ꓬꓯ ꓒꓲꓸ ꓬꓯ ꓐꓰ ꓟꓶꓽ ꓘꓴꓽ

ꓠꓬꓲꓹ ꓠꓬꓲ ꓣꓳ ꓙꓲ-ꓢꓴ ꓢꓲ ꓤꓼ ꓐꓴꓹ ꓡꓰ ꓐꓰ ꓙꓵ ꓠꓲꓹ ꓮꓸ ꓔꓲꓸ ꓤ; ꓪꓽ ꓡꓯ ꓘꓳˍ ꓟ ꓠꓬ ꓲꓢꓡꓮꓟ ꓙꓵ ꓠꓲꓹ ꓐꓯˍ ꓟ ꓥˍ ꓡꓳ= ꓲꓢꓡꓮꓟ ꓙꓵ ꓠꓲꓹ ꓔꓯ ꓙꓵ ꓔꓬ ꓢꓴ ꓟꓴꓢꓡꓲꓟ ꓐꓴ ꓠꓬ ꓙꓵ ꓒꓶꓽ ꓐꓯˍ ꓟ ꓟ ꓓꓳ= ꓮꓡꓲꓳ ꓐꓯ ꓠꓬ ꓬꓲ ꓪꓽ ꓢꓲ-ꓫꓬ ꓕꓳꓽ ꓶ ꓗꓪ ꓙꓵ ꓒꓶꓽ ꓐꓯˍ ꓟ ꓠꓬ ꓪꓴ-ꓢ ꓠꓲꓹ ꓡꓶꓽ ꓔꓯ ꓟꓽ ꓜꓯꓼ ꓡꓰ ꓝꓲˍ ꓟ ꓥˍ ꓡꓳ ꓐꓯˍ ꓟ ꓪꓴꓸ ꓠꓬꓲ ꓠꓲ ꓬꓲ ꓪꓽ ꓠꓬ ꓙꓵ ꓒꓶꓽ ꓟꓽ ꓓꓳˍ ꓟ ꓕꓱ ꓡꓰ ꓥˍ ꓡꓳ= ꓖꓳ ꓟ ꓡꓰꓽ ꓟꓽ ꓞꓲ ꓪꓴꓽ ꓥˍ ꓟꓲ ꓟꓽ ꓪꓴꓽ ꓝꓲ ꓓꓳ ꓥˍ ꓟꓲ ꓟꓽ ꓓꓳ ꓝꓲ ꓕꓱ ꓡꓰ ꓬꓰˍ ꓟ ꓥˍ ꓪ= ꓖꓳ ꓟ ꓪꓴꓸ ꓠꓬꓲ ꓠꓲ ꓲꓢꓡꓮꓟ ꓗꓴꓷꓼ ꓗꓪ ꓠꓬ ꓙꓵ ꓒꓶꓽ ꓐꓯˍ ꓟ ꓟꓽ ꓙꓳˍ ꓟ ꓟꓬ ꓠꓬꓲ ꓥˍ ꓡꓳ= ꓖꓳ ꓡꓰ ꓥˍ ꓟꓲ ꓟꓶꓽ ꓘꓵꓽ ꓛꓵˍ ꓟ ꓬꓰ ꓒꓲꓸ ꓬꓰ ꓓꓳˍ ꓟ꓾ ꓗꓸ ꓔ ꓟ꓾ ꓛꓵˍ ꓟ ꓕꓱ ꓡꓰ ꓫꓵꓽ ꓔꓯ ꓠꓬ ꓢꓲ-ꓫꓬ ꓕꓳꓽ ꓶ ꓗꓪ ꓟꓽ ꓐꓯ ꓔ ꓟ ꓪꓴꓸ ꓠꓬꓲ ꓠꓲ ꓲꓢꓡꓮꓟ ꓗꓴꓷꓼ ꓗꓪ ꓥˍ ꓟꓲ ꓓꓳˍ ꓟ꓾ ꓗꓸ ꓔ ꓟ꓾ ꓛꓵˍ ꓟ ꓮ ꓟꓬꓹ ꓙꓳ ꓡꓳ= ꓔꓯ ꓥꓳꓽ ꓕꓲꓽ ꓟ ꓐꓯ ꓠꓬ ꓮꓝꓖꓧꓮꓠꓲꓢꓔꓮꓠ ꓗꓴꓷꓼ ꓠꓬ ꓬꓯ ꓒꓲꓸ ꓬꓯ ꓟꓽ ꓓ ꓓꓳ ꓖꓴ ꓡꓰ ꓟ ꓗꓴꓷꓼ ꓥˍ ꓐꓶ=

ꓠꓬꓲꓹ ꓠꓬꓲ ꓓꓣꓴꓖ ꓐꓯˍ ꓟ ꓞꓳ ꓤꓽ ꓔꓯ ꓬꓲꓼ ꓡꓰ ꓝꓲˍ ꓟ ꓣꓱꓽ ꓫꓵꓽ ꓔꓯ ꓕꓱ ꓡꓰ 4 ꓫꓵꓽ ꓒꓯꓽ ꓔ ꓟ ꓙꓳ ꓐꓶ= ꓟꓮꓣꓲꓙꓴꓮꓠꓮ ꓮꓠꓓ ꓧꓮꓢꓧꓲꓢꓧ꓾ ꓡꓢꓓ꓾ ꓐꓮꓐꓲꓔꓴꓣꓮꓔꓰꓢ꓾ ꓳꓑꓲꓴꓟ ꓓꓰꓣꓲꓦꓮꓔꓰꓢ ꓐꓯˍ ꓟ ꓕꓱ ꓡꓰ 4 ꓫꓵꓽ ꓒꓯꓽ ꓔ ꓟ ꓙꓳ ꓐꓶ=

1ꓸ ꓟꓮꓣꓲꓙꓴꓮꓠꓮ ꓮꓠꓓ ꓧꓮꓢꓧꓲꓢꓧ ꓐꓯˍ ꓟ ꓠꓬ ꓮ ꓡꓲꓳ ꓫꓵꓽ ꓔꓯ ꓐꓯˍ ꓡ ꓐꓯˍ ꓠꓬ ꓧꓶꓸ ꓕꓯꓽ ꓕꓲꓽ ꓞꓲꓼ ꓗꓪ ꓣꓳ ꓡꓲ-ꓢꓴ ꓐꓴ ꓔꓶ ꓔ ꓟ ꓣꓱꓹ ꓟ ꓜꓲꓽ ꓐꓯˍ ꓟ ꓐꓵ ꓞꓲꓽ ꓬꓰ ꓟ ꓜꓲꓽ ꓝꓯꓸ ꓐꓵ ꓞꓲꓽ ꓬꓰˍ ꓟ ꓬꓲ ꓒꓬꓽ ꓬꓲꓸ ꓜꓲ ꓔꓯ ꓐꓯˍ ꓟ ꓥ ꓐꓶ= ꓕꓱ ꓟ ꓔꓯ ꓞꓳ ꓤꓽ ꓓꓳ ꓠꓬ ꓛꓵꓼ ꓠꓬ ꓕꓯꓽ ꓢꓲ ꓕꓲꓽ ꓕ ꓗꓪ ꓐꓱ ꓙꓳˍ ꓪ ꓡꓰ ꓐꓰ ꓕꓱ ꓡꓰ ꓫꓵꓽ ꓠꓲꓹ ꓟ ꓗꓶ ꓡꓰ ꓙꓵ ꓐꓶ=

2ꓸ ꓡꓢꓓ ꓐꓯˍ ꓟ ꓕꓱ ꓟ ꓠꓬ ꓮꓸ ꓫꓵꓽ ꓥˍ ꓡ ꓐꓯ ꓠꓬ ꓙꓼ ꓗꓪ ꓐꓰ ꓫꓹ ꓩꓴ ꓡˍ ꓟ ꓠꓲꓹ ꓟ ꓔꓯ ꓙꓵ ꓡꓰ ꓝꓲˍ ꓟ꓾ ꓫꓰꓸ ꓔꓶꓹ ꓡꓰ ꓝꓲˍ ꓟ ꓕꓱ ꓡꓲꓳꓫꓵꓽ ꓟꓬ ꓞꓲꓼ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ=

3ꓸ ꓐꓮꓐꓲꓔꓴꓣꓮꓔꓰꓢ ꓐꓯˍ ꓟ ꓠꓬ ꓕꓱ ꓟ ꓠꓬ ꓞꓳ ꓤꓽ ꓫꓵꓽ ꓙꓴꓽ ꓞꓳ ꓤꓽ ꓬꓲ ꓙꓴꓽ ꓥ ꓕ ꓑꓳ ꓔꓯ ꓧꓪꓸ ꓛꓲ ꓡꓰ ꓝꓲˍ ꓟ꓾ ꓔꓴ ꓡ ꓝꓲˍ ꓟ꓾ ꓢꓯꓼ ꓪꓽ ꓙꓳ ꓝꓲˍ ꓟ꓾ ꓒꓳꓹ ꓡꓰ ꓝꓲˍ ꓟ ꓕꓱ ꓡꓲꓳ ꓫꓵꓽ ꓔꓯ ꓐꓯˍ ꓟ ꓥ ꓐꓶ= ꓕꓱ ꓟ ꓣꓱꓽ ꓠꓬ ꓠꓲꓹ ꓟ ꓔꓯ ꓒꓳꓹ ꓡꓰ ꓝꓲˍ ꓟ꓾ ꓧꓶꓸ ꓕꓯꓹ ꓡꓰ ꓐꓰ ꓟꓽ ꓗꓶ ꓡꓰ ꓝꓲˍ ꓟ ꓕꓱ ꓡꓲꓳ ꓫꓵꓽ ꓗꓷ ꓡ ꓐꓶ=

4ꓸꓳꓑꓲꓴꓟ ꓓꓰꓣꓲꓦꓮꓔꓰꓢ ꓐꓯˍ ꓟ ꓠꓬ ꓬꓯ ꓒꓲꓸ ꓬꓯ ꓗꓪ ꓐꓰ ꓓꓳ ꓡꓹ ꓟ ꓣꓱꓽ ꓫꓵꓽ ꓕꓱ ꓡꓲꓳ ꓫꓵꓽ ꓔꓯˍ ꓟ ꓥ ꓪ= ꓬꓯ ꓒꓲꓸ ꓬꓯ ꓜꓲ ꓗꓪ ꓐꓰ ꓓꓳ ꓡꓹ ꓟ ꓬꓯ ꓒꓲꓸ ꓬꓯ ꓠꓯ꓾ ꓬꓮꓟꓮ꓾ ꓬꓯ ꓒꓴ ꓕꓱ ꓡꓲꓳ ꓫꓵꓽ ꓔꓯ ꓐꓯ ꓟ ꓥ ꓐꓶ=