ꓪꓽ ꓘꓴˍ ꓟ

ꓣꓳꓽ ꓪꓽ ꓘꓴꓹ ꓕꓯ ꓟꓽ ꓑ ꓟꓽ ꓓꓹ ꓟ 4 ꓫꓵꓽ ꓙꓳꓹ ꓡꓳ= 1ꓸ ꓠꓬ ꓪꓴ-ꓢ ꓟꓬꓱ ꓓꓳꓽ ꓔꓯ ꓫꓱꓸ ꓖꓶˍ ꓟ꓾ ꓒꓵꓽ ꓗꓹ ꓬꓰˍ ꓟ꓾ ꓣꓳꓽ ꓪꓽ ꓘꓴꓹ ꓕꓯ ꓟꓴ ꓗꓪ ꓐꓰ ꓟꓲ ꓠꓯ ꓔꓯ ꓚꓰꓼ ꓢꓴ ꓐꓹ ꓐꓽ ꓪꓴ-ꓢ꓾ ꓟꓮ ꓫꓵꓹ ꓟꓲ ꓬꓰ ꓐ ꓡ ꓢꓴ ꓐꓹ ꓐꓽ ꓪꓴ-ꓢ ꓐꓰ ꓕꓱ ꓡꓰ ꓪꓴ-ꓢ ꓔꓯ ꓫꓱꓸ ꓖꓶˍ ꓟ ꓙꓳˍ ꓡꓳ= ꓪꓽ ꓘꓴꓹ ꓕꓯ ꓪꓴ-ꓢ ꓟꓬꓱ ꓓꓳꓽ ꓔꓯ ꓕꓱ ꓡꓰ ꓫꓱꓸ ꓖꓶꓽ ꓠ ꓗˍ ꓡꓳ= ꓖꓳ ꓟ ꓠꓬ ꓪꓴ-ꓢ ꓠꓬ ꓣꓳꓽ ꓔꓯ ꓖꓶꓽ ꓢꓴ ꓚꓰꓼ ꓢꓴ ꓢꓲ ꓒꓽ ꓚꓵ ꓚꓵ ꓥꓹ ꓟ꓾ ꓪꓴ-ꓢ ꓠꓬ ꓣꓳꓽ ꓔꓯ ꓔ ꓙ ꓐ ꓡꓹ ꓟ ꓕꓯ ꓢꓷꓸ ꓡꓰ ꓝꓲꓹ ꓟ ꓬꓲ ꓚꓱꓹ ꓥˍ ꓡꓳ= 2ꓸ ꓡꓳꓹ ꓙꓰ ꓟ ꓩꓴꓹ ꓗꓪ ꓪꓴ-ꓢ ꓡꓰ ꓬꓰ ꓙ ꓔ ꓙ ꓡꓹ ꓟ ꓔꓯ ꓫꓸ ꓟꓳꓻ ꓐꓰ ꓐꓯ ꓠ ꓗꓹ ꓡꓳ= ꓪꓴ-ꓢ ꓠꓬ ꓣꓳꓽ ꓔꓯ ꓣꓱꓽ ꓬꓯꓹ ꓟ ꓥ ꓕꓯ ꓑꓳꓸ ꓖꓶꓽ ꓢꓴ ꓢꓲ ꓒꓽ ꓥˍ ꓡꓳ= ꓖꓳ ꓡꓱ ꓠꓬꓲ ꓪꓴ-ꓢ ꓖꓶ ꓡꓹ ꓟ ꓔꓯ ꓣꓳꓽ ꓫꓸ ꓟꓳ ꓐꓯꓹ ꓟ ꓠꓬ ꓪꓴ-ꓢ ꓟꓲꓽ ꓙꓬꓽ ꓗꓪ ꓞꓳ ꓤꓽ ꓟꓲꓽ ꓙꓬꓽ ꓗꓪ ꓕꓱ ꓟ ꓠꓬ ꓫꓸ ꓟꓳ ꓐꓯ ꓗꓴꓸ ꓔ ꓟ ꓐꓯꓹ ꓟ ꓙꓲꓹ ꓟ ꓞꓳ ꓤꓽ ꓥˍ ꓟ ꓔꓯ ꓢꓷꓸ ꓡꓰ ꓝꓲꓹ ꓟ ꓥˍ ꓟꓲ ꓥˍ ꓡꓳ= 3ꓸ ꓛꓬ ꓗꓷꓹ ꓟ ꓝꓴꓲꓸ ꓔꓯ ꓪꓴ-ꓢ ꓠꓯꓹ ꓗꓪ ꓣꓷꓠ ꓠ ꓗꓹ ꓡꓳ= ꓣꓳꓽ ꓟꓲ ꓠꓯ ꓞꓳ ꓤꓽ ꓥˍ ꓟ ꓪꓴꓸ ꓠꓬꓲ ꓛꓬ ꓗꓷ ꓥꓳꓽ ꓗꓷ ꓟ ꓙꓳˍ ꓡꓳ= ꓣꓳꓽ ꓛꓬ ꓗꓷ ꓥꓳꓽ ꓗꓷ ꓟ ꓝꓴꓲꓸ ꓥ ꓕ ꓑꓳꓸ ꓔꓯ ꓪꓴ-ꓢ ꓡꓰ ꓣꓷꓠ ꓖꓶ ꓡ ꓠꓹ ꓟ ꓪꓴ-ꓢ ꓡꓰ ꓞ꓾ꓽ ꓫꓬ ꓖꓶ ꓡ ꓠꓹ ꓟ ꓬꓲ ꓔꓯ ꓣꓳꓽ ꓝꓴꓲꓸ ꓣꓷꓠ ꓠꓹ ꓗˍ ꓡꓳ= 4ꓸ ꓤꓳꓽ ꓣꓱꓽ ꓬꓯꓼ ꓟ ꓔꓯ ꓶꓽ ꓓꓰꓹ ꓟ꓾ ꓣꓳꓽ ꓪꓽ ꓘꓴ ꓕꓯ ꓟꓽ ꓙꓳ ꓟꓽ ꓓꓹ ꓟ ꓕꓲꓽ ꓫꓵꓽ ꓠꓬ ꓣꓳꓽ ꓠꓯꓸꓼ ꓗꓪ ꓣꓱꓽ ꓬꓯꓹ ꓟ ꓔꓯ ꓪꓴ-ꓢ ꓔꓯ ꓐꓯ ꓟꓸ ꓖꓶˍ ꓟ ꓓꓰꓹ ꓟ ꓚꓱꓹ ꓥˍ ꓡꓳ= ꓖꓳ ꓡꓱ ꓠꓬꓲ ꓣꓳꓽ ꓕꓲ ꓧꓪꓹ ꓘꓴꓹ ꓕꓯ ꓕꓱ ꓟ 4 ꓫꓵꓽ ꓐ ꓠ ꓘꓴꓹ ꓟ ꓠꓬ ꓟꓽ ꓓ ꓙꓲ ꓖꓴ ꓓꓲ ꓡꓰꓹ ꓟ ꓪꓽ ꓘꓴˍ ꓟ ꓥˍ ꓡꓳ=

ꓢꓲ ꓒꓽ ꓬꓰ ꓢꓴ ꓡꓰ ꓣꓳ ꓕꓯ ꓟꓽ ꓓ ꓙꓲ ꓖꓴ ꓡꓰꓹ ꓟ ꓪꓽ ꓘꓴ ꓘꓶꓽ ꓟꓸ ꓖꓶꓽ ꓡꓹ ꓟ ꓙꓳˍ ꓡꓳ= ꓡꓴ-ꓘ 11ꓽ 2- 4ꓹ ꓟ-ꓕꓲ 6ꓽ 9- 13 ꓗꓪ ꓢꓲ ꓒꓽ ꓬꓰ ꓢꓴ ꓡꓰ ꓝꓲ ꓓꓴ ꓐꓴ ꓔꓯ ꓪꓽ ꓘꓴ ꓘꓶꓽ ꓟꓸ ꓖꓶꓽ ꓡꓹ ꓟ ꓚꓱꓹ ꓡꓳꓸ ꓟꓳ ꓪ ꓓˍ ꓡꓳ= ꓖꓳ ꓡꓰ ꓥˍ ꓟꓲ ꓠꓬꓲꓸ ꓠꓬꓲ ꓙꓰ-ꓢꓴ ꓢꓲ ꓤꓼ ꓐꓴ ꓟꓬ ꓠꓬꓲ ꓠꓬ ꓟ-ꓕꓲ 6ꓽ 9- 13 ꓐꓳ ꓔ ꓟ ꓔꓯ ꓢꓲ ꓒꓽ ꓡꓰ ꓟꓸ ꓔ ꓟ ꓪꓽ ꓘꓴ ꓓꓴ ꓔꓯ ꓟꓬ ꓠꓬꓲ ꓪꓽ ꓘꓴ ꓔꓬꓹ ꓟ ꓣꓱꓽ ꓔꓬꓹ ꓟ ꓥˍ ꓡꓳ= ꓢꓲ ꓒꓽ ꓡꓰ ꓟꓸ ꓔ ꓟ ꓪꓽ ꓘꓴ ꓓꓴ ꓔꓯ ꓣꓳꓽ ꓠ ꓠꓹ ꓓꓴ ꓬꓰ ꓡꓯ= ꓕꓱ ꓟ ꓠꓬ ꓐꓯ ꓡꓳꓹ ꓬꓰꓹ ꓟ ꓡꓰ ꓐꓰ ꓕꓲ ꓡꓰ ꓪꓽ ꓘꓴ ꓙꓵꓹ ꓕꓲꓽ ꓟ ꓗꓪ ꓟ ꓓꓹ ꓬꓳꓸ ꓚꓵꓹ ꓟ 4 ꓟ ꓙꓳ ꓠꓬꓲ ꓔ ꓟ ꓐꓲ ꓜꓲꓼ ꓟ ꓪꓽ ꓘꓴ ꓓꓴ ꓕꓲꓽ ꓟ ꓥˍ ꓡꓳ= ꓐꓳ ꓔꓸ ꓟ ꓠꓬꓺ

ꓟꓴ ꓗꓪ ꓕꓯ: ꓗꓪ ꓔꓬꓹ ꓟ ꓥꓪ ꓠꓴꓽ ꓐꓹ ꓐꓺꓳ ꓠꓴ ꓟꓬꓱꓺ ꓢꓲꓽ ꓫꓬ ꓟ ꓔꓯ ꓒꓵꓽ ꓔꓬ ꓝꓲ꓾ ꓠꓴ ꓗꓴꓷ ꓛꓲ ꓐ ꓡ ꓝꓲ꓾ ꓟꓴ ꓗꓪ ꓕꓯ ꓢꓲ ꓗꓪ ꓠꓴ ꓠꓲꓹ ꓡꓶꓽ ꓒꓬꓱꓼ ꓡꓹ ꓟ ꓡꓰ ꓐꓰ ꓟꓲ ꓠꓯ ꓗꓪ ꓥˍ ꓟꓲ ꓒꓬꓱꓼ ꓡ ꓝꓲ ꓡꓯ=

ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓥꓪ ꓠꓴꓽ ꓣꓱꓽ ꓬꓯꓹ ꓟ ꓜꓽ ꓓꓴ ꓠꓬꓲꓹ ꓠꓬꓲ ꓥꓪ ꓠꓴꓽ ꓔꓯ ꓖꓶꓽ ꓜꓽ ꓡꓯ꓾ ꓢꓴ ꓡꓰ ꓥꓪ ꓠꓴ ꓔꓯ ꓛꓬ ꓡꓹ ꓕꓯ꓾ ꓥꓪ ꓠꓴꓽ ꓖꓼ ꓖꓶꓹ ꓟ ꓡꓰ ꓐꓰ꓾ ꓥꓪ ꓠꓴꓽ ꓛꓬ ꓗꓷꓹ ꓟ ꓝꓴꓲꓸꓕꓮꓹ ꓟꓲ ꓖꓼ ꓡꓯ= ꓤꓹ ꓠꓬꓲꓹ ꓟ ꓗꓪ ꓥꓪ ꓠꓴ ꓔꓯ ꓕꓽ ꓧꓳꓽ ꓓꓵꓽ ꓙꓰ ꓝꓲ= ꓥꓶꓹ ꓟ ꓗꓪ ꓐꓰ ꓠꓽ ꓥꓪ ꓠꓴ ꓔꓯ ꓚꓬꓴ ꓓꓳ ꓖꓶꓹ ꓡꓯ=