ꓰꓠ-ꓖ-ꓡꓲ-ꓗꓮꓠ ꓘꓴ ꓜꓲꓼ ꓞꓳ ꓚ ꓟꓸ ꓟꓲꓽ (2022 Q & A)

ꓰꓠ-ꓖ-ꓡꓲ-ꓗꓮꓠ ꓘꓴ ꓜꓲꓼ ꓞꓳ ꓚꓱꓹ ꓔꓯ ꓚ ꓥꓳ ꓐꓯꓹ ꓠꓬ ꓪꓸ ꓔꓲ ꓧꓰꓠ-ꓠ-ꓣꓲ ꓦꓲꓲꓲ ꓚꓱꓹ ꓟꓽ ꓐ ꓟꓽ ꓓꓹ ꓟ ꓥˍ ꓡꓳ= ꓮ ꓡꓰꓳꓼ ꓐꓯ ꓠꓬ ꓧꓰꓠ-ꓠ-ꓣꓲ ꓪꓸ ꓔꓲ ꓧꓰꓠ-ꓠ-ꓣꓲ ꓦꓲꓲꓲ ꓠꓬ ꓰꓠ-ꓖ-ꓡꓲ-ꓗꓮꓠ ꓘꓴ ꓜꓲꓼ ꓞꓳ ꓒꓬꓱꓼ ꓡꓹ ꓟ ꓠꓯꓸꓼ ꓗꓪ ꓟꓽ ꓓ ꓬꓳꓸ ꓚꓵꓹ ꓟ ꓕꓲꓽ ꓣꓳ ꓥˍ ꓡꓳ= ꓬꓲ ꓠꓬ 1509 ꓘꓳꓼ 7 ꓦ ꓟ 11 ꓠꓬꓲ ꓕꓯ ꓬꓲꓸ ꓬꓲꓼ ꓦꓲ ꓢꓲ ꓟ ꓥˍ ꓟ ꓟꓶꓽ ꓛꓵꓽ ꓟ ꓗꓮꓔ-ꓔ-ꓣꓲꓠ ꓮ-ꓣꓳ-ꓖꓮꓠ ꓐꓰ ꓦꓲ ꓕꓴꓽ ꓖꓪ ꓕꓴ ꓗꓷꓳ= ꓡꓯꓽ ꓒꓯꓹ ꓝ ꓗꓷꓳ= ꓪꓸ ꓔꓲ ꓧꓰꓠ-ꓠ-ꓣꓲ ꓦꓲꓲꓲ ꓠꓬ ꓙꓵ ꓠꓲꓹ ꓚꓱꓹ ꓔꓯ ꓮ ꓕꓯꓽ ꓥˍ ꓟꓲ ꓡꓳꓸ ꓙ ꓢꓴ꓾ ꓗꓽ ꓕꓸ ꓙ ꓢꓴ꓾ ꓦꓲꓼ ꓙ ꓢꓴ ꓥˍ ꓡꓳ= 1517 ꓘꓳꓼ ꓕꓯ ꓟ-ꓔꓲꓠ ꓡꓴ-ꓔ ꓪꓴꓸ ꓓꓵ ꓣꓱꓽ ꓢꓲ ꓘꓴ ꓜꓲꓼ ꓞꓳ ꓗꓪ ꓐꓰ ꓧˍ ꓡꓰꓹ ꓟ ꓕꓯ ꓬꓲ ꓠꓬ ꓟꓽ ꓠꓲꓹ ꓫꓵ= ꓖꓳ ꓟ ꓪꓴꓸ ꓠꓬꓲ ꓠꓲ ꓬꓲ ꓠꓬ ꓘꓴ ꓜꓲꓼ ꓞꓳ ꓗꓪ ꓐꓰ ꓒꓳꓹ ꓔꓴ ꓡꓹ ꓢꓴ ꓔꓯ ꓟꓽ ꓠꓲꓹ ꓫꓵˍ ꓟ ꓐꓰ ꓗꓽ ꓕꓸ ꓟ ꓚꓱꓹ ꓡꓳꓸ ꓙ ꓐꓳꓽ ꓙ ꓔ ꓙꓹ ꓟ ꓚꓱꓹ ꓬꓲ ꓠꓬ ꓕꓳꓽ ꓶ ꓗꓪ ꓐꓰ ꓐꓳ ꓛꓱ ꓗꓷꓳ= ꓖꓳ ꓟ ꓪꓴꓸ ꓠꓬꓲ ꓘꓴ ꓜꓲꓼ ꓞꓳ ꓠꓬ ꓬꓲ ꓔꓯ ꓝꓲꓓꓰꓲ ꓓꓰꓝꓰꓠꓢꓳꓣ ꓐꓯꓹ ꓟ ꓙꓵ ꓠꓲꓹ ꓔꓯ ꓡꓳꓸ ꓙ ꓢꓴ꓾ ꓗꓽ ꓙ ꓢꓴ ꓐꓯꓹ ꓟ ꓟꓬꓱ ꓓꓳ ꓖꓶꓹ ꓟ ꓡꓯꓽ ꓫꓵ 1521 ꓘꓳꓼ 10 ꓦ ꓟ 11 ꓠꓬꓲ ꓕꓯ ꓖꓶ ꓗꓷꓳ= ꓬꓲ ꓠꓯꓸꓼ ꓗꓪ ꓫꓵꓽ ꓪꓴ ꓓꓽ ꓟ ꓕꓲꓽ ꓟ ꓠꓬ ꓪꓸ ꓔꓲ ꓟ ꓗꓮꓔ-ꓔ-ꓣꓲꓠ ꓠꓯꓸꓼ ꓗꓪ ꓤꓼ ꓠꓱ ꓮꓸ ꓐꓲ ꓟꓽ ꓪ꓾ ꓮꓸ ꓟꓲꓽ ꓓꓲ ꓢꓲ ꓪꓸ ꓡꓳ= ꓬꓲ ꓡꓯꓼ ꓪ ꓔꓯ꓾ ꓬꓲ ꓖꓴꓽ ꓙꓵꓽ ꓠꓲꓹ ꓫꓯꓸ ꓔꓯ꓾ ꓬꓲ ꓙꓵꓽ ꓪꓽ ꓔꓯ ꓘꓳꓹ ꓣꓴ ꓢꓴ ꓝꓸ ꓢꓴ ꓟꓽ ꓙꓳ ꓕꓱ ꓡꓰ ꓔꓸ ꓡꓳ= ꓖꓳ ꓟ ꓪꓴꓸ ꓠꓬꓲ 1527 ꓘꓳꓼ ꓕꓯ ꓔꓲꓺ ꓒꓽ ꓪꓸ ꓔꓲ ꓗ-ꓡꓯ-ꓟꓰꓠ ꓦꓲꓲ ꓠꓯꓸꓼ ꓗꓪ ꓕꓳꓽ ꓶ ꓐꓳ ꓢꓲ ꓪꓸ ꓔꓲ ꓟ ꓗꓮꓔ-ꓔ-ꓣꓲꓠꓹ ꓐꓰ ꓧꓹ ꓡꓯꓽ ꓘꓳ ꓠꓹ ꓟ ꓙꓵꓽ ꓪꓽ ꓖꓶ ꓡ ꓠꓹ ꓟ ꓓꓲꓹ ꓟ ꓕꓳꓽ ꓶ ꓐꓳ ꓗꓷꓳ= ꓖꓳ ꓟ ꓠꓬ ꓡꓱ-ꓬꓲ 18ꓽ 16 ꓝꓲꓸ ꓗꓪ ꓐꓯꓹ ꓟ ꓡꓰ ꓐꓰ ꓓꓰꓹ ꓟ ꓥˍ ꓡꓳ= ꓬꓲ ꓠꓬ ꓗꓮꓔ-ꓔ-ꓣꓲꓠ ꓐꓰ ꓧꓹ ꓡꓯꓽ ꓘꓳ ꓢꓲ ꓰꓠ-ꓐꓳ-ꓡꓲꓠ ꓐꓰ ꓡꓯꓽ ꓒꓯꓹ ꓝꓸ ꓠꓹ ꓟ ꓐꓱ ꓶ ꓢꓯꓼ ꓕꓵꓼˍ ꓟ ꓥˍ ꓡꓳ= 

ꓘꓴ ꓜꓲꓼ ꓞꓳ ꓠꓬ ꓬꓲ ꓔꓯ ꓙꓵꓽ ꓪꓽ ꓟꓽ ꓖꓶ= ꓮ ꓡꓰꓳꓼ ꓐꓯ ꓠꓬ ꓕꓲꓽ ꓧꓪꓹ ꓡꓯꓽ ꓒꓯꓹ ꓝꓸ ꓓꓳ ꓢꓴ ꓔꓯ ꓘꓴ ꓜꓲꓼ ꓞꓳ ꓠꓬ ꓧꓹ ꓠꓹ ꓟ ꓙꓵꓽ ꓪꓽ ꓟꓽ ꓙꓳ= ꓪꓴ-ꓢ ꓡꓰ ꓝꓱ ꓔ ꓟ ꓕꓯ ꓞꓳ ꓤꓽ ꓡꓰ ꓕꓽ ꓧꓹ ꓗꓶ ꓝꓲ꓾ ꓐꓯꓹ ꓟ ꓪꓴꓸ ꓠꓬꓲ ꓘꓴ ꓜꓲꓼ ꓞꓳ ꓠꓯꓸꓼ ꓗꓪ ꓙꓵꓽ ꓪꓽ ꓟꓽ ꓙꓳ= ꓖꓳ ꓡꓰ ꓢꓲ ꓪꓸ ꓔꓲ ꓧꓰꓠ-ꓠ-ꓣꓲ ꓦꓲꓲꓲ ꓠꓬ ꓮꓽ ꓘꓶꓸ ꓠꓲꓹ ꓫꓵꓼ ꓢꓲ ꓔꓬ ꓡꓳ= ꓘꓴ ꓜꓲ ꓞꓳ ꓔꓯ ꓬꓲ ꓠꓬ ꓟꓽ ꓠꓲꓹ ꓫꓵꓹ ꓟ ꓕꓱ ꓡꓰ ꓗꓶꓹ ꓓꓴ ꓟ ꓥ ꓪ= ꓖꓳ ꓕꓲꓽ ꓘꓴꓸ ꓗꓪ ꓰꓠ-ꓖ-ꓡꓮꓠ ꓗꓴꓷꓼ ꓘꓴꓽ ꓗꓪ ꓟ ꓔꓲꓺ ꓒꓽ ꓓꓽ ꓥꓹ ꓟ ꓗꓮꓠ-ꓔ-ꓐꓯ-ꓣꓲ ꓡꓳ ꓒꓱ ꓔꓲꓺ ꓒꓽ ꓓꓽ ꓠꓬ 1533 ꓘꓳꓼ ꓕꓯ ꓪꓸ ꓔꓲ ꓧꓰꓠ-ꓠ-ꓣꓲ ꓦꓲꓲꓲ ꓐꓰ ꓗꓮꓔ-ꓔ-ꓣꓲꓠ ꓮ-ꓣꓳ-ꓖꓮꓠ ꓠꓬꓲ ꓗꓴꓸ ꓚꓸ ꓗꓪ ꓡꓯꓽ ꓒꓯꓹ ꓝꓸ ꓦꓹ ꓟ ꓔꓯ ꓧꓹ ꓖꓶꓹ ꓟ ꓙꓵꓽ ꓪꓽ ꓕꓳꓽ ꓶ ꓔꓯ ꓖꓶ ꓗꓷꓳ= ꓗꓮꓠꓔ-ꓐ-ꓣꓲ ꓗꓪ ꓟ ꓔꓲꓺ ꓒꓽ ꓓꓽ ꓥˍ ꓟꓲ ꓘꓴ ꓜꓲꓼ ꓞꓳ ꓠꓯꓸꓼ ꓗꓪ ꓐꓰ ꓓꓳ ꓙꓰꓹ ꓟ ꓕꓱ ꓡꓰ ꓗꓶ ꓡꓰꓹ ꓓꓴ ꓟ ꓥˍ ꓪ= ꓘꓴ ꓜꓲꓼ ꓞꓳ ꓐꓯ ꓘꓶꓽ ꓔꓯ ꓕꓱ ꓡꓰ ꓟꓽ ꓠ ꓠꓹ ꓕꓱ ꓡꓰ ꓓꓳ ꓙꓰꓹ ꓓꓴ ꓟ ꓥ ꓪ= ꓖꓳ ꓡꓰ ꓢꓲ ꓰꓠ-ꓖ-ꓡꓮꓠ ꓗꓴꓷꓼ ꓗꓪ ꓟ ꓘꓴ ꓜꓲꓼ ꓞꓳ ꓙꓵꓽ ꓪꓽ ꓮꓽ ꓙꓵꓽ ꓔꓯ ꓪꓸ ꓔꓲ ꓧꓰꓠ-ꓠ-ꓣꓲ ꓦꓲꓲꓲ ꓣꓴ ꓢꓲ ꓬꓲ ꓠꓬ ꓰꓠ-ꓖ-ꓡꓮꓠ ꓗꓴꓷꓼ ꓗꓪ ꓟ ꓘꓴ ꓜꓲꓼ ꓞꓳ ꓪꓴꓸ ꓓꓵ ꓣꓱꓽ ꓢꓴ ꓥˍ ꓡꓳ= ꓟꓽ ꓓ ꓙꓵꓽ ꓪꓽ ꓙꓳ ꓢꓴ ꓥˍ ꓡꓳ ꓐꓰ ꓕꓱ ꓡꓰ ꓐꓯ ꓑꓶ ꓩꓴ ꓡꓹ ꓓꓴ ꓟ ꓥ ꓪ= ꓖꓳ ꓕꓲ ꓠꓬꓲ ꓗꓪ ꓚꓳꓸ ꓘꓴ ꓜꓲꓼ ꓞꓳ ꓐꓰ ꓪꓸꓔꓲ ꓧꓰꓠ-ꓠ-ꓣꓲ ꓦꓲꓲꓲ ꓠꓬꓲ ꓗꓴꓸ ꓚꓸ ꓗꓪ ꓫꓵꓽ ꓪꓴ ꓓꓽ ꓟ ꓗꓶ ꓡꓰꓳ= ꓖꓳ ꓗꓪ ꓚꓳꓸ ꓰꓠ-ꓖ-ꓡꓲ-ꓗꓮꓠ ꓘꓴ ꓜꓲꓼ ꓞꓳ ꓐꓯꓹ ꓟ ꓪꓸ ꓔꓲ ꓡꓰ ꓪꓴꓸ ꓓꓵ ꓣꓱꓹ ꓟ ꓘꓴ ꓜꓲꓼ ꓞꓳ ꓕꓲꓽ ꓟ ꓕꓱ ꓡꓰ ꓓꓳ ꓡꓹ ꓓꓴ ꓟ ꓥ ꓪ= ꓟꓽ ꓓ ꓫꓵꓽ ꓪꓴ ꓠꓬ ꓤꓼ ꓟꓶꓼ ꓚꓱꓹ ꓗꓪ ꓐꓰ ꓓꓽ ꓪꓴꓸ ꓔꓴ ꓡꓹ ꓟ ꓥˍ ꓡꓳ= 

 ꓠꓬꓲꓹ ꓠꓬꓲ ꓰꓠ-ꓖ-ꓡꓲ-ꓗꓮꓠ ꓘꓴ ꓜꓲꓼ ꓞꓳ ꓠꓬ ꓘꓴ ꓜꓲꓼ ꓞꓳ ꓮꓽ ꓟꓬꓹ ꓙꓳꓹ ꓟ ꓠꓯꓸꓼ ꓗꓪ ꓵ ꓣꓳ ꓟꓬꓹ ꓟ ꓘꓴ ꓜꓲꓼ ꓞꓳ ꓕꓲꓽ ꓟ ꓥˍ ꓡꓳ= ꓕꓱ ꓟ ꓘꓴ ꓜꓲꓼ ꓞꓳ ꓠꓬ ꓗ-ꓕꓳ-ꓡꓲꓼ ꓘꓴ ꓜꓲꓼ ꓞꓳ ꓙꓵ ꓔꓬ ꓟ ꓮꓽ ꓟꓬ ꓕꓯ ꓥˍ ꓟꓲ ꓙꓵ ꓔꓬ ꓡꓳ= ꓝꓲ ꓓꓴ ꓐꓴ ꓙꓵ ꓠꓲꓹ (ꓮꓑꓳꓢꓔꓡꓰꓢ' ꓚꓣꓰꓰꓓ) ꓔꓯ ꓘꓳꓹ ꓣꓴˍ ꓡꓳ= ꓗ-ꓕꓳ-ꓡꓲꓼ ꓘꓴ ꓜꓲꓼ ꓞꓳ ꓠꓯꓸꓼ ꓗꓪ ꓟ ꓢꓲ ꓫꓬ ꓕꓳꓽ ꓶ 8 ꓑꓷꓠ ꓔꓯ ꓥˍ ꓟꓲ ꓣꓱꓹ ꓡꓳ= ꓖꓳ ꓟ ꓡꓰ ꓟꓽ ꓞꓲ ꓗ-ꓕꓳ-ꓡꓲꓼ ꓘꓴ ꓜꓲꓼ ꓞꓳ ꓡꓰ ꓐꓰ ꓔꓲꓺ ꓒꓽ ꓓꓽ ꓔꓲꓺ ꓒꓽ ꓐꓯꓹ ꓟ ꓙꓳˍ ꓡꓳ= ꓗ-ꓕꓳ-ꓡꓲꓼ ꓘꓴ ꓜꓲꓼ ꓞꓳ ꓡꓰ ꓐꓰ ꓢꓮꓚꓣꓮꓟꓰꓠꓔꓴ ꓐꓯꓹ ꓟ ꓣꓱꓽ ꓛꓵꓽ ꓡꓯꓽ ꓫꓵ ꓐꓯꓹ ꓟꓶ ꓝꓲ ꓟ ꓗꓳ ꓓꓱꓽ ꓔꓲꓹ ꓔ ꓟ ꓐꓰ ꓢꓲ ꓫꓬ ꓑꓸ ꓑꓸ ꓘꓴ ꓗꓪ ꓢꓲꓺ ꓒꓽ ꓬꓰ-ꓢꓴ ꓚꓵ ꓚꓵ ꓔꓬ ꓟ ꓔꓯ ꓙꓵ ꓔꓬ ꓡꓳ= ꓖꓳ ꓡꓰ ꓥˍ ꓟꓲ ꓝꓴꓲꓸ ꓣꓷꓠ ꓔ ꓟ꓾ ꓦ ꓢꓯꓼ ꓡꓴꓽ ꓖꓶꓹ ꓟ꓾ ꓠꓬꓲꓽ ꓟ ꓡꓽ ꓞꓳ ꓝꓱꓹ ꓟ꓾ ꓔꓲꓺ ꓒꓽ ꓟꓬꓱꓽ ꓐꓱꓽ ꓘꓶꓽ ꓔꓯ ꓘꓳ ꓣꓴꓹ ꓟ ꓐꓰ ꓠ ꓢꓴ ꓒꓬꓽ ꓢꓴ ꓔꓯ ꓟꓲ ꓞꓷ ꓟꓲ ꓖꓶꓹ ꓟ ꓔꓯ ꓠꓬ ꓢꓮꓚꓣꓮꓟꓰꓠꓔꓮꓡ ꓐꓯꓹ ꓟ ꓣꓱꓽ ꓛꓵꓽ ꓐꓯ ꓟꓶ ꓠꓹ ꓟ ꓐꓱ ꓶ ꓢꓲ ꓫꓬ ꓡꓰ ꓝꓲꓹ ꓟ ꓡꓰ ꓢꓲ ꓘꓳꓹ ꓐꓶ=