ꓒ-ꓡꓲ-ꓢꓷ ꓐꓴ ꓔꓯ ꓕꓼ_ ꓟ

ꓚꓲꓸ ꓛꓬ ꓠꓲꓹ ꓟ ꓠꓬ ꓡꓳ ꓓꓲꓻ ꓗꓪ ꓐꓰ ꓫ ꓔ ꓠꓬ ꓡꓳ ꓓꓲꓻ ꓖꓳ ꓟ ꓗꓪ ꓐꓰ ꓠꓱꓸ ꓐꓯꓼ ꓢꓴ ꓔꓯ ꓣꓳ ꓡꓳ ꓡ ꓥꓳ꓾ ꓐꓰ ꓙꓲ ꓫꓬ ꓢꓴ ꓐꓯ ꓧꓪꓸ ꓘꓶꓽ ꓕꓲ ꓘꓶꓽ ꓙꓳ_ꓡꓳ= ꓣꓳ ꓠꓲꓹ ꓟ ꓠꓬ ꓩꓴ_ ꓕꓯ ꓣꓳ ꓠꓲꓹ ꓟ ꓠꓬ ꓭꓸ ꓛꓲ ꓡꓰ ꓐꓰ ꓓ_ ꓕꓯ ꓩꓴꓸ_ ꓕꓯ ꓕꓱ ꓡꓱ ꓡꓳ ꓓꓲꓻ ꓗꓪ ꓐꓰ ꓫ ꓔ ꓟ ꓠꓲꓹ ꓟ ꓣꓳ ꓠꓲꓹ ꓟ ꓠꓯꓼ ꓗꓪ ꓙꓳ ꓡ ꓠꓬ ꓡꓳ ꓓꓲꓻ ꓕꓱ ꓟ ꓗꓪ ꓐꓰ ꓠꓱꓸ ꓐꓯꓼ ꓢꓴ ꓔꓯ ꓡꓳ ꓠꓹ ꓟ꓾ ꓠꓱꓸ ꓐꓯꓼ ꓢꓴ ꓔꓯ ꓠꓻ ꓡꓰ ꓝꓲ ꓐ ꓡ ꓠꓹ ꓟ ꓐꓱ ꓶ ꓣꓳ ꓠꓬ ꓬꓰ ꓡ ꓥꓳ ꓐꓰ ꓙꓲ ꓫꓬ ꓢꓴ ꓡꓰ ꓕꓱ ꓡꓱ ꓐꓯ ꓔ ꓡꓳ=

ꓥ ꓡꓳ꓾ ꓠꓬꓲꓸ ꓠꓬꓲ ꓢꓲ ꓫꓬ ꓕꓳ ꓶ ꓟ-ꓕꓲ 23ꓽ27-32 ꓗꓪ ꓢꓲ ꓒ ꓬꓰ-ꓢꓴ ꓠꓬ ꓒ-ꓡꓲ-ꓢꓷ ꓐꓴ ꓬꓲ ꓪ ꓠꓲꓹ ꓟ ꓠꓬ ꓡꓱꓼ ꓜꓴ ꓔꓯ ꓫꓱꓸ_ ꓡꓳ ꓐꓰ ꓔꓯ ꓔ ꓡꓳ= ꓡꓱꓼ ꓜꓴ ꓠꓬ ꓬꓲꓸ ꓕꓯ ꓢꓲ ꓗꓪ ꓐꓲ ꓔ ꓥ ꓟꓲ ꓬꓲꓸ ꓘꓴꓽ ꓗꓪ ꓠꓬ ꓛꓵꓽ ꓔ ꓟ ꓪꓳꓽ ꓔꓳ ꓡꓰ ꓐꓰ ꓐꓲ ꓔ ꓟ ꓔꓯ ꓫꓱꓸ_ ꓡꓳ ꓐꓰ ꓐꓯ ꓖꓶ_ ꓡꓳ= ꓕꓲ ꓚꓱꓹ ꓐꓯ ꓠꓬ ꓬꓲꓸ ꓪ ꓠꓲꓹ ꓟ ꓠꓬ ꓬꓲ ꓕꓯ ꓢꓲ ꓗꓪ ꓕꓲ ꓫꓵ ꓬꓲꓸ ꓘꓴꓽ ꓗꓪ ꓕꓲ ꓫꓵ ꓓ_ ꓢꓲ ꓠꓬꓲ ꓕꓱ ꓡꓱ ꓐꓰ ꓢꓴ ꓔꓯ ꓬꓲ ꓪ ꓟꓽ ꓔꓱ ꓟ ꓙꓻ ꓖꓴ ꓟꓳꓸ ꓖꓶ ꓔꓬ ꓟ꓾ ꓟꓬ ꓔꓷ ꓙ ꓖꓴ ꓟꓳꓸ ꓖꓶ ꓔꓬ ꓟ ꓡꓰ ꓐꓰ ꓥꓳ꓾ ꓖꓳ ꓡꓱ ꓠꓬꓲ ꓬꓲ ꓪ ꓠꓲꓹ ꓟ ꓩꓴ_ ꓟ ꓔꓯ ꓣꓳ ꓡꓳꓸ ꓠꓬꓲ ꓕꓯ ꓢꓲ ꓒ ꓬꓰ-ꓢꓴ ꓮ ꓡꓰ ꓫꓵ ꓓꓵ ꓙ ꓓꓴ ꓬꓰ ꓡ ꓥ ꓟꓲ ꓬꓲ ꓪ ꓠꓲꓹ ꓟ ꓠꓬ ꓘꓳꓹ ꓣꓴ ꓟꓽ ꓐ ꓡ꓾ ꓢꓲ ꓒ ꓬꓰ-ꓢꓴ ꓠꓬ ꓫꓵꓻ ꓢꓴ ꓔꓯ ꓢꓯꓸ ꓬꓲꓼ ꓡ ꓝꓲ ꓠꓹ ꓟ ꓐꓱ ꓶ ꓬꓲ ꓕꓵꓼ ꓪ ꓖꓶ ꓗꓷ ꓢꓲ ꓠꓬꓲ ꓢꓯꓸ ꓬꓲꓼ ꓡ ꓐ ꓡ ꓥ ꓟꓲ꓾ ꓬꓲ ꓪ ꓠꓲꓹ ꓟ ꓠꓬ ꓡꓳ ꓓꓲꓻ ꓗꓪ ꓐꓰ ꓫ ꓔ ꓟ ꓑꓶ ꓓꓴ ꓙꓵꓻ ꓟꓽ ꓐ ꓡ꓾ ꓮ ꓡꓰ ꓫꓵ ꓓꓵꓽ ꓙ ꓟꓶ ꓓꓴ ꓫꓱꓸ ꓤ ꓓꓴ ꓟꓬꓱꓽ ꓢꓲ ꓒ ꓬꓰ-ꓢꓴ ꓬꓰ ꓔꓬ ꓥ ꓟꓲ ꓬꓲ ꓪ ꓠꓲꓹ ꓟ ꓠꓬ ꓩꓴ_ ꓟ ꓑꓶ ꓓꓴ ꓘꓳꓹ ꓣꓴ ꓟꓽ ꓐ ꓡ꓾ ꓬꓲ ꓪ ꓘꓳꓹ ꓣꓴ ꓟꓽ ꓐ ꓡ_ ꓟ ꓡꓰ ꓐꓰ ꓠꓱꓸ ꓐꓯꓼ ꓢꓴ ꓔꓯ ꓥ ꓟꓲ ꓕꓱ ꓡꓱ ꓐꓯ ꓟꓳꓸ ꓖꓶ_ ꓡꓳ= ꓟꓽ ꓔꓱ_ ꓟ ꓙ ꓖꓴ꓾ ꓟꓬ ꓔꓷ ꓙ ꓖꓴ ꓟꓳꓸ ꓖꓶ ꓢꓴ ꓥ ꓡꓳ꓾

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓠꓲꓹ ꓟ ꓥ ꓟꓲ ꓮ ꓫꓵ ꓗꓪ ꓐꓰ ꓫ ꓔ ꓡ ꓐꓯ ꓟ ꓠꓬꓲꓸ ꓠꓬꓲ ꓓꓵꓽ ꓙ ꓠꓬꓲ ꓓꓴ ꓬꓰ ꓡꓯ꓾ ꓚꓳ ꓡꓳ ꓚꓳ ꓫꓵ ꓗꓪ ꓠꓲꓹ ꓫ ꓟꓬ ꓫ ꓔꓬ ꓢꓴ ꓔꓯ ꓟꓳ ꓕꓯ ꓣꓳ ꓠꓲꓹ ꓟ ꓠꓻ ꓡ? ꓬꓲ ꓓꓳꓽ ꓬꓲ ꓫꓵ ꓑ ꓙ ꓕꓯ ꓡ ꓞꓳ ꓐꓴ ꓠꓲꓹ ꓫ ꓟꓬ ꓫ ꓟꓳ ꓕꓯ ꓥꓪ ꓠꓬ ꓬꓲ ꓪ ꓡꓰ ꓐꓰ ꓟꓽ ꓗꓹ ꓟ ꓑꓶ ꓓꓴ ꓪꓴ-ꓢ ꓔꓯ ꓫ ꓟꓳ ꓐꓰ ꓪꓽ ꓘꓴ ꓔꓬ ꓡ? ꓕꓱ ꓡꓱ ꓪꓽ ꓘꓴ ꓔꓬ ꓥꓳ ꓐꓯ ꓠꓬ ꓣꓳ ꓠꓬ ꓒ-ꓡꓲ-ꓢꓷ ꓐꓴ ꓡꓰ ꓐꓰ ꓬꓲ ꓪ ꓠꓲꓹ ꓟ ꓟꓯ ꓬꓰꓳ= ꓒ-ꓡꓲ-ꓢꓷ ꓐꓴ ꓠꓲꓹ ꓟ ꓠꓬ ꓠꓱꓸ ꓐꓯꓼ ꓢꓴ ꓫꓸ ꓙꓵ ꓟ ꓡꓰ ꓐꓰ ꓬꓲ ꓪ ꓟꓽ ꓫꓸ ꓙꓵ ꓟ ꓑꓶ ꓓꓴ ꓪꓴ-ꓢ ꓔꓯ ꓫꓸ ꓟꓳ ꓡꓳ ꓐꓰ ꓪꓽ ꓘꓴ ꓢꓴ ꓥ ꓡꓳ= ꓣꓳ ꓠꓬ ꓕꓱ ꓡꓱ ꓐꓰ ꓬꓰ ꓟꓽ ꓓ꓾ ꓣꓳ ꓠꓲꓹ ꓟ ꓠꓬ ꓧꓪꓽ ꓗꓪ ꓐꓰ ꓫ ꓔ ꓟ꓾ ꓪꓴ-ꓢ ꓚꓰꓼ ꓔ ꓟ ꓠꓲꓹ ꓟ ꓥꓳ꓾ꓐꓯ ꓠꓬ ꓮꓽ ꓟ ꓫꓸ ꓙꓵ_ ꓥ ꓟꓲ ꓣꓳ ꓠꓬ ꓫꓱꓸ ꓤ ꓗꓴꓸ_ ꓟ ꓠꓲꓹ ꓟ ꓙꓳ ꓠ ꓡꓳ꓾ꓟꓽ ꓥ ꓐꓯ ꓠꓬ ꓣꓳ ꓠꓲꓹ ꓟ ꓥ ꓟꓲ ꓭ ꓛꓲ ꓗꓪ ꓐꓰ ꓫ ꓔ ꓕꓯ ꓭꓸ ꓛꓲ ꓖꓳ ꓟ ꓗꓪ ꓐꓰ ꓠꓱꓸ ꓐꓯꓼ ꓔꓯ ꓡꓳ ꓠꓹ ꓟ ꓣꓳ ꓠꓬ ꓢꓯꓼ ꓕꓵꓼ ꓥꓳ= ꓣꓳ ꓠꓲꓹ ꓟ ꓔꓯ ꓢꓲ-ꓫꓬ-ꓟ-ꓦ ꓡꓰ ꓠꓵꓽ ꓡꓰ ꓝꓲ ꓢꓲ ꓠꓬꓲ ꓢꓲ-ꓫꓬ-ꓟ-ꓦ ꓐꓲ ꓞꓹ ꓟ ꓠꓲꓹ ꓟ ꓗꓷ ꓡꓰ ꓠꓹ ꓟ ꓐꓱ ꓶ ꓣꓳ ꓢꓯꓼ ꓕꓵꓼ ꓙꓰ ꓡꓯ꓾