ꓤ ꓠꓱ ꓤ (1600) ꓣꓳ ꓔꓯ ꓚꓬꓴ ꓙ ꓗꓷ ꓢꓴ ꓘꓴ ꓜꓲꓼ ꓞꓳ ꓟ. ꓒꓽ ꓕꓲ ꓣꓳ ꓚꓱ, (He saved (1600) babies)

#creditphoto #Pastor lee saved 1600 babies #credit to owner #lisu #rva

ꓤ ꓠꓱ ꓤ (1600) ꓣꓳ ꓔꓯ ꓚꓬꓴ ꓙ ꓗꓷ ꓢꓴ ꓘꓴ ꓜꓲꓼ ꓞꓳ ꓟ. ꓒꓽ ꓕꓲ ꓣꓳ ꓚꓱ, (He saved (1600) babies)

ꓠꓬꓲ. ꓠꓬꓲ ꓠꓬ ꓟꓬꓱꓺ ꓓꓳꓽ ꓙꓳˍ ꓢꓴ ꓐꓴ ꓚꓺ ꓟꓲꓽ ꓗꓪ ꓐꓰ ꓤ ꓠꓱ ꓤ (1600) ꓣꓳ ꓔꓯ ꓚꓬꓴ ꓙ ꓗꓷ ꓢꓴ ꓪꓴ‐ꓢ ꓟꓬꓱꓽ ꓟꓯ ꓢꓴ ꓟ. ꓒ ꓕꓲ ꓣꓳ ꓚꓱ,ꓔꓯ ꓚꓺ ꓟ. ꓖꓶ ꓓꓴ ꓥꓳ꓿ ꓖꓴ ꓪꓴ. ꓗꓳꓣꓰꓮꓠ ꓗꓴꓷꓼ ꓗꓪ ꓪꓴ‐ꓢ ꓟꓬꓱꓽ ꓟꓯ ꓢꓴ ꓟ. ꓒꓽ ꓣꓳ ꓠꓬ ꓤ ꓠꓱ ꓤ (1600) ꓣꓳ ꓢꓯꓼ ꓟꓬ, ꓔꓯ ꓫꓵꓻ ꓘꓶꓽ ꓗꓪ ꓐꓰ ꓚꓬꓴ ꓙ ꓗꓷ ꓢꓴ ꓔꓬ ꓟ ꓥ ꓡꓳ꓿ ꓬꓲ ꓟꓬꓱꓺ ꓠꓬ ꓟ. ꓒꓽ ꓡꓰꓰ ꓟꓬꓱꓺ ꓔ ꓢꓴ ꓥ ꓡꓳ꓿ ꓬꓲ ꓠꓬꓲ ꓤ ꓠꓱ ꓤ ꓐꓴ ꓔꓯ ꓚꓬꓴ ꓠ, ꓟ ꓗꓽ ꓤ ꓤ ꓫꓬ, ꓢꓲ ꓠꓬꓲ ꓛ ꓖꓶ ꓠ, ꓟ ꓔꓶ. ꓫꓬ ꓔ ꓟ ꓥ ꓡꓳ꓿ ꓕꓱ ꓡꓱ ꓤ ꓠꓱ ꓤ ꓐꓴ ꓔꓯ ꓚꓬꓴ ꓙ ꓗꓷ ꓟ ꓠꓬ (1000) ꓣꓳ ꓔꓯ ꓢꓲ ꓙꓳˍ ꓡꓰ ꓟ ꓥ ꓡꓳ꓿ ꓬꓲ ꓠꓬ ꓮ ꓫꓵꓽ ꓬꓰ ꓔꓬ ꓡ? ꓗꓽ ꓤ ꓤ ꓐꓴ ꓠꓬ ꓮ ꓫꓵꓽ ꓥ ꓶ? ꓐꓯ ꓟ ꓔꓯ ꓟ ꓔꓯ ꓡꓳ. ꓠꓬꓲ ꓓꓴ ꓬꓰ ꓡꓯ꓿

ꓖꓴ ꓪꓴ. ꓗꓳꓣꓰꓮ ꓗꓴꓷꓼ ꓦꓲꓻ ꓤ ꓤ ꓕꓲ ꓦꓲꓻ ꓗꓪ ꓪꓴ‐ꓢ ꓟꓬꓱꓽ ꓟꓯ ꓔꓬ ꓟ ꓟ. ꓒ ꓡꓰꓰ ꓔꓯ ꓡꓳ. ꓟꓳ ꓡꓰꓳ꓿ ꓬꓲ ꓟꓬꓱꓺ ꓠꓬ ꓟ. ꓒꓽ ꓡꓰꓰ ꓥ ꓡꓳ꓿ ꓬꓲ ꓪ ꓕꓲ ꓦꓲꓻ ꓗꓪ ꓐꓰ ꓞꓳ ꓫꓵꓼ ꓤ ꓠꓱ ꓤ (1600) ꓣꓳ ꓔꓯ ꓚꓬꓴ ꓙ ꓗꓷ ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿ ꓗꓳ. ꓗꓷ ꓟ (30) ꓘꓳꓼ ꓗꓪ ꓟ. ꓒꓽ ꓡꓰ ꓗꓪ ꓬꓲ ꓤ ꓠꓱ ꓔꓬ ꓟ ꓥ ꓡꓳ꓿ ꓬꓲ ꓤ ꓠꓱ ꓠꓬ ꓠꓻ ꓫꓵꓽ ꓙꓳˍ ꓟ ꓟꓽ ꓐꓲ ꓞꓲꓼ ꓟ ꓤ ꓠꓱ ꓤ ꓥ ꓡꓳ꓿ꓖꓳ ꓡꓱ ꓥ ꓟ ꓪꓴ. ꓠꓬꓲ ꓟ. ꓒ ꓡꓰꓰ ꓠꓬ ꓠꓯꓼ ꓞꓲꓼ ꓦꓲꓻ ꓗꓪ ꓬꓲ ꓙꓵ, ꓟꓶ ꓫꓵˍ ꓫꓵˍ ꓔꓬ ꓗꓷ ꓟ ꓥ ꓡꓳ꓿ ꓕꓱ ꓗꓪ ꓬꓲ ꓔꓯ ꓓꓴ ꓙ ꓟꓶ ꓓꓴ ꓙ ꓟꓶ ꓓꓴ ꓙꓳˍ ꓟ ꓥ ꓡꓳ꓿ ꓞꓳ ꓫꓵꓼ ꓤ ꓤ ꓠꓱ ꓤ ꓮ ꓟꓬ, ꓠꓬ ꓠꓱ. ꓐꓯꓼ ꓢꓴ ꓔꓯ ꓦꓵꓻ ꓤ ꓠ, ꓟ ꓖꓶ ꓜ ꓗꓷ ꓟ ꓔꓯ ꓡꓳ. ꓟꓳ ꓠꓬ ꓮ ꓘꓶ. ꓛꓲ ꓓꓴ ꓙ ꓟꓶ ꓡꓰꓳ꓿ ꓝꓮꓲ ꓕꓲ ꓧꓪ ꓧꓪ ꓠꓬ ꓞꓳ ꓫꓵꓼ ꓤ ꓤ ꓠꓱ ꓤ ꓐꓴ ꓔꓯ ꓡꓳ ꓗꓷ ꓟ ꓔꓯ ꓡꓳ. ꓟꓳ ꓟ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓐꓯ ꓠꓬ ꓟ, ꓟ ꓐꓴ ꓠꓬ ꓕꓲ ꓣꓳ ꓔꓵꓼ ꓢꓯ. ꓔꓬ ꓠ, ꓟ ꓮ ꓘꓶ. ꓫ. ꓔ ꓟ ꓡꓰ ꓟꓽ ꓞꓲ ꓬꓲ ꓪ ꓔꓬ ꓟ ꓜꓴꓻ ꓗꓪ ꓡ ꓞ ꓐꓴ ꓔꓯ ꓮ ꓘꓶ. ꓛꓲ ꓙꓳꓺ ꓟ ꓪꓴ. ꓠꓬꓲ ꓥ ꓡꓳ꓿

ꓤ ꓠꓱ ꓤ  ꓕꓲ ꓐꓱ ꓠꓬ ꓞꓲ ꓣꓳ ꓟ ꓡꓯ. ꓤ ꓟꓶ ꓡꓯ ꓐꓴ ꓗꓪ ꓐꓰ ꓤ ꓠꓱ ꓙꓳˍ ꓡꓰ ꓝꓮꓲ ꓕꓲ ꓐꓱ ꓔꓯ ꓠꓬ ꓢꓴ ꓡꓰ ꓟꓽ ꓙꓳ ꓟ ꓟꓬꓱꓽ ꓗꓷ ꓟ ꓪꓴ. ꓠꓬꓲ ꓤ ꓠꓱ ꓤ ꓙꓳˍ ꓟ ꓥ ꓡꓳ꓿ ꓗꓳꓣꓰꓮ ꓗꓴꓷꓼ ꓗꓪ ꓠꓬ ꓟꓶ ꓚꓵꓽ ꓟ ꓐꓴ ꓐꓱ ꓶ ꓮ ꓘꓶ. ꓛꓲ  ꓔꓬ ꓫ. ꓟ ꓥ ꓡꓳ꓿ ꓕꓱ ꓡꓱ ꓐꓰ ꓗꓴꓷꓼ ꓘꓴꓽ ꓗꓪ ꓙꓵꓽ ꓗꓽ ꓡꓰ ꓬꓰ ꓙ ꓔ ꓙ ꓠꓬ ꓢꓲꓠꓖꓡꓰ ꓟꓳꓟ ꓐꓴ ꓬꓲ ꓪ ꓤ ꓠꓱ ꓤ ꓐꓴ ꓔꓯ ꓟꓬꓱꓽ ꓓꓳꓽ ꓙꓳˍ ꓙꓳ ꓦꓵꓻ ꓪꓴꓽ ꓡ ꓓꓴ ꓥꓳ꓿ ꓮ ꓟꓶ ꓟ ꓙꓵ, ꓗꓪ ꓠꓬ ꓬꓲ ꓪ ꓐꓱ ꓶ ꓬꓰ ꓙ ꓔ ꓙ ꓟ ꓗꓴꓷꓼ ꓙꓵꓽ ꓗꓽ ꓐꓰ ꓡꓲ ꓒꓰꓼ ꓗꓪ ꓟꓽ ꓙꓳ ꓢꓲ ꓐꓰ ꓟ. ꓒ ꓡꓰꓰ ꓡꓰ ꓐꓯ ꓔ ꓡꓳ꓿

ꓖꓳ ꓡꓱ ꓥ ꓟ ꓪꓴ. ꓠꓬꓲ ꓠꓬ ꓟ. ꓒ ꓡꓰꓰ ꓠꓬ ꓝꓴꓲ ꓟꓽ ꓙꓳ ꓟ ꓤ ꓠꓱ ꓤ ꓐꓴ ꓔꓯ ꓝꓮꓲ ꓫꓵꓻ ꓡꓰ ꓝꓲ ꓟꓽ ꓫꓵˍ ꓟ ꓪꓴ. ꓠꓬꓲ ꓚꓬꓴ ꓙ ꓟ ꓟꓬꓱꓽ ꓔꓯ ꓬꓰ ꓓꓵ ꓡꓰꓳ꓿ ꓕꓱ ꓟ ꓠꓬ ꓞꓳ ꓫꓵꓼ ꓤ ꓤ ꓠꓱ ꓤ ꓐꓴ ꓔꓯ ꓛ ꓖꓶ ꓠ, ꓟ ꓗꓽ ꓤ ꓤ ꓫꓬ ꓔ ꓟ ꓥ ꓡꓳ꓿ ꓟ. ꓒ ꓡꓰꓰ ꓪꓽ ꓘꓴ ꓦꓲꓻ ꓗꓪ ꓬꓲ ꓘꓴꓽ ꓤ ꓤ ꓫꓬ ꓔ ꓢꓲ ꓠꓬꓲ ꓞꓳ ꓫꓵꓼ ꓤ ꓐꓴ ꓔꓯ ꓕꓱ ꓗꓪ ꓛ ꓖꓶ ꓠ,ꓟ ꓬꓰ ꓔ ꓟ ꓥ ꓡꓳ꓿ꓕꓱ ꓗꓪ ꓤ ꓠꓱ ꓟ, ꓟ ꓐꓴ ꓠꓬ ꓡ ꓞꓳ ꓟꓽ ꓢꓷ, ꓠ ꓡ ꓢꓲ ꓠꓬꓲ ꓤ ꓠꓱ ꓤ ꓐꓴ ꓔꓯ ꓛ ꓡ ꓟ ꓥ ꓡꓳ꓿ ꓤ ꓠꓱ ꓤ ꓛ ꓡ ꓟ ꓙꓵ, ꓕꓯ ꓬꓲ ꓢꓯꓼ ꓟꓶ ꓡ ꓢꓲ ꓖꓳ ꓕꓲ ꓙꓵ, ꓗꓪ ꓟ. ꓒ ꓡꓰꓰ ꓠꓬ ꓡ ꓢꓲ ꓤ ꓠꓱ ꓤ ꓔꓯ ꓣꓴ ꓡ ꓟ ꓥ ꓡꓳ꓿

ꓖꓳ ꓗ. ꓠꓯ ꓬꓲ ꓠꓬ ꓕꓱ ꓤ ꓠꓱ ꓤ ꓔꓯ ꓮ ꓠꓬꓲ ꓠꓳ ꓠꓳ ꓖꓶ ꓓꓳ ꓢꓲ ꓠꓬꓲ ꓠꓻ ꓓꓴ ꓟꓽ ꓙꓳˍ ꓠ, ꓟ ꓬꓰ ꓖꓶ ꓟ ꓥ ꓡꓳ꓿ ꓖꓳ ꓗ. ꓠꓯ ꓬꓲ ꓪ ꓔꓯ ꓤ ꓚꓵꓽ ꓤ ꓐꓴ ꓔꓬ ꓟ ꓦꓲꓻ ꓗꓪ ꓔꓬ ꓝꓲ ꓟ ꓥ ꓡꓳ꓿ꓟ. ꓒ ꓡꓰꓰ ꓡꓰ ꓫ. ꓕꓱ ꓖꓶ ꓟ ꓠꓬ ꓢꓲꓠꓖꓡꓰ ꓟꓳꓟ ꓐꓴ ꓠꓲ, ꓟ ꓟꓽ ꓫ. ꓫ. ꓞꓳ ꓙꓳ ꓔꓬ ꓠ, ꓟ ꓐꓯ ꓔ ꓡꓳ꓿ꓠꓴ ꓪ ꓤ ꓠꓱ ꓤ ꓐꓴ ꓠꓬ ꓗ, ꓛꓲ ꓛꓲ ꓡꓰ ꓪꓴꓽ ꓡ ꓔꓬ ꓡꓳ ꓐꓰ ꓐꓯ ꓔ ꓡꓳ꓿ ꓝꓮꓲ ꓬꓲ ꓪ ꓜꓴꓻ ꓠꓬ ꓞꓳ ꓙꓲ ꓕꓲ ꓣꓳ ꓒꓬꓱꓼ ꓡ ꓓꓴ ꓥꓳ ꓐꓰ ꓐꓯ ꓔ ꓡꓳ꓿ ꓠꓴ ꓪ ꓠꓬ ꓬꓲ ꓪ ꓟ, ꓟ ꓐꓴ ꓥ ꓡꓳ ꓐꓰ ꓟ. ꓒ ꓡꓰꓰ ꓡꓰ ꓐꓯ ꓔ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓬꓲ ꓪ ꓐꓱ ꓶ ꓟꓽ ꓠꓽ ꓠꓽ ꓪꓽ ꓘꓴ ꓙ ꓖꓶ ꓐꓰ ꓐꓯ ꓔ ꓡꓳ꓿

ꓟ. ꓒ ꓡꓰꓰ ꓡꓰ ꓫ. ꓕꓱ ꓔ ꓟ ꓠꓬ ꓕꓱ ꓤ ꓠꓱ ꓤ ꓐꓴ ꓠꓬ ꓟꓽ ꓠꓻ ꓟꓽ ꓒꓬ ꓟꓽ ꓫꓵꓻ ꓡꓰ ꓠ, ꓟ ꓮ ꓘꓶ. ꓛꓲ ꓬ ꓟꓳ ꓖꓶ ꓟ ꓥ ꓡꓳ꓿ ꓝꓮꓲ ꓬꓲ ꓠꓬ ꓗꓴꓷꓼ ꓙꓵꓽ ꓢꓴ ꓢꓲꓽ ꓒ ꓐꓴ ꓔꓯ ꓜꓲꓼ ꓢꓲ ꓠꓬꓲ ꓬꓲ ꓪ ꓔꓯ ꓤ ꓠꓱ ꓤ ꓟ, ꓟ ꓐꓴ ꓔꓯ ꓢꓴ ꓔꓯ ꓤ ꓠꓱ ꓖꓶ ꓜ ꓗꓷ ꓠꓬ ꓝꓮꓲ ꓙ ꓖꓴ ꓙ ꓐ ꓗꓪ ꓤ ꓠꓱ ꓤ ꓡꓳ ꓔ ꓟ ꓠꓬ ꓡꓳ. ꓟꓳ ꓠꓬ ꓬꓲ ꓔꓬ ꓟ ꓦꓲꓻ ꓗꓪ ꓛ ꓖꓶ ꓡ ꓠ, ꓟ ꓓꓰꓽ ꓗꓷꓳ ꓐꓰ ꓐꓯ ꓔ ꓡꓳ꓿ ꓕꓱ ꓤ ꓠꓱ ꓤ ꓮ ꓙꓵꓽ ꓔꓯ ꓬꓲ ꓡꓰ ꓚꓬꓴ ꓙ ꓬꓰ ꓙ ꓖꓶ ꓜ ꓖꓶ ꓓꓴ ꓓꓴ ꓥꓳꓽ ꓐꓰ ꓐꓯ ꓔ ꓡꓳ꓿

ꓟ. ꓒ ꓡꓰꓰ ꓠꓬ ꓖꓳ ꓟꓶ ꓟ ꓤ ꓠꓱ ꓤ ꓐꓴ ꓔꓯ ꓡꓰ ꓚꓬꓴ ꓙ ꓗꓷ ꓟ ꓟꓽ ꓥ ꓬꓲ ꓪ ꓟ, ꓟ ꓐꓴ ꓔꓯ ꓥ  ꓟꓲ ꓐ ꓡ ꓟ ꓕꓲ ꓒꓳ, ꓗꓪ ꓐꓰ ꓬꓰ ꓙ ꓢꓲ ꓠꓬꓲ ꓒꓴ  ꓢꓲ ꓠꓬꓲ ꓬꓰ ꓙ ꓔꓳ ꓙ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓗ. ꓠꓯ ꓢꓲꓠꓖꓡꓰ ꓟ, ꓟ ꓟꓬꓱꓺ ꓔꓯ ꓘꓳ, ꓣꓴ ꓢꓲ ꓠꓬꓲ ꓬꓲ ꓪ ꓠꓬ ꓢꓴ ꓡꓰ ꓮ ꓡꓰ ꓫꓵꓽ ꓐꓯ ꓔꓬ ꓥ ꓟꓲ ꓚꓲ ꓛꓬ ꓔꓯ ꓘꓳ, ꓣꓴ ꓡꓰ ꓟ ꓥ ꓡꓳ꓿

ꓟ. ꓒ ꓡꓰꓰ ꓡꓰ ꓐꓯ ꓔ ꓟ ꓠꓬ ꓤ ꓠꓱ ꓤ ꓟ, ꓟ ꓐꓴ ꓮ ꓙꓵꓽ ꓠꓬ ꓬꓲ ꓪ ꓤ ꓠꓱ ꓐꓴ ꓔꓯ ꓚꓬꓴ ꓙ ꓦꓵꓻ ꓪꓴꓽ ꓡ ꓟꓽ ꓘꓴ ꓟ ꓪꓴ. ꓠꓬꓲ ꓠꓲ, ꓟ ꓟꓽ ꓢ ꓟ ꓚꓱ, ꓔꓯ ꓐꓯ ꓔꓬ ꓡꓳ ꓐꓰ ꓐꓯ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓬꓲ ꓪ ꓤ ꓠꓱ ꓤ ꓐꓴ ꓔꓯ ꓮ ꓘꓶ. ꓛꓲ ꓣꓱ ꓤ ꓢꓲ ꓠꓬꓲ ꓬꓰ ꓙ ꓔꓳ, ꓙ ꓠ, ꓟ ꓐꓯ ꓔ ꓡꓳ ꓟ. ꓒ  ꓡꓰꓰ ꓡꓰ ꓐꓯ ꓔ ꓡꓳ꓿  ꓕꓱ ꓡꓱ ꓐꓰ ꓟ. ꓒ ꓠꓬ (11) ꓘꓳꓼ ꓟꓽ ꓠꓽ ꓠꓽ ꓤ ꓠꓱ ꓤ ꓐꓴ ꓔꓯ ꓚꓬꓴ ꓟ ꓟꓬꓱꓽ ꓔꓯ ꓬꓰ ꓟ ꓗꓷ ꓟ ꓪꓴ. ꓠꓬꓲ (1594) ꓣꓳ ꓢꓯꓼ ꓟꓬ ꓔꓯ ꓚꓬꓴ ꓗꓷ ꓢꓴ ꓒꓬꓱꓼ ꓡ ꓟ ꓥ ꓡꓳ꓿ ꓖꓳ ꓡꓱ ꓟ ꓡꓰ ꓟꓽ ꓞꓲ (100) ꓣꓳ ꓟꓽ ꓞꓲ ꓤ ꓟꓶ ꓤ ꓐꓴ ꓮ ꓡꓰ ꓐꓰ ꓢꓯ. ꓔꓬ ꓠ, ꓟ ꓙꓲˍ ꓟ ꓙ ꓖꓴ ꓗꓪ ꓮ ꓡꓰ ꓐꓰ ꓞꓳ ꓫꓱ, ꓠ, ꓟ ꓚꓱ, ꓔꓯ  ꓟ. ꓖꓶ ꓗꓷꓳ꓿

ꓟ. ꓒ ꓡꓰꓰ ꓠꓬ ꓙꓲˍ ꓟ ꓟꓬꓱꓽ ꓔꓯ ꓮ ꓟꓬ, ꓬꓰ ꓔꓬ ꓥ ꓟꓲ ꓟꓲ ꓠꓯ ꓕꓯ ꓢꓲ ꓤ ꓟꓶ ꓤ ꓐꓴ ꓢꓲꓠꓖꓡꓰ ꓟ, ꓟ ꓐꓴ ꓐꓱ ꓶ ꓬꓰ ꓙ ꓔꓳ, ꓙ ꓠ, ꓟ ꓮ ꓘꓶ. ꓛꓲ ꓡꓳ. ꓟ ꓟꓳ ꓢꓰ꓿ ꓞꓳ ꓫꓵꓼ ꓤ ꓐꓴ ꓕꓯ ꓡꓳ. ꓗꓷ ꓟ ꓝꓮꓲ ꓢꓴ ꓔꓯ ꓖꓶ ꓗꓷ ꓟ ꓮ ꓟꓶ ꓟ ꓙꓵ, ꓗꓪ ꓥ ꓟꓲ ꓮ ꓟꓬ, ꓙꓳˍ ꓟ ꓥ ꓡꓳ꓿ ꓣꓳ ꓟꓲ ꓠꓯ ꓗꓪ ꓞꓳ ꓫꓵꓼ ꓤ ꓝꓴꓲ ꓟꓽ ꓙꓳ ꓟ ꓤ ꓠꓱ ꓤ ꓐꓴ ꓐꓱ ꓶ ꓔꓬ ꓗ, ꓛꓲ ꓟꓲ ꓠꓯ ꓒꓬꓱꓼ ꓡ ꓠ, ꓟ ꓒ ꓡ ꓕꓲ ꓒꓳ, ꓗꓪ ꓐꓰ ꓬꓰꓙ ꓓꓴ ꓬꓰ ꓡꓯ꓿ ꓤ ꓠꓱ ꓦꓵꓻ ꓢꓴ ꓟ, ꓟ ꓐꓴ ꓐꓱ ꓶ ꓙꓳꓺ ꓟꓽ ꓛꓲ ꓠ, ꓟ ꓐꓰ ꓞꓳ ꓫꓵꓼ ꓤ ꓤ ꓠꓱ ꓤ ꓐꓴ ꓔꓯ ꓡꓳ ꓗꓷ ꓟ ꓟꓽ ꓙꓳˍ ꓠ, ꓟ ꓕꓲ ꓟꓲ ꓠꓯ ꓡꓱ ꓡ ꓞꓳ ꓮ ꓙꓵꓽ ꓕꓯ ꓢꓲ ꓶꓻ ꓙꓳˍ ꓟ ꓥ ꓡꓳ꓿

ꓡꓲꓗꓰ ꓢꓧꓮꓣꓰ ꓚꓳꓟꓟꓰꓠꓔ ꓮ ꓟꓬ, ꓬꓰ ꓖꓶ ꓓꓴ ꓬꓰ ꓡꓯ꓿

 

 

 

Add new comment

8 + 12 =