ꓒꓲ-ꓕꓱ ꓙꓲ-ꓢꓴ ꓔꓯ ꓣꓷꓠˍ ꓟ (ꓟ-ꓕꓲ 16ꓽ13-23)

ꓪꓴ-ꓢ ꓠꓬ ꓮ ꓟꓬꓹ ꓚꓱꓹ ꓣꓱꓽ ꓢꓲ ꓠꓬꓲ ꓬꓲ ꓚꓲꓸ ꓛꓬ ꓡꓰ ꓣꓳ ꓐꓴ ꓔꓯ ꓟꓳꓸ ꓖꓶ ꓔꓬ ꓡꓳ= ꓬꓲ ꓖꓳ ꓓꓱꓽ ꓟꓸ ꓖꓶˍ ꓟ ꓗꓪ ꓐꓰ ꓥ ꓟꓲ꓾ ꓬꓲ ꓐꓯ ꓘꓶꓽ ꓗꓪ ꓐꓰ ꓥ ꓟꓲ ꓾ ꓠꓬꓲ ꓟꓳꓻ ꓓꓴ ꓗꓪ ꓐꓰ ꓥ ꓟꓲ ꓣꓳ ꓔꓯ ꓟꓳꓸ ꓖꓶ ꓔꓬ ꓟ ꓥ ꓡꓳ= ꓣꓳ ꓠꓬ ꓪꓴ-ꓢ ꓡꓰ ꓣꓳ ꓔꓯ ꓟꓳꓸ ꓖꓶ ꓡˍ ꓟ ꓔꓯ ꓘꓳꓹ ꓣꓴ ꓐ ꓡ ꓟ ꓢꓲꓺ ꓤ ꓒꓬꓱꓼ ꓡ ꓠꓹ ꓟ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓪꓴ-ꓢ ꓡꓰ ꓣꓳ ꓔꓯ ꓘꓴ ꓔꓬ ꓟ ꓥ ꓡꓳ= ꓝꓲ ꓓꓴ ꓒꓲ-ꓕꓱ ꓡꓰ ꓢꓲꓺ ꓒ ꓬꓰ-ꓢꓴ ꓔꓯ ꓢꓲꓺ ꓒ ꓠꓬ ꓟꓲ-ꓢ-ꓬ꓾ ꓪꓴ-ꓢ ꓬꓲ ꓮ ꓐꓲ ꓥ ꓡꓳ꓾ ꓐꓰ ꓐꓯ ꓕꓯ ꓬꓰ-ꓢꓴ ꓡꓰ ꓕꓱ ꓟ ꓠꓽ ꓠꓴ ꓚꓲ ꓛꓬ ꓐꓯ ꓓꓳ ꓡˍ ꓟ ꓟꓽ ꓥ= ꓟꓴ ꓗꓪ ꓗꓪ ꓟ ꓐꓹ ꓐ ꓡꓰ ꓠꓴ ꓔꓯ ꓟꓳꓸ ꓖꓶ ꓡˍ ꓠꓬꓲ ꓐꓯ ꓓꓳ ꓡˍ ꓟ ꓥ ꓡꓳ꓾ ꓐꓰ ꓬꓰ-ꓢꓴ ꓡꓰ ꓒꓳꓹ ꓖꓶˍ ꓡꓳ=

ꓒꓲ-ꓕꓱ ꓠꓬ ꓢꓲꓺ ꓒ ꓬꓰ-ꓢꓴ ꓬꓲ ꓝꓲ ꓓꓴ ꓕꓲ ꓣꓳ ꓥ ꓢꓲ ꓠꓬꓲ꓾ ꓕꓳꓽ ꓶ ꓟꓽ ꓢꓷꓸ ꓟ ꓥꓪꓸ ꓧꓪ ꓢꓴ ꓐꓯ ꓥˍ ꓟꓲ ꓒꓲ-ꓕꓱ ꓗꓪ ꓐꓰ ꓐꓹ ꓐ ꓪꓴ-ꓢ ꓡꓰ ꓟꓳꓸ ꓖꓶˍ ꓟ ꓔꓯ ꓢꓲꓺ ꓒ ꓬꓰ-ꓢꓴ ꓬꓲ ꓚꓲꓸ ꓛꓬ ꓡꓰ ꓘꓳꓹ ꓣꓴ ꓗꓷꓳ= ꓪꓴ-ꓢ ꓠꓬ ꓠꓻ ꓢꓴ ꓕꓲ ꓣꓳˍ ꓡꓰˍ ꓐꓰ꓾ ꓫꓸ ꓢꓴ ꓕꓲ ꓣꓳˍ ꓡꓰ ꓐꓰ꓾ ꓟꓽ ꓥ ꓠꓬ ꓠꓱꓸ ꓐꓯ ꓢꓴ ꓠꓲꓹ ꓙꓳꓺˍ ꓟ ꓞꓳ ꓤ ꓕꓲ ꓣꓳˍ ꓡꓰ ꓐꓰ ꓬꓲ ꓚꓲꓸ ꓛꓬ ꓣꓳ ꓔꓯ ꓟꓳꓸ ꓖꓶ ꓡˍ ꓥꓳ= ꓟꓳꓔꓧꓰꓣ ꓔꓰꓣꓰꓢꓮ ꓡꓰ ꓕꓱ ꓡꓱ ꓐꓯ ꓔ ꓡꓳ= ꓠꓻ ꓢꓴ ꓒꓬꓽ ꓢꓴ ꓐꓰ ꓢꓴ ꓡꓰ ꓡꓳꓺ ꓒꓰꓹ ꓔ ꓢꓴ ꓐꓴ ꓬꓲ ꓪ ꓒꓬꓱꓽ ꓟꓬ ꓗꓪ ꓬꓰ-ꓢꓴ ꓔꓯ ꓟꓳꓻ ꓪˍ ꓟ ꓪꓴꓸ ꓠꓬꓲ ꓬꓲ ꓪ ꓔꓯ ꓣꓱꓽ ꓙ ꓔꓬ ꓟ ꓥ ꓡꓳ꓾ ꓐꓰ ꓐꓯ ꓔ ꓡꓳ= ꓖꓳ ꓡꓱ ꓠꓬꓲ ꓣꓳ ꓐꓴ ꓥˍ ꓟꓲ ꓖꓳ ꓟ ꓕꓲ ꓡꓰꓹ ꓬꓰ ꓡꓯ=