ꓢꓲꓺ ꓒ ꓬꓰ‐ꓢꓴ ꓧꓪꓽ ꓖꓳ ꓓꓱ ꓥ ꓟ ꓢꓲꓽ ꓫꓬ ꓟ ꓑ ꓑ ꓔꓯ ꓔꓯ ꓮ ꓘꓶ. ꓛꓲ ꓠꓲ, ꓠꓵ ꓢꓴ ꓙꓲꓻ ꓫꓬ Carlo Acutis ꓚꓺ ꓟꓲꓽ (St. Carlo acutis)

ꓢꓲꓺ ꓒ ꓬꓰ‐ꓢꓴ ꓧꓪꓽ ꓖꓳ ꓓꓱ ꓥ ꓟ ꓢꓲꓽ ꓫꓬ ꓟ ꓑ ꓑ ꓔꓯ ꓔꓯ ꓮ ꓘꓶ. ꓛꓲ ꓠꓲ, ꓠꓵ ꓢꓴ ꓙꓲꓻ ꓫꓬ  Carlo Acutis ꓚꓺ ꓟꓲꓽ (St. Carlo acutis)

ꓙꓲꓻ ꓫꓬ  Carlo Acutis ꓠꓬ ꓲꓔꓮꓡꓬ ꓞꓳ ꓡꓱ ꓞꓳ ꓡꓯ. ꓕꓲ ꓣꓳ ꓥ ꓡꓳ꓿ ꓬꓲ ꓠꓬ ꓢꓲꓺ ꓒ ꓬꓰ‐ꓢꓴ ꓧꓪꓽ ꓖꓳ ꓓꓱ ꓥ ꓟꓲ ꓢꓲꓽ ꓫꓬ ꓑ ꓑ ꓔꓯ ꓮ ꓘꓶ. ꓛꓲ ꓠꓲ, ꓠꓵ ꓢꓴ ꓢꓲꓻ ꓫꓬ ꓢꓴ ꓕꓲ ꓣꓳ ꓥ ꓡꓳ꓿ St. Carlo ꓔꓯ 1991 ꓘꓳꓼ ꓕꓯ ꓰꓠꓖꓡꓮꓠꓓ ꓗꓴꓷꓼ ꓡꓮꓠꓓꓳꓠ ꓡꓳ ꓒꓱ ꓗꓪ ꓦꓵꓻ ꓗꓷꓳ꓿ ꓬꓲ ꓐ, ꓐ ꓢꓲ ꓠꓬꓲ ꓟ, ꓟ ꓠꓬ ꓲꓔꓮꓡꓬ ꓞꓳ ꓫꓵꓽ ꓥ ꓡꓳ꓿ ꓬꓲ ꓔꓯ ꓒꓬꓱ ꓟꓳ ꓗꓷ ꓗ. ꓠꓯ ꓬꓲ ꓪ ꓕꓲ ꓦꓲꓻ ꓠꓬ ꓲꓔꓮꓡꓬ ꓗꓴꓷꓼ ꓗꓪ ꓔꓬ ꓗꓷꓳ꓿ ꓙꓲꓻ ꓫꓬ ꓢꓴ ꓚꓮꓣꓡꓳꓢ ꓠꓬ ꓲꓔꓮꓡꓬ ꓗꓴꓷꓼ ꓗꓪ ꓪꓴꓽ ꓡ ꓢꓲ ꓠꓬꓲ ꓟꓲ ꓠꓯ ꓢꓷ. ꓠꓲ, ꓥ ꓟꓲ ꓕꓱ ꓗꓪ ꓢꓳꓻ ꓣꓴ ꓗꓷꓳ꓿

ꓙꓲꓻ ꓫꓬ ꓢꓴ ꓚꓮꓣꓡꓳ ꓔꓯ ꓪꓴ‐ꓢ ꓡꓰ ꓬꓲ ꓔꓯ ꓖꓶ ꓔ ꓟ ꓡꓯꓽ ꓫꓴꓻ ꓠꓬ ꓡ ꓞꓳ ꓮ ꓟꓬ, ꓮ ꓟꓬ, ꓔꓯ ꓠꓲ, ꓠꓵ ꓗꓴ ꓠ, ꓟ ꓐꓰ ꓬꓲ ꓛꓳ ꓒꓯꓽ ꓐꓴ ꓔꓯ ꓮ ꓘꓶ. ꓛꓲ ꓠꓲ, ꓠꓵ ꓢꓴ ꓕꓲ ꓥ ꓡꓳ꓿ ꓬꓲ ꓠꓬ ꓮ ꓘꓶ. ꓓꓻ ꓢꓴ ꓕꓲ ꓣꓳ ꓥ ꓡꓳ꓿ ꓖꓳ ꓟ ꓡꓰ ꓟꓽ ꓞꓲ ꓬꓲ ꓠꓬ ꓢꓲꓺ ꓒ ꓬꓰ‐ꓢꓴ ꓧꓪꓽ ꓖꓳ ꓓꓱ ꓥ ꓟ ꓢꓲꓽ ꓫꓬ ꓖꓳ ꓓꓱ ꓔꓯ ꓮ ꓘꓶ. ꓛꓲ ꓠꓲ, ꓠꓵ ꓞꓳ ꓒꓵꓽ ꓢꓴ ꓤ ꓠꓱ ꓤ ꓕꓲ ꓣꓳ ꓥ ꓟ ꓪꓴ. ꓠꓬꓲ ꓬꓲ ꓞꓲꓼ (7) ꓡꓳ ꓕꓯ ꓬꓲ ꓢꓲꓽ ꓫꓬ ꓧꓪꓽ ꓖꓳ ꓓꓱ ꓔꓯ ꓘꓳ, ꓣꓴ ꓪ ꓡꓰꓳ꓿ ꓬꓲ ꓐ, ꓐ ꓢꓲ ꓟ, ꓟ ꓠꓬ ꓪꓴ‐ꓢ ꓟꓽ ꓦꓻ ꓡꓱ ꓢꓴ ꓥ ꓡ ꓳ꓿

ꓙꓲꓻ ꓫꓬ ꓢꓴ ꓚꓮꓣꓡꓳꓢ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓪꓽ ꓘꓴ ꓦꓲꓻ ꓗꓪ ꓙꓰ ꓢꓲ ꓠꓬꓲ ꓟꓲ‐ꓢ ꓔꓶ ꓟ ꓙꓵ, ꓗꓪ ꓪꓽ ꓘꓴ ꓡꓰ ꓢꓲ ꓠꓬꓲ ꓢꓲꓽ ꓫꓬ ꓧꓪꓽ ꓖꓳ ꓓꓱ ꓔꓯ ꓘꓳ, ꓣꓴ ꓢꓴ ꓥ ꓡꓳ꓿ ꓬꓲ ꓠꓬ ꓢꓲꓽ ꓫꓬ ꓧꓪꓽ ꓖꓳ ꓓꓱ ꓙꓳˍ ꓟ ꓪꓽ ꓘꓴ ꓦꓲꓻ ꓗꓪ ꓙꓰ ꓢꓲ ꓠꓬꓲ ꓮ ꓟꓬ, ꓪꓽ ꓘꓴ ꓢꓴ ꓥ ꓡꓳ꓿

ꓬꓲ ꓠꓬ ꓟꓲ ꓠꓯ ꓢꓷ. ꓠꓲ, ꓕꓲ ꓒꓳ, ꓗꓪ ꓮ ꓘꓶ. ꓓ ꓢꓴ ꓞꓳ ꓡꓯ. ꓕꓲ ꓣꓳ ꓥ ꓟ ꓪꓴ. ꓠꓬꓲ ꓚꓳꓟꓑꓴꓔꓰꓣ ꓢꓷ. ꓠꓲ, ꓔꓯ ꓥ ꓟꓲ ꓢꓳꓻ ꓧꓪ ꓡꓰꓳ꓿ ꓖꓳ ꓗ. ꓠꓯ ꓬꓲ ꓠꓬ ꓚꓳꓟꓑꓴꓔꓰꓣ ꓗꓪ ꓐꓰ ꓑꓣꓳꓖꓣꓮꓟꓟꓲꓠꓖ ꓐꓳ ꓢꓲ ꓠꓬꓲ ꓪꓰꓐꓢꓲꓔꓰ ꓫꓬ, ꓢꓲ ꓠꓬ ꓟꓵ ꓗꓳ ꓓꓵ ꓓꓵ ꓗꓪ ꓙꓳˍ ꓟ ꓢꓲꓽ ꓫꓬ ꓖꓳ ꓓꓱ ꓚꓱ, ꓔꓯ ꓪꓰꓐꓢꓲꓔꓰ ꓗꓪ ꓐꓳ ꓢꓲ ꓠꓬꓲ ꓞꓳ ꓡꓯ. ꓐꓴ ꓡꓳ. ꓛꓳ ꓠ, ꓟ ꓪꓽ ꓘꓴ ꓠ, ꓟ ꓬꓰ ꓙ ꓗꓷꓳ꓿

ꓬꓲ ꓠꓬ ꓬꓲ ꓔꓶ ꓮ ꓟꓬ, ꓗꓪ ꓙꓰ ꓢꓲ ꓠꓬꓲ ꓢꓲꓽ ꓫꓬ ꓖꓳ ꓓꓱ ꓐꓬꓱ ꓔꓯ ꓓ ꓐꓳ ꓓꓱ ꓢꓲ ꓠꓬꓲ ꓝꓮꓲ ꓬꓲ ꓪꓽ ꓘꓴ ꓗꓷ ꓟ ꓔꓶ. ꓗꓪ ꓢꓲꓽ ꓫꓬ ꓖꓳ ꓓꓱ ꓗꓪ ꓐꓰ ꓢꓷ. ꓠꓲ, ꓟꓳ. ꓖꓶ ꓟ ꓚꓱ, ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ ꓧꓪꓽ ꓖꓳ ꓓꓱ ꓗꓪ ꓐꓰ ꓟꓲ ꓠꓯ ꓡ ꓞꓳ ꓔꓯ ꓟꓳ. ꓖꓶ ꓟ ꓚꓱ, ꓮ ꓟꓬ, ꓔꓯ ꓕꓳ ꓶ ꓐꓳ ꓐꓬꓱ ꓓꓱ ꓢꓲ ꓠꓬꓲ ꓪꓰꓐꓢꓲꓔꓰ ꓗꓪ ꓞꓳ ꓡꓯ. ꓐꓴ ꓔꓯ ꓪꓽ ꓘꓴ ꓠ, ꓟ ꓡꓳ. ꓠ, ꓟ ꓬꓰ ꓙ ꓗꓷꓳ꓿

ꓮ ꓟꓶ ꓫꓵˍ ꓟ ꓙꓵ, ꓕꓯ ꓬꓲ ꓠꓯ, ꓗꓪ ꓢꓲ ꓚꓮꓠꓚꓰ ꓠꓻ ꓓꓴ ꓒꓬꓱꓼ ꓡꓰ ꓟ ꓥ ꓡꓳ꓿ ꓕꓱ ꓡꓱ ꓐꓰ  ꓬꓲ ꓠꓬ ꓠꓻ ꓓꓴ ꓒꓬ ꓓꓴ ꓔꓯ ꓮ ꓘꓶ. ꓛꓲ ꓠꓻ ꓢꓲ ꓠꓬ ꓫ. ꓫ. ꓐꓰ ꓠꓻ ꓫꓬ ꓗꓷ ꓟ ꓥ ꓡꓳ꓿ ꓬꓲ ꓠꓬ ꓬꓲ ꓠꓯ, ꓗꓪ ꓠꓻ ꓓꓴ ꓔꓳ, ꓜꓳ ꓟ ꓔꓯ ꓗ‐ꓔꓳ‐ꓡꓲ ꓘꓴ ꓜꓲꓼ ꓞꓳ ꓐꓰ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓔꓬ ꓟ ꓔꓲꓺ ꓒ ꓪ ꓔꓲ ꓐꓱ ꓶ ꓔꓲ ꓖꓶ ꓢꓲ ꓠꓬꓲ ꓠꓻ ꓫꓬ ꓒꓬ ꓫꓬ, ꓗꓷ ꓟ ꓥ ꓡꓳ꓿

ꓕꓱ ꓡꓱ ꓐꓰ ꓬꓲ ꓔꓯ ꓠꓻ ꓫꓬ ꓖꓶ ꓢꓴ ꓐꓴ ꓥ ꓟꓲ ꓙꓲꓻ ꓫꓬ ꓢꓴ ꓚꓮꓣꓡꓳꓢ ꓠꓬ ꓧꓪꓽ ꓖꓳ ꓓꓱ ꓗꓪ ꓮ ꓘꓶ. ꓛꓲ ꓠꓻ ꓓꓴ ꓙꓳˍ ꓥ ꓟꓲ ꓗ, ꓛꓲ ꓛꓲ ꓡ ꓰ ꓔꓬ ꓟ ꓪꓴ. ꓠꓬꓲ ꓮ ꓘꓶ. ꓛꓲ ꓓꓵ ꓙ ꓟꓶ ꓡꓰ ꓟ ꓥ ꓡꓳ꓿ ꓬꓲ ꓠꓬ ꓬꓲ ꓟꓲ ꓠꓯ ꓗꓪ ꓐꓰ ꓧꓪꓽ ꓖꓳ ꓓꓱ ꓡꓳ ꓬꓰ ꓗꓪ ꓛꓲ ꓗ, ꓛꓲ ꓛꓲ ꓡꓰ ꓔꓬ ꓗꓷ ꓢꓴ ꓥ ꓡꓳ꓿

ꓬꓲ ꓡꓰ ꓐꓯ ꓔ ꓟ ꓠꓬ ꓬꓲ ꓠꓬ ꓮ ꓘꓶ. ꓛꓲ ꓗ, ꓛꓲ ꓡꓳ ꓮ ꓫꓵꓽ ꓑꓶ ꓓꓴ ꓥ ꓐꓯ ꓠꓬ ꓣꓳ ꓠꓬ ꓢꓲꓺ ꓒ ꓬꓰ‐ꓢꓴ ꓧꓪꓽ ꓖꓳ ꓓꓱ ꓔꓯ ꓮ ꓟꓬ, ꓘꓳ, ꓣꓴ ꓪ ꓠꓬ ꓣꓳ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓡꓰ ꓐꓰ ꓫꓱ, ꓡꓯꓽ ꓘꓳ, ꓡꓳ ꓐꓰ ꓐꓯ ꓔ ꓡꓳ꓿ ꓖꓳ ꓟ ꓡꓰ ꓟꓽ ꓞꓲ ꓣꓳ ꓟꓲ ꓠꓯ ꓗꓪ ꓐꓰ ꓧꓪꓽ ꓖꓳ ꓓꓱ ꓡꓳ ꓬꓰ ꓕꓯ ꓣꓳ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓓꓴ ꓥꓳ ꓐꓰ ꓐꓯ ꓔ ꓡꓳ꓿

ꓙꓲꓻ ꓫꓬ ꓢꓴ ꓚꓮꓣꓡꓳꓢ ꓠꓬ 2006 ꓘꓳꓼ 10 ꓦ ꓕꓯ ꓢꓲꓺ ꓒ ꓠꓯ, ꓗꓪ ꓬꓯꓼ ꓟꓶ ꓡꓰꓳ꓿ ꓬꓲ ꓧꓪꓽ ꓖꓳ ꓓꓱ ꓔꓯ ꓙꓲꓻ ꓫꓬ ꓢꓴ ꓝꓣꓮꓠꓚꓲꓢ ꓮꓢꓲꓢꓲ ꓡꓯꓼ ꓜꓳ ꓒ ꓕꓲ ꓗꓪ ꓓꓵꓻ ꓖꓶ ꓠ, ꓟ ꓬꓲ ꓔꓯ ꓐꓯ ꓔ ꓟ ꓪꓴ. ꓠꓬꓲ ꓓꓵꓻ ꓖꓶ ꓗꓷꓳ꓿ ꓖꓳ ꓗ. ꓠꓯ ꓘꓴ ꓜꓲꓼ ꓞꓳ ꓠꓬ ꓬꓲ ꓧꓪꓽ ꓖꓳ ꓓꓱ ꓔꓯ ꓚꓻ ꓢꓲ ꓠꓬꓲ ꓟꓲ ꓠꓯ ꓢꓷ. ꓠꓲ, ꓙꓳ ꓢꓴ ꓠꓯꓻ ꓞꓲꓼ ꓟ. ꓒ ꓓꓻ ꓐꓴ ꓡꓰ ꓮ ꓟꓬ, ꓧꓪ, ꓬꓲ ꓧꓪꓽ ꓖꓳ ꓓꓱ ꓔꓯ ꓚꓻ ꓗꓷ ꓥ ꓟꓲ ꓟꓽ ꓛꓵꓻ ꓡꓰ ꓟꓽ ꓒꓬ ꓡꓰ ꓙꓳ ꓟ ꓪꓴ. ꓠꓬꓲ ꓘꓴ ꓜꓲꓼ ꓞꓳ ꓠꓬ ꓬꓲ ꓔꓯ ꓙꓲꓻ ꓫꓬ ꓢꓴ ꓕꓲ ꓣꓳ ꓟꓬꓱꓺ ꓓꓳꓽ ꓖꓶ ꓗꓷꓳ꓿