ꓒ‐ꓡꓲ‐ꓢꓷ ꓐꓴ ꓡꓰ ꓢꓲꓺ ꓒ ꓬꓰ‐ꓢꓴ ꓔꓯ ꓫꓵꓽ ꓠꓬꓲˍ ꓟ

ꓒ‐ꓡꓲ‐ꓢꓷ ꓐꓴ ꓡꓰ ꓢꓲꓺ ꓒ ꓬꓰ‐ꓢꓴ ꓔꓯ ꓫꓵꓽ ꓠꓬꓲˍ ꓟ

ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓶ ꓘꓳꓼ ꓠꓯ, ꓗꓪ ꓐꓰ (29) ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳꓽ ꓶ ꓠꓬ ꓟ‐ꓕꓲ ꓕꓳ ꓶ (22ꓽ15‐21) ꓝꓲ ꓥ ꓢꓲ  ꓠꓬꓲ ꓢꓲꓺ ꓒ ꓬꓰ‐ꓢꓴ ꓔꓯ ꓒ‐ꓡꓲ‐ꓢꓷ ꓐꓴ ꓡꓰ ꓢꓲ‐ꓢ ꓔꓯ, ꓒꓵꓽ ꓐꓶꓻ ꓓꓽ ꓡꓽ ꓟꓽ ꓓꓽ ꓡ ? ꓐꓰ ꓫꓵꓽ ꓠꓬꓲˍ ꓟ ꓢꓲꓽ ꓫꓬ ꓕꓳ ꓶ ꓝꓲ. ꓥ ꓡꓳ꓿ ꓒ‐ꓡꓲ‐ꓢꓷ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓝꓴꓲ ꓧꓪ, ꓠ, ꓟ ꓖꓪ ꓙꓱ ꓡꓯꓽ ꓘꓳ ꓗꓷ ꓟ ꓥ ꓡꓳ꓿ ꓗꓳ ꓗ. ꓠꓯ ꓒ‐ꓡꓲ‐ꓢꓷ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓟ. ꓟꓲꓽ ꓚꓺ ꓟ ꓔꓲ ꓗꓪ ꓡ ꓢꓲ ꓠꓬꓲ ꓟ. ꓒꓽꓳ ꓠꓴ ꓠꓽ ꓔꓱ, ꓔꓱ, ꓐꓰ ꓪꓴ‐ꓢ ꓙꓽ ꓖꓴ ꓟ. ꓖꓶ ꓢꓴ ꓥ ꓟ ꓥꓪ ꓠꓴ ꓢꓷ. ꓡꓳ꓿ ꓖꓳ ꓡꓱ ꓠꓬꓲ ꓢꓲ‐ꓢ ꓪ ꓔꓲ ꓔꓯ, ꓒꓵꓽ ꓑꓶꓻ ꓓꓽ ꓡ ꓟꓽ ꓓ ꓡ ? ꓠ ꓠꓬꓲˍ ꓗꓷ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓡꓰ ꓥꓶˍ ꓟ ꓚꓬꓽ ꓬꓲ ꓔꓯ ꓢꓷ. ꓠꓬꓲ ꓬꓲ ꓔꓯ ꓠꓲ, ꓟ ꓠꓬꓲꓽꓔꓱ, ꓣꓱ ꓢꓴ ꓐꓴꓳ ꓮ ꓫꓵꓽ ꓪꓴ. ꓠꓬꓲ ꓥꓪ ꓔꓯ ꓫꓵꓽ ꓠꓬꓲˍ ꓡ? ꓔꓯ, ꓡꓯꓽ ꓒꓵꓽ ꓐꓶꓻ ꓓꓴ ꓓꓲ‐ꓠ‐ꓣꓲ ꓕꓲ ꓒꓯꓼ ꓥꓪ ꓔꓯ, ꓖꓶ ꓡꓯ ꓐꓰ ꓐꓯ ꓡꓳ꓿ ꓝꓮꓲ ꓢꓲꓺ ꓒ ꓬꓰ‐ꓢꓴ ꓡꓰ ꓞꓳ ꓐꓬꓱꓽ ꓐꓰ ꓟꓬꓱꓺ ꓕꓱ ꓟ ꓮꓽ ꓟ ꓔꓯ. ꓟ ꓥ ꓡ꓾ ꓐꓰ ꓠ ꓠꓬꓲˍ ꓡꓳ꓿ ꓢꓲ‐ꓢ ꓪ ꓔꓲ ꓔꓯ. ꓟ ꓥ ꓡꓳ ꓐꓰ ꓐꓯ ꓕꓯ ꓖꓳ ꓡꓱ ꓥ ꓠꓬ ꓢꓲ‐ꓔ ꓔꓯ. ꓟ ꓢꓲ‐ꓢ ꓔꓯ ꓖꓶ꓾ ꓪꓴ‐ꓢ ꓔꓯ ꓟ ꓪꓴ‐ꓢ ꓔꓯ ꓐꓯ ꓖꓶ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓶꓽ ꓓꓳꓽ ꓫꓱ, ꓓꓳꓽ ꓚꓺ ꓟ. ꓖꓶ ꓟ ꓙꓵ, ꓕꓯ ꓬꓴ‐ꓔ ꓡ ꓞꓳ ꓐꓴ ꓠꓬ ꓣꓳ‐ꓟ ꓪ ꓔꓲ ꓙꓵꓽ ꓟ ꓙꓵ, ꓟꓲ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓖꓳ ꓕꓲ ꓙꓵ, ꓗꓪ ꓠꓬ ꓗꓴꓷꓼ ꓙꓵꓽ ꓢꓴ ꓪ ꓔꓲ ꓐꓴ ꓐꓰ ꓙꓵꓻ ꓠꓲ, ꓚꓱ, ꓗꓪ ꓧꓳꓽ ꓪꓴ. ꓟꓴ ꓢꓴ ꓐꓴ ꓠꓬ ꓮ ꓘꓶ. ꓛꓲ ꓙꓵꓽ ꓪ ꓙꓳˍ ꓟ ꓥ ꓡꓳ꓿ ꓬꓴ‐ꓔ ꓡ ꓞꓳ ꓐꓴ ꓗꓪ ꓠꓯ, ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓟꓲꓽ ꓚꓺ ꓟ. ꓖꓶ ꓟ ꓔꓯ ꓐ ꓙ ꓪ ꓢꓴ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓡꓰ ꓚꓺ ꓟ ꓟ. ꓟꓲꓽ ꓔꓯ ꓙꓵꓽ ꓢꓴ ꓐꓴ ꓐꓰ ꓠꓻ ꓫꓬ, ꓖꓶ ꓟ ꓪꓴ. ꓠꓬꓲ ꓓꓽ ꓡꓰ ꓢꓴ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓙꓵꓽ ꓢꓴ ꓐꓴ ꓮ ꓟꓬ, ꓙꓳˍ ꓡ ꓟ ꓥ ꓡꓳ꓿

ꓖꓳ ꓡꓱ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓔꓯ ꓝꓴꓲ ꓓꓲ ꓟ ꓐꓰ ꓟꓽ ꓙꓲ ꓔꓯ ꓡꓰ ꓡꓳ. ꓟꓳ ꓢꓴ ꓕꓲ ꓜꓴꓻ ꓠꓬ ꓒ‐ꓡꓲ‐ꓢꓷ ꓐꓴ ꓕꓲ ꓜꓴꓻ ꓥ ꓟꓲ ꓐ ꓟ ꓥ ꓡꓳ꓿ ꓒ‐ꓡꓲ‐ꓢꓷ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓒꓴ ꓔꓯ ꓪ ꓔꓲ ꓒꓴ ꓐꓶꓻ ꓓꓽ ꓡ ꓟꓽ ꓓ ꓡ ꓐꓰ ꓠ ꓠꓬꓲˍ ꓗꓷ ꓟ ꓙꓵ, ꓕꓯ ꓢꓲꓺ ꓒ ꓬꓰ‐ꓢꓴ ꓡꓰ ꓢꓲ‐ꓢ ꓪ ꓔꓯ ꓔꓯ, ꓟ ꓪ ꓔꓲ ꓔꓯ ꓖꓶ ꓪꓴ‐ꓢ ꓔꓯ. ꓟ ꓪꓴ‐ꓢ ꓔꓯ ꓖꓶ ꓐꓰ ꓐꓯ ꓗꓷ ꓟ ꓥꓡꓳ꓿

ꓢꓲꓺꓒ ꓬꓰ‐ꓢꓴ ꓡꓰ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓟ. ꓖꓶ ꓡ ꓟ ꓠꓬ ꓟꓲ ꓠꓯ ꓗꓪ ꓣꓳ ꓞꓳ ꓙꓳ ꓢꓯ. ꓔꓬ ꓟ ꓙꓵ, ꓕꓯ ꓣꓳ ꓬꓰ ꓠ, ꓟ ꓐꓰ ꓮ ꓡꓰꓳ ꓫꓵꓽ ꓟꓬꓱꓽ ꓬꓰ ꓠ, ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓔꓯꓺ ꓥꓳꓽ ꓗꓪ ꓐꓰ ꓐꓯ ꓠꓬ ꓣꓳ ꓢꓯ. ꓔꓬ ꓟ ꓗꓴꓷꓼ ꓗꓪ ꓣꓳ ꓠꓬ ꓑ ꓫꓬ ꓕꓲ ꓣꓳ ꓒꓬꓱꓼ ꓡ ꓟ ꓥ ꓡꓳ꓿ ꓑ ꓫꓬ ꓕꓲ ꓣꓳ ꓠꓬ ꓗꓴꓷꓼ ꓙꓵꓽ ꓢꓴ ꓐꓴ ꓡꓰ ꓫꓬ, ꓔ ꓟ ꓛꓳꓽ ꓚꓱ, ꓙꓵꓽ ꓗꓽ ꓔꓯ ꓛꓳꓽ ꓠ, ꓟ ꓙꓳ ꓟ ꓥ ꓡꓳ꓿ ꓖꓳ ꓟ ꓡꓰ ꓟꓽ ꓞꓲ ꓣꓳ ꓟꓲ ꓠꓯ ꓗꓪ ꓢꓯ. ꓔꓬ ꓟ ꓙꓵ, ꓕꓯ ꓣꓳ ꓔꓯ ꓪꓴ‐ꓢ ꓡꓰ ꓖꓶ ꓡ ꓟ ꓢꓯꓼ ꓦꓻ ꓠ, ꓟ ꓟꓲ ꓦ ꓪ ꓟ ꓥ ꓡꓳ꓿

ꓟꓲ ꓦꓲꓻ ꓔꓯ ꓠꓬ ꓟꓵꓽ ꓗꓪ ꓙꓳˍ ꓟ ꓢꓲ ꓜꓲ ꓗꓪ ꓐꓰ ꓗꓪ ꓟ ꓥ ꓡꓳ꓿ ꓣꓳ ꓟꓲ ꓠꓯ ꓡ ꓞꓳ ꓐꓴ ꓠꓲ. ꓦꓱ ꓟ ꓠꓲ, ꓟ ꓗꓪ ꓐꓰ ꓟꓵꓽ ꓗꓪ ꓙꓳˍ ꓟ ꓢꓲ ꓜꓲ ꓐꓴ ꓔꓯ ꓪꓴꓽ ꓜ ꓗꓷ ꓟ ꓡ? ꓪꓴ‐ꓢ ꓡꓰ ꓚꓰꓼ ꓔ ꓟ ꓔꓯ ꓣꓳ ꓚꓲ. ꓛꓬ ꓐꓱ ꓶ ꓡꓰ ꓣꓱ ꓗꓷ ꓡ ꓐꓰ ꓣꓳ ꓔꓯ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓓꓵꓽ ꓙ ꓠ,ꓟ ꓟ. ꓖꓶ ꓡ ꓟ ꓥ ꓡꓳ꓿ 

ꓝꓮꓲ ꓕꓲ ꓫꓵꓽ ꓠꓬ ꓢꓲꓺ ꓒ ꓬꓰ‐ꓢꓴ ꓦꓬꓼ ꓠꓬꓲ ꓗꓪ ꓐꓰ ꓠꓬꓲ. ꓠꓬꓲ ꓗꓪ ꓛꓲ ꓙꓵꓻ ꓠꓲ, ꓚꓱ, ꓔꓯ ꓧꓳꓽ ꓪꓴ. ꓟꓴ ꓢꓴ ꓐꓴ ꓐꓰ ꓗꓴꓷꓼ ꓔꓯ ꓙꓵꓽ ꓢꓴ ꓐꓴ ꓔꓬ ꓟ ꓥ ꓡꓳ꓿ ꓠꓬꓲ. ꓠꓬꓲ ꓘꓴ ꓜꓲꓼ ꓞꓳ ꓮ ꓟꓬ, ꓙꓳ ꓟ ꓦꓬꓼ ꓠꓬꓲ ꓟꓲ ꓥ ꓡꓳ꓿ ꓙꓵꓻ ꓠꓲ, ꓚꓱ, ꓟꓽ ꓫꓱ. ꓡꓯꓽ ꓘꓳ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓟꓬ, ꓔꓬ ꓟ ꓥꓡꓳ꓿ ꓖꓳ ꓡꓱ ꓥ ꓟꓲ ꓣꓳ ꓔꓯ ꓙꓲ‐ꓢꓴ ꓢꓲꓺ ꓤ ꓕꓲ ꓣꓳ ꓒꓬꓱꓼ ꓝꓲ ꓟ ꓪꓴ‐ꓢ ꓔꓯ ꓣꓳ ꓫ. ꓟꓳ ꓓꓴ ꓬꓰ ꓡꓯ꓿ ꓝꓮꓲ ꓣꓳ ꓔꓯ ꓙꓲ ꓟ ꓙꓲ‐ꓢꓴ ꓢꓲꓺ ꓤ ꓕꓲ ꓣꓳ ꓒꓬꓱꓼ ꓝꓲ ꓟ ꓪꓴ‐ꓢ ꓠꓵꓻ ꓠꓲ, ꓔꓯ ꓣꓳ ꓢꓷ. ꓠ, ꓟ ꓥ ꓡꓳ꓿

ꓣꓳ ꓙꓲ‐ꓢꓴ ꓢꓲꓺ ꓤ ꓒꓬꓱꓼ ꓡ ꓠꓬ ꓘꓴ ꓜꓲꓼ ꓞꓳ ꓗꓪ ꓐꓰ ꓟ. ꓖꓶ ꓡ ꓟ ꓙꓵꓽ ꓗꓽ ꓔꓯ ꓣꓳ ꓛꓳꓽ ꓠ, ꓟ ꓙꓵꓽ ꓪ ꓙꓳˍ ꓟ ꓥ ꓡꓳ꓿ ꓣꓳ ꓪꓴ‐ꓢ ꓔꓯ ꓮ ꓡꓰ ꓫꓵꓽ ꓔꓯ ꓖꓶ ꓠ, ꓟ ꓬꓰ ꓔꓬ ꓡ? ꓒ‐ꓡꓲ‐ꓢꓷ ꓐꓴ ꓡꓰ ꓐꓰ ꓢꓲꓺ ꓒ ꓬꓰ‐ꓢꓴ ꓔꓯ ꓤ ꓠꓬꓲ ꓢꓴ ꓣꓳ ꓒꓬꓱꓼ ꓔꓬ ꓡ ? ꓐꓰ ꓚꓲ. ꓛꓬ ꓓꓴ ꓙ ꓓꓴ ꓬꓰ ꓡꓯ꓿  ꓣꓳ ꓔꓯ ꓚꓰꓼ ꓡ ꓢꓴ ꓪꓴ‐ꓢ ꓔꓯ ꓣꓳ ꓫ. ꓟꓳ ꓓꓴ ꓬꓰ ꓡꓯ꓿ ꓢꓲꓺ ꓒ ꓔꓯ ꓣꓳ ꓧꓪ, ꓓꓴ ꓬꓰ ꓡꓯ ꓿ ꓢꓲꓺ ꓒ ꓐꓯ ꓘꓶꓽ ꓔꓯ    ꓣꓳ ꓒꓵꓽ ꓢꓲ ꓠꓬꓲ ꓠꓵꓻ ꓠꓲ, ꓣꓱ ꓢꓲ ꓠꓬꓲ ꓟꓬꓱꓽ ꓬꓰ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿