ꓟꓴꓽ ꓗꓪ ꓝꓲ ꓓꓴ 3 ꓣꓳ ꓑꓮꓲ

  ꓟꓴꓽ ꓗꓪ ꓝꓲ ꓓꓴ ꓐꓴ ꓑꓮꓲ

ꓟꓴꓽ ꓗꓪ ꓝꓲ ꓓꓴ ꓐꓴ ꓠꓬ ꓪꓴ-ꓢ ꓡꓰ ꓟꓲꓸꓸꓠꓯꓸ ꓔꓯ ꓟꓽ ꓚꓰꓼ ꓕꓯ ꓡꓰ ꓪꓴ-ꓢ ꓡꓰ ꓚꓰꓼ ꓔ ꓟ ꓦ ꓖꓳ ꓓꓱ ꓥ ꓡꓳ= ꓟꓴꓽ ꓗꓪ ꓝꓲ ꓓꓴ ꓐꓴ ꓔꓯ ꓟꓳꓸ ꓐꓯˍ ꓠꓬ ꓦ ꓖꓳ ꓓꓱ ꓡꓰ ꓥ ꓢꓲ꓾ ꓧꓪꓽ ꓖꓳ ꓓꓱ ꓟꓽ ꓙꓳ= ꓬꓲꓸ ꓪ ꓬꓰ ꓟ ꓟꓬꓱꓽ ꓐꓰ ꓕꓲ ꓪꓽ ꓬꓲ ꓪ ꓔꓯ ꓟꓬꓱꓸꓸꓖꓶ ꓔ ꓡꓳ=

ꓟꓴ ꓗꓪ ꓝꓲ ꓓꓴ ꓟꓲ-ꓘꓯ-ꓡꓷ ꓠꓬꓹ ꓢ-ꓓꓯ ꓔꓯ꓾ ꓢꓰꓼ ꓡꓯꓼ ꓠ ꓟ ꓙꓵꓽ ꓪ ꓖꓶ ꓗꓷ ꓟ ꓪꓴꓽ ꓠꓬꓲ (Who is like God) ꓪꓴ-ꓢ ꓡꓰ ꓐꓰ ꓮ ꓟ ꓥ! ꓐꓯˍꓟ ꓟꓸ ꓟꓲꓽ ꓥ ꓡꓳ= ꓪꓴ-ꓢ ꓠꓬ ꓟꓴꓽ ꓗꓪ ꓝꓲ ꓓꓴ ꓟꓲ-ꓘꓷ-ꓡꓷ ꓔꓯ ꓪꓴ-ꓢ ꓔꓯ ꓓꓽ ꓔꓳꓹ ꓔ ꓟ ꓡꓴ-ꓢ-ꓩ ꓔꓯ ꓮ ꓘꓶꓸ ꓗꓹ ꓛꓲꓽˍ ꓟ ꓑ-ꓣꓸꓓꓲ ꓟꓵꓽ ꓗꓪ ꓐꓰ ꓖꓼ ꓓꓳꓻ ꓗꓷˍ ꓟ ꓥ ꓡꓳ=

ꓟꓳꓸ ꓖꓶ ꓓꓴ ꓕꓳ ꓶ 12ꓽ 7-8 ꓗꓪ ꓟꓴ ꓗꓪ ꓗꓪ ꓠꓬ ꓟꓯꓼ ꓢꓰꓼ ꓡꓯꓽ ꓘꓳˍ ꓟ ꓙꓳˍ ꓡꓳ=ꓟꓲ-ꓘꓷ-ꓡꓷˍꓐꓰ ꓬꓲ ꓝꓲ ꓓꓴ ꓐꓴ ꓠꓬ꓾ ꓡꓴꓽˍ ꓐꓰ ꓢꓰꓼ ꓡꓯꓽ ꓘꓳˍꓕꓯˍ ꓡꓴꓽˍ ꓐꓰ ꓬꓲ ꓝꓲ ꓓꓴ ꓐꓴˍ ꓟꓲ ꓬꓲ ꓪ ꓔꓯ ꓔꓳꓹ ꓡˍ ꓡꓳ= ꓖꓳ ꓡꓱ ꓥˍ ꓟꓲ ꓡꓴꓽ ꓠꓬ ꓧꓪꓸ ꓡꓰ ꓟꓽ ꓘꓴꓻ ꓠꓬꓲ ꓟꓴ ꓗꓪ ꓗꓪˍ ꓟꓲ ꓬꓲ ꓔꓬ ꓖꓴ ꓟꓽ ꓙꓳ ꓗꓷ ꓡꓰꓳ=

ꓝꓮꓲ ꓟꓳꓸ ꓖꓶ ꓓꓴ ꓕꓳ ꓶ 20ꓽ10 ꓝꓲꓸ ꓗꓪ ꓞꓳ ꓤ ꓔꓯ ꓟꓸ ꓒꓬꓹ ꓢꓴ ꓢ-ꓓꓯ ꓔꓯ ꓠꓬ꓾ ꓓꓴꓽ ꓪꓴˍ ꓐꓰ ꓟꓽ ꓔꓱꓹ ꓟ ꓟꓷꓽ ꓠꓷꓹ ꓝꓸ ꓢꓴ ꓔꓬ ꓖꓴ꓾ ꓡꓳ ꓐ ꓮꓸ ꓔꓳꓸ ꓬꓲꓻꓐꓱ ꓗꓪ ꓡꓳ ꓧꓳꓽ ꓗꓷˍ ꓡꓳ= ꓬꓲ  ꓪ ꓠꓬ ꓟꓳꓼ ꓡꓳ ꓢ ꓘꓪ ꓮ ꓕꓯˍ ꓟꓲ ꓖꓳ ꓗꓪ ꓫꓸ ꓙꓵꓻ ꓟꓷꓽ ꓙꓵꓻˍ ꓥꓳ=

ꓟꓴꓽ ꓗꓪ ꓝꓲ ꓓꓴ ꓚꓬ-ꓑꓷ-ꓡꓰ ꓠꓬ ꓪꓴ-ꓢ ꓬꓲꓸ ꓶꓼ ꓓꓳꓽ ꓫꓱꓹ ꓓꓳꓽ ꓐꓯ ꓐꓶ ꓢꓴ ꓥ ꓡꓳ= ꓖꓳ ꓡꓱ ꓥ ꓟ ꓪꓴꓸ ꓠꓬꓲ ꓟꓴꓽ ꓗꓪ ꓝꓲ ꓓꓴ ꓚꓬ-ꓑꓓ-ꓡꓰ ꓔꓯ “Power of God” ꓐꓯˍ ꓟ ꓥ ꓡꓳ= ꓚꓬ-ꓑꓓ-ꓡꓰ ꓠꓬ ꓟ-ꓡꓲ-ꓬ ꓔꓯ ꓬꓰ-ꓢꓴ ꓦꓵꓻ ꓡ ꓠꓹ ꓟ ꓓꓳꓽ ꓐꓯ ꓖꓶˍ ꓟ ꓥ ꓡꓳ= ꓟ-ꓡꓲ ꓠꓬ ꓟꓴꓽ ꓗꓪ ꓝꓲ ꓓꓴ ꓔꓯ꓾ ꓥꓪ ꓠꓬ ꓤ ꓟꓶꓽ ꓡꓯꓸ ꓚꓵꓸꓸ ꓥ ꓠꓬꓲ꓾ ꓕꓱ ꓟ ꓮ ꓡꓰ ꓒꓬꓱꓼ ꓡ ꓓ ꓢꓰꓽ꓾ ꓐꓯꓹ ꓖꓶˍ ꓔꓯ꓾ ꓚꓬ-ꓑꓷ-ꓡꓰ ꓠꓬ ꓟ-ꓡꓲ ꓔꓯ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓬꓰ ꓟꓽ ꓐ ꓡ ꓟ ꓮ ꓫꓵꓽˍ ꓟꓲ ꓟ ꓙꓳ꓾ ꓐꓯ꓾ ꓡꓳ=

ꓟꓴꓽ ꓗꓪ ꓝꓲ ꓓꓴ Rapha –el ꓔꓯ ꓠꓬ ꓧꓪ ꓖꓳ ꓓꓱ ꓐꓰ ꓦ ꓕꓲ ꓒꓳꓹ ꓗꓪ ꓠꓻ ꓔꓬ ꓢꓴ ꓔꓯꓸ ꓠꓯꓸꓸ ꓞꓲꓼ ꓫꓬꓹ ꓠꓹ ꓟ ꓪꓴ-ꓢ ꓡꓰ ꓬꓲꓸ ꓔꓯ ꓙꓵꓽ ꓪ ꓖꓶ ꓗꓷ ꓟ ꓥ ꓡꓳ= ꓬꓲꓸ ꓟꓬꓱꓸꓸ ꓠꓬ ꓪꓴ-ꓢ ꓠꓯꓹ ꓞꓲ (medicine of God)ꓐꓯˍ ꓟ ꓥ ꓡꓳ= ꓬꓲ ꓠꓬ Tobiya ꓟꓬꓱꓸꓸ ꓔꓸ ꓟ ꓡ ꓞꓳ ꓕꓲ ꓣꓳ ꓔꓯ ꓠꓱꓸ ꓐꓯꓼ ꓟꓵꓽ ꓗꓪ ꓙꓰˍꓟ ꓗꓪ ꓬꓰ ꓙ ꓢꓴ ꓥ ꓡꓳ= Tobiya ꓔꓯ ꓢ-ꓓꓯ ꓡꓯꓽ ꓒꓯꓹ ꓗꓪ ꓐꓰ ꓬꓰ ꓙ ꓢꓴ ꓥ ꓡꓳ= Tobiya ꓬꓲ ꓐꓹ ꓐ ꓔꓯ ꓟꓬ-ꓢꓷꓽ ꓝꓮꓲ ꓡꓳꓸ ꓟꓳ ꓠꓹ ꓟ ꓬꓰ ꓙ ꓖꓶ ꓗꓷ= ꓬꓲ ꓟꓬꓱꓸꓸ ꓠꓬ  Rapha-el ꓥ ꓡꓳ=  ꓬꓲꓹ ꓠꓬ ꓪꓴ-ꓢ ꓟꓲꓽ ꓙꓬꓼ ꓗꓪ ꓟꓬꓱꓽ ꓬꓰ ꓔꓬꓹ ꓟ ꓟꓴꓽ ꓗꓪ ꓝꓲ-ꓓꓴ 7 ꓣꓳ ꓟ ꓗꓪ ꓕꓲ ꓣꓳ ꓥ ꓡꓳ=