ꓒ-ꓡꓲ-ꓢꓷ ꓐꓴ ꓔꓯ ꓕꓼˍ ꓟ

ꓠꓬꓲꓸ ꓠꓬꓲ ꓗꓪ ꓣꓳ ꓑ ꓙ ꓪˍ ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ-ꓘ 11ꓽ37-41 ꓥ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓒ-ꓡꓲ-ꓢꓷ ꓐꓴ ꓜ ꓘꓴ ꓖꓶ ꓜꓽˍ ꓟ ꓗꓪ ꓙꓰˍ ꓡꓳ= ꓖꓳ ꓗꓪ ꓬꓲ ꓠꓬ ꓡꓯꓽ ꓒꓯꓹ ꓟꓽ ꓞꓲꓽ ꓞꓲꓽ ꓜ ꓜꓽˍ ꓐꓰ ꓬꓰˍ ꓡꓳ= ꓖꓳ ꓟ ꓔꓯ ꓟꓳˍ ꓟ ꓒ-ꓡꓲ-ꓢꓷ ꓖꓳ ꓕꓲ ꓣꓳ ꓠꓬ ꓬꓲ ꓠꓲꓹ ꓟ ꓠꓯꓸꓼ ꓗꓪ ꓐꓰ ꓕꓱ ꓕꓲ ꓣꓳ ꓠꓬ ꓮ ꓡꓲ ꓫꓵꓽ ꓥ ꓡ? ꓜ ꓜꓽˍ ꓕꓯ ꓡꓯꓽ ꓒꓯꓹ ꓟꓽ ꓞꓲꓽ꓾ ꓐꓰ ꓓꓵꓽ ꓙˍ ꓡꓳ= ꓖꓳ ꓡꓱ ꓠꓬꓲ ꓢꓲꓺ ꓒ ꓬꓰ-ꓢꓴ ꓡꓰ ꓕꓱ ꓟ ꓔꓯ ꓡꓳꓸ ꓟꓳˍ ꓡꓳ= ꓒ-ꓡꓲ-ꓢꓷ ꓐꓴꓳ꓾ ꓮ ꓫꓵꓽ ꓑꓶꓸ ꓓꓴ ꓠꓴ ꓪ ꓕꓱ ꓡꓱ ꓓꓵꓽ ꓙꓽˍ ꓡ? ꓠꓴ ꓪ ꓐꓴ ꓠꓬ ꓐꓯ ꓐꓰ ꓡꓴ ꓗꓶꓸ ꓔꓯ ꓢꓲꓽ ꓢꓲꓽ ꓫꓬ ꓫꓬ ꓡꓰꓽ ꓞꓲꓽˍ ꓡꓳ= ꓖꓳ ꓡꓱ ꓥˍ ꓟꓲ ꓠꓴ ꓪ ꓠꓲꓹ ꓟ ꓠꓯꓸꓼ ꓗꓪ ꓠꓬ ꓥꓶˍ ꓟ꓾ ꓦꓯꓸ ꓠꓲꓹ ꓙꓵꓽˍ ꓟ꓾ ꓟꓽ ꓢꓲꓽ ꓟꓽ ꓫꓬ ꓟ ꓡꓰꓽ ꓐꓲ ꓓꓹ ꓡꓳ꓾ ꓐꓰ ꓐꓯ ꓖꓶˍ ꓡꓳ=ꓬꓲ ꓕꓯꓽ ꓢꓲ ꓗꓪ ꓡꓴ ꓗꓶꓸ ꓐꓰ ꓐꓯ ꓔꓯ ꓢꓲꓽ ꓢꓲꓽ ꓫꓬ ꓫꓬ ꓡꓰꓽ ꓬꓰˍ ꓟ ꓡꓰ ꓐꓰ ꓠꓴ ꓪ ꓐꓴ ꓠꓲꓹ ꓟ ꓔꓯ ꓥˍ ꓟꓲ ꓢꓲꓽ ꓢꓲꓽ ꓫꓬ ꓫꓬ ꓡꓰꓽ ꓗꓷ ꓔ ꓠꓯꓹ ꓡꓳ꓾ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓟꓸ ꓖꓶˍ ꓟ ꓥ ꓡꓳ=

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓪꓴ-ꓢ ꓠꓬ ꓠꓲꓹ ꓟ ꓔꓯ ꓡꓳꓸ ꓢꓴ ꓥ ꓡꓳ= ꓞꓳ ꓤ ꓠꓬ ꓕꓯꓽ ꓢ ꓲ ꓔꓯ ꓡꓳꓸ ꓠꓬꓲˍ ꓡꓳ= ꓐꓵ ꓞꓶꓽ ꓟꓶ ꓞꓲ ꓖꓪꓽ ꓔ ꓟ꓾ ꓟꓳ-ꓓꓳ ꓜꓶꓽ ꓔ ꓟ꓾ ꓥ ꓠꓬ ꓞꓳ ꓤ ꓕꓲ ꓣꓳ ꓔꓯ ꓬꓲ ꓔꓯ ꓙꓳˍ ꓟ ꓖꓴꓽ ꓙꓴ꓾ ꓦꓲꓻ ꓮ ꓙꓵꓽ ꓔꓯ ꓞꓳ ꓤ ꓠꓬ ꓡꓳꓸ ꓢꓲ ꓠꓬꓲ ꓐꓯ ꓟꓴ ꓘꓶꓽˍ ꓡꓳ= ꓖꓳ ꓡꓱ ꓥˍ ꓟꓲ ꓢꓲ ꓒ ꓬꓰ-ꓢꓴ ꓠꓬ ꓠꓲꓹ ꓟ ꓔꓯ ꓡꓳꓸ ꓢꓲ ꓡꓰꓽ ꓐꓯ ꓟꓴ ꓘꓶꓽˍ ꓡꓳ= ꓠꓲꓹ ꓟ ꓔꓯ ꓡꓰꓽ ꓡꓳꓸ ꓢꓴ ꓥ ꓡꓳ=

ꓠꓴ ꓔꓯ ꓮ ꓫꓵꓽ ꓙꓳˍ ꓡ? ꓠꓴ ꓔꓯ ꓒꓵꓽ ꓶ ꓮ ꓫꓵꓽ ꓙꓳˍ ꓡ? ꓠꓴ ꓙꓵꓽ ꓗ ꓔꓯ ꓮ ꓡꓰ ꓐꓰ ꓛꓳ ꓔꓬ ꓡ? ꓬꓲ ꓠꓬ ꓕꓱ ꓟ ꓔꓯ ꓟꓽ ꓡꓳꓸ= ꓬꓲ ꓡꓳꓸˍ ꓟ ꓠꓬ ꓠꓴ ꓠꓲꓹ ꓟ ꓠꓬ ꓮ ꓡꓰ ꓟꓬ ꓛꓲ ꓒꓴ ꓛꓹ ꓡ? ꓠꓲꓹ ꓟ ꓢꓲꓽ ꓫꓬꓹ ꓡ꓾ ꓐꓯ ꓟ ꓔꓯ ꓡꓰꓽ ꓡꓳꓸ ꓠꓬꓲˍ ꓡꓳ=

ꓠꓴ ꓪꓽ ꓘꓴ ꓦꓲꓻ ꓗꓪ ꓙꓰˍ ꓕꓯ꓾ ꓥ ꓠꓬ ꓙꓲˍ ꓟ ꓬꓰˍ ꓕꓯ꓾ ꓫꓱꓸ ꓤ ꓓꓴ ꓟꓬꓱꓽ ꓬꓰˍ ꓕꓯ ꓠꓴ ꓠꓲꓹ ꓟ ꓠꓬ ꓮ ꓫꓵꓽ ꓑꓶꓸ ꓓꓴ ꓕꓱ ꓟ ꓔꓯ ꓬꓰˍ ꓡ? ꓐꓯ ꓟ ꓔꓯ ꓬꓲ ꓡꓳꓸˍ ꓡꓳ= ꓥ ꓠꓬ ꓚꓵ ꓚꓵ ꓪꓴ-ꓢ ꓔꓯ ꓠꓲꓹ ꓠꓵˍ ꓟ ꓑꓶꓸ ꓓꓴ ꓬꓰ ꓔꓬ ꓡ? ꓥ ꓠꓬ ꓢꓴ ꓡꓰ ꓠꓴ ꓔꓯ ꓓꓳ ꓟꓴꓹ ꓖꓶ ꓠꓹ ꓟ꓾ ꓢꓴ ꓡꓰ ꓠꓴ ꓔꓯ ꓫꓱꓸ ꓖꓶ ꓠꓹ ꓟ꓾ ꓢꓴ ꓡꓰ ꓠꓴ ꓔꓯ ꓦ ꓡꓱ ꓐꓳ ꓠꓹ ꓟ ꓠꓴ ꓬꓰ ꓔꓬ ꓡ? ꓕꓱ ꓡꓱ ꓬꓰˍ ꓠꓬ ꓠꓴ ꓬꓰˍ ꓟ ꓮ ꓙꓵꓽ꓾ ꓠꓴ ꓓꓵꓽ ꓙꓽˍ ꓟ ꓮ ꓙꓵꓽ ꓠꓬ ꓪꓴ-ꓢ ꓟꓲꓽ ꓙꓬ ꓗꓪ ꓡꓳ ꓒꓰˍ ꓟ ꓟꓶˍ ꓥꓳ=

ꓚꓲ ꓛꓬ ꓠꓲꓹ ꓟ ꓠꓯꓸꓼ ꓗꓪ ꓪꓴ-ꓢ ꓔꓯ ꓠꓲꓹ ꓠꓵˍ ꓟ ꓡꓰ ꓐꓰ꓾ ꓚꓲ ꓛꓬ ꓠꓶꓽ ꓛꓳ ꓕꓲ ꓛꓳ ꓔꓯ ꓠꓲꓹ ꓠꓵˍ ꓟ ꓡꓰ ꓐꓰ ꓬꓰˍ ꓕꓯ꓾ ꓙꓲˍ ꓟ ꓬꓰˍ ꓕꓯ꓾ ꓠꓲꓹ ꓟ ꓠꓯꓸꓼ ꓗꓪ ꓐꓰ ꓢꓲꓽ ꓢꓲꓽ ꓫꓬ ꓫꓬ ꓡꓰꓽ ꓓꓳ ꓡˍ ꓕꓯ ꓪꓴ-ꓢ ꓠꓬ ꓶꓼ ꓤ ꓫꓱꓹ ꓤ ꓖꓶˍ ꓡꓳ ꓐꓰ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓟꓸ ꓖꓶ ꓡ ꓔꓬꓹ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓣꓳ ꓠꓬꓲꓸ ꓠꓬꓲ ꓢꓯꓼ ꓕꓵꓼ ꓙꓰˍ ꓟ ꓗꓪ ꓞꓳ ꓙꓳ ꓙꓰˍ ꓟ ꓗꓪ ꓣꓳ ꓓꓵꓽ ꓙꓽˍ ꓟ ꓮ ꓙꓵꓽ꓾ ꓫꓸ ꓕꓱˍ ꓟ ꓮ ꓙꓵꓽ꓾ ꓬꓰˍ ꓟ ꓮ ꓙꓵꓽ ꓠꓬ ꓚꓵ ꓚꓵ ꓙꓲˍ ꓟ ꓔꓶ ꓙꓱꓼ꓾ ꓙꓲˍ ꓟ ꓠꓲꓹ ꓟ ꓗꓪ ꓐꓰ ꓓꓳ ꓡˍ ꓡ? ꓪꓴ-ꓢ ꓔꓯ ꓠꓲꓹ ꓠꓵˍ ꓟ꓾ ꓠꓶꓽ ꓛꓳ ꓕꓲ ꓛꓳ ꓔꓯ ꓫꓱꓸ ꓤ ꓗꓴꓸˍ ꓟ ꓠꓲꓹ ꓟ ꓗꓪ ꓐꓰ ꓡˍ ꓡ ꓐꓯ ꓟ ꓓꓵꓽ ꓙ ꓠꓬꓲ ꓡꓯ=

ꓕꓱ ꓡꓱ ꓟꓽ ꓬꓰ ꓔꓬꓹ ꓥꓳ ꓐꓯ ꓠꓬ ꓣꓳ ꓠꓲꓹ ꓟ ꓒꓳꓹ ꓬꓲꓼ ꓡ ꓢꓲ ꓙꓲˍ ꓟ꓾ ꓧꓸˍ ꓟ꓾ ꓠꓲꓹ ꓟ ꓐꓲˍ ꓟ꓾ ꓪꓴ-ꓢ ꓠꓲꓹ ꓠꓵˍ ꓟ ꓠꓲꓹ ꓟ ꓙꓳ ꓢꓴ ꓕꓲ ꓣꓳ ꓒꓬꓱꓼ ꓡ ꓠꓹ ꓟ ꓣꓳ ꓢꓯꓼ ꓕꓵꓼ ꓙꓰ ꓡꓯ ꓐꓰ ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓟꓳꓸ ꓖꓶ ꓡ ꓟ ꓥ ꓡꓳ=