ꓐꓹ ꓐ ꓥꓪ ꓔꓯ ꓠꓲꓹ ꓠꓵˍ ꓟ ꓡꓰ ꓐꓰ꓾ ꓥꓪˍ ꓟꓲ ꓠꓴ ꓪ ꓔꓯ ꓠꓲꓹ ꓠꓵˍ ꓡꓳ

“ꓐꓹ ꓐ ꓥꓪ ꓔꓯ ꓠꓲꓹ ꓠꓵˍ ꓟ ꓡꓰ ꓐꓰ꓾ ꓥꓪˍ ꓟꓲ ꓠꓴ ꓪ ꓔꓯ ꓠꓲꓹ ꓠꓵˍ ꓡꓳ=” (ꓬꓳ-ꓦ 15ꓽ9)

ꓢꓲꓽ ꓫꓬ ꓕꓳꓽ ꓶ ꓝꓲꓸ ꓕꓱ ꓟ ꓗꓪ ꓣꓳ ꓢꓳꓻ ꓣꓴ ꓠ ꓔ ꓟ ꓐꓲꓻˍ ꓟ ꓙꓽ ꓗꓴꓸ ꓠꓲꓹ (3) ꓙꓰꓽ ꓙꓳˍ ꓡꓳ=

ꓬꓲ ꓪꓴꓸ ꓕꓲꓽ ꓙꓰꓽ ꓠꓬ꓾ ꓤ ꓔꓲꓸ ꓕꓯꓽ ꓢꓲ ꓗꓪ ꓐꓹ ꓐ ꓬꓲ ꓠꓵꓻ ꓠꓲꓹ ꓠꓬ ꓬꓲ ꓚꓱꓹ ꓮ ꓙꓵꓽ ꓗꓪ ꓐꓲ ꓜꓲꓼˍ ꓡꓳ= ꓠꓵꓻ ꓠꓲꓹ ꓖꓳ ꓟ ꓠꓬ ꓗꓽ ꓓꓴ ꓟꓽ ꓙꓳ= ꓠꓵꓻ ꓠꓲꓹ ꓖꓳ ꓟ ꓠꓬ ꓐꓹ ꓐ ꓔꓯ ꓙꓳˍ ꓟ ꓠꓵꓻ ꓠꓲꓹ ꓮ ꓙꓵꓽ ꓡꓱꓸꓼ ꓥ ꓡꓳ= ꓐꓹ ꓐ ꓬꓲ ꓠꓵꓻ ꓠꓲꓹ ꓔꓯ ꓘꓳꓹ ꓣꓴ ꓟꓶˍ ꓟ ꓗꓪ ꓐꓰ꓾ ꓢꓲ ꓒ ꓬꓰ-ꓢꓴ ꓬꓲ ꓠꓲꓹ ꓫꓵˍ ꓟ ꓮ ꓙꓵꓽ ꓔꓯ ꓟꓶ ꓡꓰ ꓟ ꓥ ꓡꓳ=

ꓠꓬꓲꓽ ꓙꓰꓽ ꓕꓲ ꓙꓰꓽ ꓠꓬ꓾ ꓐꓹ ꓐ ꓗꓪ ꓐꓰ ꓘꓳꓹ ꓣꓴ ꓟꓶˍ ꓟ ꓠꓵꓻ ꓠꓲꓹ ꓔꓯ ꓢꓲ ꓒ ꓬꓰ-ꓢꓴ ꓠꓬ ꓚꓵ ꓔ ꓟꓽ ꓐ ꓡ ꓐꓯ ꓟ ꓥ ꓡꓳ= ꓬꓲ ꓠꓬ ꓬꓲ ꓚꓲꓸ ꓛꓬ ꓡꓰ ꓠꓵꓻ ꓠꓲꓹ ꓖꓳ ꓟ ꓔꓯ ꓫ ꓔ ꓟꓽ ꓐ ꓡ= ꓐꓹ ꓐ ꓬꓲ ꓠꓵꓻ ꓠꓲꓹ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓠꓲꓹ ꓟ ꓗꓪ ꓐꓰ ꓡꓶꓽ ꓓꓳꓻ ꓡˍ ꓡꓳ= ꓢꓲ ꓒ ꓬꓰ-ꓢꓴ ꓔꓬ ꓗꓪ ꓚꓳꓸ ꓣꓳꓽ ꓠꓯꓸꓼ ꓗꓪ ꓓꓵꓽ ꓡ ꓟ ꓠꓵꓻ ꓠꓲꓹ ꓠꓬ ꓮ ꓘꓶꓸ ꓪꓴꓽˍ ꓟ ꓥ ꓡꓳ=

ꓢ ꓙꓰꓽ ꓕꓲ ꓙꓰꓽ ꓠꓬ꓾ ꓣꓳ ꓔꓯ ꓮ ꓟꓶ ꓕꓯ ꓖꓶ ꓔ ꓟ ꓣꓳ ꓔꓯ ꓪꓸ ꓔ ꓖꓶˍ ꓟ ꓠꓵꓻ ꓠꓲꓹ ꓕꓱ ꓟ ꓠꓬ ꓣꓳ ꓠꓯꓸꓼ ꓗꓪ ꓥˍ ꓟꓲ ꓚꓵ ꓔ ꓟꓽ ꓐ ꓡ꓾ ꓠꓵꓻ ꓠꓲꓹ ꓖꓳ ꓟ ꓔꓯ ꓠꓱꓸ ꓐꓯꓼ ꓗꓪ ꓟꓽ ꓙꓰ ꓝꓲ ꓠꓹ ꓟ ꓛꓳꓹ ꓔ ꓟꓽ ꓐ ꓡ ꓐꓯ ꓟ ꓔꓯ ꓣꓳ ꓓꓵꓽ ꓙ ꓠꓬꓲ ꓠ ꓗꓹ ꓡꓳ= ꓠꓵꓻ ꓠꓲꓹ ꓖꓳ ꓟ ꓠꓬ ꓣꓳ ꓠꓲꓹ ꓟ ꓗꓪ ꓐꓰ ꓕꓲ ꓝꓸ ꓠꓱꓸ ꓐꓯ ꓢꓴ ꓔꓯ ꓧꓳꓽ ꓖꓶ ꓠ ꓗꓹ ꓡꓳ= ꓖꓳ ꓟ ꓑꓶꓸ ꓓꓴ ꓣꓳ ꓐꓴ ꓠꓬ ꓐꓹ ꓐ ꓐꓰ ꓤ ꓔꓲꓸ ꓬꓲ ꓠꓵꓻ ꓠꓲꓹ ꓔꓯ ꓘꓳꓹ ꓣꓴ ꓟꓶ ꓡꓰ ꓢꓴ ꓚꓵ ꓚꓵ ꓥ ꓕꓯ ꓠꓽ꓾ ꓠꓵꓻ ꓠꓲꓹ ꓖꓳ ꓟ ꓔꓯ ꓠꓱꓸ ꓐꓯ ꓢꓴ ꓔꓯ ꓥˍ ꓟꓲ ꓗꓽ ꓔ  ꓓꓴ ꓟꓽ ꓙꓳ ꓙꓳ ꓐꓱ ꓖꓶ ꓠ ꓔ ꓡꓳ=

ꓖꓳ ꓡꓱ ꓠꓬꓲ ꓗꓽ ꓔ ꓓꓴ ꓟꓽ ꓙꓳ ꓙꓳ ꓖꓶ ꓠꓹ ꓟ ꓠꓬ ꓒꓬꓱꓼ ꓡ ꓓꓹ ꓡ? ꓣꓳ ꓠꓬ ꓠꓱꓸ ꓐꓯ ꓢꓴ ꓔꓯ ꓣꓳ ꓕꓲ ꓠꓲꓹ ꓟ ꓡꓱꓸꓼ ꓠꓲꓹ ꓠꓵꓻ ꓠꓹ ꓟ ꓠꓽ ꓒꓬꓱꓼ ꓡ ꓓꓹ ꓡ꓾ ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓡꓯ= ꓥ ꓡꓳ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓐꓯ ꓔꓬ ꓟ ꓠꓵꓻ ꓠꓲꓹ ꓠꓬ ꓤ ꓔꓲ ꓔꓯ ꓐꓹ ꓐ ꓬꓲ ꓠꓲꓹ ꓟ ꓗꓪ ꓐꓰ ꓡꓶꓽ ꓓꓳꓻ ꓡˍ ꓟ ꓠꓵꓻ ꓠꓲꓹ ꓔꓯ꓾ ꓣꓳ ꓥˍ ꓟꓲ ꓢꓴ ꓔꓯ ꓐꓱꓻ ꓖꓶˍ ꓕꓯ ꓡꓰꓽ ꓕꓱ ꓟ ꓠꓬ ꓒꓬꓱꓼ ꓡ ꓓˍ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓠꓴ ꓐꓰ ꓥꓪ ꓔꓯ ꓢꓴ ꓔꓯ ꓐꓱ ꓶ ꓠꓹ ꓟ ꓠꓵꓻ ꓠꓲꓹ ꓠꓬ ꓟꓴꓽ ꓗꓪ ꓗꓪ ꓟ ꓐꓹ ꓐ ꓬꓲ ꓠꓲꓹ ꓟ ꓗꓪ ꓐꓰ ꓬꓯꓼ ꓡˍ ꓟ ꓠꓵꓻ ꓠꓲꓹ ꓥ ꓡꓳ꓾ ꓐꓯ ꓟ ꓔꓯ ꓠꓬꓲꓸ ꓠꓬꓲ ꓣꓳ ꓓꓵꓽ ꓙꓽ ꓠꓬꓲ ꓓꓴ ꓬꓰ ꓡꓯ= ꓐꓹ ꓐ ꓬꓲ ꓠꓲꓹ ꓟ ꓡꓰ ꓠꓲꓹ ꓠꓵꓻ ꓗꓴꓸ ꓠꓹ ꓟ ꓢꓳ ꓣꓴˍ ꓟ ꓗꓪ ꓬꓲ ꓪꓴꓸ ꓠ-ꓐ ꓕꓲꓽ ꓐꓰ ꓬꓳꓸ ꓚꓵˍ ꓟ ꓚꓱꓹ ꓠꓬ ꓣꓳ ꓔꓯ ꓠꓲꓹ ꓠꓵꓻ ꓠꓹ ꓟ ꓪꓴ-ꓢ ꓔꓯ ꓙꓵꓽ ꓪ ꓖꓶ ꓠꓹ ꓟ ꓥ ꓡꓳ= ꓕꓱ ꓡꓱ ꓬꓰ ꓠꓹ ꓟ ꓠꓬ ꓫꓸˍ ꓟ ꓫꓸˍ ꓥꓳ= ꓪꓴ-ꓢ ꓡꓰ ꓠꓴꓻ ꓐꓰ ꓥꓪ ꓔꓯ ꓠꓲꓹ ꓠꓵꓻ ꓝꓲ ꓠꓹ ꓟ꓾ ꓠꓵꓻ ꓠꓲꓹ ꓖꓳ ꓟ ꓔꓯ ꓘꓳ ꓣꓴ ꓟꓶ ꓠꓹ ꓟ꓾ ꓝꓮꓲ ꓠꓵꓻ ꓠꓲꓹ ꓖꓳ ꓟ ꓣꓳ ꓠꓯꓸꓼ ꓗꓪ ꓓꓯꓹ ꓝꓲ ꓠꓹ ꓟ ꓠꓬ ꓫꓸ ꓓꓴ ꓙꓳˍ ꓟꓲ ꓙꓳˍ ꓥꓳ=

ꓖꓳ ꓡꓱ ꓥ ꓟꓲ ꓪꓴ-ꓢ ꓠꓬ ꓬꓲ ꓐꓲ ꓜꓲꓼˍ ꓟ ꓠꓵꓻ ꓠꓲꓹ ꓗꓪ ꓐꓰ ꓣꓳꓽ ꓔꓯ ꓬꓲ ꓑꓶꓸ ꓟꓽ ꓞꓷꓹ ꓠꓲꓹ ꓠꓵꓻ ꓝꓲˍ ꓕꓯ꓾ ꓠꓵꓻ ꓠꓲꓹ ꓖꓳ ꓟ ꓠꓬ ꓣꓱꓽ ꓛꓰꓽ ꓐꓰ ꓫꓱꓸ ꓤ ꓠꓲꓹ ꓐꓲ ꓞꓹ ꓟ ꓬꓲꓻ ꓙꓬ ꓡꓴ ꓘꓴꓽˍ ꓡꓰ ꓐꓰ ꓣꓳ ꓔꓬ ꓗꓪ ꓬꓲ ꓓꓻ ꓬꓲ꓾ ꓬꓲ ꓔꓱꓹ ꓬꓲ ꓬꓲꓻ ꓓꓵꓽ ꓡˍ ꓟ ꓔꓯ ꓣꓳ ꓟꓳꓻ ꓪˍ ꓥꓳ=

ꓸꓸꓸꓸꓸ

ꓠꓲꓹ ꓠꓵˍ ꓟ ꓐꓹ ꓐ ꓐꓰ ꓤ ꓔꓲꓸꓳ꓾ ꓥꓪ ꓠꓬ ꓢꓲ ꓒ ꓔꓯ ꓠꓲꓹ ꓠꓵꓻ ꓢꓲ ꓢꓲ ꓒ ꓥˍ ꓟꓲ ꓥꓪ ꓔꓯ ꓠꓲꓹ ꓠꓵꓻˍ ꓟ ꓔꓯ ꓥꓪ ꓢꓷꓸˍ ꓡꓳ= ꓠꓴ ꓠꓵꓻ ꓠꓲꓹ ꓔꓯ ꓒꓴ ꓠꓹ ꓟ ꓥꓪ ꓔꓯ ꓬꓰ ꓙ ꓡꓯ= ꓠꓵꓻ ꓠꓲꓹ ꓖꓳ ꓟ ꓠꓬ ꓥꓪ ꓠꓲꓹ ꓟ ꓠꓯꓸꓼ ꓗꓪ ꓐꓰ ꓠꓱꓸ ꓐꓯ ꓢꓴ ꓔꓯ ꓬꓲꓻ ꓓꓵꓽ ꓙꓰ ꓠꓹ ꓟ ꓐꓱ ꓶ ꓠꓵꓻ ꓠꓲꓹ ꓖꓳ ꓟ ꓥꓪ ꓠꓯꓸꓼ ꓗꓪ ꓬꓲꓻ ꓓꓵꓽ ꓡ ꓠꓹ ꓟ ꓬꓰ ꓙ ꓖꓶ ꓡꓯ= ꓢꓲ ꓒ ꓬꓰ-ꓢꓴꓳ꓾ ꓥꓪ ꓠꓬ ꓢꓲꓺ ꓒ ꓔꓯ ꓙꓵꓻˍ ꓡꓳ=