ꓒ-ꓡꓲ-ꓢꓷ ꓐꓴˍ ꓐꓰ ꓧꓳꓺ ꓡꓯꓽ ꓘꓳˍ ꓟ

ꓧꓪꓽ ꓒꓴ ꓫꓵꓽ ꓥꓳꓽ ꓗꓪ prejudice ꓐꓯˍ ꓟ ꓕꓲ ꓟ ꓙꓳˍ ꓡꓳ= Prejudice ꓐꓯ ꓟ ꓠꓬ ꓡ ꓞꓳ ꓕꓲ ꓣꓳ  ꓟꓽ ꓔꓱꓹ ꓟ ꓥꓶˍ ꓟ ꓠꓬ ꓬꓲ ꓠꓲꓹ ꓟ ꓠꓯꓸꓼ ꓗꓪ ꓓꓵꓽ ꓙꓰˍ ꓕꓯ ꓬꓲ ꓮ ꓫꓵꓽ ꓬꓰˍ ꓥ ꓟꓲ ꓙꓲˍ ꓟ ꓟꓽ ꓟꓳꓻ꓾ ꓕꓱ ꓟ ꓔꓯ ꓐꓯ ꓡꓳ= ꓔꓯꓺ ꓥꓳꓽ꓾ ꓠꓴ ꓔꓯ ꓠꓴ ꓕꓲ ꓧꓪꓹ ꓡꓰꓸ ꓟꓽ ꓟꓳꓻ ꓠꓬꓲ ꓟ ꓕꓲ ꓣꓳ ꓬꓲ ꓟꓽ ꓙꓲꓻ ꓟ ꓠꓴ ꓔꓯ ꓐꓯ ꓖꓶ ꓡˍ ꓕꓯ꓾ ꓖꓳ ꓕꓲ ꓣꓳ ꓠꓬ ꓕꓱ ꓡꓱ ꓗꓹ ꓡꓳ꓾ ꓖꓳ ꓡꓱ ꓗꓹ ꓡꓳ ꓐꓰ ꓐꓯ ꓖꓶ ꓡ ꓕꓯ꓾ ꓠꓴ ꓠꓬ ꓬꓲ ꓔꓯ ꓟꓽ ꓟꓳꓻ ꓠꓬꓲ ꓕꓯ ꓡꓰ ꓠꓲꓹ ꓟ ꓠꓯꓸꓼ ꓗꓪ ꓐꓰ ꓬꓲ ꓔꓯ ꓠꓲꓹ ꓜꓳꓺˍ ꓟ꓾ ꓬꓲ ꓔꓯ ꓦꓶˍ ꓟ ꓡꓳꓸ ꓠꓲꓹ ꓟꓽ ꓫꓵ ꓟ ꓠꓲꓹ ꓟ ꓓꓵꓽ ꓡˍ ꓡꓳ= ꓖꓳ ꓡꓱ ꓢꓲ ꓬꓲ ꓔꓯ ꓒꓬꓱꓽ ꓔꓳꓹ ꓟꓬ ꓔꓳꓹ ꓟꓳꓻ ꓡꓯ ꓘꓳꓹ ꓕꓯ ꓥ ꓟꓲ ꓠꓴ ꓠꓬ ꓢꓴ ꓡꓰ ꓐꓯ ꓖꓶ ꓡ ꓟ ꓐꓯ ꓘꓶꓽ ꓠꓴ ꓠꓲꓹ ꓟ ꓠꓯꓸꓼ ꓗꓪ ꓓꓵˍ ꓟ ꓑꓶꓸ ꓓꓴ ꓖꓳ ꓕꓲ ꓣꓳ ꓔꓯ ꓡꓳꓸ ꓠꓲꓹ ꓟꓽ ꓫꓵ ꓟ꓾ ꓦꓶˍ ꓟ ꓠꓲꓹ ꓜꓳꓺˍ ꓟ ꓒꓬꓱꓼ ꓡˍ ꓡꓳ= ꓕꓱ ꓟ ꓔꓯ ꓠꓬ prejudice ꓐꓰ ꓐꓯ ꓟ ꓠꓲꓹ ꓠꓯꓸꓼ ꓗꓪ ꓐꓰ ꓠꓲꓹ ꓜꓳꓺˍ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓕꓱ ꓟ ꓔꓯ ꓣꓳ ꓮ ꓘꓶꓸ ꓙꓽ ꓜꓲꓼ ꓠ ꓔ ꓡꓳ=

ꓣꓳ ꓠꓲꓹ ꓟ ꓠꓯꓸꓼ ꓗꓪ ꓠꓲꓹ ꓟ ꓕꓱ ꓟ ꓓꓵꓽ ꓡ ꓕꓯ ꓡ ꓞꓳ ꓖꓳ ꓕꓲ ꓣꓳ ꓟ ꓮ ꓫꓵꓽ ꓬꓰˍ ꓥ ꓟꓲ ꓙꓲˍ ꓟ ꓬꓰˍ ꓥ ꓟꓲ ꓣꓳ ꓟꓳꓻ ꓟꓽ ꓘꓴ= ꓟꓬꓺ ꓢꓶꓽ ꓗꓪ ꓙꓳꓺ ꓠꓲꓹ ꓖꓳ ꓟ ꓑꓲꓸ ꓓꓹ ꓟ ꓑꓶꓸ ꓓꓴ ꓠꓱꓸ ꓐꓯ ꓢꓴ ꓮ ꓫꓵꓽ ꓬꓰˍ ꓥ ꓟꓲ ꓣꓳ ꓡꓳꓸ ꓟꓳꓻ ꓟꓽ ꓘꓴ= ꓕꓱ ꓟ ꓔꓯ ꓐꓯ ꓡꓳ=

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳꓽ ꓶ ꓥ ꓟ ꓟ-ꓕꓲ 15ꓽ1-2ꓹ 10-14 ꓗꓪ ꓒ-ꓡꓲ-ꓢꓷ ꓐꓴ ꓠꓬ ꓬꓲ ꓪ ꓠꓲꓹ ꓟ ꓠꓯꓸꓼ ꓗꓪ ꓕꓱ ꓡꓱ ꓫꓵꓽ ꓠꓲꓹ ꓟ ꓓꓯꓹˍ ꓡꓳ꓾ ꓐꓯ ꓟ ꓔꓯ ꓟꓳꓻ ꓪ ꓡꓳ= ꓢꓲ ꓒ ꓬꓰ-ꓢꓴ ꓐꓰ ꓬꓲ ꓝꓲ ꓓꓴ ꓐꓴ ꓮ ꓡꓲ ꓬꓰˍ ꓟꓲ ꓡꓳꓸ ꓟꓽ ꓟꓵ= ꓢꓲ ꓒ ꓬꓰ-ꓢꓴ ꓠꓬ ꓮ ꓟꓬ ꓛꓲ ꓙꓲˍ ꓟ ꓬꓰ ꓖꓶˍ ꓥ ꓟꓲ ꓬꓲ ꓪ ꓠꓲꓹ ꓟ ꓠꓯꓸꓼ ꓗꓪ ꓢꓲ ꓒ ꓬꓰ-ꓢꓴ ꓔꓯ ꓙꓲˍ ꓟ ꓟꓽ ꓟꓳꓻ= ꓫꓵꓻ ꓢꓴ ꓔꓯ ꓢꓯꓸ ꓬꓲꓼ ꓡ ꓝꓲ ꓐ ꓡˍ ꓟ꓾ ꓝꓮꓲ ꓠꓻ ꓢꓴ ꓒꓬꓽ ꓢꓴ ꓐꓴ ꓔꓯ ꓫꓬꓹ ꓠꓻ ꓖꓶˍ ꓟ꓾ ꓠꓲꓽ ꓔꓯ ꓖꓼ ꓓꓳ ꓖꓶˍ ꓟ꓾ ꓕꓱ ꓟꓬ ꓫꓵꓽ ꓙꓲˍ ꓟ ꓬꓰ ꓔꓬ ꓥ ꓟꓲ ꓬꓲ ꓪ ꓟꓬꓺ ꓢꓶꓽ ꓗꓪ ꓙꓲꓻˍ ꓡꓳ ꓐꓰ ꓟꓽ ꓟꓳꓻ= ꓙꓲꓻˍ ꓟ ꓟꓽ ꓟꓳꓻ ꓟ ꓡꓰꓽ ꓟꓽ ꓞꓲꓺ ꓢꓲ ꓒ ꓬꓰ-ꓢꓴ ꓠꓬ ꓠꓲꓽ ꓢ-ꓓꓯ ꓢꓯꓼ ꓪ ꓗꓪ ꓐꓰ ꓕꓱ ꓟꓬ ꓫꓵꓽ ꓬꓰ ꓐ ꓡˍ ꓡꓳ꓾ ꓐꓯ ꓢꓲ ꓝꓴꓲꓸ ꓧꓪˍ ꓡꓳ=

ꓖꓳ ꓡꓱ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓥ ꓟꓲ ꓢꓲ ꓒ ꓬꓰ-ꓢꓴ ꓐꓰ ꓬꓲ ꓝꓲ ꓓꓴ ꓐꓴ ꓕꓲ ꓘꓹ ꓡꓰ ꓕꓲ ꓘꓹ ꓙꓰ ꓔꓬ ꓕꓯ ꓙꓻ ꓖꓴ ꓗꓪ ꓢꓲ ꓒ ꓬꓰ-ꓢꓴ ꓬꓲ ꓝꓲ ꓓꓴ ꓐꓴ ꓠꓬ ꓜꓻ ꓧꓼ ꓜꓽˍ ꓡꓳ= ꓕꓱ ꓟ ꓔꓯˍ ꓟꓲ ꓒ-ꓡꓲ-ꓢꓷ ꓐꓴ ꓟꓳꓻ ꓡꓰ ꓢꓲ ꓝꓲ ꓝꓴꓲꓸ ꓓꓰꓺˍ ꓡꓳ= ꓢꓲ ꓒ ꓬꓰ-ꓢꓴ ꓐꓰ ꓬꓲ ꓝꓲ ꓓꓴ ꓐꓴ ꓮ ꓫꓵꓽ ꓬꓰˍ ꓟꓲ ꓒ-ꓡꓲ-ꓢꓷ ꓐꓴ ꓝꓴꓲꓸ ꓟꓳꓻˍ ꓡꓳ꓾ ꓐꓯ ꓟ ꓔꓯ ꓣꓳ ꓡꓳꓸ ꓟꓳꓻ ꓪ ꓓꓹ ꓡꓳ=

ꓣꓳ ꓤꓶꓻ ꓗꓪ ꓓꓵꓽ ꓙ ꓠꓬꓲ ꓓꓴ ꓠꓬ꓾ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓞꓳ ꓤ ꓕꓲ ꓣꓳ꓾ ꓥ ꓠꓬ꓾ ꓞꓳ ꓜꓴꓻ ꓕꓲ ꓜꓴꓻ ꓔꓯ ꓬꓲ ꓪ ꓮ ꓫꓵꓽ ꓬꓰˍ ꓥ ꓟꓲ ꓙꓲꓻˍ ꓟ ꓟꓳꓻ ꓟꓽ ꓐ ꓡ ꓟ ꓙꓳˍ ꓡ? ꓕꓱ ꓡꓱ ꓫꓵꓽ ꓙꓳˍ ꓠꓬ ꓣꓳ ꓠꓲꓹ ꓟ ꓟꓬꓺ ꓢꓶꓽ ꓒꓴ ꓔ ꓠ ꓗꓹ ꓡꓳ= ꓮ ꓡꓲꓳ ꓐꓯ ꓠꓬ ꓞꓳ ꓤ ꓥ ꓕ ꓑꓳꓸꓼ ꓙꓲꓻ ꓓꓰ ꓡꓰˍ ꓟ ꓟꓽ ꓙꓳ= ꓕꓲ ꓢꓰꓸˍ ꓟꓲ ꓟꓽ ꓙꓲꓻ ꓟˍ ꓟꓲ ꓟꓽ ꓙꓳ= ꓙꓲꓻˍ ꓟ ꓐꓰ ꓟꓽ ꓙꓲꓻ ꓟ ꓕꓱ ꓡꓱ ꓓꓹ ꓟ ꓥ ꓡꓳ= ꓡ ꓞꓳ ꓐꓯ ꓗꓷ ꓠꓬ ꓛꓬꓻ ꓡꓰ ꓗꓴꓸˍ ꓡꓳ꓾ ꓥꓳꓽ ꓡꓰ ꓗꓴꓸˍ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓙꓲꓻˍ ꓟ ꓥˍ ꓟꓲ ꓙꓳˍ ꓡꓳ=

ꓖꓳ ꓡꓱ ꓠꓬꓲ ꓙꓲꓻˍ ꓟ ꓔꓯ ꓙꓲꓻˍ ꓪ ꓡꓰ꓾ ꓟꓽ ꓙꓲꓻ ꓟ ꓔꓯ ꓟꓽ ꓙꓲꓻ ꓟ ꓡꓰ ꓟꓳꓻ ꓗꓴꓸ ꓠꓹ ꓟ ꓬꓳꓸ ꓚꓵˍ ꓡꓳ= ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓫꓵꓽ ꓔꓯ ꓥ ꓟꓲ ꓗꓹ ꓘꓶꓽ ꓚꓵꓸ ꓔ ꓢꓲ ꓟꓽ ꓔꓬꓹ ꓔꓬꓹ ꓠꓲꓹ ꓟ ꓟꓬꓺ ꓢꓶꓽ ꓒꓴ ꓔ ꓠꓹ ꓟ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ=