ꓟꓶ ꓚꓵ ꓟ ꓕꓲ ꓣꓳ ꓠꓬ ꓤ ꓑ ꓤ ꓡꓰ ꓐꓰ (43) ꓘꓳꓼ ꓢꓯ. ꓔꓬ ꓗꓷ ꓢꓴ ꓚꓱ, (She lived as a man for 43 years)

#creditphoto #Sisa #Who lived as a man (43) years in Egypt

ꓟꓶ ꓚꓵ ꓟ ꓕꓲ ꓣꓳ ꓠꓬ ꓤ ꓑ ꓤ ꓡꓰ ꓐꓰ (43) ꓘꓳꓼ ꓢꓯ. ꓔꓬ ꓗꓷ ꓢꓴ ꓚꓱ, (She lived as a man for 43 years)

ꓰꓖꓬꓑꓔ ꓗꓴꓷꓼ ꓗꓪ ꓟꓶ ꓚꓵ ꓟ ꓕꓲ ꓣꓳ ꓠꓬ ꓤ ꓑ ꓤ ꓡꓰ ꓐꓰ ꓢꓯ. ꓔꓬ ꓟ ꓠꓬ (43) ꓘꓳꓼ ꓙꓳˍ ꓡꓰ ꓢꓴ ꓕꓲ ꓣꓳ ꓔꓬ ꓟ ꓥ ꓡꓳ꓿ ꓬꓲ ꓠꓬ ꓮ ꓡꓰ ꓐꓰ ꓞꓳ ꓙꓳ ꓢꓯ. ꓔꓬ ꓗꓷ ꓟ ꓔꓯ ꓮ ꓘꓶ ꓓꓵ ꓟ ꓟꓶ ꓓꓴ ꓙꓳˍ ꓟ ꓥ ꓡꓳ꓿ ꓕꓱ ꓟꓶ ꓚꓵ ꓟ ꓠꓬ ꓤ ꓑ ꓤ ꓐꓴ ꓞꓶ ꓔꓯ ꓖꓪ ꓔ ꓢꓲ ꓠꓬꓲ ꓫ. ꓕꓱˍ ꓢꓯꓼ ꓥ ꓟꓲ ꓤ ꓑ ꓤ ꓡꓰ ꓐꓰ ꓫ. ꓕꓱ ꓢꓴ ꓥ ꓡꓳ꓿ ꓝꓮꓲ ꓬꓲ ꓟꓬꓱꓽ ꓥ ꓟꓲ ꓤ ꓑ ꓤ ꓟꓬꓱꓽ ꓔꓯ ꓬꓰ ꓢꓴ ꓥ ꓡꓳ꓿

ꓬꓲ ꓟꓬꓱꓺ ꓠꓬ ꓢꓲꓢꓮ ꓟꓬꓱꓺ ꓔ ꓢꓴ ꓥ ꓡꓳ꓿ ꓬꓲ ꓠꓬ ꓰꓖꓬꓑꓔ ꓗꓴꓷꓼ ꓡꓴꓫꓳꓣ ꓡꓳ ꓒꓱ ꓗꓪ ꓔꓬ ꓢꓴ ꓥ ꓡꓳ꓿ꓬꓲ ꓠꓬ (67) ꓙꓳˍ ꓢꓴ ꓟꓶ ꓚꓵ ꓟ ꓥ ꓢꓲ ꓠꓬꓲ ꓬꓲ ꓠꓬ ꓤ ꓑ ꓤ ꓡꓰ ꓐꓰ ꓢꓯ. ꓔꓬ ꓢꓴ ꓥ ꓡꓳ꓿

ꓬꓲ ꓠꓬ ꓗꓳ. ꓗꓷ ꓟ (43) ꓘꓳꓼ ꓕꓯ ꓮ ꓘꓶ. ꓡꓳ. ꓐꓲ ꓟ ꓤ ꓠꓱ ꓤ ꓕꓲ ꓣꓳ ꓥ ꓡꓳ꓿ ꓬꓲ ꓠꓯ, ꓗꓪ ꓬꓲ ꓦꓲꓻ ꓢꓲꓽ ꓒ ꓐꓰ ꓬꓲ ꓤ ꓟꓶꓼ ꓕꓲ ꓣꓳ ꓔꓬ ꓢꓴ ꓥ ꓡꓳ꓿ ꓖꓳ ꓗ. ꓠꓯ ꓬꓲ ꓬꓲ ꓦꓲꓻ ꓢꓲꓽ ꓒ ꓠꓬ ꓫꓵꓻ ꓡꓰ ꓟ ꓙꓵ, ꓕꓯ ꓬꓲ ꓠꓬ ꓢꓯ. ꓔꓬ ꓠ, ꓟ ꓟꓬꓱꓺ ꓔꓯ ꓮ ꓘꓶ. ꓛꓲ ꓢꓯꓼ ꓕꓵꓼ ꓢꓲ ꓠꓬꓲ ꓤ ꓑ ꓤ ꓕꓲ ꓣꓳ ꓡꓰ ꓐꓵ ꓞꓶ ꓖꓪ ꓔ ꓢꓲ ꓠꓬꓲ ꓟꓬꓱꓽ ꓗꓷꓳ꓿ ꓬꓲ ꓡꓰ ꓐꓯ ꓔ  ꓟ ꓠꓬ ꓬꓲ ꓠꓬ ꓟꓬꓱꓽ ꓮ ꓟꓬ, ꓫꓵꓽ ꓔꓯ ꓬꓰ ꓗꓷꓳ꓿ ꓰꓖꓬꓑꓔ ꓗꓴꓷꓼ ꓗꓪ ꓠꓬ ꓤ ꓠꓱ ꓤ ꓐꓴ ꓔꓯ ꓟꓬꓱꓽ ꓬꓰ ꓟ ꓙꓵ, ꓕꓯ ꓟꓬꓱꓽ ꓮ ꓟꓬ, ꓟꓽ ꓖꓶ ꓡ ꓟ ꓪꓴ. ꓠꓬꓲ ꓤ ꓑ ꓤ ꓡꓰ ꓐꓰ ꓢꓯ. ꓔꓬ ꓢꓲ ꓠꓬꓲ ꓟꓬꓱꓽ ꓬꓰ ꓢꓲ ꓠꓬꓲ ꓬꓲ ꓤ ꓟꓶꓼ ꓔꓯ ꓧꓪ ꓚ. ꓗꓷ ꓟ ꓥ ꓡꓳ ꓐꓰ ꓬꓲ ꓡꓰ ꓐꓯ ꓟ. ꓖꓶ ꓡ ꓡꓳ꓿

ꓮ ꓟꓶ ꓙꓵ, ꓗꓪ ꓛꓲ ꓞꓳ ꓙꓳ ꓢꓯ. ꓔꓬ ꓪ ꓟ ꓪꓴ. ꓠꓬꓲ ꓪꓴ‐ꓢ ꓔꓯ ꓥ ꓟꓲ ꓫ. ꓟꓳ ꓡꓳ ꓐꓰ ꓐꓯ ꓔ ꓡꓳ꓿ ꓰꓖꓬꓑꓔ ꓗꓴꓷꓼ ꓗꓪ ꓠꓬ ꓤ ꓠꓱ ꓤ ꓐꓴ ꓠꓬ ꓦꓲꓻ ꓘꓴꓽ ꓗꓪ ꓡꓰ ꓔꓬ ꓢꓲ ꓠꓬꓲ ꓠꓬ ꓦꓲꓻ ꓘꓴꓽ ꓟꓬꓱꓽ ꓔꓯ ꓡꓰ ꓬꓰ ꓠ, ꓟ ꓙꓵꓽ ꓪ ꓛ ꓔ ꓟ ꓗꓴꓷꓼ ꓟꓲ ꓥ ꓡꓳ꓿  ꓤ ꓠꓱ ꓤ ꓐꓴ ꓔꓯ ꓡꓳ. ꓠ, ꓟ ꓐꓰ ꓬꓲ ꓐ ꓢꓲ ꓠꓬꓲ ꓟꓬꓱꓽ ꓟꓽ ꓬꓰ ꓠ, ꓟ ꓙꓳˍ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓢꓲꓢꓮ ꓠꓬ ꓬꓲ ꓦꓲꓻ ꓢꓲꓽ ꓒ ꓟꓽ ꓔꓬ ꓗ. ꓠꓯ ꓞꓳ ꓙꓳˍ ꓢꓯ. ꓔꓬ ꓠ, ꓟ ꓠꓲ, ꓟ ꓟꓽ ꓐꓬ ꓬꓲ ꓠꓬ ꓤ ꓑ ꓤ ꓡꓰ ꓐꓰ ꓢꓯ. ꓔꓬ ꓗꓷꓳ꓿

ꓢꓲꓢꓮ ꓡꓰ ꓐꓯ ꓔ ꓟ ꓠꓬ ꓬꓲ ꓔꓯ ꓬꓰ ꓙ ꓔꓳ, ꓙ ꓠ,ꓟ ꓬꓲ ꓪ ꓦꓲꓻ ꓘꓴꓽ ꓢꓴ ꓝꓮꓲ ꓫꓵꓽ ꓤ ꓪꓳꓽ ꓤ ꓔꓯ ꓟꓽ ꓓꓰꓽ ꓐꓰ ꓐꓯ ꓔ ꓟ ꓥ ꓡꓳ꓿ ꓬꓲ ꓡꓰ ꓒꓴ ꓫꓵˍ ꓔꓯ ꓬꓲ ꓡꓯ ꓒꓯ, ꓡꓰ ꓧꓪ ꓗꓷꓳ꓿ ꓬꓲ ꓡꓰ ꓐꓰ ꓬꓲ ꓠꓬ ꓬꓲ ꓪ ꓕꓲ ꓦꓲꓻ ꓐꓴ ꓜ ꓓꓴ ꓓꓳ ꓓꓴ ꓔꓯ ꓮ ꓘꓶ. ꓛꓲ ꓢꓯꓼ ꓕꓵꓼ ꓢꓲ ꓠꓬꓲ ꓟꓬꓱꓽ ꓬꓰ ꓗꓷꓳ꓿ ꓕꓱ ꓡꓱ ꓐꓰ ꓬꓲ ꓪ ꓕꓲ ꓦꓲꓻ ꓢꓴ ꓮ ꓙꓵꓽ ꓔꓯ ꓢꓽ ꓢꓽ ꓞꓳ ꓙꓳ ꓢꓯ. ꓔꓬ ꓟꓶ ꓠ, ꓟ ꓢꓯꓼ ꓕꓵꓼ ꓗꓷꓳ꓿

ꓝꓮꓲ ꓕꓲ ꓠꓬꓲ ꓙꓳˍ ꓕꓯ ꓢꓲꓢꓮ ꓠꓬ ꓬꓲ ꓓꓵ ꓙ ꓛꓲ ꓡ ꓗꓷꓳ ꓬꓲ ꓠꓬ ꓬꓲ ꓔꓯ ꓠꓲ, ꓠꓵ ꓢꓴ ꓟꓽ ꓧꓪ ꓟꓳ ꓠꓬ ꓬꓲ ꓠꓬ ꓢꓯ. ꓔꓬ ꓟ ꓕꓲ ꓤꓶꓻ ꓡꓱ ꓤ ꓑ ꓤ ꓡꓰ ꓐꓰ ꓢꓯ. ꓔꓬ ꓠ, ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬ ꓬꓲ ꓠꓯ ꓤ ꓠꓱ ꓤ ꓕꓲ ꓣꓳ ꓡꓰ ꓐꓰ ꓔꓬ ꓠ, ꓟ ꓓꓴ ꓙ ꓗꓷꓳ꓿ ꓮ ꓫꓵꓽ ꓑꓶ. ꓓꓴ ꓥ ꓐꓯ ꓠꓬ ꓰꓖꓬꓑꓔ ꓗꓴꓷꓼ ꓗꓪ ꓤ ꓑ ꓤ ꓐꓴ ꓡꓰ ꓟꓬꓱ ꓪ ꓓ ꓪꓴ. ꓠꓬꓲ ꓥ ꓡꓳ꓿ ꓬꓲ ꓠꓬ ꓬꓲ ꓳ. ꓞꓱ ꓔꓯ ꓔꓶꓼ ꓗꓷꓳ꓿

ꓝꓮꓲ ꓬꓲ ꓠꓬ ꓬꓲ ꓫ. ꓕꓱˍ ꓢꓯꓼ ꓔꓯ ꓥ ꓟꓲ ꓑ ꓗꓷꓳ꓿ ꓬꓲ ꓠꓬ ꓤ ꓑ ꓤ ꓐꓴ ꓞꓶ ꓖꓪ ꓔ ꓢꓲ ꓠꓬꓲ ꓟꓬꓱꓽ ꓬꓰ ꓗꓷꓳ꓿ ꓕꓱ ꓟ ꓠꓬ ꓦꓲꓻ ꓫꓬ, ꓔ ꓟ ꓝꓮꓲ ꓛꓲ ꓠꓬꓲˍ ꓔꓴ ꓔ ꓟ ꓐꓰ ꓠꓱ. ꓐꓯꓼ ꓟꓬꓱꓽ ꓮ ꓟꓬ, ꓔꓯ ꓬꓰ ꓟ ꓥ ꓡꓳ꓿ ꓬꓲ ꓪ ꓔꓬ ꓟ ꓟꓵꓽ ꓗꓪ ꓠꓬ ꓕꓱ ꓡꓱ ꓫꓵꓽ ꓟꓬꓱꓽ ꓔꓯ ꓤ ꓑ ꓤ ꓐꓴ ꓡꓰ ꓟꓬꓱꓽ ꓬꓰ ꓟ ꓥ ꓡꓳ꓿ ꓬꓲ ꓠꓬ ꓬꓲ ꓟꓬꓱ ꓔꓯ ꓕꓲ ꓫꓵꓽ ꓡꓰ ꓕꓲ ꓫꓵꓽ ꓐꓰ ꓕꓲ ꓘꓳꓼ ꓡꓰ ꓕꓲ ꓘꓳꓼ ꓬꓰ ꓗꓷ ꓟ ꓠꓬ ꓮ ꓟꓶ ꓟ ꓙꓵ, ꓗꓪ (43) ꓘꓳꓼ ꓙꓳ ꓡꓰ ꓢꓲ ꓠꓬꓲ ꓬꓲ ꓠꓬ ꓪ ꓡ ꓟ ꓒꓴ ꓔꓯ ꓥ ꓟꓲ ꓠˍ ꓔ ꓟ ꓥ ꓡꓳ꓿

ꓕꓱ ꓟ ꓠꓬ ꓬꓲ ꓤ ꓟꓶ ꓔꓯ ꓜ ꓖꓶ ꓜ ꓠ, ꓟ ꓥ ꓡꓳ꓿ ꓬꓲ ꓡꓰ ꓫ. ꓕꓱ ꓔ ꓟ ꓠꓬ ꓥꓪ ꓤ ꓟꓶ ꓞꓲꓼ ꓣꓳ ꓟ ꓙꓵ, ꓕꓯ ꓬꓲ ꓤ ꓟꓶ ꓠꓬ ꓬꓲ ꓔꓯ ꓮ, ꓐ ꓐꓰ ꓘꓴˍ ꓗꓷ ꓐꓰ ꓐꓯ ꓔ ꓡꓳ꓿ ꓮ ꓫꓵꓽ ꓑꓶ ꓓꓴ ꓥ ꓐꓯ ꓠꓬ ꓬꓲ ꓟ, ꓟ ꓥ ꓟ ꓔꓯ ꓟꓽ ꓢꓷ. ꓟ ꓪꓴ. ꓠꓬꓲ ꓥ ꓡꓳ ꓐꓰ ꓐꓯ ꓔ ꓡꓳ꓿ ꓬꓲ ꓥ ꓟꓲ ꓤ ꓑ ꓤ ꓐꓴ ꓞꓶ ꓔꓯ ꓖꓪ ꓟ ꓥ ꓟ ꓪꓴ. ꓠꓬꓲ ꓙꓲˍ ꓟ ꓮ, ꓐ ꓕꓲ ꓣꓳ ꓒꓬꓱꓼ ꓠ ꓢꓯꓼ ꓕꓵꓼ ꓗꓷꓳ ꓐꓰ ꓐꓯ ꓔ ꓡꓳ꓿ ꓪꓴ‐ꓢ ꓔꓯ ꓥ ꓟꓲ ꓮ ꓘꓶ. ꓫ. ꓟꓳ ꓐꓰ ꓐꓯ ꓔ ꓡꓳ꓿

ꓬꓲ ꓡꓰ ꓡꓰ ꓐꓯ ꓔ ꓟ ꓠꓬ ꓥꓪ ꓠꓬ ꓚꓲ. ꓛꓬ ꓔꓯ ꓥ ꓟꓲ ꓮ ꓡꓰ ꓞꓳ ꓙꓳˍ ꓠ, ꓟ ꓮ ꓘꓶ. ꓛꓲ ꓓꓴ ꓙ ꓫꓪ ꓠꓬꓲˍ ꓠ, ꓟ ꓓꓴ ꓙ ꓢꓴ ꓕꓲ ꓣꓳ ꓥ ꓡꓳ ꓐꓰ ꓐꓯ ꓔ ꓡꓳ꓿ꓢꓲꓢꓮ ꓠꓬ ꓤ ꓑ ꓤ ꓐꓴ ꓕꓯ ꓢꓲ ꓢꓯꓼ ꓙꓳˍ ꓢꓴ ꓟꓶ ꓚꓵ ꓟ ꓕꓲ ꓣꓳ ꓥ ꓡꓳ꓿ꓕꓱ ꓟ ꓠꓬ ꓧꓪꓽ ꓖꓳ ꓡꓰ ꓟꓽ ꓞꓲ ꓬꓲ ꓙꓵꓻ ꓠꓲ, ꓥ ꓟꓲ ꓮ ꓘꓶ. ꓙꓳˍ ꓢꓴ ꓥ ꓡꓳ꓿

ꓕꓱ ꓡꓱ ꓐꓰ ꓬꓲ ꓠꓬ ꓢꓲ ꓡꓲ ꓐꓰ ꓟꓬꓱꓽ ꓢꓯꓼ ꓕꓵꓼ ꓔꓬ ꓟ ꓔꓯ ꓡ ꓞꓳ ꓐꓴ ꓠꓬ ꓢꓷ. ꓡꓰ ꓟ ꓥ ꓡꓳ꓿ ꓬꓲ ꓔꓯ ꓰꓖꓬꓑꓔꓲꓮꓠ ꓗꓴꓷꓼ ꓗꓪ ꓢꓯ. ꓐꓬꓱ ꓔꓦ ꓗꓪ ꓐꓰ ꓬꓲ ꓚꓱ, ꓔꓯ ꓓꓱ ꓗꓷꓳ꓿ ꓖꓳ ꓗ. ꓠꓯ ꓬꓲ ꓔꓯ ꓰꓖꓬꓑꓔ ꓗꓴꓷꓼ ꓙꓵꓽ ꓢꓴ ꓢꓲꓽ ꓒꓽ ꓡꓰ ꓬꓲ ꓔꓯ ꓮ ꓘꓶ. ꓛꓲ ꓓꓽ ꓢꓴ ꓐꓰ ꓟꓬꓱꓽ ꓓꓳꓽ ꓖꓶ ꓡꓯ ꓫꓴ ꓖꓶ ꓗꓷ ꓟ ꓥ ꓡꓳ꓿ ꓕꓱ ꓟ ꓠꓬ ꓟ, ꓟ ꓕꓲ ꓣꓳ ꓟꓲ ꓠꓯ ꓗꓪ ꓟꓽ ꓙꓳꓺ ꓙꓳꓺ ꓮ ꓡꓰ ꓢꓯ. ꓔꓬ ꓗꓷ ꓟ ꓟꓬꓱꓽ ꓬꓰ ꓜ ꓗꓷ ꓟ ꓑꓶ. ꓓꓴ ꓬꓲ ꓔꓯ ꓖꓶ ꓗꓷ ꓟ ꓥ ꓡꓳ꓿

ꓮ ꓟꓶ ꓟ ꓙꓵ, ꓗꓪ ꓠꓬ ꓢꓲꓢꓮ ꓠꓬ ꓤ ꓑ ꓤ ꓡꓰ ꓢꓯ. ꓔꓬ ꓟ ꓠꓬ ꓫꓵꓻ ꓗꓪ ꓛꓲ ꓔꓬ ꓠ, ꓟ ꓓꓴ ꓙ ꓔ ꓡꓳ ꓐꓰ ꓐꓯ ꓔ ꓡꓳ꓿ ꓮ ꓟꓶ ꓟ ꓙꓵ, ꓗꓪ (67) ꓘꓳꓼ ꓡꓳˍ ꓬꓰ ꓟ ꓟꓶ ꓚꓵ ꓟ ꓕꓲ ꓣꓳ ꓠꓬ ꓤ ꓑ ꓤ ꓡꓰ ꓐꓰ ꓐꓴ ꓞꓶ ꓖꓪ ꓔ ꓢꓲ ꓠꓬꓲ ꓢꓯ. ꓔꓬ ꓢꓴ ꓥ ꓡꓳ꓿ ꓝꓮꓲ ꓬꓲ ꓢꓯ. ꓔꓬ ꓠ, ꓟ ꓟꓬꓱꓽ ꓔꓯ ꓥ ꓟꓲ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟꓬꓱꓽ ꓜ ꓔꓬ ꓟ ꓥ ꓡꓳ꓿

ꓢꓲꓢꓮ ꓠꓬ ꓰꓖꓬꓑꓔ ꓗꓴꓷꓼ ꓗꓪ ꓤ ꓟꓶ ꓤ ꓐꓴ ꓪ ꓙꓵꓽ ꓪ ꓔꓯ ꓓꓰꓽ ꓢꓴ ꓕꓲ ꓣꓳ ꓟꓲ ꓥ ꓡꓳ꓿ ꓟꓲ ꓠꓯ ꓗꓪ ꓤ ꓟꓶ ꓤ ꓮ ꓟꓬ, ꓠꓬ ꓮ ꓘꓶ. ꓛꓲ ꓫ. ꓓꓴ ꓟꓷꓽ ꓓꓴ ꓔꓳ, ꓜꓳ ꓔꓬ ꓟ ꓪꓴ. ꓠꓬꓲ ꓤ ꓟꓶ ꓤ ꓐꓴ ꓮ ꓙꓵꓽ ꓔꓯ ꓤ ꓑ ꓤ ꓐꓴ ꓡꓰ ꓐꓰ ꓕꓲ ꓡꓰ ꓙꓵꓽ ꓪ ꓖꓶ ꓠ, ꓟ ꓙꓳˍ ꓡꓳ ꓐꓰ ꓐꓯ ꓔ ꓡꓳ꓿

ꓠꓲ, ꓠꓵ ꓟ ꓮ, ꓐ ꓮ, ꓟ ꓐꓴ ꓠꓬꓲ. ꓠꓬꓲ ꓣꓳ ꓡꓳ. ꓟꓳ ꓗꓷ ꓟ ꓢꓯ. ꓐꓬꓱ ꓠꓬ ꓟꓶ ꓚꓵ ꓟ ꓕꓲ ꓣꓳ ꓠꓬ ꓮ ꓡꓰ ꓐꓰ ꓢꓯꓼ ꓕꓵꓼ ꓢꓲ ꓠꓬꓲ ꓢꓯ. ꓔꓬ ꓗꓷ ꓟ ꓥ ꓡꓳ꓿ ꓣꓳ ꓔꓯ ꓞꓲꓼ ꓣꓳ ꓟ ꓙꓵ, ꓗꓪ ꓐꓰ ꓠꓬꓲ. ꓠꓬꓲ ꓗꓪ ꓛꓲ ꓟꓬꓱꓽ ꓬꓰ ꓜ ꓖꓶ ꓡ ꓢꓴ ꓣꓳ ꓐ, ꓐ ꓟ, ꓟ ꓔꓯ ꓣꓳ ꓠꓲ, ꓠꓵ ꓓꓴ ꓬꓰ ꓡꓯ꓿ ꓐ, ꓐ ꓟ, ꓟ ꓔꓯ ꓒꓵꓽ ꓓꓴ ꓬꓰ  ꓡꓯ꓾ ꓬꓲ ꓪ ꓔꓯ ꓟꓬꓱꓽ ꓬꓰ ꓙ ꓓꓴ ꓬꓰ ꓡꓯ꓿ ꓣꓳ ꓐ, ꓐ ꓟ, ꓟ ꓔꓯ ꓠꓬꓲ. ꓠꓬꓲ ꓗꓪ ꓐꓰ ꓮ ꓘꓶ. ꓛꓲ ꓒꓵꓽ ꓢꓲ ꓠꓬꓲ ꓠꓲ, ꓠꓵ ꓓꓴ ꓬꓰ ꓡꓯ꓿ ꓕꓱ ꓡꓱ ꓫꓵꓽ ꓢꓯ. ꓐꓬꓱ ꓮ ꓟꓬ, ꓬꓰ ꓐ ꓡ ꓠ, ꓟ ꓡꓲꓗꓰ꓾ ꓢꓧꓮꓣꓰ ꓚꓳꓟꓟꓰꓠꓔ ꓮ ꓟꓬ, ꓖꓶ ꓓꓴ ꓬꓰ ꓡꓯ꓿

 

Add new comment

7 + 3 =