Khaby Lame ꓟꓸ ꓟꓲꓽ

ꓔꓲꓗꓔꓳꓗ ꓗꓪ ꓝꓳꓡꓡꓳꓪꓰꓣꓢ ꓮ ꓘꓶꓸ ꓟꓬ ꓢꓴ ꓫꓸ ꓪ ꓟꓽ ꓕꓱ ꓛꓲ ꓡꓴ ꓡꓯꓼ ꓡꓴ ꓡꓰ ꓟꓸ ꓖꓶ ꓢꓲ ꓡ ꓞꓳ ꓮ ꓟꓬꓹ ꓢꓷꓸ ꓔ ꓟ Khaby Lame ꓚꓱꓹ ꓔꓯ ꓐꓯ ꓟꓸ ꓖꓶ ꓓꓴ ꓥꓳ=

Khabane Khaby Lame ꓔꓯ ꓠꓬ ꓐꓶ ꓓꓵꓽ ꓮꓝꓣꓲꓚꓮ Senegal ꓗꓪ 3 ꓦ 9 ꓠꓬꓲ 2000 ꓘꓳꓼ ꓕꓯ ꓦꓵ ꓔ ꓡꓳ= ꓬꓲ ꓐꓹ ꓐ ꓟꓬꓱꓺ ꓠꓬ Mr. Lame ꓥ ꓢꓲ ꓬꓲ ꓟꓹ ꓟ ꓠꓬ Mrs. Lame ꓥ ꓡꓳ= ꓬꓲ ꓠꓬ ꓢꓰꓠꓰꓖꓮꓡ ꓞꓳ ꓫꓵꓽ ꓥ ꓢꓲ꓾ ꓙꓲ-ꓢꓴ ꓢꓲ ꓤ ꓔꓯ ꓙꓵꓻ ꓢꓴ ꓕꓳ ꓣꓳ_ ꓟ ꓥ ꓡꓳ= ꓬꓲ ꓞꓲꓼ 1 ꓘꓳꓼ ꓡꓳꓼ ꓬꓰ ꓕꓯ ꓬꓲ ꓪ ꓕꓲ ꓦꓲꓻ ꓢꓴ ꓠꓬ ꓲ-ꓔ-ꓡꓲ Chavasso ꓔꓬ ꓦꓲꓻ ꓗꓪ ꓚꓵꓸ ꓡꓰ ꓢꓲ ꓮ ꓟꓶ ꓗꓪ ꓛꓲ ꓖꓳ ꓗꓪ ꓡꓰ ꓔꓬ ꓟ ꓥꓳ= ꓝꓮꓲ ꓟꓽ ꓞꓲ ꓬꓲ ꓠꓬ ꓲ-ꓔ-ꓡꓲ ꓗꓴꓷꓼ ꓢꓴ ꓘꓳꓹ ꓣꓴ ꓗꓷ ꓢꓲ꓾ 2020 ꓘꓳꓼ 10 ꓦ ꓕꓯ Zaira Nucci ꓐꓰ ꓡꓯ ꓒꓯꓹ ꓝꓸ ꓗꓷ ꓟ ꓥꓳ= ꓬꓲ ꓬꓲ ꓠꓬꓲ ꓤ 3 ꓫꓵꓸ ꓔꓬ ꓢꓲ꓾ Italy Chivasso  ꓗꓪ ꓢꓷꓸ ꓠꓲꓹ ꓙꓵꓽ ꓪꓴꓸ ꓛꓴ ꓪ ꓡꓰ ꓟ ꓥꓳ= ꓞꓲꓼ ꓣꓳ_ ꓟ ꓙꓵꓹ ꓗꓪ ꓐꓰ ꓐꓲ ꓡꓴꓸ ꓐꓰ Basketball ꓔꓯ ꓥ ꓟꓲ ꓠꓲꓹ ꓟ ꓐ ꓢꓲ ꓡꓳ ꓖꓪ_ ꓟ ꓥꓳ= Lame ꓠꓬ 2020 ꓘꓳꓼ 3 ꓦ ꓬꓲ ꓟꓬꓱꓽ ꓟꓽ ꓠ ꓢꓲ ꓕꓯ Turin ꓑ ꓕꓲ ꓗꓪ ꓔꓬ ꓟ ꓙꓼ ꓦꓲꓻ ꓕꓲ ꓟ ꓗꓪ ꓚꓠꓚ ꓙꓼ operator ꓐꓰ ꓟꓬꓱꓽ ꓬꓰ ꓗꓷ ꓟ ꓥꓳ= ꓚꓳꓦꓲꓓ 19 ꓠꓻ ꓫꓵ ꓑꓶ ꓓꓴ ꓟꓬꓱꓽ ꓠꓽ ꓡꓰ ꓗ ꓠꓯꓸ ꓔꓬ ꓦꓲꓻ ꓗꓪ ꓡꓰ ꓡꓳꓚꓗꓓꓳꓪꓠ ꓔꓬ ꓟ ꓙꓵꓹ ꓗꓪ ꓬꓲ ꓠꓬ ꓔꓲꓗꓔꓳꓗ ꓔꓯ ꓓ ꓪꓴꓸ ꓣꓱꓽ_ ꓟ ꓥꓳ= ꓬꓲ ꓠꓬ ꓕꓲ ꓠꓬꓲ ꓕꓲ ꓠꓬꓲ ꓬꓰ_ ꓟ ꓣꓱꓽ_ ꓟ ꓟꓬꓱꓽ ꓔꓯ ꓠꓱꓸ ꓐꓯꓼ ꓢꓴ ꓡꓰ ꓮ ꓘꓶꓸ ꓫꓸ ꓠ ꓬꓰ ꓔꓬ ꓟ ꓔꓯ ꓬꓲ ꓡꓰ ꓝꓮꓲ ꓢ_ ꓟ ꓚꓱꓹ ꓗꓪ ꓐꓰ ꓬꓰ ꓟꓸ ꓖꓶ ꓢꓲ ꓫꓸ ꓪ ꓟꓽ ꓕꓱ ꓬꓰ ꓟꓸ ꓔ ꓟ ꓦꓲꓓꓰꓳ ꓐꓰ ꓥ ꓢꓲ ꓡ ꓞꓳ ꓮ ꓘꓶꓸ ꓢꓷꓸ ꓡ_ ꓟ ꓥꓳ=

ꓬꓲ ꓓꓽ ꓪꓴꓸ ꓔꓲꓗꓔꓳꓗ ꓔꓯ ꓣꓱꓽ_ ꓕꓯ ꓬꓲ ꓦꓲꓓꓰꓳ ꓔꓯ ꓛꓳꓽ ꓢꓴ 2 ꓣꓳ ꓛꓲ ꓡꓰ ꓔꓬ ꓟ ꓥꓳ= ꓕꓱ ꓠꓬꓲ ꓣꓳ ꓟ ꓠꓬ ꓬꓲ ꓐꓹ ꓐ ꓐꓰ ꓟꓹ ꓟ ꓡꓰ ꓥ ꓡꓳ= ꓬꓲ youtube subscribes ꓠꓬ ꓠꓬꓲ subscribes ꓡꓰ ꓙꓳ_ ꓟ ꓥꓳ= ꓖꓳ ꓡꓱ ꓥ ꓟꓲ ꓬꓲ ꓠꓬ ꓠꓲꓹ ꓟ ꓟꓽ ꓣꓳ ꓬꓲ ꓦꓲꓓꓰꓳ ꓔꓯ ꓡꓰ ꓠꓲꓹ ꓟ ꓫꓵ ꓫꓵ ꓡꓰ ꓢꓯꓼ ꓕꓵꓼ ꓟ ꓑꓶ ꓓꓴ ꓗ ꓠꓯꓸ ꓠꓬ ꓬꓲ ꓦꓲꓓꓰꓳ ꓔꓯ ꓡ ꓞꓳ ꓮ ꓘꓶꓸ ꓠꓲꓹ ꓫꓵ_ ꓟ ꓒꓬꓱꓼ ꓡ ꓟ ꓥ ꓢꓲ꓾ ꓟꓵꓽ ꓗꓳꓸ ꓓꓵꓽ ꓓꓵꓽ ꓗꓪ ꓐꓰ ꓬꓲ ꓔꓯ ꓢꓯꓼ ꓖꓶ ꓢꓴ ꓮ ꓟꓬꓹ ꓟꓬ ꓡ ꓟ ꓥꓳ= ꓮ ꓟꓶ ꓬꓲ ꓔꓲꓗꓔꓳꓗ ꓝꓳꓡꓡꓳꓪꓰꓣꓢ ꓠꓬ 154 ꓟ ꓙꓳ ꓡꓰ ꓟ ꓥꓳ= Instagram followers ꓠꓬ 79 ꓟ ꓙꓳ ꓡꓰ ꓟ ꓥꓳ=

2021 ꓘꓳꓼ 4 ꓦ ꓕꓯ ꓬꓲ ꓔꓲꓗꓔꓳꓗ ꓠꓬ ꓲ-ꓔ-ꓡꓲ ꓞꓳ ꓫꓵꓽ ꓝꓳꓡꓡꓳꓪꓰꓣ ꓮ ꓘꓶꓸ ꓟꓬꓽ ꓢꓴ Gianluca Vacchi ꓓꓰ ꓢ ꓙ ꓡꓰ ꓢꓲ 2021 ꓘꓳꓼ 7 ꓦ ꓕꓯ Addison Rae ꓔꓯ ꓙ ꓡꓰ ꓢꓲ ꓠ ꓐ ꓠꓬꓲ ꓡꓲꓗꓰ ꓮ ꓘꓶꓸ ꓟꓬ ꓢꓴ ꓗꓷ ꓡꓰ ꓟ ꓥꓳ= ꓝꓮꓲ ꓟꓽ ꓞꓲ 2023 ꓘꓳꓼ 1 ꓦ ꓕꓯ ꓡ ꓞꓳ ꓮ ꓘꓶꓸ ꓠꓲꓹ ꓫꓵ_ ꓟ ꓦꓲꓓꓰꓳ 25 ꓟ ꓗꓪ ꓐꓰ 6 ꓟ ꓠꓬ ꓬꓲ ꓔꓯ ꓥ ꓡꓳ= ꓬꓲ ꓠꓯꓼ ꓗꓪ ꓮ ꓟꓬ ꓫꓸ ꓓꓴ ꓔꓳꓹ ꓜꓳ ꓥ ꓟꓲ ꓠꓲꓹ ꓟ ꓫꓵ ꓫꓵ ꓡꓰ ꓢꓯꓼ ꓕꓵꓼ_ ꓟ ꓑꓶ ꓓꓴ ꓮ ꓟꓶ ꓬꓲ ꓧꓪꓸ ꓡꓰ_ ꓟ ꓥꓳ= ꓟꓽ ꓥ ꓠꓬ ꓬꓲ ꓟꓬꓱꓽ ꓠꓽ ꓓꓴ ꓗꓷ ꓡꓰ ꓢꓲ ꓠꓲꓹ ꓟ ꓣꓳ ꓔꓬ ꓠꓬ ꓮ ꓟꓶ ꓣꓳ ꓔꓯ ꓗꓹ ꓛꓲ ꓓꓴ ꓖꓶ_ ꓟ Khaby Lame ꓐꓰ ꓒꓬꓱꓼ ꓡ ꓓꓴ ꓟꓽ ꓥ꓾ ꓖꓳ ꓟ ꓡꓰ ꓟꓽ ꓞꓲ ꓬꓲ ꓡꓰ ꓡ ꓞꓳ ꓐꓴ ꓗꓹ ꓛꓲ ꓔꓬ ꓟ ꓔꓯ ꓥꓪ ꓠꓲꓹ ꓫꓵ_ ꓡꓳ ꓐꓰ ꓐꓯ ꓔ ꓡꓳ= ꓬꓲ ꓫꓸ ꓔ ꓟ ꓗꓪ ꓐꓰ ꓧꓪꓸ ꓡꓰ ꓓꓴ ꓢꓯꓼ ꓕꓵꓼ_ ꓟ ꓠꓲꓹ ꓟ ꓔꓯ ꓣꓳ ꓮ ꓙꓵꓽ ꓢꓴ ꓥ ꓟꓲ ꓞꓳ ꓫꓱꓽ ꓠꓹ ꓟ ꓥ ꓡꓳ=