ꓙꓲꓹ ꓟ ꓮꓸ ꓣꓳ ꓡꓳꓸ ꓢꓴ (ꓧꓳꓟꓲꓡꓬ)

ꓘꓴ ꓜꓲꓼ ꓞꓳ ꓟꓶꓽ ꓘꓳꓼ 16 ꓫꓵꓽ ꓠ

ꓬꓰ-ꓡꓲ-ꓟꓲ ꓕꓳꓽ ꓶ 23: 1-6

ꓥꓪ ꓫꓵꓸ ꓟꓲ ꓗꓪ ꓟ ꓮ ꓣꓳ ꓔꓯ ꓐꓬ ꓡꓰ ꓝꓲ_ ꓟ_ ꓐꓰ ꓧꓹ ꓒꓬꓱ ꓙꓰ ꓝꓲ ꓢꓴ ꓮ ꓣꓳ ꓡꓳꓸ ꓒ ꓐꓴ ꓠꓽ ꓫ ꓙꓵ_ ꓥꓳ꓾ ꓐꓰ ꓬꓰ-ꓧꓳ-ꓧꓪ ꓡꓰ ꓐꓯ_ ꓡꓳ꓿ ꓖꓳ ꓡꓱ ꓠꓬꓲ ꓬꓲ-ꓢꓷ-ꓡꓰ ꓐꓴ ꓠꓴ ꓪ ꓬꓰ-ꓧꓳ-ꓧꓪ ꓪꓴ-ꓢ ꓡꓰ ꓥꓪ ꓑ ꓫꓬ ꓔꓯ ꓖꓶꓽ ꓜ ꓢꓴ ꓮ ꓣꓳ ꓡꓳꓸ ꓒ ꓐꓴ ꓔꓯ ꓖꓴ ꓢꓲ ꓕꓱ ꓡꓱ ꓐꓯ_ ꓡꓳ꓾ ꓠꓴ ꓪ ꓠꓬ ꓥꓪ ꓮ ꓣꓳ ꓜꓴ ꓔꓯ ꓟꓽ ꓚꓳ ꓡꓳꓸ ꓠꓬꓲ ꓢꓲ꓾ ꓮ ꓣꓳ ꓜꓴ ꓔꓯ ꓖꓼ ꓦ ꓗꓷ ꓢꓲ꓾ ꓧꓹ ꓒꓬꓱ ꓙꓰ ꓝꓲ_ ꓠꓬꓲ꓾ ꓠꓬꓲ ꓠꓹ꓾ ꓠꓴ ꓪ ꓬꓰ_ ꓟ ꓥꓶ_ ꓟ ꓔꓯ ꓛꓳ ꓢꓲ꓾ ꓥꓪ ꓡꓰ ꓠꓴ ꓪ ꓔꓯ ꓛꓬꓻ ꓒꓵ ꓖꓶ_ ꓥꓳ꓾ ꓐꓰ ꓬꓰ-ꓧꓳ-ꓧꓪ ꓡꓰ ꓐꓯ_ ꓡꓳ꓿ ꓖꓳ ꓡꓱ ꓢꓲ ꓥꓪ ꓡꓰ ꓬꓲ ꓪ ꓔꓯ ꓖꓼ ꓦ ꓔ_ ꓟ ꓟꓵꓽ ꓥ ꓕ ꓑꓳ ꓗꓪ ꓐꓰ꓾ ꓜꓰꓻ ꓞ_ ꓟ ꓥꓪ ꓮ ꓣꓳ ꓜꓴꓻ ꓔꓯ ꓧꓪ ꓜꓲꓼ ꓡ ꓢꓲ꓾ ꓬꓲ ꓪ ꓐꓱ ꓗꓪ ꓧꓳ ꓬꓲꓼ ꓡ_ ꓥꓳ꓿ ꓖꓳ ꓗꓪ ꓬꓲ ꓪ ꓠꓬ ꓤ ꓦꓵ ꓠꓱ ꓦꓵ ꓢꓲ ꓟꓬꓽ ꓡ_ ꓥꓳ꓿ ꓥꓪ ꓬꓲ ꓪ ꓔꓯ ꓠꓬꓲ ꓙ ꓢꓴ ꓮ ꓣꓳ ꓡꓳꓸ ꓒ ꓗꓶ ꓔꓸ ꓖꓶ_ ꓥꓳ꓿ ꓖꓳ ꓕꓯ ꓬꓲ ꓪ ꓟꓽ ꓙꓳꓺ ꓡꓰꓳ꓾ ꓙ_ ꓟꓲ ꓟꓽ ꓙꓽ ꓫꓸꓳ꓿ ꓕꓲ ꓟ_ ꓟꓲ ꓟꓽ ꓠꓲꓸ ꓡꓰ꓾ ꓐꓰ ꓬꓰ-ꓧꓳ-ꓧꓪ ꓡꓰ ꓐꓯ_ ꓡꓳ꓿ ꓬꓰ-ꓧꓳ-ꓧꓪ ꓡꓰ ꓕꓱ ꓡꓱ ꓐꓯ_ ꓡꓳ꓾ ꓠꓬꓲ ꓠꓹ꓾ ꓥꓪ ꓠꓬ ꓓ-ꓪꓵ ꓐꓱ ꓶ ꓙꓲ ꓫꓬ_ ꓟ ꓡꓯꓼ-ꓑꓵꓺ ꓕꓲ ꓗ ꓣꓱ ꓡ ꓝꓲ_ ꓟ ꓦꓬꓼ ꓠꓬꓲ ꓛꓲ ꓡ_ ꓥꓳ꓿ ꓬꓲ ꓠꓬ ꓙꓽ ꓗꓴ ꓠꓲꓹ ꓙꓳꓻ ꓙꓳ_ ꓡꓰ ꓪ ꓔꓲ ꓣꓱ ꓢꓲ ꓙꓵꓽ_ ꓥꓳ꓿ ꓬꓲ ꓠꓬ ꓟꓵꓽ ꓗꓪ ꓔꓱꓹ ꓜꓳ_ ꓟ_ ꓐꓰ ꓙꓲ ꓫꓬ_ ꓟ ꓬꓰ ꓓꓳ ꓡ_ ꓥꓳ꓿ ꓬꓲ ꓦꓬꓼ ꓠꓬꓲ ꓗꓪ ꓬꓴ-ꓔ ꓠꓬ ꓢꓯꓼ ꓟꓬ ꓚꓬꓴ ꓟꓶ_ ꓥꓳ꓾ ꓬꓲ-ꓢꓷ-ꓡꓰ_ ꓟꓲ ꓮ ꓫꓵ ꓟꓽ ꓘꓳ ꓟꓽ ꓟꓳ ꓐꓰ ꓔꓬ ꓟꓶ_ ꓥꓳ꓿ ꓖꓳ ꓡꓱ ꓢꓲ ꓬꓲ ꓟꓬꓱꓺ ꓠꓬ꓾ ꓬꓰ-ꓧꓳ-ꓧꓪ-ꓥꓪ-ꓠꓴ-ꓙꓲ-ꓫꓬ-ꓟ꓾ ꓐꓰ ꓘꓴ_ ꓟ ꓕꓱ ꓟ ꓥ ꓡꓳ꓿

ꓬꓲ-ꓩꓴ-ꓢꓳ 2ꓽ 13-18

ꓖꓳ ꓡꓱ ꓥ ꓟꓲ ꓧꓶꓸ ꓕꓯ ꓶꓽ ꓤ ꓗꓳꓹ ꓞ ꓢꓴ ꓠꓴ ꓪꓽ ꓔꓯ ꓠꓬ꓾ ꓮ ꓟꓶ ꓠꓽ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓬꓲ ꓫꓵꓽ ꓗꓪ ꓐꓰ ꓕꓲꓺ ꓡꓯꓽ ꓘꓳ ꓡꓰ ꓝꓲꓳ꓿ 14 ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓣꓳꓽ ꓧꓳꓹ ꓡꓯꓽ ꓘꓳ ꓓꓴ ꓢꓲ ꓡꓲ ꓟ ꓥ ꓠꓬꓲ꓾ ꓣꓳꓽ ꓠꓬꓲꓽ ꓫꓵꓽ ꓟ ꓔꓯ ꓕꓲ ꓫꓵꓽˍ ꓡꓰ ꓒꓬꓱꓼ ꓡ ꓝꓲ ꓢꓲ ꓠꓬꓲ꓾ ꓣꓳꓽ ꓠꓬꓲꓽ ꓗꓴꓸ ꓚꓸꓼ ꓗꓪ ꓕꓴꓽ ꓔ ꓟ ꓚꓬꓹ ꓔꓯ ꓒꓬꓹ ꓩꓴ ꓗꓷꓳ꓿ 15 ꓝꓮꓲ ꓣꓳꓽ ꓛꓴꓽ ꓙꓳ ꓡꓯꓽ ꓘꓳˍ ꓟ ꓔꓯ ꓠꓬ ꓬꓲ ꓖꓳ ꓓꓱꓽ ꓗꓪ ꓐꓰ ꓟꓽ ꓙꓳ ꓗꓷ ꓡꓰ ꓝꓲ ꓢꓲ꓾ ꓕꓵꓼ ꓪꓽˍ ꓐꓰ ꓙꓵꓽ ꓚꓱꓹ ꓙꓳˍ ꓟ ꓙꓵꓽ ꓗ ꓔꓯˍ ꓟꓲ ꓒꓬꓹ ꓩꓴ ꓗꓷꓳ꓿ ꓕꓱ ꓟ ꓠꓬ ꓙꓲ-ꓢꓴ ꓡꓰ ꓞꓳ ꓫꓵꓽ ꓕꓱ ꓠꓬꓲꓽ ꓫꓵꓽ ꓗꓪ ꓐꓰ ꓬꓲ ꓚꓲ ꓛꓬ ꓠꓯꓸꓼ ꓗꓪ ꓞꓳ ꓤ ꓬꓲ ꓫꓵꓼ ꓕꓲ ꓫꓵꓽ ꓚꓰꓼ ꓓꓳ ꓡ ꓢꓲ ꓧꓳꓹ ꓡꓯꓽ ꓘꓳ ꓡꓰ ꓝꓲ ꓠꓹ ꓟ ꓥ ꓡꓳ꓿ 16 ꓝꓮꓲ ꓠꓬ ꓡꓯꓼ ꓐꓳ ꓔꓶꓸ ꓓꓴ ꓡꓰ ꓛꓴꓽ ꓙꓳ ꓡꓯꓽ ꓘꓳˍ ꓟ ꓔꓯ ꓟꓶꓽ ꓬꓰ ꓝꓲ ꓢꓲ꓾ ꓠꓬꓲꓽ ꓫꓵ ꓡꓱꓸꓼ ꓔꓯ ꓕꓲ ꓖꓳ ꓓꓱˍ ꓗꓪ꓾ ꓪꓴ-ꓢˍ ꓐꓰ ꓧꓳꓹ ꓡꓰ ꓝꓲ ꓠꓹ ꓟˍ ꓟꓲ ꓥ ꓡꓳ꓿ 17 ꓖꓳ ꓡꓱ ꓠꓬꓲ ꓙꓲ-ꓢꓴ ꓡ ꓢꓲ꓾ ꓶꓽ ꓤ ꓗꓪ ꓔꓬ ꓟ ꓐꓶꓽ ꓞꓳ ꓐꓴ ꓠꓴ ꓪꓽ ꓔꓯˍ ꓟꓲ꓾ ꓒ ꓕꓲꓺꓼ ꓗꓪ ꓔꓬ ꓟ ꓬꓴ-ꓔ ꓡꓽ ꓞꓳ ꓐꓴ ꓔꓯˍ ꓟꓲ꓾ ꓧꓳꓹ ꓡꓰ ꓓꓴ ꓢꓲ ꓡꓲ ꓟ ꓓꓳꓽ ꓚ ꓟꓸ ꓖꓶ ꓡꓺꓳ꓿ 18 ꓮ ꓡꓲꓳ ꓐꓯ ꓠꓬ ꓣꓳꓽ ꓠꓬꓲ ꓫꓵꓽ ꓡꓱꓸꓼ ꓠꓬ ꓬꓲ ꓠꓯꓸꓼ ꓗꓪ ꓢꓲ-ꓫꓬ-ꓟ-ꓦ ꓬꓲ ꓕꓲ ꓣꓳˍ ꓗꓪ ꓐꓰ ꓐꓹ ꓐ ꓟꓲꓽ ꓙꓬ ꓗꓪ ꓓꓵꓽ ꓡꓰ ꓓꓻˍ ꓟ ꓙꓵꓽ ꓪꓽ ꓙꓳ ꓡꓰꓳ꓿

ꓟ-ꓘꓳ 6ꓽ 30- 34

ꓝꓲ ꓓꓴ ꓐꓴ ꓠꓬ ꓬꓰ-ꓢꓴ ꓔꓬ ꓗꓪ ꓜꓲꓼ ꓡ ꓢꓲ꓾ ꓬꓲ ꓪꓽ ꓬꓰ ꓗꓷ ꓟ ꓐꓰ ꓟꓸ ꓟꓲꓽ ꓟꓸ ꓖꓶ ꓗꓷ ꓟ ꓮꓽ ꓙꓵ ꓬꓲ ꓔꓯ ꓐꓯ ꓖꓶˍ ꓡꓳ꓿ 31 ꓖꓳ ꓕꓯ ꓜꓻ ꓜꓽ ꓙꓵꓹ ꓟꓽ ꓙꓳ ꓠ ꓛꓲ ꓙꓰ ꓙꓰ ꓡ ꓡ ꓬꓰ ꓢꓴ ꓟꓬꓽˍ ꓠꓬꓲ꓾ ꓬꓰ-ꓢꓴ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓣꓳ ꓠꓬ ꓢꓲ ꓡꓲ ꓟ ꓕꓲ ꓖ ꓗꓪ ꓕꓲ ꓑꓹ ꓪꓴꓽ ꓧꓶ ꓠꓽ ꓬꓰ ꓡꓯ꓾ ꓐꓯˍ ꓡꓳ꓿ 32 ꓖꓳ ꓡꓱ ꓠꓬ ꓬꓲ ꓪꓽ ꓡꓲ ꓜꓶꓽ ꓢꓲ꓾ ꓢꓲ ꓡꓲ ꓟ ꓕꓲꓽ ꓖ ꓗꓪ ꓙꓰˍ ꓡꓳ꓿ 33 ꓖꓳ ꓡꓱ ꓥ ꓟꓲ ꓬꓲ ꓪꓽ ꓖꓳ ꓗꓪ ꓐꓰ ꓓꓳ ꓙꓰˍ ꓟ ꓔꓯ ꓟꓳꓻ ꓢꓲ ꓬꓲ ꓪꓽ ꓔꓯ ꓢꓷꓸ ꓢꓴ ꓐꓴ ꓠꓬ꓾ ꓡꓳ ꓒꓱ ꓮꓽ ꓙꓵ ꓗꓪ ꓐꓰ ꓔꓷꓹ ꓙꓰ ꓢꓲ ꓠꓬꓲ ꓬꓲ ꓪꓽ ꓧꓶꓸ ꓕꓯ ꓖꓳ ꓗꓪ ꓛꓲ ꓬꓰˍ ꓡꓳ꓿ 34 ꓬꓰ-ꓢꓴ ꓠꓽ ꓡꓲ ꓗꓪ ꓐꓰ ꓓꓳ ꓡ ꓕꓯ ꓞꓳ ꓜꓴ ꓞꓳ ꓟꓯꓼ ꓔꓯ ꓟꓳꓻ ꓗꓷ ꓠꓬ꓾ ꓬꓲ ꓪꓽ ꓠꓽ ꓡꓳꓸ ꓢꓴ ꓟꓽ ꓙꓳ ꓟ ꓮ ꓣꓳˍ ꓡꓰ ꓐꓰ ꓗꓹ ꓠꓬꓲ꓾ ꓬꓲ ꓠꓬ ꓬꓲ ꓪꓽ ꓔꓯ ꓫꓱꓸ ꓤ ꓢꓲ꓾ ꓟꓸ ꓟꓲꓽ ꓮꓽ ꓟꓬꓹ ꓫꓵꓽ ꓟꓸ ꓖꓶ ꓪꓴꓸ ꓔꓴˍ ꓡꓳ꓿