ꓢꓲ-ꓫꓬ-ꓟ-ꓦ ꓐꓰ ꓢꓲ ꓫꓬ ꓕꓳ ꓶ (Q & A)

ꓘꓶꓽ ꓫꓵꓼ ꓡꓵ ꓗꓪ ꓢꓲ-ꓫꓬ-ꓟ-ꓦ ꓔꓯ ꓪꓴ-ꓢ ꓦ ꓐꓰ ꓕꓱ ꓡꓰ ꓐꓯ ꓐꓶ= ꓪꓴ-ꓢ ꓦ ꓐꓯꓹ ꓟ ꓮ ꓟꓬ ꓧꓪꓹ ꓔꓯ ꓘꓶꓽ ꓫꓵꓼ ꓡꓵ ꓗꓪ ꓕꓱ ꓡꓰ ꓡꓳꓸ ꓟꓳ ꓪ ꓓˍ ꓡꓳ= ꓟꓬ ꓠꓬꓲ ꓐꓶꓹ ꓠꓬꓲ ꓬꓲ ꓚꓰ ꓬꓲ ꓪꓴꓸ ꓕꓳ ꓶ 1 ꓽ 2 ꓗꓪ ꓪꓴ-ꓢ ꓟꓲ ꓠꓯ ꓔꓯꓚꓰꓼ ꓔ ꓔꓯ ꓪꓴ-ꓢ ꓦ ꓠꓬ ꓬꓲ ꓙꓬ ꓕꓯꓽ ꓢꓲ ꓗꓪ ꓮꓺ ꓔꓬ ꓟ ꓐꓱ ꓔꓬ ꓟ ꓚꓱꓹ ꓔꓯ ꓐꓯ ꓔ ꓟ ꓙꓳˍ ꓡꓳ= ꓖꓳ ꓟ ꓡꓰ ꓟꓽ ꓞꓲ ꓟꓴ ꓖꓪ ꓕꓳ ꓶ 104ꓽ 29ꓹ 30꓾ ꓬꓲ ꓚꓰ ꓬꓲ ꓪꓴꓸ ꓕꓳꓽ ꓶ 2ꓽ 7 ꓗꓪ ꓪꓴ-ꓢ ꓠꓬ ꓟꓲ ꓠꓯ ꓞꓳ ꓤꓽ ꓔꓯ ꓚꓰꓼ ꓓꓳ ꓡꓰ ꓠꓬ ꓬꓲ ꓢꓯꓼ ꓦ ꓖꓶˍ ꓡꓳ꓾ ꓬꓲ ꓢꓯꓼ ꓡꓴ ꓖꓶˍ ꓡꓳ= ꓖꓳ ꓕꓲ ꓘꓴꓸ ꓗꓪ ꓪꓴ-ꓢ ꓢꓯꓼ ꓦ ꓖꓶˍ ꓟ ꓔꓯ ꓦ ꓐꓯꓹ ꓟ ꓢꓲ-ꓫꓬ-ꓟ-ꓦ ꓐꓯˍ ꓟ ꓟꓸ ꓟꓲ ꓔꓯ ꓕꓱ ꓡꓰ ꓣꓱꓽ ꓔ ꓟ ꓔꓯ ꓡꓳꓸ ꓟꓳ ꓪ ꓓˍ ꓡꓳ=

  ꓬꓲ ꓚꓰ ꓬꓲ ꓪꓴꓸ ꓕꓳꓽ ꓶ 41ꓽ 38 ꓗꓪ ꓩ-ꓣꓳ ꓪꓸ ꓔꓲꓸ ꓡꓰ ꓬ-ꓗꓴ ꓬꓲ ꓤꓽ ꓬꓳ-ꓢꓷ ꓔꓯ ꓐꓯꓹ ꓟ ꓠꓬ "ꓕꓱ ꓡꓰ ꓪꓴ-ꓢ ꓦ ꓡꓰ ꓐꓲ ꓞꓹ ꓢꓴ ꓔꓯ ꓮ ꓡꓰ ꓐꓰ ꓟꓳ ꓪ ꓓ ꓢꓯꓼ ꓡ?" ꓐꓰ ꓐꓯ ꓟ ꓔꓯ ꓟꓳꓸ ꓡꓳꓸ ꓟꓳ ꓪ ꓓˍ ꓡꓳ= ꓖꓳ ꓟ ꓡꓰ ꓟ ꓞꓲ ꓟꓳ-ꓫꓵ ꓐꓰ ꓬꓳ-ꓫꓴ ꓔꓯ ꓥˍ ꓟꓲ ꓪꓴ-ꓢ ꓦ ꓡꓰ ꓐꓲ ꓞꓹ ꓢꓴ ꓐꓰ ꓐꓯꓹ ꓐꓶ= ꓘꓶꓽ ꓫꓵꓼ ꓡꓵ ꓗꓪ ꓪꓴ-ꓢ ꓦ ꓐꓲ ꓞꓹ ꓟ ꓚꓱꓹ ꓔꓯ ꓮ ꓟꓬ ꓧꓪ ꓡꓳꓸ ꓟꓳ ꓪ ꓓˍ ꓡꓳ= 

   ꓘꓶꓽ ꓫꓵꓼ ꓫꓵꓼ ꓗꓪ ꓠꓬ ꓢꓲ-ꓫꓬ-ꓟ-ꓦ ꓚꓱꓹ ꓔꓯ ꓟꓳꓸ  90 ꓧꓪꓹ ꓕꓱ ꓡꓰ ꓐꓳ ꓔ ꓐꓶ= ꓟ-ꓕꓲ 12ꓽ 30-32ꓹ ꓟ-ꓘꓳ 3ꓽ 28-30ꓹ ꓡꓴ-ꓘ 12ꓽ 8-10 ꓗꓪ ꓢꓲ-ꓫꓬ-ꓟ-ꓦ ꓔꓯ ꓥꓳꓽ ꓡꓰ ꓢꓴ ꓔꓯ ꓠꓬ ꓝꓴꓲꓸ ꓣꓴꓠꓸ ꓖꓶꓽ ꓟ ꓐ ꓡꓹ ꓟ ꓚꓱꓹ ꓕꓱ ꓕꓲ ꓘꓴꓸ ꓗꓪ ꓕꓱ ꓡꓰ ꓐꓳ ꓔ ꓟ ꓙꓳˍ ꓐꓶ= ꓖꓳ ꓟ ꓡꓰ ꓟꓽ ꓞꓲ ꓟ-ꓕꓲ  28ꓽ 19 ꓗꓪ ꓠꓬ ꓐꓹ-ꓐꓽ꓾ ꓤꓽ-ꓔꓲ꓾ ꓢꓲ-ꓫꓬ-ꓟ-ꓦ ꓐꓯˍ ꓟ ꓔꓯ ꓟꓸ ꓖꓶꓽ ꓡˍ ꓟ ꓙꓳˍ ꓐꓶ= ꓖꓳ ꓟ ꓡꓰ ꓐꓰ ꓕꓲꓽ ꓡꓰꓹ ꓡꓴ-ꓘ 1ꓹ 2 ꓗꓪ ꓢꓲ ꓒꓽ ꓬꓰ-ꓢꓴ ꓦꓱ ꓡꓹ ꓟ ꓚꓱꓹ ꓕꓱ ꓟ ꓠꓬ ꓫꓲ-ꓫꓬ-ꓟ-ꓦ ꓢꓯꓼ ꓪꓽ ꓗꓪ ꓐꓰ ꓦꓱ ꓡꓹ ꓟ ꓡꓴ-ꓘ 1ꓽ 15 ꓝꓲꓸ ꓗꓪ ꓗꓳ ꓓꓱꓽ ꓔꓲꓹ ꓒꓽ ꓬꓳ-ꓦ ꓚꓱꓹ ꓔꓯ ꓟꓳꓸ ꓢꓲ-ꓫꓬ-ꓟ-ꓦ ꓐꓲ ꓡꓹ ꓟ ꓚꓱꓹ ꓔꓯ ꓡꓳꓸ ꓟꓳ ꓪ ꓓˍ ꓡꓳ=