ꓘ-ꓠ-ꓘ ꓤꓽ ꓟꓶ ꓝꓱ ꓑꓮꓲꓽ (Homily)

ꓘꓴ ꓜꓲꓼ ꓞꓳ ꓟꓶꓽ ꓘꓳꓼ 2 ꓫꓵꓽ ꓠꓽ

ꓬꓲ-ꓢ-ꓬ ꓕꓳꓽ ꓶ 62: 1-5

 ꓜꓲ-ꓬꓴ ꓬꓲ ꓙꓲ ꓫꓬ_ ꓟ ꓠꓬ ꓐꓬꓱꓼ ꓡꓱ ꓡꓱ_ ꓟ_ ꓡꓰ ꓐꓰ ꓣꓳ ꓓꓳ ꓡ_ ꓗꓪ ꓛꓲ꓾ ꓙꓱ-ꓣꓴ-ꓢ-ꓡꓱ ꓬꓲ ꓢꓯꓼ ꓟꓬ ꓝ_ ꓟ ꓣꓱ ꓛꓰ ꓠꓬ ꓟꓬ ꓔ_ ꓟ ꓟꓬ ꓡꓴ_ ꓡꓰ ꓐꓰ ꓡꓬꓸ ꓓꓳ ꓡ_ ꓗꓪ ꓛꓲ꓾ ꓥꓪ ꓠꓬ ꓜꓲ-ꓬꓴ ꓐꓱ ꓶ ꓟꓽ ꓪꓳꓹ ꓐꓰ ꓟꓽ ꓔꓬ꓿ ꓙꓱ-ꓣꓴ-ꓢ-ꓡꓱ ꓐꓱ ꓶ_ ꓟꓲ ꓥꓪ ꓪꓴ ꓧꓶ ꓟꓽ ꓠ ꓡꓰ꓿ ꓞꓳ ꓫꓵ ꓞꓳ ꓙꓰ ꓐꓴ ꓠꓬ ꓠꓴ ꓙꓲ ꓫꓬ_ ꓟ ꓔꓯ ꓟꓳ ꓪ_ ꓥꓳ꓿ ꓪ ꓔꓲ ꓐꓴ ꓮ ꓙꓵ_ ꓟꓲ ꓠꓴ ꓟꓬꓱ ꓓꓳꓽ ꓔꓯ ꓟꓳ ꓪ_ ꓥꓳ꓿ ꓖꓳ ꓡꓱ ꓢꓲ ꓬꓰ-ꓧꓳ-ꓧꓪ ꓬꓲ ꓟꓷ ꓠꓷ ꓡꓰ ꓟꓬꓱꓺ ꓫꓵꓼ ꓠꓴ ꓔꓯ ꓟꓬꓱꓺ ꓖꓶ_ ꓥꓳ꓿ ꓠꓴ ꓠꓬ ꓬꓰ-ꓧꓳ-ꓧꓪ ꓡꓯ ꓒꓯ ꓗꓪ ꓡꓳꓸ ꓐꓲ_ ꓟ ꓙꓵꓽ ꓪꓴꓸ ꓛꓴ_ ꓐꓰ꓾ ꓠꓴ ꓪꓴ-ꓢ ꓡꓯ ꓒꓯ ꓗꓪ ꓪ ꓔꓲ ꓪꓴꓸ ꓡꓲ ꓒꓬꓱꓼ ꓡ_ ꓥꓳ꓿ ꓕꓱ ꓡꓱ ꓖꓳ ꓑꓳ ꓠꓴ ꓔꓯ ꓠꓬ ꓡꓳꓺ-ꓔ-ꓟ꓾ ꓐꓰ ꓟꓽ ꓐꓯꓳ꓿ ꓠꓴ ꓟꓵꓽ ꓔꓯ_ ꓟꓲ ꓙꓬ-ꓓꓷꓼ-ꓟ꓾ ꓐꓰ ꓟꓽ ꓘꓴꓳ꓿ ꓠꓴ ꓔꓯ ꓠꓽ ꓦꓰ-ꓩꓴ-ꓫꓲ-ꓐ꓾ ꓐꓰ ꓟꓬꓱꓺ ꓖꓶ_ ꓥꓳ꓿ ꓠꓴ ꓟꓵꓽ ꓔꓯ_ ꓟꓲ ꓐꓱ-ꓡ꓾ ꓐꓰ ꓟꓬꓱꓺ ꓖꓶ_ ꓥꓳ꓿ ꓮ ꓡꓲꓳ ꓐꓯ ꓠꓬ ꓬꓰ-ꓧꓳ-ꓧꓪ ꓠꓬ ꓠꓴ ꓔꓯ ꓠꓲꓹ ꓒꓴ_ ꓡꓳ꓿ ꓠꓴ ꓟꓵꓽ_ ꓟꓲ ꓚꓱ ꓡꓯ ꓘꓳ ꓔ_ ꓟ ꓒꓬꓱ ꓡ_ ꓥꓳ꓿ ꓤ ꓖꓴ ꓡꓯꓸ ꓠꓬ ꓤ ꓟꓶ ꓡꓯꓸ ꓚꓵ ꓟ ꓔꓯ ꓚꓱ_ ꓟ_ ꓡꓰ ꓐꓰ꓾ ꓠꓴ ꓤ ꓐꓴ_ ꓟꓲ ꓖꓳ ꓟ_ ꓡꓰ ꓐꓰ ꓠꓴ ꓔꓯ ꓚꓱ_ ꓥꓳ꓿ ꓟꓯꓸ ꓡꓯ ꓒ ꓡꓰ ꓟꓯꓸ ꓡꓯ ꓟꓺ ꓔꓯ ꓮ ꓡꓲ ꓗꓹ ꓛꓲ_ ꓠꓬ꓾ ꓠꓴ ꓪꓴ-ꓢ_ ꓟꓲ ꓠꓴ ꓔꓯ ꓮ ꓡꓲ ꓗꓹ ꓛꓲ_ ꓥꓳ꓿

1 ꓘꓳ-ꓡꓱ-ꓕꓴ 12ꓽ 4-11

ꓡꓯꓼ ꓫꓴ ꓠꓬ ꓟꓽ ꓫꓱꓸ ꓡꓯꓼ ꓘꓳ ꓟ ꓙꓳˍ ꓟꓲ꓾ ꓢꓲ-ꓫꓬ-ꓟ-ꓦ ꓠꓽ ꓬꓲ ꓕꓲ ꓣꓳˍ ꓡꓰꓽ ꓥꓳ꓿ 5 ꓝꓮꓲ ꓠꓬ ꓣꓱꓽ ꓙˍ ꓟ ꓟꓬꓱꓽ ꓠꓬ ꓟꓽ ꓫꓱꓸ ꓡꓯꓽ ꓘꓳ ꓟ ꓙꓳˍ ꓟꓲ꓾ ꓢꓲ ꓒꓽ ꓠꓽ ꓬꓲ ꓕꓲ ꓣꓳˍ ꓡꓰꓽ ꓥꓳ꓿ 6 ꓬꓰ ꓓꓳ ꓡ ꓟ ꓟꓽ ꓫꓱꓸ ꓡꓯꓽ ꓘꓳ ꓟ ꓙꓳˍ ꓟꓲ꓾ ꓙꓵꓻ ꓢꓴ ꓐꓴ ꓠꓯꓸꓼ ꓗꓪ ꓢꓯꓼ ꓕꓵꓼ ꓢꓴ ꓪꓴ-ꓢ ꓠꓽ ꓬꓲ ꓕꓲ ꓣꓳˍ ꓡꓰꓽ ꓥꓳ꓿ 7 ꓖꓳ ꓡꓱ ꓥ ꓟꓲ ꓮꓽ ꓙꓵ ꓢꓴ ꓙꓲ ꓖꓴ ꓐꓱ ꓶ꓾ ꓮ ꓡꓲ ꓕꓲ ꓣꓳ ꓔꓯˍ ꓟꓲ ꓢꓲ-ꓫꓬ-ꓟ-ꓦ ꓓꓯꓹ ꓟ ꓢꓷꓸ ꓠꓹ ꓟꓳꓸ ꓖꓶ ꓔ ꓡꓳ꓿ 8 ꓮ ꓡꓲꓳ ꓐꓯ ꓠꓬ ꓕꓲ ꓣꓳ ꓔꓯ ꓠꓬ ꓢꓲ-ꓫꓬ-ꓟ-ꓦ ꓗꓪ ꓐꓰ ꓙꓽ ꓜꓲꓼˍ ꓟ ꓐꓯ ꓘꓶ ꓖꓶꓽˍ ꓡꓳ꓿ ꓠꓱꓸ ꓐꓯ ꓕꓲ ꓣꓳ ꓔꓯ ꓠꓬ ꓢꓲ-ꓫꓬ-ꓟ-ꓦ ꓬꓲ ꓕꓱ ꓕꓲ ꓣꓳ ꓡꓰ ꓢꓷꓸ ꓠꓲꓹ ꓐꓯ ꓘꓶ ꓖꓶˍ ꓡꓳ꓿ 9 ꓝꓮꓲ ꓕꓲ ꓣꓳ ꓔꓯ ꓠꓬ ꓢꓲ-ꓫꓬ-ꓟ-ꓦ ꓬꓲ ꓕꓱ ꓕꓲ ꓣꓳ ꓡꓰ ꓙꓵꓻ ꓠꓲꓹ ꓖꓶˍ ꓡꓳ꓿ ꓝꓮꓲ ꓕꓲ ꓣꓳ ꓔꓯ ꓠꓬ ꓢꓲ-ꓫꓬ-ꓟ-ꓦ ꓬꓲ ꓕꓱ ꓕꓲ ꓣꓳ ꓡꓰ ꓠꓻ ꓫꓬꓹ ꓟ ꓡꓯꓼ ꓫꓴ ꓖꓶˍ ꓡꓳ꓿ 10 ꓝꓮꓲ ꓕꓲ ꓣꓳ ꓔꓯ ꓠꓬ ꓪꓽ ꓠꓬꓲˍ ꓟ ꓟꓬꓱꓽ ꓬꓰˍ ꓟ ꓡꓯꓼ ꓫꓴ ꓖꓶˍ ꓡꓳ꓿ ꓝꓮꓲ ꓕꓲ ꓣꓳ ꓔꓯ ꓠꓬ ꓟꓷꓽ ꓠꓷꓹ ꓝꓸˍ ꓟ ꓡꓯꓼ ꓫꓴ ꓖꓶˍ ꓡꓳ꓿ ꓝꓮꓲ ꓕꓲ ꓣꓳ ꓔꓯ ꓠꓬ ꓦ ꓔꓯ ꓦꓰꓽ ꓗꓴꓸˍ ꓟ ꓡꓯꓼ ꓫꓴ ꓖꓶˍ ꓡꓳ꓿ ꓝꓮꓲ ꓕꓲ ꓣꓳ ꓔꓯ ꓠꓬ ꓥꓳꓽ ꓫꓵ ꓥꓳꓽ ꓙꓰ ꓫꓸ ꓕꓱˍ ꓟ ꓡꓯꓼ ꓫꓴ ꓖꓶˍ ꓡꓳ꓿ ꓝꓮꓲ ꓕꓲ ꓣꓳ ꓔꓯ ꓠꓬ ꓬꓲꓸ ꓥꓳꓽ ꓡꓶꓸˍ ꓟ ꓡꓯꓼ ꓫꓴ ꓖꓶˍ ꓡꓳ꓿ 11 ꓖꓳ ꓡꓱ ꓥ ꓟꓲ ꓕꓱ ꓟꓬ ꓟ ꓮꓽ ꓙꓵ ꓠꓬ ꓢꓲ-ꓫꓬ-ꓟ-ꓦ ꓬꓲ ꓕꓲ ꓣꓳˍ ꓗꓪ ꓐꓰ ꓬꓰ ꓓꓳ ꓡ ꓟ ꓥ ꓢꓲ꓾ ꓮꓽ ꓟ ꓔꓯ ꓮ ꓡꓲ ꓐꓱ ꓖꓶ ꓠꓲꓹ ꓫꓵˍ ꓠꓬ ꓖꓳ ꓡꓱ ꓐꓱꓻ ꓖꓶ ꓔ ꓟ ꓥ ꓡꓳ꓿ 

ꓬꓳ-ꓦ 2ꓽ 1-11

ꓢ ꓠꓬꓲ ꓕꓲ ꓠꓬꓲ ꓗꓪ꓾ ꓖ-ꓡꓲ-ꓡꓲ ꓟꓵꓽ ꓘꓹ-ꓠ ꓘꓹ ꓗꓪ꓾ ꓤ ꓟꓶꓻ ꓝꓱꓺ ꓑꓮꓲ ꓕꓲ ꓟ ꓙꓳˍ ꓡꓳ꓿ ꓬꓰ-ꓢꓴ ꓬꓲ ꓟꓹ ꓟˍ ꓟꓲ ꓖꓳ ꓗꓪ ꓔꓬ ꓡꓳ꓿ 2 ꓤ ꓟꓶꓻ ꓝꓱꓺ ꓑꓮꓲ ꓗꓪ ꓬꓰ-ꓢꓴˍ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓔꓯˍ ꓟꓲ ꓘꓴ ꓔ ꓡꓳ꓿ 3 ꓖꓳ ꓡꓱ ꓢꓲ ꓛꓱꓼ ꓡꓱꓼ ꓙꓵꓻ ꓓꓳ ꓖꓴ ꓡꓰ ꓕꓯ꓾ ꓬꓰ-ꓢꓴ ꓬꓲ ꓟꓹ ꓟ ꓡꓰ ꓬꓲ ꓔꓯ꓾ ꓬꓲ ꓪꓽ ꓛꓱꓼ ꓡꓱ ꓙꓵꓻ ꓟꓽ ꓙꓳ ꓡꓰꓳ꓾ ꓐꓯ ꓖꓶˍ ꓡꓳ꓿ 4 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ꓾ ꓤ ꓟꓶ ꓤꓽꓳ꓾ ꓖꓳ ꓟ ꓠꓴˍ ꓐꓰ ꓮꓸ ꓫꓵ ꓗꓴꓸ ꓙꓲ ꓙꓳˍ ꓡ? ꓥꓪ ꓙꓵꓹ ꓟꓽ ꓛꓲ ꓡ ꓢꓰ꓾ ꓐꓯˍ ꓡꓳ꓿ 5 ꓬꓲ ꓟꓹ ꓟ ꓡꓰ ꓣꓱꓽ ꓢꓴ ꓟꓴ ꓢꓴ ꓐꓴ ꓔꓯ꓾ ꓬꓲ ꓡꓰ ꓠꓴ ꓪꓽ ꓔꓯ ꓮ ꓡꓲ ꓐꓯ ꓖꓶ ꓡ ꓠꓬ ꓖꓳ ꓡꓱ ꓬꓰ꓾ ꓐꓯ ꓖꓶˍ ꓡꓳ꓿ 6 ꓬꓴ-ꓔ ꓡ ꓞꓳ ꓞꓲꓽ ꓟ ꓡꓯꓹ ꓟ ꓗꓺ ꓫꓵ ꓛꓳˍ ꓕꓯ ꓣꓱꓽˍ ꓟ ꓬꓲꓻ ꓪꓴ ꓖꓳ ꓕꓲ ꓫꓵꓽ ꓛꓳꓼ ꓟ ꓖꓳ ꓗꓪ ꓗꓶ ꓔꓸ ꓡꓳ꓿ ꓬꓲꓻ ꓪꓴ ꓕꓲ ꓟ ꓗꓪ ꓠꓬ ꓠꓬꓲꓽ ꓢ ꓡꓳꓻ ꓗꓶ ꓓꓲˍ ꓡꓳ꓿ 7 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓬꓲꓻ ꓪꓴ ꓖꓳ ꓟ ꓗꓪ ꓬꓲꓻ ꓙꓬ ꓧꓳꓽ ꓐꓲ ꓡꓰ ꓝꓲ꓾ ꓐꓯˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓪꓽ ꓡꓰ ꓬꓲꓻ ꓙꓬ ꓧꓳꓽ ꓐꓲ ꓡꓰ ꓝꓲˍ ꓡꓳ꓿ 8 ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓮ ꓟꓶ ꓠꓬ ꓱꓹ ꓢꓲ ꓑꓮꓲꓽ ꓙꓵꓽ ꓒ ꓔꓯ ꓔꓯꓹ ꓖꓶ ꓬꓰ꓾ ꓐꓯˍ ꓕꓯ꓾ ꓬꓲ ꓪꓽ ꓖꓳ ꓡꓱ ꓬꓰˍ ꓡꓳ꓿ 9 ꓛꓱꓼ ꓡꓱ ꓙꓵꓻ ꓒꓬꓱꓼ ꓡ ꓗꓷ ꓟ ꓬꓲꓻ ꓙꓬ ꓖꓳ ꓟ ꓔꓯ ꓑꓮꓲꓽ ꓙꓵꓽ ꓒ ꓡꓰ ꓢꓳꓽ ꓠꓬꓲˍ ꓟꓲ꓾ ꓮ ꓡꓲ ꓗꓪ ꓐꓰ ꓧꓪ ꓔꓸ ꓟ ꓬꓲ ꓟꓽ ꓢꓷ꓿ (ꓖꓳ ꓡꓱ ꓥ ꓟꓲ ꓬꓲꓻ ꓙꓬ ꓱꓹ ꓢꓴ꓾ ꓣꓱꓽ ꓙ ꓢꓴ ꓐꓴ ꓠꓽ ꓢꓷˍ ꓡꓳ꓿) ꓖꓳ ꓕꓯ ꓑꓮꓲ ꓙꓵꓽ ꓒ ꓠꓬ ꓟꓯꓸ ꓡꓯꓸ ꓒ ꓔꓯ ꓘꓴꓻ ꓔꓯꓹ ꓡ ꓢꓲ꓾ 10 ꓮꓽ ꓟ ꓥ ꓟꓲ ꓙꓲꓻˍ ꓟ ꓛꓱꓼ ꓡꓱꓼ ꓙꓵꓻ ꓧꓶꓸ ꓕꓯ ꓑꓶ ꓖꓶ ꓓꓳˍ ꓡꓳ꓿ ꓙꓲˍ ꓟ ꓛꓱꓼ ꓡꓱ ꓙꓵꓻ ꓓꓳ ꓐꓳ ꓡꓰ ꓕꓯ ꓢꓲꓸˍ ꓡꓰꓽ ꓖꓳꓻ ꓘꓶꓸ ꓟꓽ ꓙꓲ ꓟ ꓑꓶ ꓖꓶ ꓓꓳˍ ꓡꓳ꓿ ꓠꓴ ꓠꓽ ꓙꓲˍ ꓟ ꓛꓱꓼ ꓡꓱ ꓙꓵꓻ ꓔꓯ ꓮ ꓟꓶ ꓗꓪ ꓛꓲ ꓗꓶ ꓔ ꓐꓷ꓾ ꓐꓯˍ ꓡꓳ꓿ 11 ꓬꓰ-ꓢꓴ ꓡꓰ ꓢꓷꓸ ꓡꓰ ꓓꓴ ꓬꓰ ꓪꓴꓸ ꓔꓴˍ ꓟ ꓕꓱ ꓟ ꓠꓬ꓾ ꓖ-ꓡꓲ-ꓡꓲ ꓟꓵ ꓘꓹ-ꓠ ꓘꓹ ꓗꓪ ꓥ ꓢꓲ꓾ ꓬꓲ ꓟꓬꓱ ꓓꓳꓽ ꓟꓳꓸ ꓖꓶˍ ꓟ ꓗꓪ ꓐꓰ꓾ ꓬꓲ ꓛꓳꓽ ꓒꓯꓹ ꓐꓴ ꓬꓲ ꓔꓯ ꓙꓵꓻˍ ꓡꓳ꓿