ꓠꓵꓻ ꓠꓲꓹ ꓗꓪ ꓐꓰ ꓪꓴ-ꓢ ꓶꓼ ꓓꓳ ꓫꓱꓹ ꓓꓳ ꓔꓯ ꓚˍ ꓟ ꓔꓲꓺ ꓟ ꓜꓴꓻ ꓔꓯ ꓔꓶ ꓗꓷ ꓢꓴ Mother Teresa

Mother Teresa ꓠꓬ ꓗ-ꓕꓳ-ꓡꓲꓗ ꓘꓴ ꓜꓲ ꓞꓳ ꓗꓪ ꓟ ꓔꓲꓺ ꓟ ꓕꓲ ꓣꓳ ꓥ ꓡꓳ= ꓬꓲ ꓠꓬ ꓬꓲ ꓕꓲ ꓞꓲꓼ ꓡꓱꓸꓼ ꓔꓯ ꓪꓴ-ꓢ ꓠꓯꓸꓼ ꓗꓪ ꓡꓯꓼ ꓙꓱ ꓢꓲ ꓪꓴ-ꓢ ꓟꓬꓱꓽ ꓟꓯ ꓢꓴ ꓥ ꓡꓳ= ꓫ ꓢꓴ ꓟꓶ ꓢꓴ ꓐꓰ꓾ ꓛꓲ ꓒꓯꓹ ꓡꓯ ꓒꓯꓹ ꓡꓵꓻ ꓟꓽ ꓓ꓾ ꓠꓻ ꓢꓴ ꓒꓬꓽ ꓢꓴ ꓔꓯ ꓬꓰ ꓙ ꓔ ꓙ ꓢꓴ ꓥ ꓡꓳ= ꓬꓲ ꓠꓬ ꓗ-ꓡ-ꓗ-ꓔ ꓡꓳ ꓒꓱ ꓗꓪ ꓮ ꓟꓬꓹ ꓘꓳꓼ ꓔꓬ ꓢꓲ ꓕꓱ ꓡꓱ ꓫꓵꓽ ꓟꓬꓱꓽ ꓔꓯ ꓬꓰ ꓗꓷꓳ= ꓬꓲ ꓠꓬ Missionaries of Charity ꓐꓯ ꓟ "ꓠꓵꓻ ꓠꓲꓹ ꓗꓪ ꓐꓰ ꓪꓴ-ꓢ ꓶꓼ ꓓꓳ ꓫꓱꓹ ꓓꓳ ꓔꓯ ꓚˍ ꓟ" ꓐꓯ ꓟ ꓜꓴꓻ ꓕꓲ ꓜꓴꓻ ꓔꓯ ꓲ-ꓓꓲ-ꓬ ꓟꓵꓽ ꓗꓪ ꓬꓲ ꓪꓴꓸ ꓔꓶꓻ ꓗꓷꓳ= ꓕꓱ ꓟ ꓠꓬ ꓕꓲ ꓞꓲꓼ ꓡꓱꓸꓼ ꓔꓯ ꓪꓴ-ꓢ ꓠꓯꓸꓼ ꓗꓪ ꓡꓯ ꓙꓱ ꓔ ꓢꓴ ꓤ ꓟꓶ ꓤ ꓐꓴ ꓔꓲꓺ ꓟ ꓬꓰˍ ꓟ ꓜꓴꓻ ꓕꓲ ꓜꓴꓻ ꓔꓯ ꓕꓱ ꓡꓱ ꓒꓴ ꓔ ꓟ ꓥ ꓡꓳ=

ꓬꓲ ꓪ ꓐꓴ ꓠꓬ ꓚꓵ ꓚꓵ ꓬꓰ ꓙ ꓔ ꓙ ꓢꓴ ꓟꓽ ꓙꓳ ꓢꓴ ꓔꓯ ꓬꓰ ꓙ ꓔ ꓙˍ ꓟ ꓥ ꓡꓳ= 1979 ꓘꓳꓼ ꓕꓯ Mother Teresa ꓠꓬ Nobel Peace Prize ꓐꓯ ꓟ ꓟꓲ ꓠꓯ ꓗꓪ ꓢꓲꓺ ꓡꓲ ꓟ ꓗꓷ ꓡꓰ ꓠꓹ ꓟ ꓐꓱ ꓶ ꓢꓯꓼ ꓕꓵꓼ ꓢꓴ ꓔꓯ ꓖꓶˍ ꓟ ꓟꓲ ꓠꓯ ꓗꓪ ꓟꓽ ꓓ ꓪꓴ ꓓꓰ ꓡꓰˍ ꓟ ꓡꓯ ꓫꓴ ꓓ ꓟ ꓔꓯ ꓬꓲ ꓠꓬ ꓟꓶ ꓡꓰꓳ= ꓖꓳ ꓟ ꓠꓬ ꓚꓲ ꓛꓬ ꓐꓱ ꓶ ꓟꓽ ꓓꓵꓽ ꓙ ꓠꓵꓻ ꓠꓲꓹ ꓐꓱ ꓶ ꓟꓬꓱꓽ ꓬꓰˍ ꓟ ꓬꓲ ꓢꓷꓸ ꓡꓰ ꓓꓴ ꓓꓽ ꓟ ꓕꓲ ꓟ ꓗꓷ ꓡꓰꓳ= 2016 ꓘꓳꓼ ꓕꓯ ꓠꓬ ꓬꓲ ꓔꓯ ꓣꓳ-ꓟ ꓗ-ꓕꓳ-ꓡꓲꓗ ꓘꓴ ꓜꓲ ꓞꓳ ꓗꓪ ꓐꓰ ꓢꓲꓽ ꓫꓬ ꓢꓴ ꓕꓲ ꓣꓳ ꓐꓰ ꓬꓲ ꓔꓯ ꓟꓬꓱꓺ ꓓꓳꓽ ꓖꓶ ꓗꓷꓳ= 

Mother Teresa ꓠꓬ 1910 ꓘꓳꓼ ꓕꓯ Macedonia ꓗꓴꓷꓼ ꓥ ꓟ Skopje ꓡꓳ ꓒꓱ ꓗꓪ ꓒꓬꓱꓽ ꓟꓳ ꓗꓷ ꓟ ꓥꓳ= ꓬꓲ ꓮ ꓤ ꓮ ꓤ ꓪꓴꓽ ꓡ ꓠꓬ ꓔꓲꓺ ꓟ ꓒꓬꓱꓼ ꓠꓲꓹ ꓫꓵˍ ꓟ ꓠꓲꓹ ꓟ ꓙꓳ ꓢꓲ ꓠꓬꓲ ꓫ ꓢꓴ ꓟꓶ ꓢꓴ ꓔꓯ ꓬꓰ ꓙ ꓔ ꓙ ꓠꓲꓹ ꓫꓵˍ ꓟ ꓠꓲꓹ ꓟ ꓙꓳ ꓡꓰꓳ= ꓬꓲ ꓞꓲꓼ 18 ꓘꓳꓼ ꓙꓳ ꓡ ꓕꓯ ꓠꓬ ꓬꓲ ꓠꓬ Ireland ꓗꓴꓷꓼ ꓗꓪ ꓙꓰ ꓠꓹ ꓟ ꓙꓵꓽ ꓪꓽ ꓟꓶ ꓗꓷꓳ= ꓖꓳ ꓡꓱ ꓢꓲ ꓠꓬꓲ ꓖꓳ ꓕꓲ ꓘꓴ ꓗꓪ ꓬꓲ ꓦ ꓒꓴ ꓮ ꓟꓬꓹ ꓟ ꓢꓳ ꓠ ꓔ ꓟ ꓔꓯ ꓢꓳ ꓢꓲ ꓠꓬꓲ ꓖꓳ ꓟ ꓓꓳ ꓡꓰ ꓠꓬ ꓔꓲꓺ ꓟ ꓥ ꓟ Loreto ꓐꓰ ꓕꓲ ꓪ ꓲ-ꓓꓲ-ꓬ ꓟꓵꓽ ꓗꓪ ꓙ ꓫꓱꓽ ꓠꓹ ꓟ ꓒꓴ ꓫꓵ ꓗꓶˍ ꓟ ꓔꓯ ꓘꓳꓹ ꓣꓴ ꓟꓶ ꓡꓰꓳ=