ꓒ‐ꓡꓲ‐ꓢꓷ ꓐꓴ ꓡꓰ ꓢꓲꓺ ꓒ ꓬꓰ‐ꓢꓴ ꓔꓯ ꓫꓵꓽ ꓠꓬꓲˍ ꓟ ( Sunday reflection)

#Lisu culture #love othe another #Photo by Paul yemi

Sunday, October 29, 2023

ꓒ‐ꓡꓲ‐ꓢꓷ ꓐꓴ ꓡꓰ ꓢꓲꓺ ꓒ ꓬꓰ‐ꓢꓴ ꓔꓯ ꓫꓵꓽ ꓠꓬꓲˍ ꓟ

ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ ꓗꓪ ꓐꓰ (29) ꓫꓵꓽ ꓠ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓵꓻ ꓠ, ꓟ ꓢꓲꓼ ꓫꓬ ꓕꓳ ꓶ ꓠꓬ ꓟ‐ꓕꓲ ꓕꓳ ꓶ (22ꓽ34‐40) ꓝꓲ ꓗꓪ ꓐꓰ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓒ‐ꓡꓲ‐ꓢꓷ ꓐꓴ ꓡꓰ ꓢꓲꓺ ꓒ ꓬꓰ‐ꓢꓴ ꓔꓯ ꓫꓵꓽ ꓠꓬꓲˍ ꓟ ꓢꓲꓽ ꓫꓬ ꓕꓳ ꓶ ꓝꓲ ꓥ ꓡꓳ꓿ ꓒ‐ꓡꓲ‐ꓢꓷ ꓐꓴ ꓡꓰ ꓟ. ꓒꓽꓳ ꓙꓵꓼ ꓗ ꓕꓳ ꓶ ꓗꓪ ꓕꓵꓼ ꓪ ꓮ ꓡꓲ ꓕꓲ ꓚꓱ, ꓟ ꓪꓴꓽ ꓓꓰˍ ꓡꓰ ꓠ ꓠꓬꓲˍ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓡꓰ ꓕꓲ ꓠꓲ, ꓟ ꓡꓱ.ꓼ ꓕꓲ ꓶ ꓟꓬ ꓡꓰ.ꓼ ꓕꓲ ꓙꓽ ꓠꓲ, ꓡꓱ.ꓼ ꓢꓲꓺ ꓒ ꓠꓴ ꓪꓴ‐ꓢ ꓔꓯ ꓠꓲ, ꓠꓵ ꓐꓯ ꓔ ꓡꓳ꓿ ꓕꓱ ꓟ ꓠꓬ ꓪꓴ. ꓓꓲ ꓡꓰ ꓕꓵꓼ ꓪ ꓥ ꓢꓲ ꓠꓬꓲ ꓗ ꓠꓯ. ꓕꓲ ꓚꓱ, ꓟˍ ꓠꓬ ꓠꓴ ꓠꓬ ꓚꓲ ꓛꓬ ꓔꓯ ꓠꓲ, ꓠꓵˍ ꓟ ꓡꓰ ꓐꓰ ꓠꓴ ꓠꓶꓽ ꓛꓳ ꓕꓲ ꓛꓳꓽ ꓔꓯ ꓠꓲ, ꓠꓵˍ ꓠ ꓗ, ꓡꓳ ꓐꓰ ꓐꓯ ꓔ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓔ ꓟ ꓠꓬ ꓪꓴ‐ꓢ ꓠꓲ, ꓠꓵ ꓠ, ꓟ ꓐꓰ ꓣꓳ ꓒ ꓕꓲ ꓗꓪ ꓔꓬ ꓟ ꓣꓳ ꓛꓳ ꓒꓯꓽ ꓞꓳ ꓤ ꓐꓴ ꓔꓯ ꓠꓲ, ꓠꓵˍ ꓠ, ꓟ ꓐꓯ ꓔ ꓟ ꓥ ꓡꓳ꓿

ꓮ ꓫꓵꓽ ꓑꓶ ꓓꓴ ꓪꓴ‐ꓢ ꓔꓯ ꓠꓲ, ꓠꓵ`ˍ ꓠ ꓔ ꓡ ꓐꓰ ꓐꓯ ꓕꓯ ꓠꓬ ꓟꓲ ꓠꓯ ꓗꓪ ꓓꓽ ꓪꓴ. ꓬꓲ. ꓪꓴ. ꓞꓳ ꓤ ꓒꓬꓱꓼ ꓡ ꓢꓴ ꓠꓬꓲꓽ ꓣꓳ ꓥ ꓟ ꓮ‐ꓓꓯ ꓐꓰ ꓰ‐ꓪ ꓐꓴ ꓠꓬꓲꓽ ꓣꓳ ꓠꓬ ꓪꓴ‐ꓢ ꓔꓯ ꓟꓽ ꓠꓲ, ꓠꓵ ꓟ ꓪꓴ. ꓠꓬꓲ ꓝꓴꓲ ꓬꓰ ꓗꓷ ꓟ ꓥ ꓡꓳ꓿ ꓪꓴ‐ꓢ ꓔꓯ ꓠꓲ, ꓠꓵˍ ꓠꓬ ꓕꓽ ꓬꓰ ꓐꓯ ꓔ ꓟ ꓔꓯ ꓠ, ꓡꓳ ꓠ, ꓟ ꓥ ꓡꓳ꓿ ꓠꓲ, ꓠꓵˍ ꓠꓬ ꓪꓴ‐ꓢ ꓐꓯ ꓘꓶꓽ ꓔꓯ ꓠ ꓠ, ꓟ ꓥ ꓡꓳ꓿

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓠꓴ ꓥꓪ ꓔꓯ ꓪꓴ‐ꓢ ꓔꓯ ꓚꓲ ꓚꓲ ꓠꓲ, ꓠꓵˍ ꓡ ꓐꓰ ꓢꓲꓺ ꓒ ꓬꓰ‐ꓢꓴ ꓡꓰ ꓠ, ꓠꓬꓲˍ ꓔꓬ ꓟ ꓥ ꓡꓳ꓿ ꓝꓮꓲ ꓣꓳ ꓠꓬ ꓪꓴ‐ꓢ ꓕꓯ ꓢꓲ ꓠꓱ. ꓐꓯꓼ ꓔꓯ ꓢꓲ ꓠꓲ, ꓠꓵˍ ꓔꓬ ꓡꓳ ꓣꓳ ꓚꓲ ꓛꓬ ꓓꓴ ꓙ ꓠ, ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓠꓽ ꓠꓬꓲˍ ꓔꓬ ꓟ ꓥ ꓡꓳ꓿ ꓒꓴ ꓫꓵˍ ꓔꓯ ꓝꓮꓲ ꓚꓲ ꓛꓬ ꓙꓵꓽ ꓪ ꓪ ꓠ, ꓟ ꓐꓰ ꓠꓱ. ꓐꓯꓼ ꓪꓴ‐ꓢ ꓡꓰ ꓚꓰꓼ ꓔ ꓟ ꓔꓯ ꓪꓴ‐ꓢ ꓕꓯ ꓢꓲ ꓠꓲ, ꓠꓵˍ ꓔꓬ ꓡꓳ ꓐꓰ ꓣꓳ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓠꓬꓲ. ꓠꓬꓲ ꓢꓲꓺꓒ ꓦꓬꓼ ꓠꓬꓲ ꓗꓪ ꓠ, ꓠꓬꓲ ꓔꓬ ꓡꓳ꓿

ꓣꓳ ꓪꓴ‐ꓢ ꓔꓯ ꓚꓲ ꓚꓲ ꓠꓲ, ꓠꓵ ꓠꓬ ꓪꓴ‐ꓢ ꓡꓰ ꓣꓳ ꓣꓱ ꓬꓯꓼ ꓔꓬ ꓟ ꓣꓱ ꓞ ꓔꓬ ꓟ ꓔꓯ ꓪꓴ‐ꓢ ꓡꓰ ꓣꓳ ꓔꓯ ꓖꓶ ꓡ ꓓꓴ ꓥꓳ꓿ ꓮ ꓫꓵꓽ ꓑꓶ. ꓓꓴ ꓥ ꓐꓯ ꓠꓬ ꓪꓴ‐ꓢ ꓠꓬ ꓠꓵꓻ ꓠꓲ, ꓪꓴ‐ꓢ ꓥ ꓡꓳ꓿ ꓝꓮꓲ ꓠꓶꓽ ꓛꓳ ꓕꓲ ꓛꓳꓽ ꓔꓯ ꓠꓲ, ꓠꓵ ꓐꓯ ꓔ ꓟ ꓥ ꓡꓳ꓿ ꓢꓲꓽ ꓫꓬ ꓕꓳ ꓶ ꓬꓲ ꓚꓰ ꓬꓲ ꓪꓴ. ꓕꓳ ꓶ ꓗꓪ ꓤ ꓠꓬꓲ ꓔꓯ ꓢꓰꓼ ꓗꓷ ꓟ ꓔꓯ ꓣꓳ ꓡꓳ. ꓟꓳ ꓪ ꓡꓳ꓿ ꓕꓱ ꓟ ꓠꓬ ꓮ ꓘꓶ. ꓛꓲ ꓟꓽ ꓙꓲ ꓟ ꓥ ꓡꓳ ꓠꓲ, ꓟ ꓠꓽ ꓓꓴ ꓥ ꓡꓳ꓿ ꓮ ꓟꓶ ꓟ ꓙꓵ, ꓗꓪ ꓕꓲ ꓦꓲꓻ ꓘꓴꓽ ꓗꓪ ꓮ ꓬꓲ ꓠꓬꓲ ꓤ ꓥ ꓟꓲ ꓢꓰꓼ ꓡꓯꓼ ꓘꓳꓼ ꓓꓴ ꓮ ꓘꓶ. ꓙꓳˍ ꓟ ꓔꓯ ꓡꓳ. ꓟꓳ ꓪ ꓡꓳ꓿

ꓝꓮꓲ ꓜꓴꓻ ꓗꓪ ꓥ ꓟꓲ ꓘꓴ ꓜꓲꓼ ꓞꓳ ꓗꓪ ꓥ ꓟꓲ ꓮ ꓘꓶ. ꓛꓲ ꓓꓯꓺ ꓡꓯꓽ ꓘꓳ, ꓟ ꓔꓯ ꓡꓳ. ꓟꓳ ꓪ ꓟ ꓥ ꓡꓳ꓿ ꓢꓯꓼ ꓙꓳ ꓢꓴ ꓠꓬ ꓢꓯꓼ ꓟꓽ ꓙꓳ ꓢꓴ ꓔꓯ ꓧꓪ. ꓜꓽ ꓟ ꓙꓳ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓢꓯꓼ ꓟꓽ ꓙꓳ ꓢꓴ ꓔꓯ ꓟꓽ ꓙꓽ ꓞꓲꓼ ꓢꓴ ꓐꓴ ꓔꓯ ꓬꓰ ꓙ ꓔ ꓙ ꓠ, ꓟ ꓬꓰ ꓠ, ꓟ ꓙꓳˍ ꓟ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓒ ꓙ ꓗꓷ ꓟ ꓪꓴ. ꓠꓬꓲ ꓪꓴ‐ꓢ ꓔꓯ ꓠꓴ ꓙꓳ ꓟ ꓮ ꓙꓵꓽ ꓓꓯ ꓢꓲ ꓪꓴ‐ꓢ ꓠꓲ, ꓠꓵˍ ꓓꓴ ꓬꓰ ꓡꓯ ꓣꓳ ꓒ ꓕꓲ ꓗꓪ ꓔꓬ ꓢꓴ ꓐꓴ ꓔꓯ ꓠꓲ, ꓠꓵˍ ꓓꓴ ꓬꓰ ꓡꓯ꓿

ꓝꓮꓲ ꓣꓳ ꓒ ꓕꓲ ꓗꓪ ꓔꓬ ꓟ ꓣꓱ ꓬꓯꓼ ꓔꓬ ꓟ ꓣꓱ ꓞ ꓔꓬ ꓢꓴ ꓐꓴ ꓔꓯ ꓬꓰ ꓙ ꓓꓴ ꓬꓰ ꓡꓯ ꓠꓲ, ꓠꓵˍ ꓓꓴ ꓬꓰ ꓡꓯ꓿ ꓪꓴ‐ꓢ ꓠꓬ ꓠꓵꓻ ꓠꓲ, ꓥ ꓡꓳ ꓐꓰ ꓐꓯ ꓔ ꓡꓳ꓿ ꓠꓴ ꓥꓪ ꓪꓴ‐ꓢ ꓔꓯ ꓚꓲ ꓚꓲ ꓠꓲ, ꓠꓵˍ ꓢꓴ ꓥ ꓠꓬ ꓮ ꓫꓵꓽ ꓬꓰ ꓟꓲ ꓫ. ꓕꓱ ꓟꓲ ꓠꓲ, ꓠꓵ ꓗꓪ ꓐꓰ ꓟꓬꓱꓽ ꓬꓰ ꓡꓯ꓿ ꓪꓴ‐ꓢ ꓔꓯ ꓣꓳ ꓠꓲ, ꓟ ꓗꓪ ꓔꓬ ꓔꓲ. ꓖꓶ ꓡꓯ꓿ ꓪꓴ‐ꓢ ꓔꓯ ꓧꓪ, ꓡꓯ꓿ ꓫ. ꓟꓳ ꓪ꓿