ꓢꓲ-ꓫꓬ-ꓟ-ꓦ ꓐꓲˍ ꓟ (Q & A)

ꓢꓲ-ꓫꓬ-ꓟ-ꓦ ꓐꓲ ꓢꓴ ꓕꓲꓽ ꓣꓳ ꓣꓳ ꓠꓬ 1 ꓘꓳꓼ 2 ꓘꓳꓼ ꓡꓰ ꓐꓲ ꓢꓲ ꓠꓽ ꓡꓰˍ ꓟ ꓟꓳ ꓠꓬꓲꓺꓳ= ꓕꓲꓽ ꓣꓳ ꓣꓳ ꓠꓬ ꓙꓵ ꓒꓶꓽ ꓓꓳ ꓒꓽ ꓬꓰ ꓒꓲꓸ ꓬꓰ ꓛꓵꓼ ꓒꓽ ꓓꓳ ꓒꓽ ꓓꓽ ꓟ ꓗꓶ ꓡꓰˍ ꓟ ꓟꓲ ꓟꓳ ꓠꓬꓲ ꓺꓳ= ꓮ ꓡꓰ ꓪꓴꓸ ꓠꓬꓲ ꓕꓱ ꓡꓰ ꓗꓶ ꓡꓰˍ ꓡ?

ꓢꓲ-ꓫꓬ-ꓟ-ꓦ ꓐꓲ- ꓟ ꓠꓬ ꓮ ꓘꓶꓸ ꓙꓲˍ ꓟ ꓥ ꓪ= ꓮ ꓡꓲꓳ ꓐꓯ ꓠꓬ “ꓐꓹ ꓐ ꓗꓪ ꓐꓰ ꓓꓳ ꓡO ꓡˍ ꓟ ꓐꓰ꓾ ꓬꓲ ꓗꓪ ꓐꓰ ꓥꓪ ꓡꓰ ꓠꓴ ꓪꓽ ꓔꓬ ꓗꓪ ꓝꓲ ꓩꓴ ꓡ ꓠꓹ ꓟ꓾ ꓠꓲꓹ ꓗꓴ ꓖꓶ ꓢꓴ ꓔꓱꓹ ꓚꓵˍ ꓟ ꓦꓻ ꓖꓳ ꓟ ꓛꓲ ꓡ ꓕꓯ ꓬꓲ ꓠꓽ ꓥꓪ ꓐꓱ ꓶ ꓢꓷꓸ ꓙ ꓟꓳ ꓙˍ ꓥꓳ” ꓐꓰ ꓬꓳ-ꓦ 15ꓽ 26 ꓗꓪ ꓐꓯ ꓔ ꓟ ꓪꓴꓸ ꓠꓬꓲ ꓠꓲ ꓥˍ ꓡꓳ= ꓟ-ꓘꓳ 13ꓽ 11 ꓗꓪ ꓠꓬ “ꓬꓲ ꓪꓽ ꓡꓰ ꓠꓴ ꓪꓽ ꓔꓯ ꓞꓳꓹ ꓢꓲ ꓐꓯ ꓟꓴ ꓜꓲꓼ ꓓꓴ ꓗꓪ ꓡꓯꓼ ꓙꓱ ꓗꓷˍ ꓕꓯ꓾ ꓠꓴ ꓪꓽ ꓮ ꓡꓲ ꓫꓸ ꓕꓱ ꓠꓯꓹ ꓟ ꓕꓽ ꓙꓽ ꓫꓸ꓿ ꓖꓳ ꓕꓲ ꓝꓲꓸ ꓗꓪ ꓠꓴ ꓪꓽ ꓔꓯ ꓮꓸ ꓫꓵ ꓐꓯ ꓘꓶꓽ ꓖꓶ ꓡ ꓠꓬ ꓖꓳ ꓡꓱ ꓫꓸ ꓕꓱ꓿ ꓮ ꓡꓲꓳ ꓐꓯ ꓠꓬ ꓫꓸ ꓕꓱ ꓢꓴ ꓠꓽ ꓠꓴ ꓪꓽ ꓟꓽ ꓥ꓾ ꓢꓲ-ꓫꓬ-ꓟ-ꓦ ꓥ ꓡꓳ” ꓕꓱ ꓡꓰ ꓐꓯ ꓔ ꓡꓳ= ꓖꓳ ꓟ ꓪꓴꓸ ꓠꓬꓲ ꓠꓲ ꓢꓲ-ꓫꓬ-ꓟ-ꓦ ꓠꓬ ꓢꓯꓼ ꓪꓽ ꓖꓶ ꓢꓴ꓾ꓠꓲꓹ ꓟ ꓧꓪꓸ ꓛꓲꓽ ꓖꓶ ꓢꓴ꓾ ꓙꓽ ꓜꓲꓼ ꓠꓲꓹ ꓖꓶ ꓢꓴ꓾ ꓠꓲ ꓗꓳꓹ ꓟꓬ ꓗꓳꓹ ꓖꓶ ꓢꓴ ꓥˍ ꓡꓳ= ꓖꓳ ꓟ ꓡꓰ ꓐꓰ ꓕꓲꓽ ꓡꓲꓹ ꓢꓲ-ꓫꓬ-ꓟ-ꓦ ꓠꓬ ꓔꓱꓹ ꓚꓵˍ ꓟ ꓥˍ ꓡꓳ=

ꓦꓻ ꓕꓲꓽ ꓒꓳꓹ ꓔꓯ ꓢꓲ ꓢꓯꓼ ꓕꓵꓼ ꓡ ꓢꓴ ꓕꓲꓽ ꓐꓱ ꓠꓬ ꓢꓲ-ꓫꓬ-ꓟ-ꓦ ꓐꓲ ꓡˍ ꓟ ꓙꓳˍ ꓡꓳ= ꓖꓳ ꓡꓱ ꓥ_ ꓟꓲ ꓕꓱꓹ ꓚꓵˍ ꓟ ꓟꓽ ꓙꓳ ꓡꓰ ꓕꓯ ꓢꓲ-ꓫꓬ-ꓟ-ꓦ ꓥˍ ꓟꓲ ꓟꓽ ꓬꓯꓼ ꓡꓺ ꓳ= ꓮ ꓡꓲꓳ ꓐꓯ ꓠꓬ ꓢꓲ-ꓫꓬ-ꓟ-ꓦ ꓠꓬ ꓔꓱꓹ ꓚꓵˍ ꓟ ꓥˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓕꓲꓽ ꓐꓱ ꓠꓬ ꓢꓲ-ꓫꓬ-ꓟ-ꓦ ꓟꓽ ꓐꓲ ꓡꓰˍ ꓟ ꓥˍ ꓡꓳ= ꓕꓲꓽ ꓣꓳ ꓣꓳ ꓠꓬ ꓶꓸ ꓡꓰˍ ꓟ ꓖꓳꓼ ꓡꓰꓹ ꓟ ꓗꓶˍ ꓟ ꓥ ꓪ= ꓢꓲ-ꓫꓬ-ꓟ-ꓦ ꓟꓽ ꓗꓶ ꓡꓰ ꓠꓲꓽ ꓪꓸ ꓔꓲ ꓢ ꓓꓯꓼ ꓢꓶꓸ ꓗꓶ ꓡꓰˍ ꓟ ꓙꓳˍ ꓡꓳ= ꓔꓱ ꓚꓵˍ ꓟ ꓟꓽ ꓙꓳ ꓡꓰ ꓝꓲˍ ꓟ ꓠꓬ ꓠꓯꓸ ꓦꓯ ꓙꓵˍ ꓟ꓾ ꓟꓬꓱ ꓓꓳꓽ ꓧꓪˍ ꓟ꓾ ꓘꓶꓽ ꓘˍ ꓟ ꓠꓬ ꓢꓲ-ꓫꓬ-ꓟ-ꓦ ꓟꓽ ꓬꓯ ꓡꓰ ꓝꓲˍ ꓟ ꓐꓰ ꓢ ꓓꓯꓼ ꓔꓯ ꓟꓬꓱꓽ ꓬꓰ ꓝꓲˍ ꓟ ꓥˍ ꓡꓳ=

ꓬꓲ-ꓢꓷ-ꓡꓰ ꓐꓴ ꓚ ꓟꓲꓽ ꓕꓲꓽ ꓟ ꓙꓳˍ ꓡꓳ= ꓪꓴ-ꓢ ꓠꓬ ꓟꓴꓽ ꓗꓪ ꓝꓲ ꓓꓴ ꓓꓽ 3 ꓣꓳ ꓔꓯ ꓟꓬꓱꓽ ꓖꓶꓽ ꓔ ꓡꓳ= ꓣ-ꓒ-ꓯ-ꓡꓷ ꓔꓯ ꓠꓬ ꓟꓬ ꓞꓲꓼ ꓟꓬꓱꓽ ꓔ ꓟꓳꓸ꓾ ꓝꓲ ꓓꓴ ꓚꓬ-ꓑꓷ-ꓡꓰꓼ ꓔꓯ ꓠꓬ ꓓꓳꓽ ꓐꓯ ꓠˍ ꓟ꓾ ꓡꓴ-ꓢꓲ-ꓩꓯ ꓔꓯ ꓠꓬ ꓟꓴ ꓗꓪ ꓝꓲ ꓓꓴ ꓔꓯ ꓪꓴꓸ ꓓꓵ ꓣꓱꓽ ꓢꓴ ꓐꓰ ꓕꓱ ꓡꓰ ꓟꓬꓱꓽ ꓖꓶ ꓔ ꓡꓳ= ꓖꓳ ꓕꓯ ꓟꓴ ꓗꓪ ꓝꓲ ꓓꓴ ꓡꓴ-ꓢꓲ-ꓩꓯ ꓠꓬ ꓠꓯꓸ ꓦꓯ ꓙꓵˍ ꓟ ꓘꓶꓽ ꓘꓶꓹ ꓔ ꓟ꓾ ꓮꓸ ꓫꓵˍ ꓟꓲ ꓬꓰ ꓐ ꓡꓹ ꓠꓬ ꓚꓵꓸ ꓛꓬꓽ ꓔꓵꓹ ꓚꓵꓸ ꓛꓬꓽ ꓪꓴ-ꓢ ꓡꓰ ꓐꓰ ꓓꓵꓽ ꓙꓽ ꓢꓲ ꓪꓴ-ꓢ ꓐꓯ ꓘꓶꓽ ꓟꓽ ꓠ ꓠꓹ ꓗꓶ ꓡꓰꓳ= ꓪꓴ-ꓢ ꓠꓬ ꓟꓴ ꓗꓪ ꓝꓲ ꓓꓴ ꓟꓲ-ꓘꓷ-ꓡꓷ ꓔꓯ ꓪꓴꓸ ꓓꓵ ꓣꓱꓽ ꓝꓲ ꓢꓲ ꓡꓴ-ꓢꓰ-ꓒꓯ ꓕꓯ ꓓꓶꓽ ꓡꓯꓽ ꓘꓳ ꓝꓲˍ ꓡꓳ= ꓖꓳ ꓕꓯ ꓟꓲ-ꓘꓷ-ꓡꓷ ꓡꓰ ꓓꓶꓽ ꓧꓪꓸ ꓡꓰ ꓢꓲ ꓡꓴ-ꓢꓰ-ꓒꓯ ꓠꓬ ꓛꓬꓽ ꓟꓵꓽ ꓗꓪ ꓛꓲ ꓡꓰ ꓢꓲ ꓠꓲꓽ ꓪꓸ ꓔꓲ ꓗꓶ ꓡꓰˍ ꓟ ꓥˍ ꓡꓳ= ꓟꓲ-ꓘꓷ-ꓡꓷ ꓠꓬ ꓟꓴ ꓗꓪ ꓝꓲ ꓓꓴ ꓪꓴꓸ ꓓꓵ ꓣꓱꓽ ꓢꓴ ꓕꓱ ꓡꓰ ꓗꓶ ꓡꓰˍ ꓓꓴ ꓟ ꓥꓳ= ꓡꓴ-ꓢꓰ-ꓒꓯ ꓠꓬ ꓟꓴ ꓗꓪ ꓝꓲ ꓓꓴ ꓗꓪ ꓚꓳꓸ ꓠꓲꓸ ꓔꓲ ꓗꓶ ꓡꓰˍ ꓡꓳ=

ꓘꓶꓽ ꓫꓵꓼ ꓡꓵ ꓗꓪ ꓟꓶꓽ ꓠꓶꓹ ꓝ ꓐꓴ ꓕꓲꓽ ꓐꓱ ꓠꓬ ꓟꓽ ꓔꓱˍ ꓟ ꓓꓵꓽ ꓙꓽ ꓢꓲ ꓬꓰ ꓠꓬ ꓟꓽ ꓔꓱˍ ꓟ ꓟꓶꓽ ꓠꓶꓹ ꓝꓲꓸ ꓒꓽ ꓗꓶ ꓡꓰˍ ꓡꓳ= ꓖꓳ ꓟ ꓡꓰ ꓐꓰ ꓟꓽ ꓕꓱ ꓟ ꓟꓶꓽ ꓠꓶꓹ ꓝꓸ ꓒꓽ ꓗꓶ ꓡꓰˍ ꓟ ꓡꓰ ꓐꓰ꓾ ꓟꓴ ꓗꓪ ꓝꓲ ꓓꓴ ꓡꓴ-ꓢꓰ-ꓩꓯ ꓠꓬ ꓠꓲꓽ ꓪꓸ ꓔꓲ ꓢ ꓓꓯꓼ ꓗꓶ ꓡꓰˍ ꓟ ꓡꓰ ꓐꓰ ꓢꓲ-ꓫꓬ-ꓟ-ꓦ ꓐꓰ ꓢꓴ ꓥˍ ꓟꓲ ꓬꓲ ꓟꓶꓽ ꓗꓪ ꓠꓲꓽ ꓒꓽ ꓗꓶ ꓡꓰˍ ꓫꓵꓽ ꓥˍ ꓟꓲ ꓙꓳ ꓥ= ꓗ-ꓟꓶ-ꓓꓲ ꓑꓴꓔꓮꓳ ꓗꓪ ꓢꓲ-ꓫꓬ-ꓟ-ꓦ ꓐꓲ ꓢꓴ ꓕꓲꓽ ꓣꓳ ꓬꓰ ꓟꓶꓽ ꓗꓪ ꓠꓬ ꓠꓲꓽ ꓒꓽ ꓗꓶ ꓡꓰ ꓢꓲ ꓞꓳ ꓤꓽ ꓮ ꓟꓬꓹ ꓣꓳ ꓫꓵ ꓢꓲ ꓐꓯ ꓟꓵ ꓕꓱ ꓡꓯꓽ ꓘꓳ ꓗꓪ ꓛꓲ ꓡꓰˍ ꓟ ꓔꓯ ꓑ ꓙꓽ ꓠꓬꓲꓺ ꓳ= ꓮꓟꓰꓣꓲꓚꓮꓠ ꓗꓪ ꓢꓲ-ꓫꓬ-ꓟ-ꓦ ꓐꓲ ꓢꓴ ꓕꓲꓽ ꓣꓳ ꓡꓰ ꓞꓳ ꓤꓽ ꓬꓲ ꓔꓵ ꓣꓳ ꓔꓯ ꓟꓴ ꓗꓪ ꓗꓪ ꓓꓰ ꓙꓰ ꓡꓯ ꓐꓯ ꓢꓲ ꓓꓳꓼ ꓜꓽ ꓝꓲ ꓢꓲ ꓫꓵˍ ꓟ ꓚ ꓟꓲꓽ ꓙꓳˍ ꓡꓳ= ꓕꓱ ꓡꓰˍ ꓫꓵꓽ ꓟꓲ ꓠꓯ ꓗꓪ ꓛ ꓟꓲꓽ ꓮꓽ ꓟꓬꓹ ꓙꓳ ꓡꓳ=

ꓠꓬꓲꓸ ꓠꓬꓲ ꓘꓴ ꓜꓲꓼ ꓞꓳ ꓘꓴ ꓗꓪ ꓚꓧꓮꓣꓲꓢꓟꓮꓔꓲꓚ ꓟꓳꓦꓰꓟꓰꓠꓔ ꓐꓯˍ ꓟ ꓢꓲ-ꓫꓬ-ꓟ-ꓦ ꓐꓲ ꓢꓴ ꓟꓬꓱꓽ ꓬꓰ ꓔꓬ ꓟ ꓬꓲ ꓜꓴ ꓬꓲ ꓟꓯꓼ ꓮ ꓟꓬꓹ ꓙꓳˍ ꓡꓳ= ꓖꓳ ꓡꓰ ꓥˍ ꓟꓲ ꓢꓲ-ꓫꓬ-ꓟ-ꓦ ꓐꓲ ꓢꓴ ꓮꓽ ꓙꓵꓽ ꓔꓯ ꓬꓰ ꓝꓲˍ ꓟ ꓟꓽ ꓥ= ꓢꓲ-ꓫꓬ-ꓟ-ꓦ ꓐꓲ ꓢꓴ ꓬꓲ ꓚ ꓟꓲꓽ ꓔꓯ ꓥˍ ꓟꓲ ꓛꓳꓽ ꓢꓲ ꓦ ꓕꓲꓽ ꓒꓳꓹ ꓔꓯ ꓢꓲ ꓢꓯꓼ ꓕꓵꓼ ꓢꓴ ꓔꓯ ꓢꓲ ꓢꓲ-ꓫꓬ-ꓟ-ꓦ ꓐꓲˍ ꓟ ꓟꓬꓱꓽ ꓬꓰ ꓝꓲˍ ꓟ ꓥˍ ꓡꓳ= ꓞꓳ ꓤꓽ ꓕꓲꓽ ꓣꓳ ꓚ ꓟꓲꓽ ꓔꓯ ꓛꓳꓽ ꓠꓬꓲ ꓠꓬ ꓗꓷꓸ ꓒꓽ꓾ ꓠꓯꓸ ꓦꓯꓸ ꓙꓵꓽ ꓒꓽ꓾ ꓟꓬꓱ ꓓꓳꓽ ꓧꓪ ꓒꓽ ꓥ ꓐꓷˍ ꓠꓬ ꓬꓲ ꓟꓶꓽ ꓗꓪ ꓠꓲꓽ ꓪꓸ ꓔꓲ ꓢ ꓓꓯꓼ ꓗꓪ ꓐꓰ ꓫꓸ ꓕꓱ ꓡˍ ꓥꓳ= ꓘꓴ ꓜꓲꓼ ꓞꓳ ꓐꓱ ꓶ ꓟꓽ ꓗꓶ ꓡꓰ ꓚꓵꓸ ꓛꓬ ꓐꓱ ꓶ ꓟꓬꓱ ꓓꓳꓽ ꓧꓪˍ ꓟ ꓚꓵꓸ ꓛꓬ ꓐꓱ ꓶ ꓒꓴ ꓫꓵ ꓪ ꓠˍ ꓟ ꓙꓳ ꓢ ꓔꓬ ꓢ ꓠꓹ ꓟ ꓐꓱ ꓶ ꓡꓰ ꓢꓲ ꓓꓵꓽ ꓙꓽ ꓡˍ ꓟ ꓗꓷ ꓡꓰˍ ꓥꓳ= ꓘꓴ ꓜꓲꓼ ꓞꓳ ꓡꓰ 2 ꓐꓱ 3 ꓐꓱ ꓒꓯꓽ ꓡꓰˍ ꓟ ꓘꓶ ꓡꓰˍ ꓥꓳ= ꓟꓲ ꓠꓯ ꓞꓳ ꓤꓽ ꓠꓬ ꓗꓷꓸ ꓔ ꓟ ꓔꓯ ꓢꓷ ꓔ ꓥˍ ꓟꓲ ꓮꓻ ꓡꓰ ꓓꓴ ꓬꓰ ꓢꓲ ꓟꓶꓽ ꓠꓶꓹ ꓝꓸ ꓔ ꓠꓬ ꓕꓱ ꓡꓰˍ ꓫꓵꓽ ꓔꓯ ꓡꓰ ꓙꓵꓽ ꓔꓬ ꓡꓳ= ꓟꓽ ꓔꓱꓹ ꓟ ꓟꓶꓽ ꓠꓶꓹ ꓝꓸ ꓒꓽ ꓠꓲꓽ ꓢꓯꓼ ꓪꓽ ꓗꓪ ꓐꓰ ꓟꓬꓱꓽ ꓬꓰ ꓔꓬ ꓢꓴ ꓔꓯ ꓤ ꓟꓳ ꓓꓴ ꓬꓰ ꓡꓯ=          

Add new comment

7 + 6 =