ꓦ ꓢꓯꓼ ꓧꓳꓽ ꓖꓶˍ ꓟ (Q & A)

ꓦꓺ ꓢꓯꓼ ꓧꓳꓽ ꓖꓶˍ ꓟ ꓢꓲ-ꓫꓬ-ꓟ-ꓦ ꓐꓲ ꓡꓹ ꓟ ꓔꓯ ꓘꓶꓼ ꓫꓵꓼ ꓫꓵꓼ ꓗꓪ ꓡꓳ ꓟꓳ ꓪ ꓓˍ ꓡꓳ= ꓬꓳ-ꓦ ꓕꓳ ꓶ 14 ꓕꓱ ꓗꓪ ꓮ ꓡꓰ ꓐꓳ ꓔ ꓥˍ ꓡ ꓐꓯꓹ ꓠꓬ ꓢꓲ-ꓒꓽ ꓬꓰ-ꓢꓴ ꓡꓰ ꓢꓲ-ꓫꓬ-ꓟ-ꓦ ꓬꓯꓼ ꓡˍ ꓥꓳ꓾ ꓝꓲ ꓩꓴ ꓡˍ ꓥꓳ ꓐꓯꓹ ꓟ ꓔꓯ ꓐꓳ ꓔ ꓡꓳ (ꓬꓳ=ꓦ 14ꓽ 15- 26) = ꓢꓲ ꓒꓽ ꓬꓰ-ꓢꓴ ꓫꓵꓹ ꓟ ꓗꓪ ꓐꓰ ꓢꓯꓸ ꓬꓲꓼ ꓡ ꓕꓯꓽ ꓢꓲ ꓒꓽ ꓬꓰ-ꓢꓴ ꓠꓬ ꓝꓲ ꓓꓴ ꓐꓴ ꓕꓯꓽ ꓢꓲ ꓗꓪ ꓢꓲ-ꓫꓬ-ꓟ-ꓦ ꓢꓯꓼ ꓪꓽ ꓦ ꓢꓯꓼ ꓡꓴ ꓖꓶˍ ꓟ ꓬꓲ ꓡꓰ ꓢꓯꓼ ꓦ ꓡꓴꓽ ꓖꓶˍ ꓟ ꓚꓱꓹ ꓔꓯ ꓡꓳꓸ ꓟꓳ ꓪ ꓓꓹ ꓡꓳ= ꓬꓳ-ꓦ 20ꓽ 22 ꓗꓪ ꓬꓲ ꓬꓲ ꓪꓽ ꓔꓯ ꓢꓯꓼ ꓦ ꓧꓳꓽ ꓖꓶꓽ ꓢꓲ ꓢꓲ-ꓫꓬ-ꓟ-ꓦ ꓠꓴ ꓪꓽ ꓟꓶ ꓝꓲ ꓐꓰ ꓕꓱ ꓡꓰ ꓐꓯꓹ ꓟ ꓚꓱꓹ ꓔꓯ ꓟꓳꓸ ꓡꓳꓸ ꓟꓳ ꓪ ꓓˍ ꓡꓳ= ꓕꓱ ꓟ ꓠꓬ ꓢꓲ ꓒꓽ ꓬꓰꓢꓴ ꓡꓰ ꓢꓯꓼ ꓦ ꓖꓡꓹ ꓠꓬ ꓟꓵ ꓡꓴꓽ ꓖꓶꓹ ꓠꓬ ꓢꓲ-ꓫꓬ-ꓟ-ꓦ ꓐꓲ ꓡꓹ ꓟ ꓚꓱꓹ ꓥˍ ꓡꓳ= ꓖꓳ ꓡꓰ ꓢꓲ ꓠꓬꓲ ꓢꓲ ꓒꓽ ꓬꓰ-ꓢꓴ ꓫꓵˍ ꓟ ꓗꓪ ꓐꓰ ꓢꓯꓸ ꓬꓲ ꓡ ꓗꓸ ꓠꓯꓸ 50 ꓦꓬꓼ ꓡꓳ ꓡꓰ ꓠꓬ ꓢꓲ-ꓫꓬ-ꓟ-ꓦ ꓚꓵ ꓚꓵ ꓬꓯꓼ ꓡꓺ ꓳ=

ꓕꓱ ꓡꓰ ꓬꓯꓼ ꓡꓹ ꓟ ꓠꓬ Messianic Age ꓐꓯꓹ ꓟ ꓚꓬꓴ ꓢꓲ ꓒꓽ ꓬꓯꓼ ꓡꓹ ꓟ ꓙꓵꓹ ꓬꓲ ꓪꓴꓸ ꓔꓴˍ ꓟ ꓐꓰ ꓕꓱ ꓡꓰ ꓟꓶꓽ ꓠꓶꓹ ꓝꓸ ꓒꓽ ꓐꓴ ꓡꓰ ꓐꓯ ꓔ ꓟ ꓔꓯ (ꓬꓲ-ꓫꓵ-ꓚꓲ 36ꓽ 25- 27 ꓬꓳ- ꓶ 3ꓽ 1-2 ꓗꓪ ꓕꓱ ꓡꓰ ꓐꓯ ꓔ ꓐꓶ= ꓖꓳ ꓡꓰ ꓢꓲ-ꓫꓬ-ꓟ-ꓦ ꓬꓯꓼ ꓡꓹ ꓟ ꓦꓬꓼ ꓠꓬꓲ ꓗꓪ ꓝꓲ ꓓꓴ ꓒꓲ-ꓕꓱ ꓡꓰ ꓙꓰ-ꓣꓴ-ꓢ-ꓡꓱ ꓗꓪ ꓜꓲꓼ ꓛꓲ ꓡ ꓢꓴ ꓮ ꓙꓵꓽ ꓔꓯ ꓪꓴ-ꓢ ꓶꓽ ꓓꓳꓽ ꓫꓱꓸ ꓓꓳꓽ ꓚ ꓗꓷꓹ ꓠꓬ ꓮ’ ꓡꓰ ꓓꓴ ꓓꓺ ꓟ ꓗꓷ ꓡꓰꓳ= ꓪꓴ-ꓢ ꓮ’ ꓡꓰ ꓓꓴ ꓟꓬꓱꓽ ꓓꓽ ꓟ ꓔꓯ ꓬꓲ ꓪꓴꓸ ꓔꓴˍ ꓟ ꓥˍ ꓡꓳ ꓐꓰ ꓝꓲ-ꓓꓴ 2ꓽ 11- 17 ꓗꓪ ꓣꓳꓽ ꓡꓳꓸ ꓟꓳ ꓪ ꓓꓹ ꓡꓳ= ꓖꓳ ꓟ ꓓꓳ ꓡꓰ ꓠꓬ ꓝꓲ ꓓꓴ ꓐꓴ ꓠꓬ ꓠꓱꓸ ꓐꓯꓼ ꓢꓴ ꓔꓯ ꓡꓯꓽ ꓒꓯꓹ ꓚꓰꓹ ꓖꓶꓽ ꓢꓲ ꓢꓲ-ꓫꓬ-ꓟ-ꓦ ꓬꓯꓼ ꓡ ꓠꓹ ꓟ ꓦꓺ ꓢꓯꓼ ꓧꓳꓽ ꓖꓶˍ ꓟ ꓟꓬꓱꓽ ꓔꓯ ꓬꓰˍ ꓟ ꓚꓱꓹ ꓡꓳꓸ ꓟꓳ ꓪ ꓓˍ ꓡꓳ= ꓖꓳ ꓡꓰ ꓠꓬꓲ ꓡꓯꓽ ꓒꓯꓹ ꓚꓰ ꓖꓶˍ ꓟ ꓠꓬ ꓦꓺ ꓢꓯꓼ ꓧꓳꓽ ꓖꓶꓹ ꓟ ꓥˍ ꓡꓳ=

ꓖꓳ ꓡꓰ ꓗꓳ ꓓꓱꓽ ꓔꓲꓹ ꓓꓳ ꓢꓴ ꓔꓯ ꓖꓶꓹ ꓟ ꓚꓱꓹ ꓔꓯ ꓟꓳꓸ ꓢꓲ-ꓫꓬ ꓕꓳ ꓶ ꓗꓪ ꓡꓳꓸ ꓟꓳ ꓪ ꓓˍ ꓡꓳ= ꓝꓲ ꓓꓴ 8ꓽ 4-20ꓹ 19ꓽ 1-7 ꓦ-ꓐꓱ-ꓣꓴ 6ꓽ 1-6 ꓗꓪ ꓗꓳ ꓷꓱꓽ ꓔꓲꓹ ꓓꓳ ꓢꓴ ꓔꓯ ꓡꓯꓽ ꓒꓯꓹ ꓚꓰꓹ ꓖꓶˍ ꓟ ꓦꓺ ꓢꓯꓼ ꓧꓳꓽ ꓖꓶꓹ ꓟ ꓬꓰꓹ ꓟ ꓚꓱꓹ ꓔꓯ ꓡꓳꓸ ꓟꓳ ꓪ ꓓꓹ ꓡꓳ= ꓝꓲ ꓓꓳ 8ꓽ 14- 17 ꓗꓪ ꓛꓳꓽ ꓠꓬꓲ ꓠꓬ ꓗꓳ ꓓꓱꓽ ꓔꓲꓹ ꓖꓶ ꓢꓴꓹ ꓐꓰ ꓡꓯꓽ ꓒꓯꓹ ꓚꓰꓹ ꓖꓶ ꓢꓴ ꓟꓽ ꓪꓽ ꓡꓯꓽ ꓘꓳꓹ ꓟ ꓔꓯ ꓡꓳꓸ ꓟꓳ ꓪ ꓓꓹ ꓡꓳ= ꓕꓱ ꓕꓲꓽ ꓘꓴꓸ ꓗꓪ ꓟꓬꓱꓽ ꓙ ꓢꓴ ꓥꓹ ꓟ ꓒꓲ-ꓡꓲ ꓠꓬ ꓖꓳ ꓓꓱꓽ ꓔꓲꓹ ꓖꓶ ꓢꓴ ꓥ ꓢꓲ ꓗꓳ ꓓꓱꓽ ꓔꓲꓹ ꓔ ꓟ ꓔꓯ ꓑꓯꓹ ꓟꓶꓽ ꓢꓴ ꓮ ꓙꓵ ꓕꓯ ꓢꓲ ꓗꓪ ꓝꓲ ꓓꓴ ꓐꓴ ꓠꓬ ꓡꓯꓽ ꓒꓯꓹ ꓚꓰꓹ ꓖꓶˍ ꓟ ꓦꓺ ꓢꓯꓼ ꓧꓳꓽ ꓖꓶˍ ꓟ ꓚꓱꓹ ꓔꓯ ꓟꓳꓸ ꓡꓳꓸ ꓟꓳ ꓪ ꓓꓹ ꓡꓳ=