ꓕꓲ ꓠꓱ ꓠꓬ ꓭꓸ ꓒꓲ ꓓꓰ ꓠꓱꓸ ꓦꓱꓽ ꓮꓽ ꓟꓬꓹ ꓟꓽ ꓙꓳ ꓟ ꓗꓪ ꓞꓰ ꓡꓰ ꓟ (Sunday reflection)

#rvalisu #creditphoto #Plant

Sunday, July 16, 2023

ꓕꓲ ꓠꓱ ꓠꓬ ꓭꓸ ꓒꓲ ꓓꓰ ꓠꓱꓸ ꓦꓱꓽ ꓮꓽ ꓟꓬꓹ ꓟꓽ ꓙꓳ ꓟ ꓗꓪ ꓞꓰ ꓡꓰ ꓟ

ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓠꓬ ꓟ˗ꓕ˗ ꓕꓳ ꓶ 13ꓽ 1˗23 ꓝꓲꓸ ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ˗ꓢꓴ ꓡꓰ ꓜ ꓫꓵꓸ ꓫꓵꓸˍ ꓟ ꓔꓯ ꓥꓳꓽ ꓟꓸ ꓟꓲ ꓥ ꓡꓳ꓿ ꓜ ꓫꓵꓸ ꓫꓵꓸ ꓢꓴ ꓠꓬ ꓬꓲ ꓫꓵꓸ ꓕꓯ ꓕꓲ ꓐꓱ ꓠꓬ ꓙ ꓖꓴ ꓘꓶꓽ ꓗꓪ ꓞꓰ ꓡꓰ ꓢꓲ ꓠꓬꓹ ꓡꓰ ꓖꓳ ꓜꓽ ꓡꓳ꓿ ꓕꓲ ꓐꓱ ꓠꓬ ꓭꓸ ꓒꓲꓽ ꓓꓰ ꓠꓱꓸ ꓦꓱꓽ ꓮꓽ ꓟꓬꓹ ꓟꓽ ꓙꓳ ꓟ ꓗꓪ ꓞꓰ ꓡꓰ ꓢꓲ꓾ ꓠꓱꓸ ꓦꓱꓽ ꓟꓽ ꓠꓯꓸ ꓠꓬꓲ ꓞꓼ ꓐꓰ ꓣꓱꓻ ꓡ ꓡꓳ꓿

ꓟꓲꓽ ꓟꓲ ꓓꓳ ꓡ ꓢ ꓞ ꓡ ꓠꓬ ꓬꓲ ꓚꓰ ꓟꓽ ꓙꓳ ꓠꓬꓲ ꓙꓴ ꓬꓰꓳ꓿ ꓕꓲ ꓐꓱ ꓠꓬ ꓛꓴꓽ ꓐꓬꓼ ꓗꓪ ꓞꓰ ꓡꓰ ꓠꓬꓲ ꓛꓴꓽ ꓪꓴꓽ ꓡ ꓢꓲ ꓦꓱꓹ ꓗꓷꓳ꓿ ꓕꓲ ꓐꓱ ꓠꓬ ꓟꓵꓽ ꓙꓲˍ ꓟ ꓗꓪ ꓞꓰ ꓡꓰ ꓢꓲ ꓬꓲ ꓢꓶꓽ ꓓꓱꓼ ꓡ ꓡꓳ ꓐꓰ ꓢꓲꓽ ꓫꓬ ꓕꓳ ꓶ ꓗꓪ ꓡꓳꓸ ꓟꓳ ꓪ ꓡꓳ꓿

ꓜ ꓫꓵꓸ ꓫꓵꓸˍ ꓟ ꓔꓯ ꓥꓳ ꓠꓬ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓔꓯ ꓮ ꓟꓬꓹ ꓛꓲ ꓣꓳ ꓚꓵꓸ ꓟ ꓔꓯ ꓠꓻ ꓠꓬꓲ ꓔꓬ ꓟ ꓥ ꓡꓳ꓿ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓠꓬ ꓮ ꓡꓰ ꓫꓵꓽ ꓟꓵꓽ ꓗꓪ ꓫꓵꓸ ꓔꓯ ꓟ ꓜ ꓫꓵꓸ ꓡꓰ ꓔ ꓡ ꓐꓰ ꓠꓹ ꓠꓬꓲ ꓓꓴ ꓙꓳ ꓟ ꓥ ꓡꓳ꓿ ꓪꓴ˗ꓢ ꓐꓯ ꓘꓶ ꓠꓹ ꓡꓳ ꓐ ꓙ ꓗꓷ ꓟ ꓥ ꓡꓳ ꓙꓲˍ ꓟ ꓟꓬꓱꓽ ꓮ ꓫꓵꓽ ꓟꓲ ꓬꓰ ꓟ ꓐ ꓡ ꓟ ꓣꓳ ꓤꓶ ꓗꓪ ꓙꓳ ꓟ ꓥ ꓡꓳ꓿ ꓪꓴ˗ꓢ ꓐꓯ ꓘꓶ ꓔꓯ ꓠꓹ ꓡꓳ ꓐ ꓙ ꓗꓷ ꓗꓸ ꓠꓯ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓥ ꓟꓲ ꓪꓴ˗ꓢ ꓐꓯ ꓘꓶꓽ ꓕꓯ ꓠꓹ ꓡꓳ ꓐ ꓙ ꓪ ꓟ ꓕꓯ ꓢꓲ ꓪꓴ˗ꓢ ꓐꓯ ꓘꓶꓽ ꓕꓯ ꓣꓳ ꓵꓻ ꓠꓹ ꓟ ꓣꓳ ꓚꓵꓸ ꓟ ꓥ ꓡꓳ꓿ ꓣꓳ ꓠꓯ ꓗꓪ ꓪꓴ˗ꓢ ꓐꓯ ꓘꓶ ꓬꓲꓸ ꓫꓵꓸ ꓟꓽ ꓙꓳˍ ꓠꓬ ꓪꓴ˗ꓢ ꓔꓯ ꓢꓷꓸ ꓟꓽ ꓐ ꓡ꓿

ꓣꓳ ꓢꓯꓸ ꓔꓬ ꓟ ꓤꓶ ꓗꓪ ꓣꓳ ꓮ ꓡꓰ ꓫꓵꓽ ꓟꓵ ꓮ ꓡꓰ ꓜ ꓫꓵꓸ ꓔꓯ ꓥꓳ ꓗꓪ ꓐ ꓟ ꓔꓯ ꓣꓳ ꓢꓷꓸ ꓠꓹ ꓔ ꓡꓳ꓿ ꓟꓽ ꓥ ꓠꓬ ꓣꓳ ꓤꓶ ꓠꓬ ꓐꓬ ꓡꓰ ꓟꓶ ꓡꓰ ꓗꓴ ꓟ ꓥ ꓡꓳ꓿ ꓢꓲꓺ ꓒ ꓬꓰ˗ꓢꓴ ꓠꓬ ꓟꓽ ꓡꓯ ꓘꓳꓹ ꓟ ꓟꓽ ꓫꓱꓹ ꓡꓯ ꓘꓳꓹ ꓟ ꓠꓲꓹ ꓟ ꓙꓳˍ ꓟ ꓔꓯ ꓥꓳ ꓔꓯ ꓣꓳ ꓔꓯ ꓟꓸ ꓖꓶ ꓔ ꓟ ꓥ ꓡꓳ꓿ ꓖꓳ ꓡꓰ ꓟ ꓞꓲ ꓢꓲꓺ ꓒ ꓬꓰ˗ꓢꓴ ꓠꓬ ꓪꓴ˗ꓢ ꓐꓯ ꓘꓶꓽ ꓔꓯ ꓠꓹ ꓡꓳ ꓐ ꓙ ꓘꓴˍ ꓣꓴ ꓐ ꓡ ꓟ ꓠꓲꓹ ꓟ ꓙꓳˍ ꓠꓯ ꓟ ꓟꓸ ꓖꓶ ꓔ ꓡꓳ꓿

ꓪꓴ˗ꓢ ꓐꓯ ꓘꓶꓽ ꓔꓯ ꓠꓹ ꓡꓳ ꓘꓳꓹ ꓣꓴ ꓠꓹ ꓟ ꓣꓳ ꓚꓵꓸ ꓟ ꓥ ꓡꓳ꓿ ꓟꓴ ꓗꓪ ꓗꓴꓷꓼ ꓠꓬ ꓜ ꓫꓵꓸ ꓫꓵꓸˍ ꓡꓰ ꓐꓰ ꓫꓱꓹ ꓡꓯ ꓘꓳꓹ ꓡꓳ ꓐꓰ ꓢꓲꓺ ꓒ ꓬꓰ˗ꓢꓴ ꓝꓲ ꓓꓴ ꓐꓴ ꓠꓬ ꓟꓽ ꓓꓵꓽ ꓙ ꓔ ꓟ ꓥ ꓡꓳ꓿ꓝꓲ ꓓꓴ ꓐꓴ ꓓꓵꓽ ꓙ ꓟ ꓐꓰ ꓟꓽ ꓫꓱꓹ ꓡꓯ ꓘꓳꓹ ꓓꓴ ꓮ ꓟꓬꓹ ꓙꓳˍ ꓟ ꓥ ꓡꓳ꓿ ꓣꓳ ꓢꓲꓺ ꓒ ꓬꓰ˗ꓢꓴ ꓗꓸ ꓠꓯ ꓢꓲ ꓛꓳ ꓢꓴ ꓐꓴ ꓠꓬ ꓫꓸ ꓓꓴ ꓟꓶ ꓓꓴ ꓮ ꓟꓴꓹ ꓔꓳꓹ ꓜꓳ ꓡ ꓥ ꓟꓲ ꓢꓲꓺ ꓒ ꓐꓯ ꓘꓶꓽ ꓔꓯ ꓣꓳ ꓠꓲꓹ ꓟ ꓠꓯ ꓗꓪ ꓗꓶ ꓔ ꓢꓲ ꓠꓬꓲ ꓙꓲˍ ꓟ ꓟꓵꓽ ꓗꓪ ꓞꓰ ꓡꓰ ꓟ ꓜ ꓫꓵꓸ ꓡꓰ ꓐꓰ ꓬꓲ ꓢꓶꓽ ꓓꓱꓼ ꓡ ꓟ ꓜ ꓫꓵꓸ ꓒꓬꓱꓼ ꓡ ꓠꓹ ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿

ꓕꓲ ꓠꓬꓲ ꓡꓰ ꓕꓲ ꓠꓬꓲ ꓪꓴ˗ꓢ ꓐꓯ ꓘꓶꓽ ꓵˍ ꓓꓴ ꓬꓰ ꓡꓯ꓿ ꓢꓲꓺ ꓒ ꓠꓯ ꓗꓪ ꓛꓳ ꓓꓴ ꓬꓰ ꓡꓯ꓿ ꓢꓲꓺ ꓒ ꓔꓯ ꓙꓵꓻ ꓢꓲ ꓠꓬꓲ ꓬꓲꓸ ꓐꓰ ꓕꓲ ꓛꓳ ꓞꓳ ꓫꓱꓹ ꓠꓬꓲ ꓕꓲ ꓦꓬ ꓩꓴꓸ ꓛꓳ ꓢꓲ ꓩꓴꓸ ꓟꓽ ꓞꓲ ꓪꓴ˗ꓢ ꓡꓯ ꓫꓴ ꓮꓽ ꓟꓬꓹ ꓘꓳꓹ ꓣꓴ ꓪ ꓓꓴ ꓥꓳ꓿ ꓙꓵꓻ ꓠꓲꓹ ꓜ ꓫꓵꓸ ꓖꓶ ꓡ ꓢꓴ ꓪꓴ˗ꓢ ꓔꓯ ꓣꓳ ꓫꓸ ꓟꓳ ꓓꓴ ꓬꓰ ꓡꓯ꓿ ꓫꓸ ꓟꓳ ꓪ꓿