Tom Cruise ꓟꓸ ꓟꓲꓽ

ꓬꓲ ꓟꓬꓱꓺ ꓠꓬ Thomas Cruise Mapother IV ꓥ ꓡꓳ= ꓬꓲ ꓠꓬ ꓮ ꓘꓶꓸ ꓟꓬꓱꓺ ꓓꓳ ꓙꓳˍ ꓟ Hollywood ꓢꓯꓸ ꓐꓬꓱꓽ ꓔꓯꓺ ꓢꓴ ꓥꓳ= ꓬꓲ ꓔꓯ 1962ꓘꓳꓼ 7 ꓦ 3ꓠꓬꓲ ꓕꓯ ꓴꓢ ꓗꓴꓷꓼ New York ꓡꓳ ꓒꓱ Syracuse ꓗꓪ ꓦꓵꓻ ꓔ ꓡꓳ=

ꓬꓲ ꓐꓹ ꓐ ꓟꓬꓱ ꓠꓬ Thomas Mapother III ꓥ ꓢꓲ ꓬꓲ ꓟꓹ ꓟ ꓟꓬꓱꓺ ꓠꓬ Mary Lee Pfeiffer ꓥ ꓡꓳ= ꓬꓲ ꓐꓹ ꓐ ꓠꓬ electrical engineer ꓕꓲ ꓣꓳ ꓥ ꓢꓲ ꓬꓲ ꓟꓹ ꓟ ꓠꓬ ꓢꓷꓸ ꓠꓲꓹ ꓢꓳ ꓣꓴˍ ꓟ ꓗꓪ ꓧꓶꓽ ꓧꓶꓽ ꓢꓳ ꓟꓽ ꓐ ꓡ ꓢꓴ꓾ ꓠꓱꓸ ꓐꓯꓼ ꓤ ꓠꓱ ꓤ ꓔꓯ ꓟꓸ ꓫꓱꓸ ꓢꓴ ꓐꓴ ꓔꓯ ꓟꓸ ꓖꓶˍ ꓟ ꓟꓸ ꓟ ꓕꓲ ꓣꓳ ꓥ ꓡꓳ=

ꓬꓲ ꓔꓯ ꓮ ꓝꓲ ꓠꓬꓲꓽ ꓣꓳ ꓐꓰ ꓠꓬꓲ ꓟ ꓕꓲ ꓣꓳ ꓙꓳˍ ꓡꓳ= ꓬꓲ ꓞꓲꓼ ꓣꓳˍ ꓕꓯ ꓡꓰ ꓬꓲ ꓪ ꓐꓴ ꓔꓯ ꓒꓴ ꓮꓽ ꓟꓬꓹ ꓟꓽ ꓙꓳ= ꓞꓳ ꓫꓸ ꓥ ꓡꓳ= ꓬꓲ ꓐꓹ ꓐ ꓠꓬ ꓬꓲ ꓔꓯ ꓞꓲꓼ ꓣꓳˍ ꓕꓯ ꓓꓶꓽ ꓠꓬꓲ ꓔꓲ ꓠꓬꓲ ꓬꓰ ꓖꓶˍ ꓡꓳ=

ꓬꓲ ꓐꓹ ꓐ ꓔꓯ ꓟꓬꓱꓽ ꓙꓳ ꓡꓰ ꓗꓸ ꓠꓯ ꓬꓲ ꓕꓲ ꓦꓲꓻ ꓢꓴ ꓠꓬ ꓗꓪ ꓔꓬ ꓬꓰˍ ꓡꓳ= ꓖꓳ ꓡꓱ ꓥˍ ꓟꓲ꓾ ꓬꓲ ꓪ ꓐꓴ Canada ꓗꓪ ꓔꓬ ꓬꓰ ꓢꓲ ꓟꓽ ꓟꓶ ꓫꓵ ꓕꓯ ꓬꓲꓸ ꓐꓹ ꓐ ꓟꓹ ꓟ ꓐꓴ ꓒꓰꓹ ꓡꓯꓽ ꓘꓳ ꓗꓷ ꓟ ꓑꓶꓸ ꓓꓴ ꓾ ꓬꓲꓸ ꓠꓬ ꓬꓲꓸ ꓟꓹ ꓟ ꓾ ꓬꓲ ꓮ ꓝꓲ ꓠꓬꓲ ꓟ ꓐꓴ ꓐꓰ ꓕꓲ ꓪꓺꓽ US ꓗꓪ ꓬꓲꓼ ꓙꓰ ꓗꓷꓳ=

ꓟꓲ ꓠꓯ ꓢꓷꓸ ꓠꓲꓹ ꓢꓳ ꓔꓬ ꓕꓯ ꓡꓰ ꓬꓲ ꓠꓬ ꓢꓯꓸ ꓐꓬꓱꓽ ꓓꓱꓽˍ ꓟ ꓗꓪ ꓐ ꓗꓷꓳ= ꓬꓲ ꓔꓯ ꓢꓷꓸ ꓠꓲꓹ ꓟꓸ ꓖꓶ ꓔꓬ ꓟ ꓟꓸ ꓟ ꓕꓲ ꓣꓳˍ ꓟꓲ ꓬꓲ ꓠꓬ ꓢꓯꓸ ꓐꓬꓱꓽ ꓔꓯˍ ꓟ ꓗꓪ ꓓ ꓒ ꓥ ꓟ ꓡꓳꓸ ꓓꓳ ꓡˍ ꓠꓬꓲ꓾ ꓬꓲ ꓔꓯ ꓢꓯꓼ ꓖꓶꓽ ꓗꓷꓳ=

ꓬꓲ ꓞꓲꓼ 10 ꓘꓳꓼ ꓟꓽ ꓞꓲ ꓙꓳ ꓡˍ ꓕꓯ Franciscan ꓜꓳꓽ ꓦꓲꓻ ꓗꓪ ꓔꓬ ꓢꓲ ꓖꓳ ꓗꓪ ꓝ ꓢꓲ ꓢꓷꓸ ꓠꓲꓹ ꓢꓳ ꓪˍ ꓟ ꓡꓯꓼ ꓫꓴ scholarship ꓟꓶ ꓡꓰ ꓢꓲ ꓬꓲ ꓠꓬ ꓗ-ꓔꓳ-ꓡꓲ ꓔꓲ ꓒ ꓕꓲ ꓣꓳ ꓒꓬꓱꓼ ꓡ ꓠꓹ ꓟ ꓢꓯꓼ ꓕꓵꓼˍ ꓡꓳ= ꓖꓳ ꓡꓱ ꓥˍ ꓟꓲ ꓗꓸ ꓠꓯꓸ ꓕꓯ ꓬꓲ ꓠꓬ ꓔꓲꓺ ꓒ ꓒꓬꓱꓼ ꓠꓲꓹ ꓫꓵˍ ꓟ ꓠꓲꓹ ꓡꓶꓽ ꓔꓯ ꓡꓳꓺ ꓦ ꓗꓷ ꓢꓲ ꓢꓯꓸ ꓐꓬꓱꓽ ꓔꓯˍ ꓟ ꓗꓪ ꓢꓯꓼ ꓕꓵꓼ ꓠꓹ ꓟ ꓓꓵꓽ ꓙ ꓞꓷꓹ ꓗꓷꓳ=

ꓬꓲ ꓠꓬ New York ꓡꓳ ꓒꓱ ꓗꓪ ꓙꓰ ꓗꓷ ꓢꓲ ꓾ 1981 ꓘꓳꓼ ꓬꓲ ꓞꓲꓼ 19 ꓘꓳꓼ ꓕꓯ ‘Endless Love’ ꓐꓰ ꓟꓬꓱꓺ ꓔ ꓟ ꓢꓯꓸ ꓐꓬꓱꓽ ꓓꓱꓽ ꓧꓪꓸ ꓡꓰ ꓗꓷꓳ=

1983 ꓘꓳꓼ ꓕꓯ Risky Business ꓟꓬꓱꓺ ꓔ ꓟ ꓢꓯꓸ ꓐꓬꓱꓽ ꓗꓪˍ ꓟꓲ ꓔꓯꓺ ꓗꓷꓳ= ꓢꓯꓸ ꓐꓬꓱꓽ ꓕꓱ ꓟ ꓠꓬ ꓮ ꓘꓶꓸ ꓟꓬꓱꓺ ꓓꓳꓽ ꓙꓳ ꓡ ꓢꓲ꓾ Tom Cruise ꓬꓲꓸ ꓒꓬꓱꓽ ꓮ ꓘꓶꓸ ꓡꓳꓸ ꓐꓲˍ ꓟ ꓪꓴꓸ ꓠꓬꓲ American ꓤ ꓟꓶ ꓤ ꓐꓴ ꓮꓽ ꓟꓬꓹ ꓢꓯꓼ ꓖꓶˍ ꓟ ꓟꓶ ꓗꓷꓳ=

1986 ꓘꓳꓼ ꓕꓯ ꓬꓲ ꓠꓬ ‘Top Gun’ ꓢꓯꓸ ꓐꓬꓱꓽ ꓪꓴꓸ ꓠꓬꓲ superstar ꓕꓲ ꓣꓳ ꓒꓬꓱꓼ ꓡ ꓗꓷꓳ= 1980 ꓘꓳꓼ ꓗꓸ ꓠꓯꓸ ꓬꓲ ꓠꓬ ‘The Color of money’꓾ ‘Cocktail’꓾ ‘Rain Man’ ꓐꓰ ‘Born on the Fourth of July’ ꓢꓯꓸ ꓐꓬꓱꓽ ꓐꓴ ꓗꓪ ꓐꓰ ꓟꓬꓱꓺ ꓓꓳꓽ ꓮ ꓘꓶꓸ ꓟꓶ ꓡꓰ ꓗꓷꓳ=

ꓬꓲ ꓠꓬ 1996 ꓘꓳꓼ ‘Mission: Impossible’ ꓢꓯꓸ ꓐꓬꓱꓽ ꓗꓪ ꓔꓯꓺ ꓗꓷ ꓟ ꓑꓶꓸ ꓓꓴ ꓮ ꓘꓶꓸ ꓐꓰ ꓮ ꓘꓶꓸ ꓟꓬꓱꓺ ꓓꓳ: ꓙꓳ ꓡꓺꓳ= ꓬꓲ ꓠꓬ ‘Eyes Wide Shut’꓾ ‘Vanilla Sky’꓾ ‘Minority Report’꓾ ‘The Last Samurai’꓾ ‘Collateral’꓾ ‘War of the Worlds’ ꓐꓰ ‘Lions for Lambs’ ꓢꓯꓸ ꓐꓬꓱꓽ ꓗꓪ ꓔꓯꓺ ꓗꓷ ꓟ ꓪꓴꓸ ꓠꓬꓲ 1990 ꓐꓰ 2000 ꓘꓳꓼ ꓠꓬꓲꓽ ꓗꓴꓸ ꓚꓸꓼ ꓗꓪ ꓝ ꓢꓲ ꓟꓬꓱꓺ ꓓꓳꓽ ꓙꓳˍ ꓟ popular star ꓒꓬꓱꓼ ꓡ ꓗꓷꓳ=

ꓖꓳ ꓟ ꓡꓰ ꓐꓰ ꓟꓬꓱꓺ ꓓꓳꓽ ꓙꓳˍ ꓟ ꓢꓯꓸ ꓐꓬꓱꓽ ꓐꓴ ꓠꓬ ‘Rock of Ages’꓾ ‘Jack Reacher’꓾ ‘Oblivion’ ꓐꓰ ‘Edge of Tomorrow’꓾ Mission: Impossible – Rogue Nation꓾ Jack Reacher: Never Go Back꓾ The Mummy꓾ American Made꓾ Mission: Impossible – Fallout꓾ Top Gun: Maverick ꓐꓴ ꓥ ꓡꓳ=

ꓞꓳꓹ ꓤ ꓮꓽ ꓟꓬꓹ ꓟꓽ ꓢꓷꓸ ꓔ ꓟ ꓬꓲ ꓚꓱꓹ ꓐꓴ ꓠꓬ꓾

ꓬꓲ ꓠꓬ ꓢꓯꓸ ꓐꓬꓱꓽ ꓔꓯꓺ ꓖꓴ ꓗꓪ ꓟꓬꓱꓽ ꓬꓰ ꓔꓬ ꓟ ꓪꓴꓸ ꓠꓬꓲ ꓬꓲ ꓢꓷꓸ ꓠꓲꓹ ꓢꓳ ꓡꓳꓹ ꓬꓰ ꓢꓲ ꓢꓳ ꓡꓳꓹ ꓬꓰ ꓟ ꓙꓵꓽ ꓪꓴꓸ ꓛꓴꓽ ꓖꓶˍ ꓟ ꓑꓮꓲꓽ ꓗꓪ ꓬꓲ ꓟꓽ ꓙꓰ ꓪ ꓡꓰ= Tom ꓠꓬ ꓙꓵꓻ ꓠꓲꓹ ꓙꓳˍ ꓟ ꓗ-ꓔꓳ-ꓡꓲ ꓦꓲꓻ ꓗꓪ ꓐꓰ ꓪꓴꓽ ꓡ ꓢꓲ ꓬꓲ ꓠꓬ ꓗ-ꓔꓳ-ꓡꓲ ꓔꓲꓺ ꓒ ꓒꓬꓱꓼ ꓠꓲꓹ ꓟ ꓙꓳˍ ꓡꓳ=

ꓬꓲ ꓞꓲꓼ 14 ꓘꓳꓼ ꓕꓯ ꓬꓲ ꓠꓬ Cincinnati ꓗꓪ ꓟ Franciscan ꓢꓷꓸ ꓠꓲꓹ ꓢꓳ ꓦꓲꓻ ꓗꓪ ꓐꓰ ꓝ ꓢꓲ ꓢꓷꓸ ꓠꓲꓹ ꓢꓳˍ ꓟ ꓡꓯꓼ ꓫꓴ scholarship ꓟꓶ ꓡꓰ ꓗꓷ ꓥˍ ꓟꓲ Hollywood ꓢꓯꓸ ꓐꓬꓱꓽ ꓔꓯˍ ꓟ ꓔꓯ ꓟꓬꓽ ꓠꓬꓲ ꓠꓲꓹ ꓟ ꓐ ꓗꓷꓳ=

The Color of Money ꓢꓯꓸ ꓐꓬꓱꓽ ꓔꓯ ꓔꓬ ꓕꓯ ꓬꓲ ꓠꓬ ꓟꓳ-ꓓꓳ ꓫꓵꓸ ꓔꓯꓺ ꓡꓯꓽ ꓘꓳꓹ ꓟ ꓔꓯ ꓠꓲꓹ ꓟ ꓙꓳˍ ꓟ ꓪꓴꓸ ꓠꓬꓲ ꓟꓳ-ꓓꓳ ꓫꓵꓸ ꓔꓯꓺ ꓡꓯꓽ ꓘꓳꓹ ꓟ ꓜꓴꓻ ꓗꓪ ꓓꓵꓽ ꓢꓲ ꓟꓳ-ꓓꓳ ꓫꓵꓸ ꓔꓯꓺ ꓡꓯꓽ ꓘꓳ ꓗꓷꓳ= ꓝꓮꓲ ꓬꓲ ꓠꓬ ꓢꓷꓸ ꓠꓲꓹ ꓢꓳ ꓔꓬ ꓕꓯ ꓬꓲ ꓢꓳ ꓔꓬ ꓟ ꓢꓳ ꓦꓲꓻ ꓗꓪ ꓚꓴꓹ ꓡꓯꓽ ꓘꓳꓹ ꓟ ꓗꓪ ꓓꓽ ꓒ ꓕꓲ ꓣꓳˍ ꓟꓲ ꓥ ꓡꓳ=

1992 ꓘꓳꓼ ꓕꓯ ꓬꓲ ꓠꓬ Isabella Jane Kidman Cruise ꓔꓯ ꓖꓳꓻ ꓦꓵꓻ ꓗꓷ ꓢꓲ꓾ 1995 ꓘꓳꓼ ꓕꓯ ꓠꓬ Connor Antony Kidman Cruise ꓔꓯ ꓖꓳꓻ ꓦꓵꓻ ꓗꓷꓳ= ꓬꓲ ꓠꓬ ꓬꓲ ꓕꓲ ꓤꓶꓻ ꓗꓪ 3 ꓧꓪꓹ ꓡꓯꓽ ꓒꓯꓹ ꓝ ꓗꓷꓳ= ꓬꓲ ꓔꓯˍ ꓟꓲ ꓐꓬꓱꓻ ꓦꓲꓻ ꓫꓵˍ ꓟ license ꓙꓳˍ ꓡꓳ= ꓬꓲ ꓠꓬ Japan ꓗꓴꓷꓼ ꓗꓪ ꓟꓽ ꓠꓽ ꓠꓽ ꓙꓰˍ ꓟ ꓪꓴꓸ ꓠꓬꓲ 10 ꓦ 10 ꓠꓬꓲ ꓔꓯ “Tom Cruise Day,” ꓐꓰ ꓐꓯ ꓢꓲ ꓢꓷꓸ ꓙ ꓟꓳ ꓙ ꓔ ꓡꓳ=

ꓮ ꓟꓶ ꓬꓲ ꓠꓬ 59 ꓘꓳꓼ ꓙꓳ ꓢꓲ Clearwater꓾ Florida ꓗꓪ ꓔꓬ ꓡꓳ=

Add new comment

7 + 1 =