ꓐꓹ ꓐ ꓥꓪ ꓔꓯ ꓠꓲꓹ ꓠꓵˍ ꓟ ꓡꓰ ꓐꓰ꓾ ꓥꓪˍ ꓟꓲ ꓠꓴ ꓪ ꓔꓯ ꓠꓲꓹ ꓠꓵˍ ꓡꓳ

YO-V 15:9-17
ꓐꓹ ꓐ ꓥꓪ ꓔꓯ ꓠꓲꓹ ꓠꓵˍ ꓟ ꓡꓰ ꓐꓰ꓾ ꓥꓪˍ ꓟꓲ ꓠꓴ ꓪꓽ ꓔꓯ ꓠꓲꓹ ꓠꓵˍ ꓡꓳ꓿ ꓥꓪ ꓠꓵ ꓠꓲꓹ ꓠꓯꓸꓼ ꓗꓪ ꓠꓴ ꓪꓽ ꓔꓬ꓿ꓐꓹ ꓐ ꓕꓵꓼ ꓪ ꓔꓯ ꓥꓪ ꓒꓵꓽ ꓛꓳ ꓢꓲ ꓬꓲ ꓠꓵ ꓠꓲꓹ ꓗꓪ ꓔꓬ ꓟ ꓡꓰ ꓐꓰ꓾ ꓥꓪ ꓕꓵꓼ ꓪꓽ ꓔꓯ ꓠꓴ ꓪꓽ ꓒꓵꓽ ꓛꓳˍ ꓠꓬ꓾ ꓥꓪ ꓠꓵ ꓠꓲꓹ ꓠꓯꓸꓼ ꓗꓪ ꓠꓴ ꓪꓽ ꓔꓬ ꓟꓶˍ ꓥꓳ꓿ꓥꓪ ꓗꓹ ꓛꓲ ꓠꓲꓹ ꓠꓴ ꓪꓽ ꓠꓯꓸꓼ ꓗꓪ ꓓꓯꓹ ꓢꓲ꓾ ꓠꓴ ꓪꓽ ꓗ ꓛꓲ ꓠꓲꓹ ꓐꓲ ꓡ ꓝꓲ ꓠꓹ ꓟ꓾ ꓠꓴ ꓪꓽ ꓔꓯ ꓥꓪ ꓕꓱ ꓟꓬ ꓙꓰꓽ ꓐꓯ ꓖꓶˍ ꓟ ꓥꓳ꓿
ꓠꓴ ꓪꓽ ꓔꓯ ꓥꓪ ꓠꓲꓹ ꓠꓵˍ ꓟ ꓡꓰ ꓐꓰ꓾ ꓠꓴ ꓪꓽˍ ꓟꓲ ꓕꓲ ꓣꓳ ꓛꓳ ꓕꓲ ꓣꓳ ꓠꓲꓹ ꓠꓵ ꓡꓯꓽ ꓘꓳ ꓠꓹ ꓟ ꓕꓱ ꓟ ꓠꓬ ꓥꓪ ꓕꓵꓼ ꓪ ꓥ ꓡꓳ꓿ꓡ ꓞꓳ ꓕꓲ ꓣꓳ ꓠꓬ ꓬꓲ ꓗꓪ ꓛꓳꓽ ꓐꓴ ꓐꓱ ꓶ ꓢꓯꓼ ꓟꓬ ꓖꓶ ꓗꓷˍ ꓟ ꓕꓱ ꓟ ꓕꓯ ꓢꓲ ꓪꓴꓽˍ ꓟ ꓠꓵ ꓠꓲꓹ ꓮꓽ ꓟˍ ꓟꓲ ꓟꓽ ꓙꓳ꓿
ꓥꓪ ꓡꓰ ꓠꓴ ꓪꓽ ꓔꓯ ꓕꓵꓼ ꓪ ꓖꓶˍ ꓟ ꓠꓴ ꓪꓽ ꓒꓵꓽ ꓛꓳˍ ꓠꓬ꓾ ꓠꓴ ꓪꓽ ꓠꓽ ꓥꓪ ꓗꓪ ꓛꓳꓽ ꓐꓴ ꓥꓳ꓿ꓥꓪ ꓠꓬ ꓕꓱ ꓡꓱ ꓖꓳ ꓑꓳ ꓠꓴ ꓪꓽ ꓔꓯ ꓚꓳ ꓑꓸ ꓟꓽ ꓘꓴ꓿ ꓮ ꓡꓲꓳ ꓐꓯ ꓠꓬ ꓚꓳ ꓑꓸ ꓠꓽ ꓬꓲ ꓢꓲ ꓒ ꓮꓸ ꓫꓵ ꓬꓰˍ ꓟ ꓬꓲ ꓟꓽ ꓢꓷ꓿ ꓥꓪ ꓠꓬ ꓠꓴ ꓪꓽ ꓔꓯ ꓗꓪ ꓛꓳꓽ ꓘꓴˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓐꓹ ꓐ ꓗꓪ ꓐꓰ ꓥꓪ ꓑ ꓙꓽˍ ꓟ ꓮꓽ ꓙꓵ ꓥꓪ ꓡꓰ ꓠꓴ ꓪꓽ ꓔꓯ ꓢꓷꓸ ꓡꓰ ꓝꓲꓳ꓿
ꓠꓴ ꓪꓽ ꓡꓰ ꓥꓪ ꓔꓯ ꓢꓲ ꓔ ꓟ ꓟꓽ ꓥ꓿ ꓥꓪ ꓡꓰ ꓠꓴ ꓪꓽ ꓔꓯ ꓢꓲ ꓔ ꓟ ꓥ ꓡꓳ꓿ ꓠꓴ ꓪꓽ ꓙꓰ ꓢꓲ ꓐꓬ ꓡꓰ ꓛꓵꓽ ꓡꓰ ꓟꓽ ꓓ ꓟ ꓬꓲ ꓢꓶꓽ ꓓꓱꓼ ꓠꓹ ꓟ꓾ ꓥꓪ ꓡꓰ ꓠꓴ ꓪꓽ ꓔꓯ ꓢꓲ ꓔ ꓡꓳ꓿ ꓖꓳ ꓡꓱ ꓢꓲ ꓠꓴ ꓪꓽ ꓥꓪ ꓟꓬꓱꓺ ꓗꓪ ꓐꓰ ꓐꓹ ꓐ ꓔꓯ ꓮꓸ ꓫꓵ ꓓꓰꓽˍ ꓟꓲ꓾ ꓬꓲ ꓡꓰ ꓠꓴ ꓪꓽ ꓔꓯ ꓖꓶ ꓡ ꓥꓳ꓿ꓠꓴ ꓪꓽ ꓠꓲꓹ ꓠꓵ ꓡꓯꓽ ꓘꓳ ꓠꓹ ꓟ꓾ ꓥꓪ ꓡꓰ ꓠꓴ ꓪꓽ ꓔꓯ ꓕꓵꓼ ꓪ ꓖꓶˍ ꓡꓳ꓿

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓪꓴ-ꓢ ꓬꓲ ꓠꓵꓻ ꓠꓲꓹ ꓠꓬ ꓣꓳ ꓔꓯ ꓕꓱ ꓟꓬ ꓫꓵꓽ ꓟ ꓓꓰꓽ ꓔꓬ ꓡꓳ= ꓪꓴ-ꓢ ꓠꓬ ꓟꓲ ꓠꓯ ꓞꓳ ꓤ ꓔꓯ ꓟꓽ ꓡꓳꓹ ꓬꓰ ꓟ ꓠꓵꓻ ꓠꓲꓹ ꓡꓰ ꓠꓲꓹ ꓠꓵꓻˍ ꓡꓳ꓾ ꓐꓯ ꓟ ꓣꓳ ꓔꓯ ꓐꓯ ꓟꓸ ꓖꓶ ꓡ ꓔꓬ ꓡꓳ= ꓖꓳ ꓟ ꓑꓶꓸ ꓓꓴ꓾ ꓣꓳ ꓠꓬ ꓠꓱꓸ ꓐꓯ ꓢꓴ ꓔꓯ ꓮ ꓡꓲ ꓫꓵꓽ ꓗꓪ ꓥˍ ꓟꓲ ꓠꓲꓹ ꓠꓵ ꓗꓴꓸ ꓠꓹ ꓟ ꓐꓯ ꓖꓶ ꓡ ꓔꓬ ꓟ ꓐꓯ ꓘꓶꓽ ꓔꓯ ꓛꓳ ꓠ ꓗꓹ ꓡꓳ= ꓠꓵꓻ ꓠꓲꓹ ꓕꓱ ꓟ ꓠꓬ ꓣꓳ ꓐꓴ ꓔꓯ ꓟꓲ ꓠꓯ ꓗꓪ ꓐꓰ ꓡˍ ꓟ ꓗꓹ ꓛꓲꓽ ꓠꓲꓹ ꓕꓲ ꓟˍ ꓡꓰꓽ ꓟꓽ ꓥ ꓥ꓾ ꓣꓳ ꓠꓯꓸꓼ ꓗꓪ ꓢꓲ ꓒ ꓬꓰ-ꓢꓴ ꓔꓬ ꓟ ꓔꓯ ꓟꓬꓽ ꓠꓬꓲ ꓗꓹ ꓛꓲˍ ꓟ ꓐꓯ ꓖꓴ ꓟꓽ ꓓ ꓗꓹ ꓛꓲˍ ꓟ ꓗꓹ ꓛꓲ ꓠꓲꓹ ꓔꓯ ꓑꓯꓹ ꓟꓶ ꓡꓰ ꓝꓲˍ ꓥꓳ= ꓢꓲ ꓒ ꓬꓲ ꓒꓬꓱꓽ ꓕꓯꓽ ꓗꓪ ꓔꓬ ꓪˍ ꓟ ꓠꓬ ꓐꓲ ꓜꓲꓼˍ ꓟ ꓗꓹ ꓛꓲ ꓓꓴ ꓕꓲ ꓟˍ ꓟꓲ ꓥ ꓡꓳ=
ꓕꓱ ꓡꓱ ꓥ ꓠꓬꓲ꓾ ꓠꓵꓻ ꓠꓲꓹ ꓕꓱ ꓟ ꓠꓬ ꓣꓳ ꓐꓴ ꓔꓯ ꓕꓲ ꓞꓲꓼ ꓕꓲ ꓒ ꓛꓵꓽ ꓡꓰ ꓟꓽ ꓓꓻ ꓟ ꓢꓲꓹ ꓢꓶꓽ ꓮ ꓟꓬꓹ ꓔꓯ ꓓꓱꓼ ꓝꓲˍ ꓥꓳ= ꓪꓴ-ꓢ ꓠꓬ ꓣꓳ ꓐꓴ ꓔꓯ ꓣꓳ ꓝꓴꓲꓸ ꓔꓯ ꓣꓷꓠꓸ ꓠꓹ ꓟ ꓐꓰ ꓬꓲ ꓠꓵꓻ ꓠꓲꓹ ꓔꓯ ꓮ ꓕꓯ ꓟꓲ ꓐꓱ ꓖꓶ ꓠꓹ ꓟ ꓚꓱꓹ ꓬꓲ ꓫꓵꓼ ꓔꓯ ꓮ ꓕꓯ ꓧꓪ ꓝꓲ ꓠꓲꓹ ꓫꓵˍ ꓡꓳ= ꓖꓳ ꓡꓱ ꓬꓰˍ ꓟ ꓗꓪ ꓣꓳ ꓐꓴ ꓠꓬ ꓖꓳ ꓡꓱ ꓬꓰ ꓐ ꓡˍ ꓟ ꓑꓶꓸ ꓓꓴ ꓣꓳ ꓔꓯ ꓢꓲ ꓒ ꓠꓬ ꓮ ꓕꓯ ꓟꓲ ꓟꓽ ꓡꓳꓸ ꓔ=
ꓬꓲ ꓠꓬ ꓡ ꓞꓳ ꓮ ꓙꓵꓽ ꓔꓯ ꓕꓲ ꓠꓲꓹ ꓕꓲ ꓪ ꓗꓷ ꓡꓰ ꓝꓲ ꓠꓲꓹ ꓫꓵˍ ꓡꓳ= ꓮ ꓙꓵꓽ ꓔꓯ ꓠꓲꓹ ꓠꓵꓻˍ ꓟ ꓬꓲ ꓠꓵꓻ ꓠꓲꓹ ꓔꓯ ꓣꓷꓠꓸ ꓠꓹ ꓟ ꓐꓱ ꓶ ꓪꓽ ꓘꓴ ꓠꓹ ꓟˍ ꓟꓲ ꓢꓲ ꓒ ꓡꓰ ꓣꓳ ꓔꓯ ꓘꓴꓻ ꓔꓬ ꓟ ꓥ ꓡꓳ=

Add new comment

14 + 5 =