓠꓬꓲ ꓢꓳꓺ ꓟꓽ ꓢꓳꓺ ꓐꓰ ꓚ ꓗꓷꓳ꓿

ꓬꓲ ꓡꓰ ꓫ. ꓕꓱ ꓔ ꓟ ꓠꓬ ꓥꓪ ꓟꓬ ꓢꓷꓽ ꓠꓬꓲ ꓟꓽ ꓟꓳ ꓗꓷ ꓡꓰ ꓥ ꓟꓲ ꓡ ꓞꓳ ꓕꓲ ꓣꓳ ꓠꓯ, ꓗꓪ ꓪꓴ‐ꓢ ꓡꓰ ꓖꓶ ꓔ ꓟ ꓡꓯ ꓫꓴ ꓔꓯ ꓣꓱ ꓢꓲ ꓠꓬꓲ ꓪꓳꓽ ꓑꓬ ꓕꓯ ꓮ ꓡꓰ ꓐꓰ ꓢꓳꓺ ꓟꓽ ꓢꓳ ꓚꓻ ꓠ, ꓟ ꓬꓲ ꓠꓬ ꓢꓷ. ꓡꓰ ꓟ ꓥ ꓡꓳ ꓐꓰ ꓫ. ꓕꓱ ꓔ ꓡꓳ꓿ ꓝꓮꓲ ꓥꓪ ꓠꓬ ꓜ ꓪꓳ ꓑꓬ ꓜ. ꓕꓯ ꓣꓱ ꓫꓵꓽ ꓣꓱ ꓙꓵꓽ ꓔꓯ ꓮ ꓘꓶ. ꓛꓲ ꓶ ꓟꓳ ꓢꓲ ꓠꓬꓲ ꓣꓱ ꓠ, ꓟ ꓢꓳꓻ ꓣꓴ ꓗꓷꓳ꓿ ꓕꓲ ꓫꓵꓽ ꓐꓯ ꓠꓬ ꓬꓲꓻ ꓞ ꓚ. ꓔꓯ ꓮ ꓡꓰ ꓐꓰ ꓚ. ꓠ, ꓟ ꓮ ꓟꓬ, ꓫꓵꓽ ꓔꓯ ꓢꓳꓻ ꓣꓴ ꓗꓷꓳ ꓐꓰ ꓐꓯ ꓔ ꓡꓳ꓿

ꓟꓬ ꓢꓷꓽ ꓟꓳ ꓢꓴ ꓕꓲ ꓣꓳ ꓠꓬ ꓮ ꓕꓽ ꓡꓲ ꓔꓯ ꓣꓴ ꓟ ꓬꓲꓻ ꓞ ꓔꓯ ꓚ. ꓟ ꓠꓬ ꓮ ꓘꓶ. ꓛꓲ ꓙꓳꓺ ꓓꓴ ꓙꓳˍ ꓟ ꓥ ꓡꓳ꓿ ꓖꓳ ꓡꓰ ꓥ ꓟꓲ ꓚꓧꓣꓲꓢꓔꓲꓠꓰ ꓠꓬ ꓕꓱ ꓟ ꓮ ꓙꓵꓽ ꓔꓯ ꓢꓳꓻ ꓣꓴ ꓗꓷꓳ꓿ ꓬꓲ ꓠꓬ ꓠꓬꓲ ꓟꓷꓽ ꓠꓬꓲ ꓟ ꓟꓳ ꓟ ꓪꓴ. ꓠꓬꓲ ꓬꓲ ꓜ ꓪꓳꓽ ꓑꓬ ꓚ. ꓟ ꓙꓵ, ꓕꓯ ꓣꓱ ꓫꓵꓽ ꓣꓱ ꓙꓵꓽ ꓔꓯ ꓬꓲ ꓒ ꓕꓲ ꓗꓪ ꓛ ꓔ ꓢꓲ ꓠꓬꓲ ꓣꓱ ꓢ ꓠ, ꓟ ꓛ ꓗꓷꓳ꓿ ꓕꓱ ꓟ ꓠꓬ ꓬꓲ ꓮ ꓕꓽ ꓜ ꓚ. ꓓꓴ ꓞ ꓐꓳ ꓧꓪ ꓞꓶ ꓕꓱ ꓡꓰ ꓫꓵꓽ ꓔꓯ ꓬꓲ ꓒ ꓕꓲ ꓗꓪ ꓛ ꓗꓷꓳ꓿

ꓚꓧꓣꓲꓢꓔꓲꓠꓰ ꓡꓰ ꓫ. ꓕꓱ ꓔ ꓟ ꓠꓬ ꓬꓲ ꓣꓱ ꓠ ꓔ ꓟ ꓮ ꓙꓵꓽ ꓔꓯ ꓬꓲ ꓒ ꓕꓲ ꓗꓪ ꓛ ꓔ ꓟ ꓪꓴ. ꓠꓬꓲ ꓠꓬ ꓜꓽ ꓪꓳꓽ ꓑꓬ ꓚ. ꓕꓯ ꓮ ꓘꓶ. ꓢ ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿ ꓕꓱ ꓡꓰ ꓐꓰ ꓟꓬ ꓢꓷꓽ ꓠꓬꓲˍ ꓟꓽ ꓟꓳ ꓢꓴ ꓕꓲ ꓣꓳ ꓠꓬ ꓜꓽ ꓪꓳꓽ ꓑꓬ ꓮ ꓘꓶ. ꓚ. ꓢꓴ ꓒꓬꓱꓼ ꓡ ꓪ꓿ ꓖꓳ ꓡꓱ ꓥ ꓟꓲ ꓬꓲ ꓠꓲ, ꓟ ꓘꓴꓽ ꓗꓪ ꓬꓲ ꓠꓬ ꓜꓽ ꓪꓳꓽ ꓑꓬ ꓚ. ꓔꓯꓺ ꓡꓯꓽ ꓘꓳ, ꓑꓮꓲꓽ ꓗꓪ ꓔꓯꓺ ꓠ, ꓟ ꓓꓵ ꓙ ꓗꓷꓳ꓿ ꓝꓮꓲ ꓚꓧꓣꓲꓢꓔꓲꓠꓰ ꓡꓰ ꓫ. ꓕꓱ ꓔ ꓟ ꓠꓬ ꓜꓽ ꓪꓳꓽ ꓑꓬ ꓚ. ꓔꓯꓺ ꓡꓯꓽ ꓘꓳ, ꓟ ꓑꓮꓲꓽ ꓔꓯ ꓬꓰ ꓢꓴ ꓐꓴ ꓐꓰ ꓫ. ꓕꓱ ꓗꓷ ꓕꓯ ꓬꓲ ꓔꓯ ꓥ ꓟꓲ ꓔꓯꓺ ꓠ, ꓟ ꓙꓵꓽ ꓪ ꓖꓶ ꓗꓷ ꓢꓲ ꓠꓬꓲ ꓟꓬ ꓢꓷꓽ ꓟꓽ ꓢꓴ ꓕꓲ ꓣꓳ ꓜꓽ ꓪꓳꓽ ꓑꓬ ꓚ. ꓔꓯꓺ ꓡꓯꓽ ꓘꓳ, ꓟ ꓑꓮꓲꓽ ꓗꓪ ꓔꓯꓺ ꓡꓯ ꓘꓳ, ꓠꓬ ꓴꓢꓮ ꓑ ꓫꓬ ꓐꓴ ꓡꓰ ꓟꓽ ꓞꓲ ꓠꓱ. ꓐꓯꓼ ꓢꓴ ꓔꓯ ꓥ ꓟꓲ ꓮ ꓘꓶ. ꓛꓲ ꓓꓵ ꓙ ꓟꓶ ꓓꓴ ꓙꓳ ꓡꓰ ꓟ ꓥ ꓡꓳ ꓐꓰ ꓬꓲ ꓡꓰ ꓐꓯ ꓔ ꓡꓳ ꓐꓰ ꓐꓯ ꓔ ꓡꓳ꓿

ꓖꓳ ꓗ. ꓠꓯ ꓚꓧꓣꓲꓢꓔꓲꓠꓰ ꓠꓬ ꓜꓽ ꓪꓳꓽ ꓑꓬ ꓚ. ꓕꓯ ꓠꓱ. ꓐꓯꓼ ꓢꓴ ꓕꓯ ꓢꓲ ꓜꓽ ꓙꓲˍ ꓠ, ꓟ ꓬꓲ ꓠꓬ ꓮ ꓘꓶ. ꓛꓲ ꓢꓯꓼ ꓕꓵꓼ ꓢꓲ ꓠꓬ ꓢꓳꓻ ꓣꓴ ꓗꓷꓳ꓿ ꓜꓽ ꓪꓳꓽ ꓑꓬ ꓚ. ꓔꓯꓺ ꓡꓯꓽ ꓘꓳ, ꓕꓯ ꓬꓲ ꓧꓶꓽ ꓖꓶ ꓢꓴ ꓕꓲ ꓣꓳ ꓡꓰ ꓫ. ꓕꓱ ꓔ ꓟ ꓠꓬ ꓚꓧꓣꓲꓢꓔꓲꓠꓰ ꓠꓴ ꓡꓰ ꓚ. ꓗꓷ ꓟ ꓪꓳꓽ ꓑꓬ ꓠꓬ ꓮ ꓘꓶ. ꓛꓲ ꓡꓳ. ꓐꓲˍ ꓢꓲ ꓠꓬꓲ ꓮ ꓘꓶ. ꓜꓽ ꓙꓲˍ ꓡꓳ ꓝꓮꓲ ꓬꓲ ꓒꓴ ꓟꓬ, ꓗꓪ ꓥ ꓟꓲ ꓮ ꓕꓯ ꓟꓲ ꓪꓽ ꓫꓱ ꓟ ꓔꓯ ꓡꓳ. ꓟꓳ ꓪ ꓟ ꓪꓴ. ꓠꓬꓲ ꓮ ꓘꓶ. ꓛꓲ ꓠꓲ, ꓟ ꓢꓽ ꓓꓴ ꓙꓳˍ ꓡꓳ ꓐꓰ ꓫ. ꓕꓱ ꓔ ꓡꓳ꓿ ꓠꓴ ꓠꓬ ꓮ ꓘꓶ. ꓓꓽ ꓟ ꓜꓽ ꓪꓳꓽ ꓑꓬ ꓜꓽ ꓢꓴ ꓚꓧꓰꓑ ꓕꓲ ꓣꓳ ꓥ ꓡꓳ ꓠꓲ, ꓟ ꓕꓽ ꓐꓬ ꓢꓯꓼ ꓕꓵꓼ ꓐꓰ ꓟꓬꓱꓺ ꓓꓳꓽ ꓖꓶ ꓗꓷꓳ꓿

ꓖꓳ ꓗ. ꓠꓯ ꓚꓧꓣꓲꓢꓔꓲꓠꓰ ꓠꓬ ꓴꓢꓮ ꓕꓲ ꓗꓴꓷꓼ ꓡꓱ ꓜꓽ ꓪꓳꓽ ꓑꓬ ꓚ. ꓔꓯꓺ ꓡꓯ ꓘꓳ, ꓕꓯ ꓕꓲ ꓞ ꓐꓱ ꓛ ꓕꓲ ꓞ ꓓꓯꓺ ꓙꓰ ꓟ ꓟ ꓥ ꓡꓳ꓿ ꓬꓲ ꓟꓶ ꓕꓯ ꓬꓲ ꓠꓬ ꓴꓢꓮ ꓕꓲ ꓗꓴꓷꓼ ꓡꓱꓼ ꓜꓽ ꓪꓳꓽ ꓑꓬ ꓚ. ꓔꓯꓺ ꓑꓮꓲꓽ ꓗꓪ ꓐꓰ ꓠ ꓐ ꓕꓲ ꓡꓯꓽ ꓫꓴ ꓘꓳ, ꓣꓴ ꓪ ꓡꓰꓳ꓿ ꓖꓳ ꓗ. ꓠꓯ ꓡ ꓞꓳ ꓮ ꓟꓬ, ꓠꓬ ꓮ ꓘꓶ. ꓛꓲ ꓓꓵ ꓙ ꓟꓶ ꓡꓰ ꓰ ꓡꓰ ꓓꓴ ꓙꓳˍ ꓡꓰ ꓟ ꓥ ꓡꓳ ꓟꓬ ꓢꓷꓽ ꓟꓽ ꓠꓬꓲˍ ꓟ ꓢꓴ ꓜꓽ ꓪꓳꓽ ꓑꓬ ꓚ. ꓢꓴ ꓠꓬ ꓠꓱ. ꓐꓯꓼ ꓢꓴ ꓕꓯ ꓢꓲ ꓓꓽ ꓟ ꓪꓴ. ꓠꓬꓲ ꓮ ꓘꓶ. ꓛꓲ ꓓꓵ ꓙ ꓟꓶ ꓡꓰꓳ꓿

ꓚꓧꓣꓲꓢꓔꓲꓠꓰ ꓡꓰ ꓫ. ꓕꓱ ꓔ ꓟ ꓠꓬ ꓜꓽ ꓪꓳꓽ ꓑꓬ ꓚ. ꓟ ꓔꓯ ꓥꓪ ꓮ ꓘꓶ. ꓠꓲ, ꓠꓵ ꓡꓰ ꓮ ꓘꓶ. ꓑꓶ. ꓓꓴ ꓥ ꓐꓯ ꓠꓬ ꓜꓽ ꓪꓳꓽ ꓑꓬ ꓔꓯ ꓟꓲ ꓠꓯ ꓡ ꓞꓳ ꓮ ꓙꓵꓽ ꓠꓲ, ꓠꓵ ꓪꓴ. ꓠꓬꓲ ꓥ ꓡꓳ ꓐꓰ ꓐꓯ ꓔ ꓡꓳ꓿ ꓝꓮꓲ ꓬꓲ ꓠꓬ ꓕꓲ ꓟꓵꓽ ꓡꓰ ꓕꓲ ꓟꓵꓽ ꓗꓪ ꓙꓰ ꓢꓲ ꓠꓬꓲ ꓡ ꓞꓳ ꓮ ꓟꓬ, ꓐꓰ ꓫ. ꓕꓱ ꓢꓲ ꓠꓬꓲ ꓬꓲ ꓪ ꓮ ꓫꓵꓽ ꓕꓯ ꓜꓽ ꓠꓲ, ꓫꓵˍ ꓟ ꓐꓰ ꓮ ꓡꓰ ꓐꓰ ꓙ ꓡꓯꓽ ꓘꓳ, ꓠ, ꓟ ꓬꓲ ꓠꓬ ꓢꓷ. ꓡꓰ ꓟ ꓥ ꓡꓳ꓿

ꓖꓳ ꓗ. ꓠꓯ ꓬꓲ ꓠꓬ ꓜꓽ ꓪꓳꓽ ꓑꓬ ꓙꓵ꓾ ꓠꓬꓲꓽ ꓙꓵ ꓒꓴ ꓗꓷ ꓟ ꓡꓰ ꓟꓽ ꓞꓲ ꓬꓲ ꓠꓬ ꓜꓽ ꓪꓳꓽ ꓑꓬ ꓔꓯ ꓮ ꓡꓰ ꓐꓰ ꓚ. ꓠ, ꓟ ꓕꓳ ꓶ ꓔꓯ ꓥ ꓟꓲ ꓐꓳ ꓗꓷꓳ꓿ ꓬꓲ ꓠꓬ ꓟꓲ ꓠꓯ ꓗꓪ ꓡ ꓞꓳ ꓮ ꓟꓬ, ꓢꓷ. ꓢꓴ ꓝꓮꓲ ꓬꓲ ꓔꓯ ꓟꓬꓱꓺ ꓓꓳꓽ ꓖꓶ ꓢꓴ ꓮ ꓟꓬ, ꓔꓬ ꓟ ꓟꓲ ꓥ ꓡꓳ꓿ ꓟꓬ ꓢꓷꓽ ꓟꓽ ꓟꓳ ꓥ ꓟꓲ ꓕꓱ ꓟ ꓬꓲ ꓔꓯ ꓗꓽ ꓕꓽ ꓟꓽ ꓐ ꓡ ꓟ ꓪꓴ. ꓠꓬꓲ ꓥ ꓡꓳ꓿

ꓬꓲ ꓡꓰ ꓫ. ꓕꓱ ꓔ ꓟ ꓠꓬ ꓟꓲ ꓠꓯ ꓗꓪ ꓢꓯ. ꓔꓬ ꓟ ꓡ ꓞꓳ ꓮ ꓟꓬ, ꓠꓬ ꓕꓲ ꓡꓰ ꓥ ꓟ ꓪꓴ. ꓠꓬꓲ ꓮ ꓙꓵꓽ ꓕꓯ ꓞꓳ ꓒꓵꓽ ꓠ, ꓟ ꓐꓯ ꓔ ꓟ ꓥ ꓡꓳ꓿ ꓝꓮꓲ ꓣꓳ ꓮ ꓙꓵꓽ ꓠꓬ ꓪꓴ‐ꓢ ꓡꓰ ꓚꓰꓼ ꓔ ꓟ ꓡ ꓞꓳ ꓥ ꓟꓲ ꓪꓴ. ꓠꓬꓲ ꓕꓲ ꓣꓳ ꓛꓳꓽ ꓕꓲ ꓣꓳ ꓞꓳ ꓒꓵꓽ ꓠ, ꓟ ꓥ ꓟꓲ ꓐꓯ ꓔ ꓡꓳ꓿ ꓕꓱ ꓡꓰ ꓬꓲ ꓠꓬ ꓟꓲ ꓠꓯ ꓠꓬ ꓮ ꓘꓶ. ꓛꓲ ꓔꓬ ꓗ, ꓛꓲ ꓟ ꓟꓲ ꓠꓯ ꓒꓬꓱꓼ ꓡ ꓓꓴ ꓥꓳꓽ ꓐꓰ ꓬꓲ ꓡꓰ ꓢꓯꓼ ꓖꓶ ꓔ ꓟ ꓥ ꓡꓳ꓿

ꓠꓴ ꓥꓪ ꓔꓯ ꓥ ꓟꓲ ꓪꓴ‐ꓢ ꓡꓰ ꓮ ꓫꓵꓽ ꓡꓯ ꓫꓴ ꓖꓶ ꓔ ꓟ ꓔꓯ ꓢꓷ. ꓠ, ꓟ ꓣꓳ ꓬꓰ ꓓꓴ ꓬꓰ ꓡꓯ꓿ ꓪꓴ‐ꓢ ꓡꓰ ꓣꓳ ꓔꓯ ꓖꓶ ꓔ ꓟ ꓡꓯ ꓫꓴ ꓔꓯ ꓣꓳ ꓣꓱ ꓢꓲ ꓠꓬꓲ ꓟꓲ ꓠꓯ ꓗꓪ ꓡ ꓞꓳ ꓮ ꓟꓬ, ꓟꓬꓱꓺ ꓓꓳꓽ ꓖꓶ ꓟ ꓞꓳ ꓒꓵꓽ ꓟ ꓡ ꓞꓳ ꓒꓬꓱꓼ ꓡ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓕꓱ ꓡꓱ ꓫꓵꓽ ꓢꓯ. ꓐꓬꓱ ꓮ ꓟꓬ, ꓬꓰ ꓐ ꓡ ꓠ, ꓟ ꓡꓲꓗꓰ꓾ ꓢꓧꓮꓣꓰ ꓚꓳꓟꓟꓰꓠꓔ ꓬꓰ ꓖꓶ ꓓꓴ ꓬꓰ ꓡꓯ ꓫ. ꓟꓳ ꓪ꓿