ꓟꓽ ꓢꓲꓽ ꓟꓽ ꓫꓬˍ ꓟ ꓚꓱꓹ (Q & A)

ꓞꓳ ꓡꓱ ꓥꓹ ꓠꓬ ꓞꓳ ꓡꓯ ꓥˍ ꓟꓲ꓾ ꓞꓳ ꓟꓳꓽ ꓥˍ ꓟꓲ ꓡꓯꓽ ꓒꓯꓹ ꓟꓽ ꓝꓸ ꓦꓹ ꓢꓴ ꓤꓽ ꓟꓶꓼ ꓤꓼ ꓐꓰ ꓤꓽ ꓑꓸ ꓤꓼ ꓠꓲꓹ ꓟ ꓪꓽ ꓡꓯꓽ ꓘꓳ ꓢꓲ ꓥꓹ ꓟꓲ ꓠꓲꓹ ꓟ ꓟꓽ ꓪꓽ ꓥꓹ ꓟꓲ ꓧꓪꓽ ꓗꓳ ꓓꓱꓽ ꓑꓯꓹ ꓡꓯꓽ ꓘꓳꓹ ꓟ ꓙꓳꓹ ꓠꓬ ꓝꓴꓲꓸ ꓥˍ ꓡꓳ= ꓕꓲꓽ ꓐꓱ ꓓꓵꓽ ꓙꓹ ꓟ ꓠꓬ ꓤꓽ ꓟꓶꓼ ꓤꓼ ꓐꓰ ꓤꓽ ꓑꓸ ꓤꓼ ꓠꓲꓹ ꓟ ꓪꓽ ꓡꓯ ꓘꓳ ꓢꓲ ꓧꓪꓽ ꓗꓳ ꓓꓱꓽ ꓐꓯꓹ ꓡꓯꓽ ꓘꓳꓹ ꓟ ꓠꓬ ꓝꓴꓲꓸ ꓟꓽ ꓥ ꓐꓰ ꓓꓵꓽ ꓙˍ ꓡꓳ= ꓖꓳ ꓡꓰ ꓟꓽ ꓥ꓾ ꓝꓴꓲꓸ ꓥˍ ꓡꓳ= ꓖꓳ ꓡꓰ ꓡꓯꓽ ꓒꓯꓹ ꓟꓽ ꓝꓸ ꓦꓹ ꓟ ꓔꓯ ꓢꓴ ꓤꓽ ꓑꓸ ꓤꓼ ꓐꓰ ꓤꓽ ꓟꓶꓼ ꓤꓼ ꓛꓬ ꓥꓳꓽ ꓡꓰꓹ ꓟ ꓔꓯ ꓧꓪꓽ ꓒꓴ ꓫꓵꓼ ꓥꓳꓽ ꓗꓪ ꓐꓰ ꓝꓳꓣꓠꓲꓚꓮꓔꓲꓳꓠ ꓐꓯꓹ ꓟ ꓥˍ ꓡꓳ= ꓡꓯꓽ ꓒꓯꓹ ꓝꓸ ꓦꓹ ꓢꓴ ꓦꓲ ꓢꓲ ꓒꓽ ꓦꓲ ꓢꓲ ꓟ ꓕꓲꓽ ꓣꓳ ꓣꓳ ꓠꓬ ꓢꓳ ꓦꓲ ꓢꓲ ꓟ ꓢꓳ ꓦꓲ ꓢꓲ ꓒꓽ ꓐꓰ ꓛꓬ ꓥꓳꓽ ꓡꓰ ꓥ ꓠꓬ ꓞꓳ ꓡꓱ ꓤꓽ ꓑꓸ ꓤꓼ ꓐꓰ ꓞꓳ ꓡꓱ ꓤꓽ ꓟꓶꓼ ꓤꓼ ꓐꓰ ꓛꓬ ꓥꓳ ꓡꓰ ꓤꓽ ꓖꓴꓽ ꓡꓯ ꓤꓽ ꓟꓶꓼ ꓡꓯ ꓐꓰ ꓛꓬ ꓥꓳ ꓡꓰ ꓡꓯꓽ ꓒꓯꓹ ꓝꓸ ꓦꓹ ꓢꓴ ꓐꓰ ꓛꓬ ꓥꓳ ꓡꓰꓹ ꓟ ꓮꓽ ꓙꓵꓽ ꓠꓬ ꓮꓓꓴꓡꓔꓰꓣꓬ ꓐꓯꓹ ꓟ ꓥ ꓪ= ꓡꓲ-ꓢꓴ ꓥꓳ ꓗꓪ ꓚꓳ ꓦꓬꓼ ꓛꓳꓽ ꓧꓪꓹ ꓟ ꓐꓰ ꓕꓱ ꓡꓰ ꓐꓯ ꓔ ꓡꓳ= ꓝꓳꓣꓠꓲꓚꓮꓔꓲꓳꓠ ꓔꓯ ꓠꓬ ꓡꓲ-ꓢꓴ ꓥꓳꓽ ꓗꓪ ꓚꓳꓸ ꓟꓽ ꓢꓲꓽ ꓟꓽ ꓫꓬꓹ ꓟ ꓬꓰˍ ꓟ ꓐꓰ ꓕꓱ ꓡꓰ ꓐꓳ ꓔ ꓐꓶ= ꓪꓴ-ꓢ ꓙꓵꓽ ꓗ 10 ꓟ ꓗꓪ ꓞꓳ ꓡꓱ ꓤꓽ ꓑꓸ ꓤꓼ ꓤꓽ ꓟꓶꓼ ꓤꓼ ꓡꓯꓽ ꓒꓯꓹ ꓟꓽ ꓝꓸ ꓦ ꓢꓴ ꓛꓬ ꓥꓳꓽ ꓡꓰꓹ ꓟ ꓔꓯ ꓝꓴꓲꓸ ꓐꓰ ꓐꓳ ꓔ ꓟ ꓟꓽ ꓙꓳ= ꓖꓳ ꓡꓰ ꓥˍ ꓟꓲ ꓡꓯꓽ ꓒꓯꓹ ꓟꓽ ꓝꓸ ꓦꓹ ꓢꓴ ꓛꓬ ꓥꓳꓽ ꓡꓰꓹ ꓟ ꓥˍ ꓟꓲ ꓝꓴꓲꓸ ꓥˍ ꓡꓳ=

ꓢꓲꓺꓒꓽ ꓬꓰ-ꓢꓴ ꓡꓰ ꓟ-ꓕꓲ 15ꓽ 19 ꓝꓲꓸ ꓗꓪ ꓮ ꓡꓲꓳꓹ ꓐꓯꓸ ꓠꓬ ꓠꓲꓹ ꓟ ꓗꓪ ꓐꓰ ꓓꓳ ꓡꓹ ꓟ ꓠꓽ ꓥꓹ ꓟ ꓓꓵꓽ ꓙˍ ꓟ꓾ ꓞꓳ ꓤꓼ ꓢꓰꓼˍ ꓟ꓾ ꓦꓬꓼ ꓛꓳꓽ ꓧꓪꓹ ꓟ ꓕꓱ ꓕꓲꓽ ꓘꓴꓸ ꓗꓪ ꓦꓬꓼ ꓛꓳꓽ ꓧꓪꓹ ꓟ ꓐꓯꓹ ꓟ ꓠꓬ ꓮꓓꓴꓡꓔꓰꓣꓬ ꓐꓯꓹ ꓟ ꓥ ꓪ= ꓡꓯꓽ ꓒꓯꓹ ꓝꓸ ꓦ ꓢꓴ ꓠꓬ ꓚꓵꓸ ꓛꓬꓽ ꓦꓲ ꓢꓲ ꓒꓽ ꓦꓲ ꓢꓲ ꓟ ꓐꓰ ꓟꓽ ꓥ ꓥ ꓠꓱꓸ ꓐꓯꓹ ꓕꓲꓽ ꓣꓳ ꓐꓰ ꓛꓬ ꓥꓳꓽ ꓡꓰꓹ ꓟ ꓔꓯ ꓐꓯꓹ ꓟ ꓥ ꓪ= ꓟꓽ ꓢꓲꓽ ꓟꓽ ꓫꓬꓹ ꓟ ꓬꓰˍ ꓟ ꓕꓱ ꓕꓲꓽ ꓘꓴꓸ ꓡꓲ-ꓢꓴ ꓥꓳꓽ ꓗꓪ ꓐꓰ ꓟꓽ ꓢꓲꓽ ꓟꓽ ꓫꓬꓹ ꓟ ꓬꓰˍ ꓟ ꓐꓰ ꓕꓱ ꓡꓰ ꓐꓳ ꓔ ꓡꓳ= ꓧꓪꓽ ꓒꓴ ꓫꓵꓽ ꓥꓳꓽ ꓗꓪ ꓚꓳ ꓠꓬ ꓝꓳꓣꓠꓲꓚꓮꓔꓲꓳꓠ ꓐꓰ ꓕꓱ ꓡꓰ ꓐꓳ ꓔ ꓡꓳ= ꓝꓳꓣꓠꓲꓚꓮꓔꓲꓳꓠ ꓐꓯꓹ ꓟ ꓠꓬ ꓡꓯꓽ ꓒꓯꓹ ꓟꓽ ꓝꓸ ꓦꓹ ꓢꓴ ꓛꓬ ꓥꓳꓽ ꓡꓰꓹ ꓟ ꓔꓯ ꓐꓯˍ ꓟ ꓥˍ ꓡꓳ= ꓡꓯꓽ ꓒꓯꓹ ꓟꓽ ꓝꓸ ꓦꓹ ꓢꓴ ꓐꓯꓹ ꓟ ꓠꓬ ꓮ ꓡꓲꓳ ꓫꓵꓽ ꓔꓯ ꓐꓯꓹ ꓡ? ꓐꓯꓹ ꓠꓬ ꓕꓲꓽ ꓧꓪꓹ ꓥˍ ꓟꓲ ꓡꓯꓽ ꓒꓯꓹ ꓟꓽ ꓝꓸ ꓠꓬꓲ ꓖꓳ ꓡꓰ ꓢꓲ ꓧꓪꓽ ꓗꓳ ꓓꓱꓽ ꓐꓯꓹ ꓡꓯꓽ ꓘꓳꓹ ꓟ ꓤꓽ ꓑꓸ ꓤꓼ ꓐꓰ ꓤꓽ ꓟꓶꓼ ꓤꓼ ꓛꓬ ꓥꓳ ꓡꓰˍ ꓟ ꓔꓯ ꓝꓳꓣꓠꓲꓚꓮꓔꓲꓳꓠ ꓐꓯꓹ ꓟ ꓥ ꓪ= ꓖꓳ ꓟ ꓡꓰꓽ ꓟꓽ ꓞꓲ ꓡꓯꓽ ꓒꓯꓹ ꓝꓸ ꓓꓳ ꓥˍ ꓟꓲ ꓦꓲ ꓢꓲ ꓒꓽ ꓫꓵ ꓥꓹ ꓠꓬ ꓦꓲ ꓢꓲ ꓟ ꓫꓵ ꓢꓲ ꓤꓽ ꓖꓴꓽ ꓤꓽ ꓡꓯ ꓤꓽ ꓟꓶꓼ ꓡꓯ ꓞꓳ ꓡꓱ ꓐꓰ ꓛꓬ ꓥꓳꓽ ꓡꓰꓹ ꓠꓬ ꓖꓳ ꓟ ꓥˍ ꓟꓲ ꓝꓳꓠꓲꓚꓮꓔꓲꓳꓠ ꓐꓯꓹ ꓟ ꓟꓽ ꓢꓲꓽ ꓟꓽ ꓫꓬˍ ꓟ ꓬꓰˍ ꓟ ꓗꓶ ꓡꓰꓹ ꓓꓴ ꓟ ꓥ ꓪ= ꓮ ꓡꓲꓳ ꓐꓯꓹ ꓠꓬ ꓬꓲ ꓠꓬ ꓦꓲ ꓢꓲ ꓒꓽ ꓟꓽ ꓙꓳ ꓦꓲ ꓢꓲ ꓟ ꓟꓽ ꓙꓳˍ ꓟ ꓪꓴꓸ ꓠꓬꓲ ꓝꓳꓣꓠꓲꓚꓮꓔꓲꓳꓠ ꓡꓰ ꓢꓲ ꓗꓶ ꓡꓰꓹ ꓥ ꓪ= ꓮ ꓡꓲꓳꓹ ꓐꓯ ꓠꓬ ꓬꓲ ꓠꓬ ꓦꓲ ꓢꓲ ꓟ ꓟꓽ ꓙꓳ ꓦꓲ ꓢꓲ ꓒꓽ ꓟꓽ ꓙꓳꓹ ꓟ ꓪꓴꓸ ꓠꓬ ꓝꓳꓣꓠꓲꓚꓮꓔꓲꓳꓠ ꓡꓰ ꓢꓲ ꓗꓶ ꓡꓰꓹ ꓟ ꓥ ꓪ= ꓦꓬꓽ ꓛꓳꓽ ꓧꓪꓹ ꓟ ꓟꓽ ꓥ=

ꓟ-ꓕꓲ 5ꓽ 32 ꓗꓪ ꓮꓽ ꓟ ꓥˍ ꓟꓲ ꓬꓲ ꓤꓽ ꓟꓶ ꓔꓯ ꓡꓳ ꓗꓶ ꓠꓬ ꓟꓽ ꓢꓲꓽ ꓟꓽ ꓫꓬꓹ ꓟ ꓪꓴꓸ ꓟꓽ ꓥ ꓔꓯ ꓠꓽ ꓬꓲ ꓔꓯ ꓦꓬꓽ ꓛꓳꓽ ꓧꓪꓹ ꓟ ꓤꓽ ꓟꓶꓼ ꓤꓼ ꓗꓶ ꓡꓰ ꓝꓲꓹ ꓡꓳ= ꓕꓱ ꓕꓲ ꓘꓴꓸ ꓗꓪ ꓮ ꓡꓲꓳ ꓫꓵꓽ ꓔꓯ ꓐꓯ ꓡ? ꓐꓯꓹ ꓠꓬ ꓦꓲ ꓢꓲ ꓒꓽ ꓦꓲ ꓢꓲ ꓟ ꓙꓳ ꓖꓳ ꓡꓰ ꓢꓲ ꓔꓯ ꓥꓳ ꓕꓲꓽ ꓟ ꓐꓯ ꓠꓬ ꓧꓹ ꓡꓯꓽ ꓘꓳ ꓗꓷꓳ= ꓧꓹ ꓡꓯꓽ ꓘꓳꓹ ꓐꓯˍ ꓟ ꓠꓬ ꓚꓵꓸ ꓚꓴꓸ ꓐꓯꓹ ꓟ ꓠꓬ ꓪꓴ-ꓢ ꓠꓯꓸꓼ ꓗꓪ ꓕꓲꓽ ꓧꓪ ꓡꓯꓽ ꓒꓯꓹ ꓝꓸ ꓦ ꓢꓴ ꓠꓬ ꓧꓹ ꓠꓹ ꓟ ꓙꓵꓽ ꓪꓽ ꓟꓽ ꓙꓳ= ꓮ ꓡꓰ ꓗꓶ ꓡꓰ ꓥˍ ꓟꓲ ꓧꓹ ꓠꓹ ꓟ ꓙꓵꓽ ꓪꓽ ꓟꓽ ꓙꓳ= ꓮ ꓡꓲꓳꓹ ꓐꓯꓹ ꓠꓬ ꓢꓲꓽ ꓫꓬ ꓕꓳꓽ ꓶ ꓗꓪ ꓮ ꓡꓰ ꓐꓯꓹ ꓡ? ꓐꓯꓹ ꓠꓬ ꓪꓴ-ꓢ ꓡꓰ ꓝꓱ ꓔ ꓟ ꓔꓯ ꓞꓳ ꓤꓽ ꓡꓰ ꓕꓽ ꓧꓹ ꓗꓶ ꓝꓲ ꓐꓰ ꓐꓯ ꓔ ꓡꓳ= ꓐꓯꓹ ꓟꓵ ꓫꓱꓹ ꓟ ꓠꓬ ꓮꓽ ꓟ ꓥˍ ꓟꓲ ꓧꓹ ꓟꓽ ꓓ ꓐꓯꓹ ꓟ ꓬꓲ ꓟꓸ ꓟꓲꓽ ꓥˍ ꓡꓳ= ꓞꓳ ꓤꓽ ꓧꓹ ꓠꓹ ꓟ ꓙꓵꓽ ꓪꓽ ꓟꓽ ꓙꓳ ꓕꓱ ꓡꓰ ꓐꓯꓹ ꓟ ꓥ ꓪ= ꓖꓳ ꓟ ꓪꓴꓸ ꓠꓬꓲ ꓧꓹ ꓔ ꓥˍ ꓟꓲ ꓧꓹ ꓙꓰ ꓢꓴ ꓤꓽ ꓑꓸ ꓤꓼ ꓤꓽ ꓟꓶꓼ ꓤꓼ ꓖꓳ ꓕꓲꓽ ꓣꓳ ꓠꓬ ꓦꓲ ꓢꓲ ꓒꓽ ꓧꓪ ꓦꓲ ꓢꓲ ꓟ ꓧꓪꓹ ꓕꓯ ꓦꓬꓽ ꓛꓳꓽ ꓧꓪꓹ ꓟ ꓥˍ ꓡꓳ ꓐꓰ ꓢꓲꓺ ꓒꓽ ꓬꓰ-ꓢꓴ ꓡꓰ ꓕꓱ ꓡꓰ ꓐꓯ ꓔ ꓡꓳ= ꓚꓵꓸ ꓚꓵꓸ ꓢꓲ ꓒꓽ ꓬꓰ ꓢꓴ ꓕꓱ ꓕꓲꓽ ꓘꓴꓸ ꓗꓪ ꓐꓯ ꓠꓲꓹ ꓫꓵˍ ꓟ ꓠꓬ ꓧꓹ ꓟꓽ ꓓ ꓐꓯꓹ ꓟ ꓬꓲ ꓟꓸ ꓟꓲꓽ ꓥˍ ꓟꓲ ꓙꓳˍ ꓡꓳ= ꓝꓮꓲ ꓠꓬ ꓮꓽ ꓟ ꓥˍ ꓟꓲ ꓢꓳ ꓡꓰ ꓡꓳ ꓗꓷ ꓗꓸ ꓠꓯꓸ ꓬꓲ ꓔꓯ ꓫ ꓢꓴꓹ ꓟꓲ ꓦꓬꓽ ꓛꓳꓽ ꓧꓪꓸ ꓟ ꓝꓴꓲꓸ ꓬꓰꓹ ꓟ ꓥˍ ꓡꓳ= ꓮꓽ ꓢꓳꓸ ꓑꓹ ꓗꓪ ꓐꓯ ꓡꓳꓹ ꓡꓰ ꓟ ꓡꓰ ꓐꓰ ꓥ ꓪ= ꓡꓳ ꓗꓷ ꓢꓴ ꓤꓽ ꓟꓶꓼ ꓤꓼ ꓔꓯ ꓤꓽ ꓑꓸ ꓤꓼ ꓔꓯ ꓖꓳ ꓢꓴ ꓮꓽ ꓟ ꓥˍ ꓟꓲ ꓦꓬꓽ ꓛꓳꓽ ꓧꓪꓹ ꓟ ꓥˍ ꓡꓳ= ꓡꓳ ꓗꓷ ꓥˍ ꓟꓲ ꓟꓽ ꓓ ꓢꓰꓼ ꓖꓳ ꓟ ꓥˍ ꓟꓲ ꓦꓬꓽ ꓛꓳꓽ ꓧꓪꓹ ꓟ ꓥˍ ꓡꓳ ꓐꓰ ꓢꓲꓺ ꓒꓽ ꓬꓰ-ꓢꓴ ꓡꓰ ꓕꓱ ꓡꓰ ꓐꓯꓹ ꓟ ꓥ ꓪ= ꓚꓵ ꓚꓴ ꓐꓯꓹ ꓠꓬ ꓧꓹ ꓟꓽ ꓓ ꓐꓯ ꓠꓲꓹ ꓫꓵꓹ ꓟ ꓥ ꓪ= ꓧꓹ ꓔ ꓥˍ ꓟꓲ ꓖꓳ ꓟ ꓠꓬ ꓧꓹ ꓔ ꓟ ꓠꓯꓸꓼ ꓗꓪ ꓟꓽ ꓜꓯꓼ ꓡꓰ ꓢꓰꓼ ꓝꓴꓲꓸ ꓙꓳꓹ ꓢꓰꓼ ꓥ= ꓮ ꓡꓲꓳ ꓐꓯ ꓠꓬ ꓪꓴ-ꓢ ꓡꓰ ꓝꓱ ꓔ ꓟ ꓔꓯ ꓞꓳ ꓤꓽ ꓡꓰ ꓕꓽ ꓧꓹ ꓗꓷ ꓝꓲ ꓐꓯꓹ ꓟ ꓪꓴꓸ ꓠꓬ ꓞꓳ ꓤꓽ ꓠꓯꓸꓼ ꓗꓪ ꓧꓹ ꓠꓹ ꓟ ꓙꓵꓽ ꓪꓽ ꓟꓽ ꓙꓳ ꓐꓯꓹ ꓟ ꓥ ꓪ= ꓕꓱ ꓕꓲꓽ ꓘꓴꓸ ꓗꓪ ꓟꓽ ꓢꓲꓽ ꓟꓽ ꓫꓬꓹ ꓟ ꓟꓽ ꓥ ꓦꓬꓽ ꓛꓳꓽ ꓧꓪꓹ ꓟ ꓮꓓꓴꓡꓔꓰꓣꓬ ꓐꓯꓹ ꓟ ꓗꓶ ꓡꓰꓹ ꓟ ꓥ ꓪ= ꓟ-ꓘꓳ 7ꓽ 21 ꓗꓪ ꓥˍ ꓟꓲ ꓟ-ꓕꓲ 15ꓽ 19  ꓡꓰ ꓐꓰ ꓕꓲꓽ ꓡꓰ ꓟꓽ ꓙꓲꓹ ꓟ ꓓꓵꓽ ꓙꓹ ꓟ꓾ ꓟꓽ ꓢꓲꓽ ꓟꓽ ꓫꓬ ꓬꓰˍ ꓟ ꓐꓯꓹ ꓟ ꓝꓳꓣꓠꓲꓚꓮꓔꓲꓳꓠ ꓐꓯꓹ ꓟ ꓡꓯꓽ ꓒꓯꓹ ꓟꓽ ꓝꓸ ꓦ ꓢꓴ ꓤꓽ ꓖꓴ ꓤꓽ ꓡꓯꓸ ꓤꓽ ꓟꓶꓼ ꓤꓼ ꓥꓳꓽ ꓡꓰꓹ ꓟ ꓕꓱ ꓡꓲꓳꓹ ꓫꓵꓽ ꓔꓯ ꓠꓲꓹ ꓫꓵˍ ꓟ ꓥ ꓪ=

 1 ꓕꓯ-ꓢ ꓡꓳ-ꓠꓲ 4ꓽ 3-4 ꓗꓪ ꓪꓴ-ꓢ ꓠꓲꓹ ꓡꓶꓽ ꓠꓬ ꓞꓳ ꓤꓽ ꓔꓯ ꓢꓲꓽ ꓫꓬ ꓡꓰ ꓠꓹ ꓟ ꓥˍ ꓡꓳ= ꓖꓳ ꓟ ꓑꓶ ꓓꓴ ꓠꓲ ꓧꓪꓽ ꓗꓳ ꓓꓱꓽ ꓑꓯꓹ ꓡꓯꓽ ꓘꓳꓹ ꓟ ꓕꓱ ꓟ ꓔꓯ ꓤ ꓟꓴ ꓠꓹ ꓟ ꓕꓱ ꓡꓰ ꓐꓯ ꓔ ꓟ ꓙꓳˍ ꓡꓳ= 1 ꓘꓳ-ꓡꓴ-ꓕꓴ 5ꓽ 9- 11 ꓝꓲꓸ ꓗꓪ ꓠꓬ ꓮ ꓡꓰ ꓐꓯꓹ ꓡ? ꓐꓯꓹ ꓠꓬ ꓕꓱ ꓡꓰ ꓟꓽ ꓢꓲꓽ ꓟꓽ ꓫꓬˍ ꓟ ꓐꓯꓹ ꓟ ꓝꓳꓣꓠꓲꓚꓮꓔꓲꓳꓠ ꓬꓰꓹ ꓢꓴ ꓔꓯ ꓤ ꓟꓳ ꓠꓹ ꓟ꓾ ꓧꓪꓽ ꓗꓳ ꓓꓱ ꓐꓯꓹ ꓡꓰꓽ ꓗꓳ ꓢꓲ ꓝꓴꓲ ꓬꓰꓹ ꓢꓴ ꓐꓰ ꓕꓲꓽ ꓛꓳꓼ ꓟꓽ ꓙꓰ ꓠꓹ ꓟ꓾ ꓟꓽ ꓔꓬꓹ ꓠꓹ ꓟ ꓐꓱ ꓶ ꓤ ꓟꓳ ꓠꓹ ꓟ ꓐꓱ ꓶ ꓐꓯꓹ ꓟ ꓔꓯ ꓡꓳꓸ ꓟꓳ ꓪ ꓓꓹ ꓡꓳ= 1 ꓘꓳ-ꓡꓴ-ꓕꓴ 6ꓽ 18 ꓗꓪ ꓟꓽ ꓢꓲꓽ ꓟꓽ ꓫꓬ ꓬꓰꓹ ꓟ ꓔꓯꓹ ꓐꓰ ꓛꓰꓹ ꓙꓰ= ꓞꓳ ꓤꓽ ꓡꓰ ꓬꓰˍ ꓟ ꓮꓸ ꓫꓵꓽ ꓝꓴꓲꓸ ꓥˍ ꓟꓲ ꓗꓳ ꓓꓱꓽ ꓠꓱꓸ ꓫꓱꓼ ꓟ ꓗꓪ ꓥˍ ꓡꓳ= ꓟꓽ ꓢꓲꓽ ꓟꓽ ꓫꓬꓹ ꓟ ꓬꓰ ꓢꓴ ꓠꓽ ꓚꓵꓸ ꓛꓬꓽ ꓗꓳ ꓓꓱꓽ ꓔꓯ ꓛꓬ ꓗꓶˍ ꓟ ꓝꓴꓲꓸ ꓬꓰˍ ꓡꓳ ꓐꓰ ꓕꓱ ꓡꓰ ꓐꓯ ꓔ ꓡꓳ= ꓖꓳ ꓟ ꓡꓰ ꓐꓰ ꓕꓲꓽ ꓡꓰꓹ 1ꓘꓳ-ꓡꓴ-ꓕꓴ 10ꓽ 8꓾ ꓬꓲ-ꓩꓴ-ꓢꓳ 5ꓽ 3꓾ ꓧꓲ-ꓐꓱ-ꓣꓴ 12ꓽ 16꓾ ꓖ-ꓡ-ꓕꓲ 5ꓽ 19   ꓗꓪ ꓝꓳꓣꓠꓲꓚꓮꓔꓲꓳꓠ ꓐꓯꓹ ꓟ ꓟꓽ ꓢꓲꓽ ꓟꓽ ꓫꓬꓹ ꓟ ꓟꓬꓱꓽ ꓬꓰꓹ ꓟ ꓕꓱ ꓟ ꓮꓽ ꓙꓵ ꓠꓬ ꓛꓬ ꓥꓳꓽ ꓡꓰꓹ ꓟ ꓝꓴꓲꓸ ꓥˍ ꓡꓳ ꓐꓰ ꓐꓯˍ ꓡꓳ= ꓝꓲ-ꓓꓴ 15ꓽ 20 ꓝꓲꓸ ꓗꓪ ꓠꓬ ꓝꓳꓠꓲꓚꓮꓔꓲꓳꓠ ꓐꓯꓹ ꓟ ꓟꓽ ꓢꓲꓽ ꓟꓽ ꓫꓬ_ ꓟ ꓔꓯ ꓤ ꓟꓳ ꓠꓹ ꓟ ꓚꓲ ꓠꓹ ꓟ ꓕꓱ ꓡꓰ ꓐꓯꓹ ꓟ ꓙꓳˍ ꓡꓳ= ꓖꓳ ꓟ ꓡꓰ ꓐꓰ ꓕꓲꓽ ꓡꓰ ꓬꓲ-ꓢꓷ-ꓡꓲ ꓐꓴ ꓙꓵ ꓠꓲꓹ ꓥꓹ ꓟ ꓬꓴ-ꓓ ꓙꓵ ꓠꓲꓹ ꓗꓪ ꓠꓬ ꓕꓱ ꓡꓰ ꓟꓽ ꓢꓲꓽ ꓟꓽ ꓫꓬˍ ꓟ ꓬꓰˍ ꓟ ꓠꓬ ꓝꓴꓲꓸ ꓥˍ ꓡꓳ ꓐꓰ ꓐꓯ ꓔ ꓟ ꓡꓰ ꓟꓽ ꓞꓲ ꓕꓱ ꓡꓰ ꓟꓽ ꓢꓲꓽ ꓟꓽ ꓫꓬˍ ꓟ ꓬꓰ ꓢꓲ ꓖꓳ ꓓꓱꓽ ꓠꓬꓲꓽ ꓔꓱꓹ ꓗꓶ ꓡꓰ ꓢꓴ ꓔꓯ ꓭꓸ ꓡꓳ ꓓꓲ ꓡꓰ ꓡꓳ ꓢꓰꓼˍ ꓟ ꓚꓱꓹ ꓕꓯ ꓡꓳꓸ ꓟꓳ ꓪ ꓓꓹ ꓡꓳ=

ꓖꓳ ꓟ ꓡꓰ ꓐꓰ ꓕꓲꓽ ꓡꓰ ꓟꓴ-ꓢ-ꓡꓲꓟ ꓐꓴ ꓠꓬ ꓡꓯꓽ ꓒꓯꓹ ꓟꓽ ꓝꓸ ꓦ ꓢꓴ ꓠꓬ ꓧꓪꓽ ꓗꓳ ꓓꓱꓽ ꓑꓯꓹ ꓡꓯꓽ ꓘꓳꓹ ꓟ ꓠꓬ ꓟꓽ ꓜꓳꓹ ꓟ ꓥ ꓢꓲ ꓕꓱ ꓟꓠꓬ ꓝꓴꓲꓸ ꓖꓶ ꓒꓵꓽꓹ ꓟꓥˍ ꓡꓳ ꓐꓰ ꓕꓱ ꓡꓰ ꓐꓰ ꓕꓱ ꓡꓰ ꓓꓵꓽ ꓙˍ ꓡꓳ= ꓕꓱ ꓟ ꓔꓯ ꓜꓲ-ꓠ ꓐꓰ ꓕꓱ ꓡꓰ ꓐꓯꓹ ꓡꓳ= ꓜꓲ-ꓠ ꓔꓯ ꓟꓽ ꓬꓰ ꓠꓹ ꓟ ꓤ ꓟꓳ ꓠꓹ ꓟ ꓕꓱ ꓡꓰ ꓐꓯꓹ ꓟ ꓥ ꓪ= ꓮ ꓟꓬ ꓗꓪ ꓛꓲ ꓥꓹ ꓡ ꓐꓯꓹ ꓠꓬ ꓕꓲꓽ ꓐꓱ ꓗꓴꓷꓼ ꓗꓪ ꓠꓬ ꓡꓯꓽ ꓒꓯꓹ ꓟꓽ ꓝꓸ ꓔ ꓢꓰꓼ ꓕꓯ ꓤꓽ ꓟꓶꓼ ꓡꓯ ꓚꓵ ꓥ ꓟꓽ ꓥ ꓤꓹ ꓠꓬꓲ ꓡꓳ= ꓟꓽ ꓥ ꓠꓬ ꓡꓯꓽ ꓒꓯꓹ ꓝꓸ ꓠꓹ ꓟ ꓙꓵꓽ ꓪꓽ ꓟꓽ ꓐꓯꓹ ꓟꓶ= ꓔꓯ ꓦꓳꓽ ꓐꓯ ꓠꓬ ꓲ-ꓣꓮꓠ ꓗꓴꓷꓼ ꓗꓪ ꓠꓬ ꓤꓽ ꓟꓶꓼ ꓡꓯꓹ ꓚꓵ ꓟꓽ ꓥˍ ꓠꓬ ꓡꓯꓽ ꓒꓯꓹ ꓝꓸ ꓟꓽ ꓪꓸ ꓟ ꓙꓳˍꓡꓳ= ꓡꓯꓽ ꓒꓯꓹ ꓝꓸ ꓔ ꓕꓯꓽ ꓤꓽ ꓟꓶꓼ ꓡꓯꓸ ꓚꓵ ꓥ ꓚꓽ ꓥ ꓐꓯꓹ ꓟ ꓕꓳꓽ ꓶ ꓐ ꓕꓯ ꓢꓲ ꓡꓯꓽ ꓒꓯꓹ ꓝꓸ ꓪ ꓓꓹ ꓟ ꓙꓳˍ ꓡꓳ= ꓦꓲ ꓢꓲ ꓒꓽ ꓟꓽ ꓙꓳ ꓙꓳ ꓗꓳ ꓓꓱꓽ ꓠꓬꓲꓽ ꓔꓱꓹ ꓗꓷ ꓡꓰ ꓢꓴ ꓔꓯ ꓠꓬ ꓢꓰꓼ ꓩꓴˍ ꓡꓳ= ꓬꓲ-ꓢꓷ-ꓡꓲ ꓡꓽ ꓞꓳ ꓡꓰ ꓐꓰ ꓭꓸ ꓡꓳ ꓓꓲ ꓡꓰ ꓡꓳ ꓢꓰꓼ ꓩꓴˍ ꓡꓳ= ꓖꓳ ꓟ ꓡꓰ ꓟꓽ ꓞꓲ ꓤꓽ ꓑꓸ ꓤꓼ ꓔꓯ ꓥꓹ ꓟꓲ ꓝꓴꓲ ꓖꓶꓹ ꓟ ꓕꓲꓽ ꓐꓱ ꓗꓴꓷꓼ ꓗꓪ ꓠꓬ ꓓꓶꓽꓹ ꓟ ꓕꓱ ꓡꓰ ꓬꓰˍ ꓡꓳ= ꓐ-ꓧ-ꓲ ꓐꓯꓹ ꓟ ꓙꓵ ꓠꓲꓹ ꓠꓯꓸꓼ ꓗꓪ ꓥꓳ ꓟꓲ ꓡꓯꓽ ꓒꓯꓹ ꓟꓽ ꓝꓸ ꓔ ꓢꓰꓼ ꓧꓶꓸ ꓕꓯ ꓗꓪ ꓧꓪꓽ ꓗꓳ ꓓꓱꓽ ꓑꓯꓹ ꓡꓯꓽ ꓘꓳ ꓟꓽ ꓓ ꓐꓰ ꓕꓱ ꓡꓰ ꓐꓯꓹ ꓐꓶ= ꓐꓴꓓ-ꓓ ꓙꓵ ꓠꓲꓹ ꓠꓯꓸꓼ ꓗꓪ ꓥˍ ꓟꓲ ꓟꓽ ꓢꓲꓽ ꓟꓽ ꓫꓬ ꓬꓰꓹ ꓟ ꓠꓬ ꓟꓽ ꓙꓲꓹ ꓟ ꓥ ꓡꓳ ꓐꓰ ꓕꓱ ꓡꓰ ꓟꓸ ꓔ ꓡꓳ= ꓖꓳ ꓟ ꓡꓰ ꓐꓰ ꓕꓲꓽ ꓡꓰ ꓧꓶꓸ ꓕꓯ ꓕꓲꓽ ꓞꓲꓼ ꓗꓪ ꓙꓲ-ꓢꓴ ꓢꓲꓺ ꓤꓼ ꓐꓴ ꓥˍ ꓟꓲ ꓕꓲꓽ ꓞꓲꓼ ꓡꓰ ꓕꓲꓽ ꓞꓲꓼ ꓕꓱ ꓟ ꓠꓬ ꓟꓽ ꓢꓲꓽ ꓟꓽ ꓫꓬˍ ꓟ ꓥˍ ꓡꓳ ꓐꓰ ꓕꓱ ꓡꓰ ꓟꓸ ꓡꓹ ꓟ ꓥ ꓪ= ꓖꓳ ꓡꓰ ꓥˍ ꓟꓲ ꓠꓬꓲꓸ ꓠꓬꓲ ꓕꓲꓽ ꓞꓲꓼ ꓗꓪ ꓠꓬ ꓗꓴꓷꓼ ꓕꓲꓽ ꓐꓱ ꓗꓪ ꓠꓬ ꓗꓴꓷꓼ ꓙꓵꓽ ꓢꓴ ꓡꓰ ꓝꓴꓲꓸ ꓖꓶꓹ ꓟ ꓟꓽ ꓙꓳ ꓟꓽ ꓢꓲꓽ ꓟꓽ ꓫꓬꓹ ꓟ ꓟꓽ ꓢꓪꓼ ꓟ ꓔꓯ ꓡꓳꓸ ꓟꓳˍ ꓡꓳ= ꓢꓲꓽ ꓫꓬ ꓕꓳꓽ ꓶ ꓗꓪ ꓐꓳ ꓔ ꓟ ꓠꓬ ꓟꓽ ꓢꓲꓽ ꓟꓽ ꓫꓬ_ ꓟ ꓬꓰˍ ꓟꓠꓬ ꓝꓴꓲꓸ ꓥˍ ꓡꓳ= ꓐ ꓡꓹ ꓥꓳ ꓐꓯꓹ ꓠꓬ ꓟꓽ ꓢꓲꓽ ꓟꓽ ꓫꓬˍ ꓟ ꓔꓯ ꓟꓽ ꓬꓰ ꓛꓱꓼ ꓡꓰ ꓠ ꓢꓯꓼ ꓕꓵꓼ ꓠ ꓗˍ ꓡꓳ= ꓤ ꓟꓳ ꓠ ꓗꓹ ꓡꓳ= ꓛꓬ ꓥꓳꓽ ꓡꓰ ꓕꓯ ꓠꓬ ꓝꓴꓲꓸ ꓣꓷꓠꓸ ꓠ ꓗˍ ꓡꓳ=