ꓣ-ꓫ ꓗꓴꓷꓼ ꓗꓪ ꓟ ꓙꓵ ꓠꓲꓹ ( Q & A)

ꓣ-ꓫꓸ ꓗꓴꓷꓼ ꓗꓪ ꓟ ꓙꓵ ꓠꓲꓹ ꓔꓯ ꓛꓳꓽ ꓠꓬꓲ ꓠꓬ ꓣ-ꓫꓸ ꓳ-ꓔꓳ-ꓓꓳꓫ ꓘꓴ ꓜꓲꓼ ꓞꓳ ꓠꓬ ꓣ-ꓫꓸ ꓗꓴꓷꓼ ꓕꓲꓽ ꓘꓴꓷꓼ ꓡꓱꓸꓼ ꓵ ꓣꓳ 100 ꓣꓳ ꓗꓪ ꓚꓳ 41% ꓣꓳ ꓝꓴꓸ ꓠꓬ ꓣ-ꓫ ꓳ-ꓔꓳ-ꓓꓳꓫ ꓥ ꓐꓶ= ꓝꓮꓲ 100 ꓣꓳ ꓗꓪ ꓚꓳꓸ 25% ꓣꓳ ꓝꓴꓸ ꓠꓬ ꓙꓵ ꓠꓲꓹ ꓔꓯ ꓙꓵ ꓔꓬ ꓢꓴ ꓡꓰ ꓐꓯ ꓢꓲ ꓮꓸ ꓫꓵꓽ ꓙꓵ ꓠꓲꓹ ꓔꓯ ꓙꓵ ꓔꓬ ꓟ ꓟꓽ ꓢꓷ ꓔ ꓢꓴ ꓥˍ ꓡꓳ= ꓟꓽ ꓦ ꓡꓱ ꓠꓬ 100 ꓣꓳ ꓗꓪ ꓚꓳꓸ 13% ꓝꓴꓸ ꓠꓬ ꓟꓽ ꓥ ꓡꓱ ꓢꓴ ꓥ ꓐꓶ= ꓾-ꓢ-ꓡꓮꓟ ꓙꓵ ꓠꓲꓹ ꓔꓯ ꓙꓵ ꓔꓬ ꓢꓴ ꓟꓴ-ꓢ-ꓡꓲꓟ ꓠꓬ 100 ꓣꓳ ꓗꓪ ꓚꓳ 6ꓸ5% ꓣꓳ ꓛꓲ ꓥ ꓐꓶ= ꓠꓱꓸ ꓐꓯꓼ ꓙꓲ-ꓢꓴ ꓢꓲ ꓤꓼ ꓐꓴ ꓠꓬ 100 ꓣꓳ ꓗꓪ ꓚꓳꓸ 6% ꓛꓲ ꓕꓱ ꓡꓰ ꓔꓬꓹ ꓟ ꓥ ꓐꓶ= ꓐꓴꓓ-ꓓ ꓙꓵ ꓠꓲꓹ ꓔꓯ ꓙꓵ ꓔꓬ ꓢꓴ ꓐꓴ ꓠꓬ 100 ꓣꓳ ꓗꓪ ꓚꓳ 0ꓸ5% ꓣꓳ ꓝꓴꓹ ꓡꓰ ꓔꓬ ꓐꓶ= ꓤꓲ ꓞꓹ ꓢꓴ ꓐꓴ ꓠꓬ ꓠꓱꓸ ꓐꓯꓼ ꓙꓵ ꓠꓲꓹ ꓔꓯ ꓙꓵ ꓔꓬ ꓢꓴ ꓐꓴ ꓥˍ ꓡꓳ= 

ꓙꓲ-ꓢꓴ ꓢꓲꓺ ꓤꓼ ꓮꓽ ꓙꓵꓽ ꓠꓬ 67 ꓪ ꓗ ꓔꓯ ꓔꓬ ꓟ ꓥ ꓐꓶ= ꓖꓳ ꓟ ꓠꓯꓸꓼ ꓗꓪ ꓣ-ꓫ ꓳ-ꓔꓳ-ꓓꓳꓫ ꓠꓬ 58 ꓪ ꓗ ꓔꓯꓹ ꓔꓬ ꓐꓶ= ꓠꓱꓸ ꓐꓯꓼ ꓳ-ꓔꓳ-ꓓꓳꓫ ꓠꓬ 2 ꓪ ꓛꓲ ꓕꓱ ꓡꓰ ꓔꓬ ꓟ ꓥ ꓐꓶ= ꓜꓲ ꓡꓰꓹ ꓟ ꓠꓬ ꓠꓱꓸ ꓐꓯꓼ ꓙꓲ-ꓢꓴ ꓢꓲ ꓤꓼ ꓐꓴ ꓥ ꓐꓶ= ꓣ-ꓫ ꓗꓪ ꓠꓬ ꓣ-ꓫ ꓳ-ꓔꓳ-ꓓꓳꓫ ꓘꓴ ꓜꓲꓼ ꓞꓳ ꓗꓪ ꓡꓰ ꓢꓲ ꓙꓲ-ꓢꓴ ꓢꓲꓺ ꓤꓼ ꓐꓴ ꓔꓬ ꓠꓹ ꓟ ꓓꓵ ꓠꓹ ꓟ ꓙꓵꓽ ꓢꓴ ꓢꓲꓽ ꓒꓽ ꓐꓴ ꓠꓬ ꓠꓲꓹ ꓫꓵˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓠꓱꓸ ꓐꓯꓼ ꓙꓲ-ꓢꓴ ꓢꓲꓺ ꓤꓼ ꓐꓴ ꓔꓯ ꓠꓬ ꓗꓽ ꓔꓸ ꓟ ꓮꓽ ꓟꓬ ꓙꓳˍ ꓡꓳ=

ꓔꓯ ꓥꓳ ꓕꓲꓽ ꓟ ꓐꓯ ꓠꓬ ꓗ-ꓕꓳ-ꓡꓲꓼ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓣ-ꓫ ꓞꓳ ꓫꓵꓽ ꓐꓴ ꓟꓽ ꓓꓵꓽ ꓡꓰ ꓠꓹ ꓟ ꓗꓴꓷꓼ ꓙꓵꓽ ꓢꓴ ꓐꓴ ꓠꓬ ꓢꓯꓼ ꓕꓵꓼˍ ꓡꓳ= ꓗ-ꓕꓳ-ꓡꓲꓼ ꓟꓬ ꓠꓬꓲ ꓠꓬ ꓣ-ꓫ ꓞꓳ ꓫꓵꓽ ꓟꓽ ꓥ ꓥ ꓠꓱꓸ ꓐꓯꓽ ꓞꓳ ꓫꓵꓽ ꓐꓴ ꓥˍ ꓡꓳ ꓐꓰ ꓕꓱ ꓡꓰ ꓢꓷꓸ ꓪˍ ꓡꓳ= ꓖꓳ ꓡꓲ ꓢꓲ ꓠꓱꓸ ꓐꓯꓼ ꓗꓴꓷꓼ ꓗꓪ ꓚꓳ ꓡꓹ ꓟ ꓔꓲꓺ ꓒꓽ ꓐꓴ꓾ ꓘꓴ ꓜꓲꓼ ꓞꓳ ꓗꓪ ꓪꓴꓸ ꓓꓵ ꓣꓱꓽ ꓢꓴ ꓐꓴ ꓔꓯ ꓦꓲ-ꓜ (ꓦꓲꓢꓮ) ꓟꓽ ꓖꓶꓹ ꓟ ꓕꓱ ꓡꓱ ꓬꓰ ꓢꓲ ꓣ-ꓫ ꓘꓴꓽ ꓗꓪ ꓓꓵꓽ ꓟꓽ ꓠ ꓠ ꓕꓱ ꓡꓰ ꓬꓰꓹ ꓟ ꓥˍ ꓟꓲ ꓙꓳˍ ꓡꓳ=

Add new comment

4 + 7 =