ꓪꓽ ꓫꓱ ꓡꓰ ꓥꓳꓽ ꓮ ꓟꓬ, ꓢꓷ. ꓢꓴ Charlie Chaplin ꓚꓺ ꓟꓲꓽ (Charlie Chaplin)

ꓪꓽ ꓫꓱ ꓡꓰ ꓥꓳꓽ ꓮ ꓟꓬ, ꓢꓷ. ꓢꓴ Charlie Chaplin ꓚꓺ ꓟꓲꓽ (Charlie Chaplin)

ꓬꓲ ꓠꓬ ꓪꓽ ꓫꓱ ꓓꓴ ꓡꓰ ꓥꓳꓽ ꓧꓶꓻ ꓚꓱ, ꓓꓴ ꓮ ꓟꓬ, ꓓꓻ ꓢꓴ ꓕꓲ ꓣꓳ ꓥ ꓢꓲ ꓠꓬꓲ ꓠꓬ ꓢꓯ. ꓐꓬꓱ ꓓꓱ ꓢꓴ ꓐꓰ ꓢꓯ. ꓐꓬꓱ ꓓꓱ ꓙꓳ ꓓꓴ ꓕꓳꓽ ꓶ ꓐꓳ ꓢꓴ ꓕꓲ ꓣꓳ ꓟꓲ ꓥ ꓡꓳ꓿ Charlie Chaplin ꓔꓯ Walworth, London ꓗꓪ 1889 4 ꓦ ꓟ 16 ꓠꓬꓲ ꓒꓬꓱ ꓟꓳ ꓗꓷ ꓟ ꓥ ꓡꓳ꓿

ꓬꓲ ꓐ, ꓐ ꓟꓬꓱꓺ ꓠꓬ Charles Chaplin ꓥ ꓢꓲ ꓠꓬꓲ ꓬꓲ ꓟ, ꓟ ꓟꓬꓱꓺ ꓠꓬ Hannah Chaplin ꓥ ꓡꓳ꓿ ꓬꓲ ꓐ, ꓐ ꓠꓬ ꓟꓴ ꓖꓪ ꓖꓪꓽ ꓒꓽ ꓕꓲ ꓣꓳ ꓥ ꓢꓲ ꓬꓲ ꓟ, ꓟ ꓠꓬ ꓢꓯꓼ ꓐꓬꓱ ꓓꓱ ꓔꓲ ꓗꓪ ꓐ ꓢꓴ ꓕꓲ ꓣꓳ ꓥ ꓡꓳ꓿

ꓬꓲ ꓞꓲꓼ ꓪꓴꓽ ꓡ ꓟ ꓙꓵ, ꓕꓯ ꓬꓲ ꓪ ꓕꓲ ꓦꓲꓻ ꓠꓯ, ꓗꓪ ꓒꓴ ꓫꓵˍ ꓮ ꓟꓬ, ꓟꓽ ꓙꓳ ꓟ ꓔꓯ ꓔꓳ, ꓜꓳ ꓗꓷꓳ꓿ ꓬꓲ ꓐ, ꓐ ꓢꓲ ꓟ, ꓟ ꓠꓬ ꓟꓬꓱꓽ ꓬꓰ ꓥ ꓟꓲ ꓒꓴ ꓫꓵˍ ꓮ ꓟꓬ, ꓟꓽ ꓪ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓬꓲ ꓠꓬ ꓬꓲ ꓞꓲꓼ (7) ꓘꓳꓼ ꓙꓳ ꓟ ꓙꓵ, ꓕꓯ ꓟꓬꓱꓽ ꓬꓰ ꓜꓽ ꓠ, ꓗꓷ ꓡꓰꓳ꓿

1898 ꓘꓳꓼ ꓕꓯ ꓬꓲ ꓟ, ꓟ ꓠꓬ ꓠꓻ ꓓꓴ ꓔꓳ, ꓜꓳ ꓡꓰ ꓢꓲ ꓠꓬꓲ ꓬꓲ, ꓐ, ꓐ ꓥ ꓟꓲ ꓙꓲ ꓑꓶ ꓓꓳꓻ ꓒꓽ ꓕꓲ ꓣꓳ ꓒꓬꓱꓼ ꓡꓰꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓬꓲ ꓠꓬ ꓬꓲ ꓪ ꓦꓲꓻ ꓗꓪ ꓐꓰ ꓓꓳ ꓡꓰ ꓪ꓿ ꓖꓳ ꓗ. ꓠꓯ ꓬꓲ ꓠꓬ ꓤ ꓑ ꓤ ꓛꓲ ꓡꓵ ꓡꓯꓼ ꓡꓵ ꓜꓴꓻ (Male dance troupe) ꓟꓬꓱꓺ ꓔ ꓟ ꓜꓴꓻ ꓗꓪ ꓓꓵ ꓪ ꓡꓰꓳ꓿ ꓕꓱ ꓜꓴꓻ ꓠꓬ 1899 ꓘꓳꓼ ꓐꓰ 1900 ꓘꓳꓼ ꓗꓪ ꓐꓲ‐ꓔꓲ ꓗꓴꓷꓼ ꓗꓪ ꓮ ꓘꓶ. ꓛꓲ ꓟꓬꓱꓺ ꓓꓳꓽ ꓙꓳ ꓢꓴ ꓐꓴ ꓒꓬꓱ ꓡ ꓪ꓿

1903 ꓘꓳꓼ ꓕꓯ ꓬꓲ ꓠꓬ (Jim) ꓟꓬꓱꓺ ꓔ ꓟ ꓢꓯ. ꓐꓬꓱ ꓔꓯ ꓓꓽ ꓪꓴ. ꓓꓱ ꓪ ꓡꓰꓳ꓿ 1903 ꓘꓳꓼ 10 ꓦ ꓗꓪ ꓐꓰ 1904 ꓘꓳꓼ ꓕꓯ ꓬꓲ ꓠꓬ ꓬꓲ ꓠꓬ ꓕꓲ ꓟꓵꓽ ꓡꓰ ꓕꓲ ꓟꓵꓽ ꓗꓪ  ꓬꓲ ꓮ ꓡꓰ ꓬꓰ ꓐ ꓡ ꓟ ꓔꓯ ꓟ. ꓖꓶ ꓟ ꓙꓵ, ꓕꓯ ꓬꓲ ꓠꓬ ꓮ ꓘꓶ. ꓛꓲ ꓟꓬꓱꓺ ꓓꓳꓽ ꓙꓳ ꓡ ꓟ ꓥ  ꓡꓳ꓿

1906 ꓘꓳꓼ ꓕꓯ ꓬꓲ ꓠꓬ Comedy Troupe ꓟꓬꓱꓺ ꓔ ꓟ ꓪꓽ ꓫꓱ ꓡꓰ ꓥꓳꓽ ꓮ ꓘꓶ. ꓓꓽ ꓢꓴ ꓧꓶꓻ ꓢꓴ ꓮ ꓘꓶ. ꓓꓽ ꓢꓴ ꓜꓴꓻ ꓗꓪ ꓬꓲ ꓥ ꓟꓲ ꓐ ꓪ ꓡꓰꓳ꓿ꓬꓲ ꓠꓬ ꓬꓲ ꓪ ꓛꓳꓽ ꓒꓯ ꓐꓴ ꓐꓰ ꓕꓲ ꓪ ꓪꓽ ꓫꓱ ꓓꓴ ꓔꓯ ꓮ ꓘꓶ. ꓛꓲ ꓟ. ꓖꓶ ꓗꓷꓳ꓿  1907 ꓘꓳꓼ 7 ꓦ ꓕꓯ ꓬꓲ ꓪ ꓕꓲ ꓜꓴꓻ ꓠꓬ ꓕꓲ ꓟꓵꓽ ꓡꓰ ꓕꓲ ꓟꓵꓽ ꓗꓪ ꓙꓰ ꓢꓲ ꓠꓬꓲ ꓪꓽ ꓫꓱ ꓓꓴ ꓥꓳꓽ ꓔꓯ ꓟ. ꓖꓶ ꓟ ꓓꓳ ꓡꓰ ꓠꓬ ꓬꓲ ꓠꓬ ꓟꓬꓱꓽ ꓬꓰ ꓟ ꓗꓪ ꓐꓰ ꓓꓳ ꓡꓰꓳ꓿ ꓖꓳ ꓗ. ꓠꓯ ꓬꓲ ꓠꓯ ꓦ‐ꓐ ꓠꓬꓲꓽ ꓢꓽ ꓟ Kennington ꓟꓬꓱꓺ ꓔ ꓟ ꓦꓲꓻ ꓗꓪ ꓔꓬ ꓗꓷꓳ꓿

1910 ꓘꓳꓼ ꓕꓯ ꓬꓲ ꓠꓬ (Jimmy the Fearless) ꓟꓬꓱꓽ ꓔ ꓟ ꓔꓯ ꓢꓯ. ꓐꓬꓱ ꓟ. ꓖꓶ ꓗꓷꓳ꓿ ꓕꓱ ꓟ ꓠꓬ ꓬꓲ ꓙꓵ, ꓔꓴ ꓔꓴ ꓤ ꓗꓪ ꓡ ꓞꓳ ꓮ ꓟꓬ, ꓢꓷ. ꓡꓰ ꓟ ꓥ ꓡꓳ꓿ 1913 ꓘꓳꓼ ꓕꓯ ꓬꓲ ꓠꓬ News York Motion Picture Company ꓐꓰ ꓕꓲ ꓘꓳꓼ ꓟꓬꓱꓽ ꓬꓰ ꓠ, ꓟ ꓪ ꓡꓯꓽ ꓘꓳ ꓡꓰꓳ꓿

ꓕꓱ ꓟꓬꓱꓽ ꓬꓰ ꓟ ꓗꓪ ꓕꓲ ꓫꓵꓽ ꓠꓽ ꓘꓴꓽ ꓗꓪ ꓴꓢꓮ ꓒꓴ (150) ꓒꓯ ꓖꓶ ꓠ, ꓟ ꓐꓯ ꓗꓷꓳ꓿ ꓬꓲ ꓠꓬ ꓢꓯ. ꓐꓬꓱꓽ ꓮ ꓟꓬ, ꓓꓱ ꓝꓮꓲ ꓢꓯ. ꓐꓬꓱ ꓮ ꓟꓬ, ꓔꓯ ꓬꓲ ꓡꓰ ꓓꓱ ꓪ ꓡꓰꓳ꓿ 1925 ꓘꓳꓼ ꓕꓯ ꓬꓲ ꓠꓬ Academy Award ꓔꓯ (The Gold Rush) ꓟꓬꓱꓺ ꓔ ꓟ ꓢꓯ. ꓐꓬꓱ ꓗꓪ ꓐꓰ ꓪ ꓡꓰꓳ꓿

(ꓔꓧꓰ ꓖꓳꓡꓓ ꓣꓴꓢꓧ) ꓢꓯ. ꓐꓬꓱ ꓠꓬ ꓟꓲ ꓠꓯ ꓗꓪ ꓠꓽ ꓐ ꓠꓬꓲꓽ ꓮ ꓘꓶ. ꓛꓲ ꓟꓬꓱꓽ ꓓꓳꓽ ꓙꓳ ꓟ ꓢꓯ. ꓐꓬꓱꓽ ꓕꓲ ꓟ ꓒꓬꓱꓼ ꓡ ꓪ꓿ 1928 ꓘꓳꓼ ꓕꓯ ꓬꓲ ꓡꓰ ꓓꓱ ꓔ ꓟ ꓢꓯ. ꓐꓬ (the circus) ꓔꓯ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓓꓱ ꓔ ꓠ, ꓙꓵꓽ ꓪ ꓖꓶ ꓗꓷꓳ꓿ ꓖꓳ ꓗꓷ. ꓠꓯ ꓬꓲ ꓠꓬ ꓫ. ꓪ ꓟꓽ ꓕꓱ ꓢꓯꓼ ꓐꓬꓱ ꓔꓯ ꓬꓲ ꓙꓵ, ꓕꓲ ꓙꓵ, ꓕꓯ ꓢꓲ ꓓꓱ ꓗꓷꓳ꓿

1936 ꓘꓳꓼ ꓕꓯ ꓬꓲ ꓢꓯ. ꓐꓬꓱ ꓥ ꓟꓲ (Modern times) ꓟꓬꓱꓺ ꓔ ꓟ ꓠꓬ ꓮ ꓘꓶ. ꓛꓲ ꓟꓬꓱꓽ ꓓꓳꓽ ꓙꓳ ꓡꓰ ꓟ ꓥ ꓡꓳ꓿ ꓕꓱ ꓢꓯ. ꓐꓬꓱ ꓠꓬ ꓴꓢꓮ ꓗꓴꓷꓼ ꓗꓪ ꓢꓯꓼ ꓐꓬꓱ ꓓꓱ ꓟ ꓗꓪ ꓮ ꓘꓶ. ꓛꓲ ꓟꓬꓱꓽ ꓓꓳꓽ ꓙꓳ ꓟ ꓐꓬꓱꓼ ꓡ ꓟ ꓥ ꓡꓳ꓿ ꓬꓲ ꓠꓬ ꓡꓲ ꓪ ꓡꓯ ꓒꓯꓽ ꓝ ꓗꓷ ꓢꓴ ꓐꓴ ꓥ ꓡꓳ꓿ 1943 ꓘꓳꓼ ꓕꓯ ꓬꓲ ꓠꓬ ꓬꓲ ꓦꓲꓻ ꓢꓲ ꓟ ꓥ ꓟꓲ ꓡꓲ ꓣꓳ Oona O’neill ꓡꓰ ꓡꓯ ꓒꓯꓽ ꓝ ꓟ ꓥ ꓡꓳ꓿ ꓕꓱ ꓤ ꓟꓶ ꓤ ꓐꓴ ꓤ ꓠꓱ (8) ꓣꓳ ꓪ ꓡꓰ ꓢꓲ ꓠꓬꓲ ꓫꓵꓻ ꓗꓪ ꓛꓲ ꓕꓲ ꓪ ꓢꓯ. ꓔꓬ ꓗꓷ ꓟ ꓥ ꓡꓳ꓿

 ꓬꓲ ꓢꓯ. ꓐꓬꓱ ꓥ ꓟ (A countess from Hong Kong) ꓟꓬꓱꓺ ꓔ ꓟ ꓔꓯ 1967 ꓘꓳꓼ ꓔꓯ ꓓꓱ ꓗꓷꓳ꓿ ꓬꓲ ꓠꓬ 1977 ꓘꓳꓼ 12 v m 25  ꓠꓬꓲ ꓕꓯ Switzerland ꓗꓴꓷꓼ ꓗꓪ ꓫꓵꓻ ꓡꓰ ꓟ ꓥ ꓡꓳ꓿ ꓖꓳ ꓕꓯ ꓬꓲ ꓞꓲꓼ (88) ꓘꓳꓼ ꓙꓳ ꓡꓰ ꓟ ꓥ ꓡꓳ꓿ ꓬꓲ ꓡꓰ ꓐꓯ ꓔ ꓟ ꓐꓯ ꓘꓶꓽ ꓠꓬ ꓞꓳ ꓡꓰ ꓟ ꓟꓬ ꓮ ꓟꓬ ꓛꓲ ꓟꓽ ꓣꓳ ꓚꓵ. ꓟ ꓥ ꓡꓳ꓿ ꓕꓱ ꓞꓳ ꓡꓰ ꓟ ꓔꓯ ꓢꓯꓼ ꓪ ꓣꓱ ꓢꓲ ꓠꓬꓲ ꓞꓳ ꓟꓯꓼ ꓕꓲ ꓣꓳ ꓡꓰ ꓟꓬꓱꓽ ꓬꓰ ꓐꓰ Charlie ꓡꓰ ꓐꓯ ꓔ ꓟ ꓥ ꓡꓳ꓿ ꓫ. ꓟꓳ ꓪ꓿