ꓴꓠ ꓟꓬꓱꓽ ꓢꓲꓽ ꓒ U Thant ꓟꓸ ꓟꓲꓽ

 (1909-1974)

U Thant ꓔꓯ ꓠꓬꓲꓸ ꓠꓬꓲ ꓟ ꓟꓬ-ꓟ ꓞꓳ ꓡꓱ ꓞꓳ ꓡꓯꓸ ꓐꓴ ꓮ ꓘꓶꓸ ꓟꓽ ꓢꓷꓸ ꓥ ꓟꓲ ꓞꓲꓼ ꓪꓴꓽ ꓢꓴ ꓮꓽ ꓟꓬꓽ ꓠꓽ ꓬꓲ ꓔꓯ ꓢꓷˍ ꓡꓳ= ꓕꓲ ꓟꓲ ꓠꓯ ꓡꓱꓸꓼ ꓗꓪ ꓟ ꓡ ꓞꓳ ꓐꓴ ꓥˍ ꓟꓲ ꓬꓲ ꓔꓯ U Thant ꓐꓯ ꓢꓲ ꓢꓷꓸ ꓔ ꓡꓳ= ꓖꓳ ꓕꓲ ꓞꓲꓼ ꓕꓯ ꓟꓲ ꓠꓯ ꓡꓰ ꓢꓷˍ ꓟ ꓟꓬ-ꓟ ꓡ ꓞꓳ ꓠꓬꓲꓽ ꓣꓳˍ ꓡꓰꓽ ꓙꓳˍ ꓢꓰꓽ ꓡꓳ= ꓕꓲ ꓣꓳ ꓠꓬ General Aung San ꓥ ꓢꓲ ꓝꓮꓲ ꓕꓲ ꓣꓳ ꓠꓬ ꓴꓠ ꓟꓬꓱꓽ ꓢꓲꓽ ꓒ U Thant ꓥ ꓡꓳ=

U Thant ꓔꓯ 1909 ꓘꓳꓼ 1 ꓦ 2 ꓠꓬꓲ ꓕꓯ ꓟꓬ-ꓟ ꓗꓴꓷꓼ Pann Tanaw ꓡꓳ ꓒꓱ ꓗꓪ ꓦꓵꓻ ꓔ ꓡꓳ= ꓤ ꓡꓲꓸ ꓣꓳ ꓙꓳˍ ꓟ ꓗꓪ ꓬꓲ ꓠꓬ ꓤ ꓪꓴꓽ (ꓤ ꓪꓴꓸ) ꓥ ꓡꓳ= ꓬꓲ ꓐꓹ ꓐ ꓠꓬ ꓢꓷꓸ ꓠꓲꓹ ꓙꓳ ꓢꓴ ꓥ ꓢꓲ꓾ ꓒꓴ ꓮ ꓟꓬꓹ ꓙꓳˍ ꓟ ꓶꓻ ꓡꓯꓼ ꓟꓴ ꓢꓴ ꓥꓳ= ꓬꓲ ꓐꓹ ꓐ ꓠꓬ ꓬꓲ ꓪ ꓠꓬꓲꓽ ꓢ ꓫꓵꓸ ꓔꓯ ꓢꓷꓸ ꓠꓲꓹ ꓢꓯꓼ ꓕꓵꓼ ꓠꓹ ꓟ ꓮ ꓕꓯˍ ꓟꓲ ꓕꓵꓼ ꓪ ꓖꓶˍ ꓡꓳ=

U Thant ꓠꓬ ꓞꓲꓼ ꓣꓳˍ ꓕꓯ ꓡꓰ ꓕꓳꓽ ꓶ ꓵ ꓠꓲꓹ ꓟ ꓙꓳˍ ꓡꓳ= ꓕꓳ ꓶ ꓮ ꓟꓬꓹ ꓵˍ ꓟ ꓑꓶꓸ ꓓꓴ ꓢꓷꓸ ꓠꓲꓹ ꓮ ꓟꓬꓹ ꓢꓷ ꓢꓲ ꓫꓸ ꓕꓱˍ ꓟ ꓗꓪ ꓟꓲ ꓓꓹ ꓡꓳ= ꓬꓲ ꓛꓳ ꓒꓯꓹ ꓐꓴ ꓠꓬ ꓬꓲ ꓔꓯ ꓓꓵꓽ ꓙˍ ꓟ ꓗꓪ ꓢꓷꓸ ꓠꓲꓹ ꓙꓳ ꓒ (Philosopher) ꓐꓰ ꓘꓴˍ ꓡꓳ=

U Thant ꓪꓴꓽ ꓡˍ ꓕꓯ ꓓꓳꓽ ꓐꓯ ꓑꓶ ꓢꓴ꓾ ꓓꓳꓽ ꓐꓳ ꓢꓴ ꓒꓬꓱꓼ ꓠꓲꓹ ꓫꓵˍ ꓟ ꓪꓴꓸ ꓠꓬꓲ ꓓꓳꓽ ꓐꓯ ꓑꓶ ꓖꓴ ꓗꓪ ꓕꓳ ꓶ ꓮ ꓟꓬꓹ ꓐꓳ ꓢꓲ ꓖꓶ ꓩꓴˍ ꓡꓳ=ꓬꓲ 14 ꓘꓳꓼ ꓕꓯ ꓬꓲ ꓐꓹ ꓐ ꓫꓵꓻ ꓢꓲ ꓦꓲꓻ ꓗꓪ ꓮ ꓘꓶꓸ ꓫ ꓡꓰˍ ꓡꓳ= U Thant ꓠꓬ 1926 ꓘꓳꓼ ꓕꓯ 10 ꓔ ꓧꓪꓸ ꓡꓰ ꓢꓲ꓾ 1928 ꓕꓯ Yangon ꓟꓴꓺ ꓕꓲꓸ ꓢꓳ ꓦꓲ ꓗꓪ ꓐꓰ ꓢꓳ ꓧꓪꓸ ꓡꓰ ꓗꓷꓳ= 

1930 ꓘꓳꓼ 3 ꓦ 28 ꓠꓬꓲ ꓕꓯ ꓢꓷꓸ ꓠꓲꓹ ꓢꓳ ꓦꓲꓻ ꓓꓽ ꓟ ꓗꓪ ꓟꓸ ꓖꓶˍ ꓟ ꓢꓷꓸ ꓠꓲꓹ ꓟꓸ ꓒ ꓢꓳˍ ꓟ ꓗꓪ ꓠꓳ 1 ꓟꓶ ꓡꓰ ꓗꓷꓳ= ꓗꓸ ꓠꓯꓸ Pann Tanaw ꓡꓳ ꓒꓱ ꓗꓪ ꓬꓲꓼ ꓙꓰ ꓢꓲ꓾ Pann Tanaw ꓢꓷꓸ ꓠꓲꓹ ꓢꓳ ꓦꓲ ꓓꓽ ꓟ ꓗꓪ ꓟꓸ ꓒ ꓟꓬꓱꓽ ꓬꓰ ꓗꓷꓳ= 3 ꓘꓳꓼ ꓛꓲ ꓙꓳ ꓡˍ ꓕꓯ ꓢꓳꓻ ꓦꓲ ꓖꓳ ꓟ ꓗꓪ ꓢꓳꓻ ꓦꓲ ꓙꓵꓽ ꓟꓸ ꓒ ꓓꓽ ꓒꓬꓱꓼ ꓬꓰ ꓗꓷꓳ=

U Thant ꓠꓬ ꓧꓪꓽ ꓒꓴ ꓫꓵꓽ ꓕꓳꓽ ꓶ ꓐꓳˍ ꓟ ꓐꓰ ꓧꓪꓽ ꓒꓴ ꓥꓳꓽ ꓫ ꓕꓱˍ ꓟ ꓗꓪ ꓮ ꓘꓶꓸ ꓓꓹ ꓡꓳ= ꓕꓱ ꓡꓰ ꓧꓪꓽ ꓒꓴ ꓥꓳꓽ ꓧꓪꓽ ꓒꓴ ꓕꓳꓽ ꓶ ꓢꓷ ꓡ ꓠꓹ ꓟ ꓐꓱ ꓶ ꓬꓲ ꓠꓬ ꓞꓲꓼ ꓣꓳˍ ꓕꓯ ꓡꓰ ꓧꓪꓽ ꓒꓴ ꓕꓳꓽ ꓶ ꓮ ꓟꓬꓹ ꓵ ꓗꓷ ꓟ ꓥꓳ=

1930 ꓘꓳꓼ ꓕꓯ ꓟꓬ-ꓟ ꓗꓴꓷꓼ ꓔꓯ ꓧꓪꓽ ꓒꓴ ꓫꓵꓽ ꓟꓯꓼ ꓐꓴ ꓙꓵꓽˍ ꓟ ꓠꓯꓸꓼ ꓗꓪ ꓐꓰ ꓡꓲꓹ ꓗꓷ ꓟꓶ ꓠꓹ ꓟ ꓐꓱ ꓶ ꓒꓳꓹ ꓔꓴˍ ꓟ ꓗꓪ U Thant ꓟꓲ ꓔꓹ ꓗꓷꓳ= 1042 ꓘꓳꓼ ꓕꓯ ꓟꓬ-ꓟ ꓗꓴꓷꓼ ꓔꓯ fascism Japan ꓐꓴ ꓡꓰ ꓣꓴ ꓗꓷꓳ= Japan ꓐꓴ ꓙꓵꓽˍ ꓟ ꓦꓬꓼ ꓠꓬꓲ ꓗꓪ Japan ꓟꓯꓼ ꓐꓴ ꓗꓪ ꓐꓰ ꓢꓷꓸ ꓠꓲꓹ ꓢꓳ ꓦꓲ ꓗꓪ Japan ꓕꓳꓽ ꓶ ꓟꓽ ꓢꓳ ꓟꓽ ꓓ ꓟ ꓙꓵꓽ ꓗ ꓫꓬꓹ ꓗꓷ ꓟ ꓑꓶꓸ ꓢꓴ ꓖꓳ ꓟ ꓔꓯ ꓒꓳꓹ ꓔꓴˍ ꓟ ꓗꓪˍ ꓟꓲ ꓐ ꓗꓷꓳ=

1948 ꓕꓯ ꓟꓬ-ꓟ ꓗꓴꓷꓼ ꓠꓬ British ꓟꓯꓼ ꓙꓵˍ ꓟ ꓠꓯꓸꓼ ꓗꓪ ꓐꓰ ꓡꓲꓹ ꓗꓷ ꓟꓶ ꓗ ꓠꓯ꓾ U Nu ꓠꓬ ꓟꓬ-ꓟ ꓗꓴꓷꓼ ꓗꓪ ꓓ ꓪꓴꓸ ꓟ( ꓬꓲꓸ ꓪꓴꓸ ꓟ) ꓗꓴꓷꓼ ꓫꓴ ꓙꓵꓽ ꓢꓲꓽ ꓒ ꓓꓽ ꓟ ꓒꓬꓱꓼ ꓡ ꓗꓷꓳ= ꓖꓳ ꓡꓱ ꓬꓲ ꓫꓵꓼ ꓫꓬꓹ ꓔꓶ ꓔ ꓟ ꓗꓴꓷꓼ ꓙꓵꓽ ꓚꓱꓹ ꓗꓪ ꓢꓷꓸ ꓠꓲꓹ ꓙꓳ ꓢꓴ ꓮꓽ ꓟꓬꓹ ꓣꓱꓽ ꓞꓹ ꓟ ꓪꓴꓸ ꓠꓬꓲ ꓗꓴꓷꓼ ꓙꓵꓽ ꓢꓲꓽ ꓒ ꓐꓴ ꓜꓴꓻ ꓗꓪ ꓟꓬꓱꓽ ꓬꓰ ꓠꓹ ꓟ U Thant ꓔꓯ ꓐꓯ ꓖꓶ ꓡˍ ꓡꓳ= ꓖꓳ ꓟ ꓪꓴꓸ ꓠꓬꓲ U Thant ꓠꓬ ꓗꓴꓷꓼ ꓙꓵꓽ ꓚꓱꓹ ꓗꓪ ꓟꓬꓱꓽ ꓬꓰ ꓗꓷꓳ=

ꓐꓶ ꓛꓳ ꓐꓴ ꓙꓵꓽˍ ꓟ ꓗꓪ ꓐꓰ ꓡꓲꓹ ꓗꓷ ꓟꓶ ꓡꓰ ꓟ ꓟꓬ-ꓟ ꓗꓴꓷꓼ ꓠꓬ ꓟꓵꓽ ꓦꓴ ꓢꓴ ꓐꓴ ꓪꓴꓸ ꓠꓬꓲ ꓗꓴꓷꓼ ꓘꓴꓽ ꓗꓪ ꓟꓯꓼ ꓓꓶꓽ ꓡꓯ ꓘꓳꓹ ꓟ ꓮ ꓟꓬꓹ ꓓꓳ ꓡˍ ꓡꓳ= ꓖꓳ ꓡꓱ ꓠꓬꓲ U Thant ꓡꓰ ꓗꓴꓷꓼ ꓢꓲ ꓡꓲ ꓗꓷ ꓡꓰ ꓠꓹ ꓟ ꓐꓱ ꓶ Kayin ꓒꓳꓹ ꓔꓴ ꓢꓴ ꓐꓴ ꓒꓱ ꓗꓪ ꓙꓰ ꓢꓲ ꓖꓪ ꓙꓱ ꓗꓷꓳ=

ꓖꓳ ꓡꓱ ꓥˍ ꓟꓲ 1949 ꓘꓳꓼ ꓢꓲꓺ ꓡꓲ ꓟ ꓖꓪ ꓙꓱ ꓜꓲꓼ ꓓꓴ ꓐꓬ ꓡꓰ ꓗꓷ ꓢꓲ ꓗꓴꓷꓼ ꓘꓴꓽ ꓗꓪ ꓟꓯꓼ ꓫꓴˍ ꓟ꓾ ꓒꓳꓹ ꓔꓴˍ ꓟ ꓮꓽ ꓘꓶꓸ ꓪꓴꓽ ꓡˍ ꓡꓳ= U Thant ꓦꓵꓻ ꓟꓵꓽ ꓥ ꓟ Pann Tanaw ꓡꓳ ꓒꓱ ꓔꓯˍ ꓟꓲ ꓒꓳꓹ ꓔꓴ ꓢꓴ ꓐꓴ ꓡꓰ ꓮꓸ ꓔꓳ ꓛꓴ ꓗꓷ ꓢꓲ꓾ U Thant ꓔꓬ ꓟ ꓦꓲˍ ꓟꓲ ꓮꓸ ꓔꓳꓸ ꓐꓬ ꓜꓽ ꓙꓰ ꓗꓷꓳ=

1951 ꓘꓳꓼ ꓗꓪ ꓐꓰ 1957 ꓘꓳꓼ ꓗꓪ ꓛꓲ U Thant ꓠꓬ ꓗꓴꓷꓼ ꓫꓴ ꓙꓵꓽ ꓢꓲꓽ ꓒ U Nu ꓬꓲꓸ ꓟꓬꓱꓽ ꓢꓲꓽ ꓒ ꓬꓰ ꓗꓷꓳ= 1957 ꓘꓳꓼ ꓕꓯ ꓬꓲ ꓠꓬ UN ꓗꓪ ꓟꓬ-ꓟ ꓗꓴꓷꓼ ꓐꓱ ꓶ ꓮ ꓕꓯꓽ ꓟꓲ ꓟꓬꓱꓽ ꓙ ꓢꓴ ꓒꓬꓱꓼ ꓡ ꓗꓷ ꓢꓲ꓾ UN ꓣꓳꓥꓸ ꓔꓶ ꓔ ꓟ American  ꓗꓴꓷꓼ New York ꓡꓳ ꓒꓱ ꓗꓪ ꓙꓰ ꓢꓲ ꓟꓬꓱꓽ ꓬꓰ ꓗꓷꓳ= ꓬꓲ ꓠꓬ ꓙꓻ ꓡꓯ ꓘꓳꓹ ꓟ ꓐꓰ ꓫꓸ ꓕꓱˍ ꓟ ꓗꓪ ꓓ ꓒ ꓥ ꓟ ꓪꓴꓸ ꓠꓬꓲ UN ꓗꓪ ꓟ ꓢꓷꓸ ꓠꓲꓹ ꓙꓳ ꓢꓴ ꓐꓴ ꓗꓴꓷꓼ ꓙꓵꓽ ꓢꓲꓽ ꓒ ꓐꓴ ꓗꓪ ꓐꓰ ꓒꓵꓽ ꓗ ꓬꓰꓹ ꓟ ꓟꓶ ꓗꓷꓳ=

1962 ꓕꓯ ꓬꓲ ꓠꓬ UN ꓟꓬꓱꓽ ꓢꓲꓽ ꓒ ꓒꓬꓱꓼ ꓡ ꓗꓷꓳ= ꓖꓳ ꓕꓲ ꓘꓳꓼ ꓗꓪ Russia ꓟꓯꓼ ꓐꓴ ꓠꓬ American ꓒ ꓕꓲ ꓗꓪ ꓟ Cuba ꓗꓴꓷꓼ ꓗꓪ ꓡ ꓢꓲ nuclear bomb ꓕꓲ ꓟ ꓔꓶ ꓡˍ ꓡꓳ= Nuclear bomb ꓪꓴꓸ ꓓꓵ ꓠꓬ American ꓗꓴꓷꓼ ꓔꓯ ꓟꓳꓸ ꓔ ꓡꓳ= ꓖꓳ ꓟ ꓪꓴꓸ ꓠꓬꓲ nuclear bomb ꓔꓯ 3 ꓠꓬꓲ ꓘꓴꓽ ꓗꓪ ꓟꓽ ꓣꓴ ꓦ ꓗꓷ ꓠꓬ ꓐꓬꓱꓻ ꓦꓲꓻ ꓗꓪ ꓐꓰ  bomb ꓡꓳ ꓩꓴˍ ꓥꓳ꓾ ꓐꓰ ꓙꓳꓺ ꓗꓽ ꓖꓶˍ ꓡꓳ= ꓖꓳ ꓕꓯ Russia ꓐꓰ American ꓐꓴ ꓟꓯꓼ ꓓꓶꓽ ꓡꓯ ꓘꓳ ꓠꓹ ꓟ ꓫꓵꓽ ꓪꓴ ꓕꓲ ꓟ ꓒꓬꓱꓼ ꓪꓴꓸ ꓔꓴ ꓡˍ ꓡꓳ=

ꓖꓳ ꓡꓱ ꓠꓬꓲ UN ꓟꓬꓱꓽ ꓢꓲꓽ ꓒ U Thant ꓡꓰ American ꓗꓴꓷꓼ ꓙꓵꓽ ꓢꓲꓽ ꓒ Kennedy ꓐꓰ Russia ꓟꓬꓱꓽ ꓢꓲꓽ ꓒ Khrushchev ꓐꓴ ꓠꓬꓲꓽ ꓗꓴꓸ ꓚꓸꓼ ꓗꓪ ꓐꓬꓱꓻ ꓦꓲ ꓐꓰ ꓙꓰ ꓙꓰ ꓡ ꓡ ꓬꓰ ꓢꓲ ꓖꓪ ꓙꓱ ꓖꓶ ꓗꓷꓳ= ꓡꓳꓹ ꓬꓰˍ ꓕꓯ Russia ꓐꓴ ꓡꓰ ꓬꓲ ꓪ ꓔꓶ ꓔ ꓟ nuclear bomb ꓔꓯ ꓣꓴ ꓦ ꓗꓷꓳ= ꓖꓳ ꓡꓱ ꓠꓬꓲ ꓟꓵꓽ ꓗꓳꓹ ꓓꓵ ꓓꓵ ꓗꓪ ꓟ ꓗꓴꓷꓼ ꓙꓵꓽ ꓢꓲꓽ ꓒ ꓐꓴ ꓠꓬ U Thant ꓔꓯ ꓮ ꓘꓶꓸ ꓐꓰ ꓮ ꓘꓶꓸ ꓒꓵꓽ ꓡˍ ꓡꓳ=

ꓝꓮꓲ ꓕꓲ ꓧꓪꓹ ꓫꓵꓽ ꓪꓴ ꓕꓲ ꓟ ꓓꓳ ꓡˍ ꓡꓳ= 1962 ꓘꓳꓼ 12 ꓦ ꓕꓯ꓾ Congo ꓗꓪ ꓟ ꓟꓯꓼ ꓐꓴ ꓔꓯ ꓒꓳꓹ ꓔꓴ ꓢꓴ ꓐꓴ ꓡꓰ Congo ꓗꓪ ꓔꓬ ꓟ UN ꓟꓯꓼ ꓜꓴ ꓐꓴ ꓔꓯ ꓢꓰꓼ ꓗꓷꓳ= ꓖꓳ ꓡꓱ ꓠꓬꓲ U Thant ꓡꓰ UN ꓟꓯꓼ ꓜꓴ ꓮꓽ ꓟꓬꓹ ꓔꓯ Congo ꓗꓪ ꓝꓲ ꓩꓴ ꓗꓷ ꓢꓲ ꓒꓳꓹ ꓔꓴ ꓢꓴ ꓐꓴ ꓔꓯ ꓢꓰꓼ ꓧꓪꓸ ꓡꓰ ꓗꓷ ꓟ ꓪꓴꓸ ꓠꓬꓲ꓾ Congo ꓗꓴꓷꓼ ꓘꓴꓽ ꓗꓪ ꓟꓯꓼ ꓓꓶꓽ ꓡꓯꓽ ꓘꓳꓹ ꓟ ꓠꓽ ꓗꓷꓳ=

1965 ꓕꓯ noble ꓡꓯꓼ ꓫꓴ ꓖꓶˍ ꓟ ꓜꓴ ꓡꓰ Cuba ꓫꓵꓽ ꓪꓴ ꓐꓰ Congo ꓫꓵꓽ ꓪꓴ ꓔꓯ ꓧꓪꓸ ꓡꓰ ꓠ ꓬꓰ ꓖꓶ ꓗꓷ ꓢꓴ U Thant ꓔꓯ ꓟꓲ ꓠꓯ ꓢꓲꓺ ꓡꓲꓺ ꓟ noble ꓡꓯꓼ ꓫꓴ ꓖꓶꓽ ꓠꓲꓹ ꓫꓵˍ ꓟꓲ꓾ noble ꓡꓯꓼ ꓫꓴ ꓖꓶ ꓜꓴ ꓗꓪ ꓟ ꓢꓽ ꓡ ꓙꓵꓽ ꓡꓰ veto ꓙꓵꓽ ꓪ ꓣꓱꓽ ꓢꓲ ꓒꓳꓹ ꓔꓳꓹ ꓟ ꓪꓴꓸ ꓠꓬꓲ ꓟꓽ ꓖꓶ ꓪ ꓡꓰ ꓗꓷ=

1966 ꓘꓳꓼ 12ꓦ ꓕꓯ UN ꓟꓬꓱꓽ ꓢꓲꓽ ꓒ ꓝꓮꓲ ꓕꓲ ꓧꓪꓹ ꓢꓲˍ ꓟ ꓗꓪ ꓟꓲ U Thant ꓧꓪꓸ ꓡꓰꓳ= ꓬꓲꓸ ꓟꓬꓱꓽ ꓢꓲꓽ ꓒ ꓬꓰˍ ꓟ 2 ꓧꓪꓹ ꓕꓲ ꓧꓪꓹ ꓗꓪ ꓠꓬ Asia ꓐꓰ Africa ꓗꓪ ꓟ ꓗꓴꓷꓼ ꓮꓽ ꓟꓬꓹ ꓔꓯ UN ꓜꓴ ꓗꓪ ꓓꓵꓽ ꓡꓰ ꓠ ꓬꓰ ꓐ ꓡ ꓗꓷꓳ= UN ꓜꓴ ꓔꓯ ꓥˍ ꓟꓲ ꓟꓲ ꓠꓯ ꓔꓯ ꓣꓱꓽ ꓙˍ ꓟ ꓟꓬꓱꓽ ꓗꓪ ꓐ ꓠꓹ ꓟ ꓬꓰ ꓖꓶ ꓗꓷꓳ=

ꓠꓬꓲꓽ ꓧꓪꓹ ꓕꓲ ꓧꓪꓹ UN ꓟꓬꓱꓽ ꓢꓲꓽ ꓒ ꓣꓱꓽˍ ꓟ ꓦꓬꓼ ꓠꓬꓲ ꓖꓴ ꓡꓰ ꓔꓬ ꓕꓯ Arab-Israel ꓟꓯꓼ ꓓꓶꓽ ꓡꓯ ꓘꓳꓹ ꓟ ꓐꓰ꓾ Vietnam ꓟꓯꓼ ꓓꓶꓽ ꓡꓯ ꓘꓳꓹ ꓟ ꓓꓳ ꓡ ꓠꓬꓲ ꓫꓵꓽ ꓪꓴ ꓖꓳ ꓟ ꓔꓯˍ ꓟꓲ U Thant ꓡꓰ ꓢꓲ ꓡꓲ ꓗꓷ ꓡꓰ ꓠ ꓬꓰ ꓐ ꓡ ꓗꓷꓳ= ꓬꓲ ꓔꓯ UN ꓗꓪ ꓝꓮꓲ ꓝ ꓢꓲ ꓟꓬꓱꓽ ꓬꓰ ꓠꓹ ꓟ ꓐꓯ ꓖꓶˍ ꓟꓲ ꓬꓲ ꓠꓬ ꓟꓽ ꓬꓰ ꓬꓰ ꓠꓽ ꓗꓷꓳ=

U Thant ꓠꓬ UN ꓟꓬꓱꓽ ꓢꓲꓽ ꓒ ꓬꓰˍ ꓟ ꓗꓪ ꓐꓰ ꓠꓽ ꓗꓷ ꓗꓸ ꓠꓯꓸ New York ꓡꓳ ꓒꓱ ꓗꓪ ꓡꓰꓽ ꓔꓬ ꓢꓲ ꓕꓳꓽ ꓶ ꓐꓳ ꓠꓬꓲ ꓐꓰ ꓬꓲ ꓤꓶꓻ ꓔꓯ ꓗꓳꓸ ꓗꓷꓳ=

1974 ꓘꓳꓼ 11 ꓦ 25 ꓠꓬꓲ ꓕꓯ New York ꓡꓳ ꓒꓱ ꓗꓪ ꓐꓵꓼ ꓟꓵ cancer ꓠꓻ ꓪꓴꓸ ꓠꓬꓲ ꓫꓵꓻ ꓗꓷꓳ= U Thant ꓫꓵꓻ ꓟꓳ ꓔꓯ Shwedagon ꓗꓪ ꓟ Kandawmin ꓢꓲꓹ ꓪꓰꓻ ꓟꓲꓺ ꓗꓪ ꓔꓵꓸ ꓗꓷꓳ= ꓬꓲ ꓡꓱꓼ ꓜꓴ ꓠꓬ Takhin Kodaw Mine꓾Su Phayar Latt꓾ Daw Khin Kyi ꓡꓱꓼ ꓜꓴ ꓐꓴ ꓐꓰ ꓕꓲ ꓪꓽ ꓓꓹ ꓡꓳ=

Photo credit

Add new comment

18 + 1 =