ꓢꓲ, ꓜꓲ ꓔꓶ ꓟ (40) ꓘꓳꓼ ꓔꓶ ꓢꓴ ꓲꓠꓓꓲꓮ ꓗꓴꓷꓼ ꓗꓪ ꓢꓲ, ꓜꓲ ꓪ ꓔꓲ ꓐꓰ ꓘꓴ ꓢꓴ ꓚꓱ, (Forest Man Jadav Payeng)

ꓢꓲ, ꓜꓲ ꓔꓶ ꓟ (40) ꓘꓳꓼ ꓔꓶ ꓢꓴ ꓲꓠꓓꓲꓮ ꓗꓴꓷꓼ ꓗꓪ ꓢꓲ, ꓜꓲ ꓪ ꓔꓲ ꓐꓰ ꓘꓴ ꓢꓴ ꓚꓱ, (Forest Man Jadav Payeng)

ꓠꓬꓲ. ꓠꓬꓲ ꓟꓬꓱꓽ ꓓꓳꓽ ꓙꓳˍ ꓢꓴ ꓐꓴ ꓚꓺ ꓟꓲꓽ ꓚꓱ, ꓗꓪ ꓐꓰ ꓢꓲ, ꓜꓲ ꓔꓶ ꓟ (40) ꓘꓳ, ꓕꓯ ꓢꓲ ꓔꓶ ꓗꓷ ꓢꓴ ꓲꓠꓓꓲꓮ ꓗꓴꓷꓼ ꓗꓪ ꓐꓰ ꓢꓲ, ꓜꓲ ꓔꓶ ꓒꓽ  ꓐꓰ ꓟꓬꓱꓺ ꓖꓶ ꓔ ꓟ Jadav Payeng ꓚꓺ ꓟꓲꓽ ꓔꓯ ꓚꓺ ꓟ. ꓖꓶ ꓓꓴ ꓥꓳ꓿ ꓬꓲ ꓠꓬ ꓟꓲ ꓠꓯ ꓡ ꓞꓳ ꓐꓴ ꓟꓽ ꓓꓵ ꓙ ꓔ ꓟ ꓟꓬꓱꓽ ꓔꓯ ꓬꓰ ꓢꓴ ꓮ ꓘꓶ. ꓛꓲ ꓓꓵ ꓙ ꓟꓶ ꓓꓴ ꓙꓳˍ ꓢꓴ ꓕꓲ ꓣꓳ ꓥ ꓡꓳ꓿ ꓬꓲ ꓠꓬ ꓲꓠꓓꓲꓮ ꓗꓴꓷꓼ ꓖꓴ ꓟꓶ. ꓕꓲ ꓒꓳ, ꓗꓪ ꓔꓬ ꓢꓴ ꓥ ꓡꓳ꓿ ꓬꓲ ꓠꓬ ꓓꓰ‐ꓟꓲ ꓑꓶ‐ꓫꓴ‐ꓟꓲ ꓬꓰ ꓜꓽ ꓢꓴ ꓥ ꓡꓳ꓿ ꓬꓲ ꓠꓬ ꓞꓲꓼ (60) ꓘꓳꓼ ꓙꓳˍ ꓢꓴ ꓥ ꓢꓲ ꓠꓬꓲ ꓬꓲ ꓪ ꓕꓲ ꓦꓲꓻ ꓠꓬ (5) ꓣꓳ ꓥ ꓡꓳ꓿

ꓬꓲ ꓠꓬ ꓬꓲ ꓡꓯ ꓒꓯꓼ ꓢꓲ, ꓜꓲ ꓔꓶ ꓗꓷ ꓟ ꓠꓬ ꓮ ꓘꓶ. ꓪꓴꓽ ꓟ  ꓡꓲ ꓛꓵ ꓟꓵꓽ ꓕꓲ ꓟꓵꓽ ꓒꓬꓱꓼ ꓡꓰ ꓟ ꓥ ꓡꓳ꓿ ꓕꓲ ꓠꓬꓲ ꓙꓳˍ ꓕꓯ ꓬꓲ ꓔꓬ ꓟ ꓞꓳ ꓘ, ꓗꓪ ꓬꓲꓻ ꓙꓬ ꓡꓳ ꓬꓰ ꓮ ꓟꓬ, ꓠꓬ ꓬꓲ ꓟꓽ ꓬꓲ ꓗꓷ ꓡꓰ ꓟ ꓔꓯ ꓬꓰ ꓡꓳ. ꓟꓳ ꓪ ꓡꓳ꓿ ꓖꓳ ꓗ. ꓠꓯ ꓬꓲ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓗꓷ ꓡꓰ ꓟ ꓔꓯ ꓬꓰ ꓢꓷ. ꓡꓰ ꓟ ꓥ ꓡꓳ꓿ ꓝꓮꓲ ꓬꓲ ꓪ ꓦꓲꓻ ꓒ ꓕꓲ ꓗꓪ ꓢꓲ, ꓜꓲ ꓮ ꓟꓬ, ꓠꓬ ꓫꓵꓻ ꓡꓰ ꓟ ꓔꓯ ꓡꓳ. ꓟꓳ ꓪ ꓡꓰꓳ꓿ ꓝꓮꓲ ꓬꓲꓻ ꓙꓬ ꓗꓪ ꓬꓲꓻ ꓙꓬ ꓟꓽ ꓙꓳˍ ꓡꓰ ꓢꓲ ꓠꓬꓲ ꓧꓪ, ꓫꓵꓽ ꓧꓪ ꓙꓵ ꓠꓬ ꓟꓽ ꓔꓬ ꓡꓰ ꓟ ꓔꓯ ꓡꓳ. ꓟꓳ ꓪ ꓡꓰꓳ꓿ ꓝꓮꓲ ꓬꓲꓻ ꓙꓬ ꓟꓽ ꓬꓲ ꓡꓰ ꓟ ꓪꓴ. ꓠꓬꓲ ꓟꓵꓽ ꓮ ꓟꓬ, ꓙꓳˍ ꓡ ꓟ ꓔꓯ ꓡꓳ. ꓟꓳ ꓪ ꓡꓰꓳ꓿

ꓖꓳ ꓗ. ꓠꓯ ꓬꓲ ꓠꓬ ꓕꓲ ꓫꓵꓽ ꓫꓵꓽ ꓟꓬꓱꓽ ꓔꓯ ꓬꓰ ꓠ, ꓟ ꓓꓵ ꓙ ꓗꓷꓳ꓿ ꓖꓳ ꓗ. ꓠꓯ ꓬꓲ ꓠꓬ ꓢꓲ, ꓜꓶ ꓔꓯ ꓕꓲ ꓠꓬꓲ ꓡꓰ ꓕꓲ ꓫꓵꓽ ꓔꓶ ꓗꓷꓳ꓿ ꓬꓲ ꓠꓬ ꓢꓲ, ꓡꓯ ꓗ ꓔꓯ ꓬꓲ ꓡꓰ ꓔꓶ ꓔ ꓟ ꓢꓲ, ꓜꓲ ꓗꓪ ꓐꓰ ꓘꓶˍ ꓢꓲ ꓠꓬꓲ ꓬꓲ ꓠꓬ 20 ꓟꓲꓠꓴꓔꓰꓢ ꓙ ꓖꓴ ꓫꓱ, ꓢꓲ ꓠꓬꓲ ꓝꓮꓲ ꓓꓲ‐ꓡꓲ ꓜꓶ ꓢꓲ ꓠꓬꓲ ꓡꓳ ꓗ ꓖꓳ ꓒ ꓢꓲ ꓠꓬꓲ ꓬꓲꓻ ꓙꓬ ꓔꓶ ꓟ ꓟꓬꓱꓽ ꓔꓯ ꓬꓰ ꓗꓷꓳ꓿ ꓝꓮꓲ ꓬꓲ ꓠꓬ ꓬꓲꓻ ꓙꓬ ꓖꓳ ꓒ ꓢꓲ ꓠꓬꓲ ꓛꓲ ꓡꓰ ꓟ ꓙꓵ, ꓕꓯ ꓠ‐ꓡꓲ ꓬꓲ ꓙꓵ, ꓙ ꓖꓴ ꓫꓱ, ꓢꓲ ꓠꓬꓲ ꓮ ꓫꓵꓽ ꓡꓰ ꓟꓽ ꓙꓳˍ ꓟ ꓟꓵꓽ ꓗꓪ ꓬꓲ ꓠꓬ ꓬꓲ ꓡꓰ ꓓꓯ ꓡ ꓟ ꓢꓲ, ꓜꓲ ꓔꓯ ꓔꓶ ꓗꓷ ꓟ ꓥ ꓡꓳ꓿ ꓬꓲ ꓠꓬ ꓕꓱ ꓡꓱ ꓬꓰ ꓟ ꓕꓲ ꓫꓵꓽ ꓡꓰ ꓕꓲ ꓠꓬꓲ ꓬꓰ ꓗꓷꓳ꓿ ꓕꓱ ꓡꓱ ꓐꓰ ꓬꓲ ꓢꓲ, ꓜꓶ ꓔꓶ ꓗꓷ ꓟ ꓠꓬ (40) ꓘꓳꓼ ꓕꓯ ꓢꓲ ꓙꓳˍ ꓡꓰ ꓟ ꓥ ꓡꓳ꓿ ꓖꓳ ꓗ. ꓠꓯ ꓬꓲ ꓡꓰ ꓔꓶ ꓔ ꓟ ꓢꓲ, ꓜꓲ ꓠꓬ ꓡꓲ ꓛꓵ ꓟꓵꓽ ꓒꓳ, ꓡꓰ ꓟ ꓥ ꓡꓳ꓿

ꓮ ꓘꓶ. ꓛꓲ ꓠꓲ, ꓛꓵ ꓛꓵ ꓐꓰ ꓔ ꓟ ꓮ ꓘꓶ. ꓛꓲ ꓡꓳ. ꓐꓲˍ ꓟ ꓡꓲ ꓛꓵ ꓟꓵꓽ ꓗꓷ ꓡꓰ ꓟ ꓥ ꓡꓳ꓿ ꓬꓲ ꓠꓬ ꓮ ꓘꓶ. ꓛꓲ ꓢꓯꓼ ꓕꓵꓼ ꓢꓲ ꓠꓬꓲ ꓢꓲ, ꓜꓲ ꓔꓶ ꓟ ꓟꓬꓱꓽ ꓔꓯ ꓬꓰ ꓗꓷꓳ꓿ ꓬꓲ ꓡꓰ ꓔꓶ ꓔ ꓟ ꓢꓲ, ꓜꓲ ꓠꓬ ꓡꓲ ꓛꓵ ꓟꓵꓽ ꓠꓬ ꓮ ꓘꓶ. ꓛꓲ ꓪꓴꓽ ꓟ ꓟꓵꓽ ꓕꓲ ꓟꓵꓽ ꓗꓷ ꓡꓰ ꓟ ꓥ ꓡꓳ꓿ ꓕꓱ ꓟ ꓠꓬ ꓴꓢꓮ ꓗꓴꓷꓼ ꓠꓰꓪ ꓬꓳꓣꓗ ꓡꓳ ꓒꓱ ꓗꓪ ꓙꓳˍ ꓟ ꓚꓰꓠꓔꓣꓮꓡ ꓑꓮꓣꓗ ꓗꓽ ꓔꓶ ꓕꓯꓺ ꓢꓲ ꓪꓴꓽ ꓟ ꓥ ꓡꓳ꓿

ꓮ ꓟꓶ ꓟ ꓙꓵ, ꓗꓪ ꓠꓬ ꓬꓲ ꓡꓰ ꓔꓶ ꓔ ꓟ ꓢꓲ, ꓜꓲ ꓗꓪ ꓐꓰ ꓢꓶ, ꓢꓶ ꓮ ꓟꓬ, ꓠꓬ ꓟꓲ ꓠꓯ ꓗꓪ ꓐꓰ ꓢꓲ, ꓜꓶ ꓮ ꓟꓬ, ꓣꓳ ꓡ ꓟ ꓥ ꓡꓳ꓿ ꓮ ꓟꓶ ꓠꓬ ꓬꓲ ꓪ ꓚꓲ. ꓛꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓪꓴꓽ ꓡ ꓟ ꓥ ꓡꓳ꓿ ꓬꓲ ꓡꓰ ꓔꓶ ꓔ ꓟ ꓡꓲ ꓛꓵ ꓟꓵꓽ ꓗꓪ ꓮ ꓟꓶ ꓟ ꓙꓵ, ꓗꓪ ꓠꓬ ꓧꓪꓽ ꓫꓵꓽ ꓧꓪ ꓙꓵꓽ ꓮ ꓟꓬ, ꓔꓬ ꓡ ꓟ ꓥ ꓡꓳ꓿ ꓕꓱ ꓧꓪ ꓫꓵꓽ ꓧꓪ ꓙꓵꓽ ꓐꓴ ꓠꓬ ꓟꓶ‐ꓖꓶ ꓦ‐ꓟ꓾ ꓡ‐ꓟ꓾ ꓐꓰ ꓮ.‐ꓥ ꓐꓰ ꓠꓱ. ꓐꓯꓼ ꓮ ꓟꓬ, ꓧꓪ ꓫꓵꓽ ꓧꓪ ꓙꓵꓽ ꓐꓴ ꓠꓬ ꓔꓬ ꓡ ꓟ ꓥ ꓡꓳ꓿

ꓮ ꓟꓶ ꓟ ꓙꓵ, ꓗꓪ ꓠꓬ ꓬꓲ ꓪ ꓕꓲ ꓦꓲꓻ ꓐꓱ ꓶ ꓜ ꓓꓴ ꓓꓳ ꓓꓴ ꓠꓬ ꓕꓱ ꓗꓪ ꓓꓰ‐ꓟꓲ ꓑꓶ‐ꓫꓴ‐ꓟꓲ ꓬꓰ ꓜꓽ ꓢꓲ ꓠꓬꓲ ꓢꓯ. ꓔꓬ ꓟ ꓥ ꓡꓳ꓿ ꓕꓲ ꓠꓬꓲ ꓙꓳˍ ꓟ ꓙꓵ, ꓕꓯ ꓬꓲ ꓔꓯ ꓬꓲ ꓔꓬ ꓟ ꓲꓠꓓꓲꓮ ꓗꓴꓷꓼ ꓗꓪ ꓐꓰ ꓢꓯ. ꓐꓬꓱ ꓓꓱ ꓢꓴ ꓐꓴ ꓡꓰ ꓬꓲ ꓓꓳꓽ ꓔꓯ ꓓꓱ ꓢꓲ ꓠꓬꓲ ꓳꓠꓡꓲꓠꓰ ꓗꓪ ꓗꓶ ꓗꓷ ꓟ ꓪꓴ. ꓠꓬꓲ ꓡ ꓞꓳ ꓮ ꓟꓬ, ꓬꓲ ꓔꓯ ꓢꓷ. ꓡꓰ ꓟ ꓥ ꓡꓳ꓿

ꓖꓳ ꓗ. ꓠꓯ ꓬꓲ ꓠꓬ ꓬꓲ ꓪ ꓗꓴꓷꓼ ꓐꓱ ꓶ ꓮ ꓟꓬ, ꓛꓲ ꓟꓬꓱꓽ ꓓꓳꓽ ꓙꓳˍ ꓢꓴ ꓕꓲ ꓣꓳ ꓒꓬꓱꓼ ꓡ ꓟ ꓥ ꓡꓳ꓿ ꓡ ꓞꓳ ꓮ ꓟꓬ, ꓡꓰ ꓬꓲ ꓔꓯ ꓲꓠꓓꓮꓲ ꓗꓴꓷꓼ ꓗꓪ ꓐꓰ ꓡ ꓛꓵꓽ ꓟꓵꓽ ꓒꓽ ꓐꓰ ꓘꓴˍ ꓟ ꓥ ꓡꓳ꓿ ꓝꓮꓲ ꓬꓲ ꓔꓯ ꓲꓠꓓꓲꓮ ꓗꓴꓷꓼ ꓙꓵꓽ ꓢꓴ ꓢꓲꓽ ꓒꓽ ꓡꓰ ꓬꓲ ꓔꓯ ꓟꓬꓱꓽ ꓓꓳꓽ ꓖꓶ ꓗꓷ ꓟ ꓥ ꓡꓳ꓿ ꓝꓮꓲ ꓬꓲ ꓔꓯ ꓡꓯ ꓫꓴ ꓮ ꓟꓬ, ꓖꓶ ꓗꓷ ꓢꓲ ꓠꓬꓲ ꓲꓠꓓꓲꓮ ꓗꓴꓷꓼ ꓙꓵꓽ ꓢꓴ ꓐꓴ ꓖꓪ ꓙꓱ ꓜꓲꓼ ꓔꓶ ꓗꓪ ꓫ. ꓕꓱ ꓠ, ꓟ ꓬꓲ ꓔꓯ ꓙꓵꓽ ꓪ ꓖꓶ ꓗꓷ ꓟ ꓥ ꓡꓳ꓿

ꓟꓬꓱꓽ ꓬꓰ ꓜ ꓢꓴ ꓡ ꓞꓳ ꓕꓲ ꓣꓳ ꓠꓬ ꓮ ꓟꓶ ꓟ ꓙꓵ, ꓗꓪ ꓬꓲ ꓔꓯ ꓔꓯꓺ ꓢꓳꓻ ꓓꓴ ꓮ ꓟꓬ, ꓙꓳˍ ꓡ ꓟ ꓡ ꓞꓳ ꓒꓬꓱꓼ ꓡ ꓟ ꓥ ꓡꓳ꓿ ꓡ ꓞꓳ ꓕꓲ ꓣꓳ ꓡꓰ ꓫ. ꓕꓱ ꓔ ꓟ ꓠꓬ ꓬꓲ ꓠꓬ ꓥꓪ ꓠꓴ ꓐꓱ ꓶ ꓮ ꓘꓶ. ꓛꓲ ꓔꓯꓺ ꓢꓳꓻ ꓓꓴ ꓙꓳˍ ꓟ ꓥ ꓡꓳ꓿ ꓬꓲ ꓠꓬ ꓢꓲ, ꓜꓲꓼ ꓔꓯ (40) ꓘꓳꓼ ꓔꓶ ꓗꓷ ꓢꓴ ꓥ ꓟ ꓪꓴ. ꓠꓬꓲ ꓬꓲ ꓮ ꓘꓶ. ꓢꓯꓼ ꓕꓵꓼ ꓢꓲ ꓠꓬꓲ ꓕꓱ ꓟꓬꓱꓽ ꓔꓯ ꓖꓶ ꓗꓷ ꓟ ꓪꓴ. ꓠꓬꓲ ꓬꓲ ꓔꓯ ꓟꓬꓱꓺ ꓓꓳꓽ ꓖꓶ ꓡꓳ ꓐꓰ ꓐꓯ ꓔ ꓡꓳ꓿

(40) ꓘꓳꓼ ꓗ. ꓠꓯ ꓙꓮꓓꓮꓦ ꓠꓬ ꓢꓲ, ꓜ  ꓶ ꓔꓯ ꓔꓶ ꓔꓬ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓮ ꓟꓶ ꓬꓲ ꓔꓶ ꓐꓬꓱ ꓠꓬ ꓢꓲ, ꓜꓲ ꓔꓶ ꓟ ꓔꓯ ꓮ ꓡꓰ ꓐꓰ ꓔꓶ ꓠ, ꓟ ꓕꓳ ꓶ ꓔꓯ ꓐꓳ ꓠ, ꓟ ꓥ ꓡꓳ ꓐꓰ ꓬꓲ ꓡꓰ ꓐꓯ ꓔ ꓡꓳ꓿ ꓬꓲ ꓠꓬ ꓬꓲ ꓛꓳ ꓒꓯ ꓐꓰ ꓕꓲ ꓪ ꓢꓲ, ꓜꓲ ꓔꓯ ꓮ ꓡꓰ ꓐꓰ ꓔꓶ ꓟ ꓔꓯ ꓕꓳ ꓶ ꓐꓳ ꓟ ꓥ ꓡꓳ꓿ ꓕꓱ ꓟ ꓠꓬ ꓮ ꓟꓶ ꓟ ꓙꓵ, ꓗꓪ ꓤ ꓠꓱ ꓤ ꓐꓴ ꓐꓰ ꓢꓳꓻ ꓤ ꓐꓴ ꓠꓬ ꓞꓲꓼ ꓣꓳ ꓟ ꓙꓵ, ꓗꓪ ꓐꓰ ꓟꓵꓽ ꓘꓳꓼ ꓠꓬ ꓮ ꓟꓬ, ꓛꓲ ꓣꓳ. ꓚꓵ ꓟ ꓔꓯ ꓢꓷ. ꓡꓰ ꓠ, ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿

ꓖꓳ ꓡꓰ ꓥ ꓟ ꓪꓴ. ꓠꓬꓲ ꓟꓵꓽ ꓘꓳꓼ ꓒꓳ,ꓡ ꓟ ꓔꓯ ꓣꓳ ꓠꓬ ꓫꓬ, ꓓ ꓢꓲ ꓡꓳ ꓐꓰ ꓐꓯ ꓔ ꓡꓳ꓿ ꓬꓲ ꓠꓬ ꓕꓱ ꓓꓳꓽ ꓔꓯ ꓮ ꓘꓶ. ꓛꓲ ꓐꓯ ꓑꓶ ꓖꓶ  ꓠ,ꓟ ꓠꓲ, ꓫꓵˍ ꓟ ꓥ ꓡꓳ꓿ ꓬꓲ ꓡꓰ ꓫ. ꓕꓱ ꓔ ꓟ ꓠꓬ ꓬꓲ ꓠꓬ ꓮ ꓕꓯ ꓥ ꓟꓲ ꓢꓲ, ꓜꓲ ꓔꓶ ꓟ ꓔꓯ ꓟꓽ ꓠꓽ ꓐꓰ ꓫ. ꓕꓱ ꓔ ꓟ ꓥ ꓡꓳ꓿ ꓠꓲ, ꓠꓵ ꓟ ꓮ, ꓐ ꓮ, ꓟ ꓬꓲ ꓤ ꓠꓬꓲ ꓤ ꓐꓴ ꓠꓴ ꓥꓪ ꓥ ꓟꓲ ꓣꓳ ꓔꓬ ꓟ ꓗꓴꓷꓼ ꓣꓳ ꓔꓬ ꓟ ꓡꓳ ꓒꓱ ꓞꓳ ꓘ, ꓗꓪ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓟ ꓟꓬꓱꓽ ꓔꓯ ꓕꓲ ꓫꓵꓽ ꓫꓵꓽ ꓗꓪ ꓬꓰ ꓐ ꓡ ꓟ ꓕꓲ ꓒꓳ, ꓗꓪ ꓐꓰ ꓬꓰ ꓓꓴ ꓬꓰ ꓡꓯ꓿ ꓣꓳ ꓦꓲꓻ ꓒ ꓕꓲ ꓗꓪ ꓢꓲ, ꓜꓲ ꓔꓯ ꓔꓶ ꓢꓲ ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓓꓴ ꓬꓰ ꓡꓯ꓿

ꓣꓳ ꓤ ꓠꓱ ꓤ ꓐꓴ ꓔꓯ ꓢꓲ, ꓜꓲ ꓠꓬ ꓮ ꓟꓬ, ꓣꓳꓺ ꓚꓵ ꓟ ꓔꓯ ꓟ. ꓖꓶ ꓓꓴ ꓬꓰ ꓡꓯ꓿ ꓙ ꓖꓴ ꓙꓳ ꓟ ꓢꓯ. ꓐꓬꓱ ꓮ ꓟꓬ, ꓬꓰ ꓐ ꓡ ꓠ ꓟ ꓣꓦꓮ ꓝꓮꓚꓰꓐꓳꓳꓗ ꓡꓲꓗꓰ ꓢꓧꓮꓣꓰ ꓚꓳꓟꓟꓰꓠꓔ ꓬꓰ ꓖꓶ ꓓꓴ ꓬꓰ ꓡꓯ꓿ ꓛꓲ ꓡ ꓟ ꓕꓲ ꓫꓵꓽ ꓠ ꓗꓪ ꓝꓮꓲ ꓕꓲ ꓧꓪ, ꓜꓲꓼ ꓡꓯ ꓘꓳ, ꓡꓯ ꓫ. ꓟꓳ ꓪ꓿