ꓕꓲꓽ ꓞꓲꓼ ꓪꓴ-ꓢ ꓔꓯ ꓡꓯꓼ ꓙꓱˍ ꓟ (Homily)

ꓘꓴ ꓜꓲꓼ ꓞꓳ ꓟꓵꓽ ꓘꓳꓼ 23 ꓫꓵꓽ ꓠ

ꓙꓽ ꓗꓴꓸ ꓠꓲꓹ 9ꓽ 13-18

ꓪꓴ-ꓢ ꓬꓲ ꓠꓲꓹ ꓟ ꓗꓪ ꓟ ꓔꓶ ꓙꓱꓼ ꓔꓯ ꓮꓽ ꓟ ꓢꓷꓸ ꓐ ꓡꓹ ꓡ?= ꓬꓲ ꓠꓲꓹ ꓫꓵꓹ ꓟ ꓚꓱꓹ ꓔꓯ ꓮꓽ ꓟ ꓢꓪꓼ ꓐ ꓡꓹ ꓢꓰꓼ?=  ꓟꓲ ꓠꓯ ꓡꓽ ꓞꓳ ꓓꓵꓽ ꓙꓽ ꓔꓬꓹ ꓟ ꓮ ꓕꓯꓹ ꓟ ꓔꓱꓹ ꓟ ꓐꓰ ꓤꓰ ꓞꓹ ꓟ ꓟꓽ ꓙꓳ= ꓓꓵꓽ ꓙꓽ ꓚꓱꓹ ꓗꓪ  ꓮ ꓕꓯꓹ ꓟꓲ ꓐꓲ ꓜꓲꓼ ꓞꓹ ꓟ ꓐꓰ ꓢꓲꓽ ꓫꓬꓹ ꓟ ꓟꓽ ꓔꓬ= ꓮ ꓡꓲꓳ ꓐꓯ ꓠꓬ ꓖꓴ ꓡꓰ ꓓꓹ ꓟ ꓧꓪꓽ ꓗꓳ ꓓꓱꓽ ꓡꓰ ꓦ ꓗꓳ ꓓꓱꓽ ꓕꓯ ꓠꓬꓲꓸ ꓧꓪꓸ ꓡꓰ ꓢꓲ꓾ ꓠꓱꓸ ꓦꓱꓽ ꓧꓶꓽ ꓡꓰ ꓫꓬꓹ ꓔ ꓟ ꓦꓲ ꓡꓰ ꓾ ꓓꓵꓽ ꓙꓽ ꓧꓪꓸ ꓛꓲꓽ ꓓꓴ ꓬꓲ ꓕꓯ ꓢꓲ ꓡꓲꓽˍ ꓟ ꓶꓻ ꓚꓰꓹ ꓘꓷꓳ= ꓟꓲ ꓠꓯ ꓢꓷꓸ ꓠꓲꓹ ꓚꓱꓹ ꓐꓲ ꓜꓲꓼ ꓠꓹ ꓟˍ ꓟꓲ ꓟꓽ ꓢꓻ= ꓢꓷꓸ ꓠꓲꓹ ꓙꓽ ꓜꓲꓼ ꓠꓲꓹ ꓔꓯ ꓧꓪ ꓟꓲꓹ ꓠꓬꓲ ꓠꓹ ꓟˍ ꓟꓲ ꓶꓺ ꓡꓰ ꓓꓽ ꓟ ꓥꓳ= ꓖꓳ ꓡꓱ ꓥˍ ꓟꓲ ꓟꓴ ꓗꓪ ꓗꓪ ꓟ ꓙꓽ ꓗꓴꓸ ꓠꓲꓹ ꓔꓯ ꓮꓽ ꓟ ꓢꓪꓼ ꓐ ꓡ ꓢꓰꓼ= ꓠꓴ ꓢꓲꓺ ꓒꓽ ꓡꓰ ꓙꓽ ꓗꓴꓸ ꓠꓲꓹ ꓟꓸ ꓖꓶꓽ ꓡ꓾ ꓟꓴ ꓡꓳꓹ ꓬꓰ ꓟ ꓗꓪ ꓐꓰ ꓠꓴ ꓢꓲ-ꓫꓬ-ꓟ-ꓦ ꓔꓯ ꓟꓽ ꓝꓲ ꓩꓴ ꓖꓶ ꓡꓹ ꓠꓬ꓾ ꓠꓴ ꓠꓲꓹ ꓡꓶ ꓐꓰ ꓠꓴ ꓙꓽ ꓜꓲꓼ ꓠꓲꓹ ꓔꓯ ꓮꓽ ꓟ ꓢꓷꓸ ꓐ ꓡ ꓢꓰꓼ= ꓖꓳ ꓡꓱ ꓠꓬꓲ ꓟꓲ ꓠꓯ ꓡꓽ ꓞꓳ ꓙ ꓫꓱˍ ꓟ ꓚꓱꓹ ꓗꓪ ꓠꓴ ꓢꓲꓺ ꓒꓽ ꓢꓷꓸ ꓠꓲꓹ ꓙꓽ ꓜꓲꓼ ꓠꓲꓹ ꓡꓰ ꓧꓳꓽ ꓣꓱꓽ ꓟ ꓬꓲ ꓘꓴꓽ ꓗꓪ ꓔꓱꓹ ꓡꓰ ꓝꓲˍ ꓡꓳ= ꓟꓲ ꓠꓯ ꓡꓽ ꓞꓳ ꓔꓯ ꓠꓴ ꓠꓲꓹ ꓫꓵꓹ ꓟ ꓗꓪ ꓤꓽ ꓟꓸ ꓠꓱ ꓑꓱ ꓖꓶ ꓢꓲ ꓥꓪ ꓠꓴ ꓔꓯ ꓚꓬꓴꓹ ꓙ ꓡꓻ ꓳ=

ꓒꓲ-ꓡꓲ-ꓟꓳ 1ꓽ 9-10ꓹ 12-17

ꓙꓲ-ꓢꓴ ꓬꓰ-ꓢꓴ ꓐꓱ ꓶ ꓐꓱꓺ ꓔ ꓟ ꓞꓳ ꓟꓳꓽ ꓒꓳ-ꓡꓳ ꓥꓪ ꓠꓬ ꓕꓵꓼ ꓪ ꓖꓶˍ ꓟ ꓟꓽ ꓥ ꓥ꓾ ꓠꓵꓻ ꓠꓲꓹ ꓗꓪ ꓐꓰ ꓠꓴ ꓔꓯ ꓕꓲ ꓫꓵꓽ ꓓꓰꓽ ꓠꓲ ꓫꓵˍ ꓡꓳ꓿ 10 ꓥꓪ ꓔꓯ ꓞꓳꓹ ꓞꓹ ꓕꓯ ꓙꓵꓻ ꓠꓲꓹ ꓗꓪ ꓦꓵꓻ ꓟꓶˍ ꓟ ꓥꓪ ꓤꓽ ꓳ-ꓠꓲ-ꓫꓲ-ꓟꓴ ꓐꓱ ꓶ ꓠꓴ ꓔꓯ ꓓꓰꓽˍ ꓥꓳ꓿ ꓥꓪ ꓡꓰ ꓬꓲ ꓔꓯ ꓠꓴ ꓔꓬ ꓗꓪ ꓬꓲꓼ ꓡ ꓝꓲˍ ꓕꓯ꓾ ꓥꓪ ꓠꓲꓹ ꓟˍ ꓟꓲ ꓬꓲ ꓔꓯ ꓛꓳ ꓞꓹ ꓟ ꓥ ꓡꓳ꓿ 13 ꓶꓼ ꓓꓳꓽ ꓫꓱꓹ ꓓꓳ ꓑꓶꓸ ꓓꓴ ꓐꓱꓺ ꓞꓹ ꓟ ꓗꓪ꓾ ꓠꓴꓻ ꓬꓲ ꓛꓲꓺ ꓥꓪ ꓔꓯ ꓣꓱꓽ ꓙ ꓠ ꓟ꓾ ꓬꓲ ꓔꓯ ꓥꓪˍ ꓐꓰ ꓕꓲ ꓪꓺꓼ ꓔꓺ ꓔꓬ ꓝꓲ ꓠꓲꓹ ꓫꓵˍ ꓡꓳ ꓫꓵꓽ ꓥ ꓡꓳ꓿ 14 ꓖꓳ ꓡꓱ ꓥ ꓟꓲ ꓠꓴ ꓮ ꓡꓲ ꓓꓵꓽ ꓙˍ ꓟ ꓥꓪ ꓟꓽ ꓢꓷꓸ ꓠꓬꓲ꓾ ꓥꓪ ꓖꓳ ꓡꓱ ꓬꓰ ꓠꓲꓹ ꓟꓽ ꓫꓵ꓿ ꓕꓱ ꓟ ꓠꓬ ꓠꓴ ꓙꓲˍ ꓟ ꓬꓰˍ ꓟ ꓠꓽ ꓟꓽ ꓓ ꓟꓽ ꓞ ꓟꓽ ꓥ ꓥ꓾ ꓠꓴ ꓚꓲ ꓛꓬ ꓬꓰ ꓠꓲꓹ ꓫꓵˍ ꓟ ꓗꓪ ꓐꓰ ꓬꓰˍ ꓟ ꓒꓬꓱꓼ ꓡ ꓝꓲ ꓠꓹ ꓟ ꓥ ꓡꓳ꓿ 15 ꓬꓲ ꓠꓴˍ ꓐꓰ ꓕꓲ ꓑꓹ ꓤ ꓧꓹ ꓡꓯꓽ ꓘꓳ ꓠ ꓗꓷ ꓡꓰ ꓟ ꓠꓬ꓾ ꓝꓮꓲ ꓠꓴˍ ꓐꓰ ꓕꓲꓽ ꓤꓶꓻ ꓡꓱꓸꓼ ꓬꓲꓼ ꓤ ꓠꓬꓲ ꓤˍ ꓡꓰ ꓐꓰ ꓔꓬ ꓟꓶ ꓠꓹ ꓟ ꓥˍ ꓟꓽ ꓢꓷꓸ꓿ 16 ꓕꓱ ꓡꓱ ꓖꓳ ꓑꓳ ꓬꓲꓸ ꓠꓽ ꓠꓴ ꓚꓳ ꓑꓸ ꓟꓽ ꓥ ꓥ꓾ ꓚꓳ ꓑꓸ ꓢꓶꓸ ꓟꓽ ꓞꓲ ꓒꓵꓽˍ ꓟ ꓠꓲꓹ ꓠꓵˍ ꓟ ꓠꓬꓲ ꓤ ꓕꓲ ꓣꓳ ꓬꓰ ꓠꓹ ꓟ ꓥ ꓡꓳ꓿ ꓬꓲ ꓠꓬ ꓥꓪ ꓔꓯꓸ ꓟꓳꓸ ꓚꓵ ꓚꓵ ꓕꓱ ꓡꓱ ꓥꓳ꓿ ꓠꓴ ꓔꓯꓸ ꓟꓳꓸ ꓠꓽ꓾ ꓧꓪꓽ ꓖꓳ ꓓꓱꓽ ꓗꓪˍ ꓟꓲ꓾ ꓢꓲ ꓒꓽ ꓠꓯꓸꓼ ꓗꓪˍ ꓟꓲ꓾ ꓪꓻ ꓜꓲ ꓕꓱ ꓡꓱ ꓥꓳ꓾ ꓟꓽ ꓥ ꓡ? 17 ꓖꓳ ꓡꓱ ꓠꓬꓲ ꓠꓴ ꓥꓪ ꓔꓯ ꓟꓬꓱꓽ ꓬꓰ ꓛꓳꓽ ꓒꓯꓹ ꓚꓬꓹ ꓔ ꓕꓯ ꓠꓽ꓾ ꓥꓪ ꓔꓯ ꓘꓳꓻ ꓣꓴˍ ꓟ ꓡꓰ ꓐꓰ ꓬꓲ ꓔꓯˍ ꓟꓲ ꓘꓳꓻ ꓣꓴ ꓖꓶ꓿ 

ꓡꓴ-ꓘ 14ꓽ 25-33

ꓞꓳ ꓜꓴ ꓓꓽ ꓟ ꓬꓰ-ꓢꓴ ꓔꓯ ꓛꓳ ꓙꓰ ꓔꓬ ꓕꓯ꓾ ꓬꓲ ꓔꓲꓸ ꓒꓳꓹ ꓢꓲ ꓬꓲ ꓪꓽ ꓔꓯ꓾ 26 ꓮꓽ ꓟ ꓥꓪ ꓔꓯ ꓡꓻˍ ꓠꓬ꓾ ꓬꓲ ꓚꓲꓸ ꓛꓬ ꓐꓹ ꓐ ꓟꓹ ꓟˍ ꓐꓰ꓾ ꓤꓽ ꓟꓶ ꓤ ꓠꓱˍ ꓐꓰ꓾ ꓬꓲꓼ ꓤ ꓠꓬꓲ ꓤˍ ꓐꓰ꓾ ꓮꓸ ꓝꓲ ꓠꓬꓲ ꓟˍ ꓐꓰ꓾ ꓬꓲ ꓚꓲꓸ ꓛꓬ ꓔꓯ ꓠꓲꓹ ꓠꓵˍ ꓟ ꓢꓶꓸ ꓟ ꓞꓲ ꓥꓪ ꓔꓯ ꓟꓽ ꓠꓲꓹ ꓠꓵ ꓕꓯ ꓠꓽ꓾ ꓥꓪ ꓛꓳꓽ ꓒꓯꓹ ꓬꓰ ꓟꓽ ꓒꓬꓱꓼ ꓡ꓿ 27 ꓝꓮꓲ ꓮꓽ ꓟ ꓥ ꓟꓲ ꓬꓲ ꓚꓲꓸ ꓛꓬ ꓡꓯꓼ ꓐꓳ ꓔꓶꓸ ꓓꓴ ꓑꓱꓸ ꓢꓲ ꓥꓪ ꓔꓯ ꓟꓽ ꓛꓳ ꓠꓬ꓾ ꓥꓪ ꓛꓳꓽ ꓒꓯꓹ ꓬꓰ ꓟꓽ ꓒꓬꓱꓼ ꓡ꓿ 28 ꓠꓴ ꓪꓽ ꓮ ꓡꓲ ꓕꓲ ꓣꓳ ꓞꓳꓽ ꓦꓲ ꓔꓳꓹ ꓠꓲꓹ ꓫꓵˍ ꓠꓬ꓾ ꓫꓬꓹ ꓓꓳ ꓡꓰ ꓠꓹ ꓟ ꓫꓬꓹ ꓒꓵꓽ ꓙꓳ ꓟꓽ ꓙꓳ ꓐꓰ꓾ ꓧꓶꓸ ꓕꓯ ꓡꓰ ꓠꓬꓲꓸ ꓠꓸ ꓢꓲ ꓟꓽ ꓢꓪꓸ ꓠꓬꓲ ꓡ? 29 ꓟꓽ ꓥ ꓠꓬ ꓦꓲ ꓚꓰ ꓜꓶꓻ ꓗꓷˍ ꓟꓲ ꓫꓬꓹ ꓓꓳ ꓡꓰ ꓟꓽ ꓘꓴ ꓠꓬ꓾ ꓡꓳꓸ ꓟꓳꓻ ꓢꓴ ꓮꓽ ꓙꓵ ꓬꓲ ꓔꓯ ꓤꓲꓺ ꓢꓲ꓾ 30 ꓡꓽ ꓞꓳ ꓕꓱ ꓕꓲ ꓣꓳ ꓠꓬ ꓦꓲ ꓫꓬꓹ ꓪꓴꓸ ꓔꓴ ꓗꓷˍ ꓟꓲ ꓫꓬꓹ ꓓꓳ ꓡꓰ ꓟꓽ ꓘꓴ꓾ ꓐꓰ ꓐꓯ ꓡ ꓥꓳ꓿ 31 ꓝꓮꓲ ꓪ ꓔꓲꓸ ꓕꓲ ꓣꓳ ꓠꓬ ꓬꓲ ꓟꓯꓼ ꓕꓲ ꓟꓶꓽ ꓣꓳ ꓧꓳꓽ ꓔ ꓢꓲ꓾ ꓠꓱꓸ ꓐꓯꓼ ꓪ ꓔꓲꓸ ꓔꓯ ꓢꓰꓼ ꓡꓯꓽ ꓘꓳ ꓠꓹ ꓟ ꓓꓳ ꓙꓰˍ ꓐꓷˍ ꓠꓬ꓾ ꓬꓲ ꓔꓯ ꓔꓳꓹ ꓡ ꓢꓴ ꓟꓯꓼ ꓠꓬꓲꓽ ꓟꓶꓽ ꓣꓳ ꓔꓯ ꓔꓳꓹ ꓜꓳˍ ꓕꓯ꓾ ꓧꓪꓸ ꓘꓴꓻ ꓧꓪꓸ ꓟꓽ ꓘꓴ ꓐꓰ ꓬꓲ ꓧꓶꓸ ꓕꓯˍ ꓡꓰ ꓠꓬꓲꓸ ꓠꓸ ꓢꓲ ꓚꓬꓹ ꓠꓬꓲˍ ꓥꓳ꓾ ꓟꓽ ꓥ ꓡ? 32 ꓧꓪꓸ ꓟꓽ ꓘꓴ ꓠꓸꓼ ꓗꓹ ꓕꓯ ꓠꓽ꓾ ꓬꓲ ꓔꓯ ꓔꓳꓹ ꓡ ꓢꓴ ꓖꓳ ꓕꓲ ꓣꓳ ꓶꓽ ꓤꓻ ꓔꓬ ꓢꓰ ꓕꓯˍ ꓡꓰ꓾ ꓝꓲ ꓓꓴ ꓝꓲ ꓩꓴ ꓗꓷ ꓢꓲ ꓬꓲˍ ꓐꓰ ꓧꓳꓹ ꓡꓯꓽ ꓘꓳ ꓡꓰ ꓠꓹ ꓟ ꓓꓰꓽ ꓬꓰ ꓝꓲˍ ꓥꓳ꓿ 33 ꓖꓳ ꓟ ꓡꓰ ꓐꓰ ꓠꓴ ꓪꓽ ꓮ ꓡꓲ ꓕꓲ ꓣꓳˍ ꓟꓲ꓾ ꓬꓲ ꓙꓳˍ ꓟ ꓮꓽ ꓙꓵ ꓔꓯ ꓟꓽ ꓡꓳ ꓒꓰꓹ ꓕꓯ ꓠꓽ꓾ ꓥꓪ ꓛꓳꓽ ꓒꓯꓹ ꓬꓰ ꓟꓽ ꓒꓬꓱꓼ ꓡ꓿