ꓐ-ꓕꓲ-ꓟꓲ-ꓪꓴ ꓔꓯ ꓫꓬꓹ ꓓꓻ ꓡꓰ ꓟ (ꓟ-ꓘꓳ 10ꓽ46-52)

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓠꓬ ꓫꓱꓸ ꓤ ꓢꓲ ꓟꓬ ꓢꓶꓽ ꓟꓽ ꓟꓳꓻ ꓟ ꓔꓯ ꓫꓬꓹ ꓖꓶ ꓠꓹ ꓟ ꓐꓱ ꓶ ꓬꓰ-ꓢꓴ ꓔꓯ ꓘꓴ ꓓꓰꓽˍ ꓟ ꓟꓬ ꓢꓶꓽ ꓟꓽ ꓟꓳꓻ ꓢꓴ ꓐ-ꓕꓲ-ꓟꓲ-ꓪꓴ ꓬꓲ ꓟꓸ ꓟꓲꓽ ꓥ ꓡꓳ= ꓟ-ꓘꓳ 10ꓽ46-52 ꓗꓪ ꓬꓲ ꓠꓬ ꓬꓰ-ꓢꓴ ꓔꓯ ꓠꓬꓲꓽ ꓧꓪꓹ ꓘꓴ ꓗꓷ ꓢꓲ꓾ ꓬꓰ-ꓢꓴ ꓡꓰ ꓬꓲ ꓔꓬ ꓗꓪ ꓡ ꓠꓹ ꓟ ꓐ-ꓕꓲ-ꓟꓲ-ꓪꓴ ꓔꓯ ꓘꓴˍ ꓡꓳ= ꓖꓳ ꓡꓱ ꓢꓲ ꓬꓲ ꓙꓵꓻ ꓠꓲꓹ ꓠꓬ ꓬꓲ ꓔꓯ ꓠꓬꓲ ꓟꓳꓻ ꓡ ꓝꓲ ꓟ ꓥ ꓡꓳ= ꓬꓲ ꓔꓯ ꓢꓴ ꓡꓰ ꓟꓽ ꓪꓳꓹ ꓔꓬ ꓠꓹ ꓟ ꓐꓯ ꓖꓶ ꓡˍ ꓟ ꓔꓯ ꓟꓽ ꓠ ꓠꓹ꓾ ꓢꓲ ꓒ ꓬꓰ-ꓢꓴ ꓔꓯ ꓘꓴ ꓢꓲ ꓫꓱꓸ ꓤ ꓠꓹ ꓟ ꓓꓰꓽ ꓗꓷꓳ= ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓙꓵꓻ ꓠꓲꓹ ꓑꓶꓸ ꓓꓴ ꓟꓬ ꓢꓶꓽ ꓟꓽ ꓟꓳꓻ ꓢꓴ ꓔꓯ ꓟꓳꓻ ꓡꓰ ꓝꓲꓳ=

ꓢꓲꓽ ꓫꓬ ꓕꓳ ꓶ ꓕꓱ ꓟ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓠꓬ꓾ ꓪꓴ-ꓢ ꓔꓯ ꓙꓵꓻ ꓠꓹ ꓟ ꓥ ꓡꓳ= ꓣꓳ ꓐꓴ ꓢꓷꓸˍ ꓟ ꓟꓳˍ ꓟ ꓡꓰ ꓐꓰ꓾ ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓙꓲ-ꓢꓴ ꓢꓲ ꓤ ꓮ ꓟꓬꓹ ꓠꓬ ꓪꓽ ꓘꓴ ꓦꓲꓻ ꓗꓪ ꓙꓰ ꓢꓲ ꓪꓽ ꓘꓴ ꓔꓬ ꓥ ꓟꓲ꓾ ꓪꓽ ꓘꓴ ꓔꓬ ꓢꓴ ꓮ ꓙꓵꓽ ꓠꓬ ꓙꓵꓻ ꓠꓲꓹ ꓟꓽ ꓕꓶꓺ ꓞꓹ ꓟ ꓥ ꓡꓳ= ꓕꓲ ꓖ ꓕꓲ ꓧꓪꓹ ꓣꓳ ꓠꓬ ꓙꓵꓻ ꓠꓲꓹ ꓟꓽ ꓕꓶꓺ ꓞꓹ ꓥ ꓟꓲ꓾ ꓥꓪ ꓠꓬ ꓙꓵꓻ ꓠꓲꓹ ꓙꓳˍ ꓡꓰ ꓐꓰ ꓓꓵꓽ ꓙ ꓔꓬ ꓗꓴꓸˍ ꓡꓳ= ꓖꓳ ꓡꓱ ꓠꓬꓲ ꓙꓵꓻ ꓠꓲꓹ ꓐꓯ ꓟ ꓠꓬ ꓟꓲ ꓠꓯ ꓞꓳ ꓤ ꓟꓬ ꓢꓶꓽ ꓡꓰ ꓟꓳꓻ ꓟꓽ ꓓ ꓟ ꓥ ꓡꓳ= ꓖꓳ ꓡꓱ ꓟꓳꓻ ꓟꓽ ꓓ ꓟ ꓑꓶꓸ ꓓꓴ ꓪꓴ-ꓢ ꓔꓯ ꓕꓲ ꓙ ꓠꓲꓹ ꓡꓱꓸꓼ ꓕꓲ ꓶ ꓟꓬ ꓡꓱꓸꓼ ꓙꓵꓻ ꓠꓹ ꓟ ꓔꓯˍ ꓟꓲ ꓐꓯ ꓟꓳꓸ ꓖꓶ ꓡ ꓔꓬ ꓡꓳ= ꓖꓳ ꓡꓱ ꓬꓰˍ ꓕꓯ ꓓꓵꓽ ꓙ ꓮ ꓡꓰ ꓓꓴ ꓐꓰ ꓧꓪꓸ ꓡꓰˍ ꓟ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓳ ꓠꓯꓸꓼ ꓗꓪ ꓙꓳ ꓡˍ ꓟ ꓥ ꓡꓳ=

ꓪꓴ-ꓢ ꓤ ꓠꓱ ꓕꓲ ꓣꓳˍ ꓡꓰ ꓐꓰ ꓝꓸ ꓢꓲ ꓞꓳ ꓙꓳ ꓢꓯꓸ ꓔꓬ ꓠꓹ ꓟ ꓪꓴ-ꓢ ꓔꓯ ꓙꓵꓻˍ ꓟ ꓙꓵꓻ ꓠꓲꓹ ꓐꓰ ꓣꓳ ꓚꓲꓸ ꓛꓬ ꓔꓯ ꓞꓳꓹ ꓔ ꓠꓹ ꓟ ꓬꓳꓸ ꓚꓵˍ ꓡꓳ= ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓯ ꓔ ꓟ ꓕꓲ ꓡꓰꓹ ꓓꓵꓽ ꓙ ꓮ ꓡꓰ ꓓꓴ ꓔꓯ ꓙꓽ ꓜꓲꓼ ꓐ ꓡ ꓠꓹ ꓟ ꓣꓳ ꓐꓴ ꓠꓬ ꓢꓷꓸ ꓠꓲꓹ ꓮ ꓟꓬꓹ ꓢꓷꓸ ꓟꓽ ꓛꓵ= ꓣꓳ ꓐꓴ ꓠꓬ ꓣꓳ ꓐꓴ ꓣꓱꓽ ꓞꓹ ꓟ ꓮ ꓙꓵꓽ ꓔꓯ ꓡꓴꓽ ꓖꓶꓽ ꓐ ꓡˍ ꓟ ꓪꓴ-ꓢ ꓔꓯ ꓙꓵꓻ ꓠꓹ ꓟ ꓡꓰꓽ ꓣꓱꓽ ꓞꓹ ꓡꓳ=

ꓣꓳ ꓮ ꓙꓵꓽ ꓠꓬ ꓪꓴ-ꓢ ꓒꓬꓱꓽ ꓕꓯꓽ ꓗꓪ ꓕꓲ ꓡꓰꓹ ꓥ ꓡꓳ= ꓞꓳ ꓐꓳ ꓞꓳ ꓫꓸ ꓟꓽ ꓙꓳ꓾ ꓢꓷꓸ ꓠꓲꓹ ꓢꓷꓸ ꓢꓴ ꓟꓽ ꓢꓷꓸ ꓢꓴ ꓐꓯ ꓢꓲ ꓟꓽ ꓘꓶꓽ ꓔ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓣꓳ ꓙꓵꓻ ꓠꓲꓹ ꓔꓯ ꓮ ꓘꓶꓸ ꓕꓶꓺ ꓞꓹ ꓟ ꓢꓲꓹ ꓜꓲ ꓡꓰ ꓐꓰ ꓙꓵꓻ ꓠꓲꓹ ꓕꓶꓺ ꓞꓹ ꓠꓯꓹ ꓟ ꓥ ꓡꓳ= ꓢꓲꓹ ꓜꓲ ꓖꓳ ꓟ ꓠꓬ ꓟꓽ ꓫꓱꓸ ꓡꓯ ꓘꓳ ꓟ ꓟꓵꓽ ꓘꓳꓼ ꓗꓪˍ ꓟꓲ ꓕꓶꓺ ꓞꓹ ꓢꓲ ꓢꓯꓸ ꓔꓬ ꓐ ꓡˍ ꓟ ꓡꓰ ꓐꓰ꓾ ꓣꓳ ꓐꓴ ꓥˍ ꓟꓲ ꓫꓸ ꓓꓴ ꓔꓳꓹ ꓜꓳꓽ ꓡˍ ꓕꓯ꓾ ꓥ ꓠꓬ ꓢꓻ ꓓꓴ ꓔꓳꓹ ꓜꓳꓽ ꓡˍ ꓕꓯ ꓙꓵꓻ ꓠꓲꓹ ꓕꓶꓺ ꓞꓹ ꓠꓯꓹ ꓟ ꓥ ꓡꓳ= ꓣꓳ ꓐꓴ ꓠꓬ ꓪꓴ-ꓢ ꓔꓯ ꓙꓵꓻ ꓗꓷ ꓕꓯ ꓪꓴ-ꓢ ꓠꓬ ꓣꓳ ꓐꓴ ꓔꓯ ꓮ ꓕꓯ ꓟꓲ ꓟꓽ ꓡꓳ ꓔ ꓟ ꓥ ꓡꓳ= ꓣꓳ ꓐꓴ ꓮ ꓙꓵꓽ ꓠꓬ ꓝꓴꓲꓸ ꓙꓳ ꓢꓴ ꓥ ꓐꓯ ꓥ ꓟꓲ꓾ ꓣꓳ ꓐꓴ ꓠꓬ ꓪꓴ-ꓢ ꓤ ꓠꓱ ꓒꓬꓱꓼ ꓓꓹ ꓢꓰꓽ ꓡꓳ= ꓖꓳ ꓡꓱ ꓠꓬꓲ ꓣꓳ ꓐꓴ ꓠꓬ ꓕꓲ ꓠꓲꓹ ꓕꓲ ꓪ ꓪꓽ ꓡꓯ ꓘꓳ꓾ ꓕꓽ ꓡꓯ ꓘꓳ ꓢꓲ ꓢꓲꓺ ꓒ ꓟꓲꓽ ꓙꓬ ꓗꓪ ꓚꓱꓹ ꓬꓲꓼ ꓙꓰ ꓠꓹ ꓟ ꓬꓳꓸ ꓚꓵˍ ꓡꓳ=